Alako wendana la losanganya la Lɔsɛnɔ ndo olimu aso w’Okristo — BIBLIƆTƐKƐ WA LO ƐTƐRNƐTƐ wa Watchtower

1. Losanganya la Lɔsɛnɔ ndo olimu aso w’Okristo layosalemaka oko wɛnyamidiɔ lo Dikatshi dia losanganya la Lɔsɛnɔ ndo olimu aso w’Okristo ndo lo ndjela alako wayela anɛ: Apandjudi tshɛ pombaka keketshama dia mfundja nkombo vɔamɛ dia vɔ nkondja asawo w’ambeki. Anto akina wɔtɔ mbala la mbala lo nsanganya ya l’etshumanelo mbeyaka nongola asawo naka vɔ mbetawɔka wetshelo wa lo Bible ndo mbɔtɔnganyiyaka nsɛnɔ yawɔ l’atɔndɔ w’Akristo.—⁠⁠be lk. 282.

ƐTƐKƐTA WA MBƆTWƐLƆ

2. Minitɛ 1. Lomingu tshɛ, l’ɔkɔngɔ w’osambo ndo wa dɔmbɛlɔ dia mbɔtwɛlɔ, ɔnɔmbɔdi wa losanganya la Lɔsɛnɔ ndo olimu aso ayolomialomia nsaki k’ampokami lo ekongelo kayela. Ɔnɔmbɔdi pombaka ndeka mbidja yimba lo awui w’ohomba wayoleka ase etshumanelo tshɛ nkondja wahɔ.

AKAMBO W’OHOMBA W’OMA L’ƆTƐKƐTA WA NZAMBI

3. Sawo: Minitɛ dikumi. Ɔtɛ a dui ndo ekongelo ka minitɛ hiende kana shato kekɔ lo Dikatshi dia losanganya la Lɔsɛnɔ ndo olimu aso. Sawo nɛ diayoshamaka oma le ekumanyi kana okambi wakimanyiya ɔmɔtshi wele l’akoka. Naka dibuku di’oyoyo mbele l’ekongelo ka wadielo wa Bible wa lomingu la lomingu, kete vidɛo yayɛnyama dia mbɔtshiya dibuku diakɔ. Ɔtɛkɛtshi koka mɛnya diɔtɔnganelo dia lam’asa vidɛo la ɔtɛ a dui. Koko, nde la dia ndjashikikɛ dia nshidiya akambo wa lo dikatshi dia losanganya. Ndo nto, naka wonya wekekɔ, nde pombaka nkamba l’esato ndo l’awui w’oma l’avɛsa, nɛ dia vɔ wekɔ l’oyango wa nkotsha awui akina lo awui wɔmbwama.

4. Diangɔ di’oshinga wolo dia lo nyuma: Minitɛ dikumi. Ɔnɛ ekɔ etenyi ka ambola la ekadimwelo kele bu l’ɛtɛkɛta wa mbɔtwɛlɔ kana wa ndjihelo. Tɔ kayoshamaka oma le ekumanyi kana okambi wakimanyiya wele l’akoka. Ɔtɛkɛtshi mbeyaka nkahanya minitɛ yakawawosha lo awui asato lo ndjela ohomba awɔ le etshumanelo. Koko nde la dia mboka ampokami ambola akɔ tshɛ. Ndo nto, nde mbeyaka nshikikɛ dia kana avɛsa tshɛ woshilami lo ambola ahende wa ntondo pombaka mbadiema kana bu. Wanɛ wayoshaka kɔmatɛrɛ pombaka ndjishaka l’edja ka sekɔndɛ 30 kana l’ɛse.

5. Wadielo wa Bible: Minitɛ nyɛi kana l’ɛse. Sawo di’ombeki nɛ diayoshamaka oma le ɔnangɛso. Ombeki pombaka tsho mbadia awui wakawawosha aha la monga la ɛtɛkɛta wa mbɔtwɛlɔ kana wa ndjihelo. Ɔnɔmbɔdi wa losanganya ayoleka ndjakiyanya dia nkimanyiya ambeki dia nsala wadielo w’oshika, wokɛma hwe, w’ɔsɛlɔ, watɔtɔmiya ɛtɛkɛta w’ohomba, wele la wengwelo wa dui, wele la diomuyelo diakoka ndo dia onto mbadia la dui diokongaka la nde. Lam’ele ɛkɛndɛ wendana la wadielo wa Bible mongaka tomondo efula ndo ekina mongaka etale efula, ɔnɔmbɔdi wa losanganya la Lɔsɛnɔ ndo olimu aso pombaka mbidja yimba lo akoka wele l’ambeki etena kawashande ɛkɛndɛ ɛsɔ.

YASHA L’OLIMU W’ESAMBISHELO

6. Minitɛ dikumi la tshanu kana l’ɛse. Etenyi ka losanganya kɛnɛ kekɔ l’oyango wa mbisha anto tshɛ diaaso dia vɔ ndjalɔngɔsɔla dikambo di’olimu w’esambishelo ndo dia vɔ ndowanya akoka awɔ wa nsambisha ndo wa mbetsha. Kaanga mbahomba apandjudi mɔmbɔla dui diɔtɛkɛtami lo bɛnyɛlɔ diʼasawo, vɔ koka mbɔtɔnganyiya asawo awɔ la nkɛtɛ keta lʼɛtshi kawɔ ka nkɛtɛ. Apandjudi kokaka mbɔsa yɛdikɔ ya nkamba l’okanda kana la vidɛo yaso mɔtshi y’oma lo Dihomɔ dia mbetsha. Dia tokimanyiya l’esambishelo, bɛnyɛlɔ di’asawo dia lo Dikatshi dia losanganya la Lɔsɛnɔ ndo olimu aso mbeyaka monga la etenyi kata ɔnɛ: “Yanga divɛsa nɛ lo dihomɔ diaso dia mbetsha.” Ambeki kokaka nsɔna dia nkamba kana aha nkamba la etenyi k’oyoyo kɛsɔ lo ɛkɛndɛ awɔ. Dikatshi dia losanganya la Lɔsɛnɔ ndo olimu aso shikikɛka yɛdikɔ ya wonya ya sawo tshɛ di’ombeki ndo, lo tena dimɔtshi, diɔ koka monga l’alako amɔtshi wa laadiko. Ambeki hawohombe nkotsha awui akina paka l’ɔtɛ w’ɔnɛ kele akoke la yɛdikɔ ya wonya yakawawosha. Wɛnyɛlɔ ɛmɔtshi wakalɔngɔswama dimɛna kokaka mbɔsa minitɛ ɔtɔi kana nshila la ntondo ka wonya wahomba wɛnyɛlɔ akɔ nshila. Naka ekɔ ohomba, kaanga dikumanyi kokaka nongola asawo w’ambeki.

7. Tovidɛo ta bɛnyɛlɔ di’asawo: Tovidɛo ta bɛnyɛlɔ di’asawo tayɛnyamaka ndo tayɔkɛtshanyemaka kaamɛ l’ampokami lo ngɔndɔ tshɛ. Tɔ tayɛnyaka woho wa nsala wendelo wa ntondo ndo wendelo w’oyoyo. Etenyi kɛnɛ kayɔlɔmbwama oma le ɔnɔmbɔdi wa Losanganya la Lɔsɛnɔ ndo olimu aso.

8. Wendelo wa ntondo: Sawo nɛ di’ombeki koka mbishama oma le ɔnangɛso kana kadiyɛso. Naka ɔnangɛso mboshawɔ, kete okimanyedi ande onge pami kana ose nkumbo kande, ko naka kadiyɛso, kete okimanyedi ande onge womoto kana ose nkumbo kande. Ombeki la okimanyedi ande mbeyaka mbidjasɛ kana memala. Ombeki pombaka nsɔna dia mbisha ompokami ande mɔyɔ washanawɔ l’ɛtshi kawɔ ka nkɛtɛ. Sawo diande pombaka mpikama lo dui diɔtɛkɛtami lo ɛnyɛlɔ ka sawo ka lo Dikatshi dia losanya la Lɔsɛnɔ ndo olimu aso.

9. Wendelo w’oyoyo: Sawo nɛ di’ombeki koka mbishama oma le ɔnangɛso kana kadiyɛso. Naka ɔnangɛso mboshawɔ, kete okimanyedi ande onge pami, ko naka kadiyɛso, kete okimanyedi ande onge womoto. (km 5/97 lk. 2) Ombeki nde la okimanyedi ande mbeyaka mbidjasɛ kana memala. Ombeki pombaka mɛnya kɛnɛ kahombaso mbuta etena kembolaso onto ɔmɔtshi lakɛnya nsaki lo wendelo wa ntondo. Sawo diande pombaka mpikama lo dui diɔtɛkɛtami lo ɛnyɛlɔ ka sawo ka lo Dikatshi dia losanganya la Lɔsɛnɔ ndo olimu aso.

10. Wekelo wa Bible: Sawo nɛ di’ombeki koka mbishama oma le ɔnangɛso kana kadiyɛso. Naka ɔnangɛso mboshawɔ, kete okimanyedi ande onge pami, ko naka kadiyɛso, kete okimanyedi ande onge womoto. (km 5/97 lk. 2) Ombeki nde la okimanyedi ande kokaka mbidjasɛ kana memala. Sawo diande diayɛnya lo minitɛ ngana tsho woho wasalema wekelo wa Bible watahame. Ombeki bu l’ohomba wa nsala mbɔtwɛlɔ kana ndjihelo, onyake paka kana wakɔlɔmbi dia nsala dikambo sɔ. Bu ohomba mbadia edingɔ tshɛ wakawawosha, kaanga mbele dui sɔ kokaka salema. Naka sawo diayɛ diayonga la vidɛo, kete ntɛkɛta diʼawui wa lɔkɔ aha la ndjiɛnya. Kɛnɛ kɔɔlɔmbawɔ ele dia nde ndeka nkamba la toho ta wetshelo toleki amɛna.

11. Sawo: Sawo nɛ di’ombeki pombaka mbishama oma le ɔnangɛso layodisha oko sawo diashawɔ la ntondo k’etshumanelo.

LƆSƐNƆ L’OKRISTO

12. Oma l’ɔkɔngɔ w’osambo, etenyi kayela ka minitɛ 15 kɛnɛ kayonga la etenyi ɔtɔi kana tenyi pende diele l’oyango wa nkimanyiya ampokami dia vɔ nkamba l’Ɔtɛkɛta wa Nzambi. Naka diewoyelo keema, kete tenyi diakɔ koka mbishama oma le dikumanyi kana ekambi wakimanyiya wele l’akoka, koko etenyi kendana l’ehomba wa l’etshumanelo kayohombaka mbishama oma le ekumanyi kɛmɔtshi.

13. Wekelo wa Bible wa l’etshumanelo: Minitɛ akumi asato kana l’ɛse. Etenyi kɛnɛ kayɔlɔmbɔmaka oma le ekumanyi kɛmɔtshi kele l’akoka. (Lɛnɛ ele dikumanyi bu efula, vɔ koka nkamba l’ekambi wakimanyiya wele l’akoka, naka ekɔ ohomba.) Olui wa dikumanyi pombaka nshikikɛ wanɛ wakotsha kɛnɛ kalɔmbama dia nɔmbɔla Wekelo wa Bible wa l’etshumanelo. Anangɛso wayɔsɔnama pombaka monga l’akoka wa nɔmbɔla wekelo ɔsɔ dimɛna, nshidiya wekelo akɔ la wonya, ntɔtɔmiya avɛsa woleki ohomba ndo nkimanyiya onto tshɛ dia nshihodia ohomba w’awui wakɛtshanyema. Vɔ wayotana atɔndɔ w’ohomba lo mvusola alako wakatondjama lo kɛnɛ kendana la woho wa nɔmbɔla Wekelo wa Tshoto y’Etangelo. Keema ohomba wa nkotsha awui akina paka l’ɔtɛ w’ɔnɛ kele akoke la yɛdikɔ ya wonya yakawawosha. Naka kokaka, nyayɔsɔnaka ɔnɔmbɔdi ndo ombadi wotshikitanyi lomingu tshɛ. Naka ɔnɔmbɔdi wa Losanganya la Lɔsɛnɔ ndo olimu aso ambɔlɔmba dia nkitshakitsha wonya wa Wekelo wa Bible wa l’etshumanelo, kete ɔnɔmbɔdi wa wekelo ayenda kɛnɛ kakokande nsala dia nsusa wenya ande. Nde mbeyaka nsɔna dia mboka ambola wa l’edingɔ ɛmɔtshi aha la mbadia edingɔ akɔ.

ƐTƐKƐTA WA NDJIHELO

14. Minitɛ 3 kana l’ɛse. Ɔnɔmbɔdi wa losanganya la Lɔsɛnɔ ndo olimu aso ayovusola lo yoho ya laande akambo w’ohomba wekami lo losanganya. Nde pombaka mbuta awui amɔtshi wayɔtɛkɛtama lomingu layaye, lo mbuta ondo dimbola dimɔtshi diayokadimɔma lomingu layaye. Nde kokaka mbewoya nkombo y’ambeki wayosha asawo lomingu layela naka etena kekekɔ. Diewoyelo tshɛ di’ohomba ndo mukanda tshɛ w’ohomba pombaka mbadiema oma le ɔnɔmbɔdi lo ɛtɛkɛta ande wa ndjihelo, naka hawowɛnyisha dia nsala woho okina. Awui akina wele oko, nsanganya y’otsha l’esambishelo kana dikongelo dia wɔmbɛlɔ la osolelo wa mbalasa hawohombe mbewoyama oma lo lɔyɛnga, koko vɔ pombaka panema lo dibaya dia waewoyelo. Naka nde bu l’akoka wa mbisha waewoyelo tshɛ kana mbadia mikanda tshɛ lo minitɛ yande shato ya ndjihelo, kete ɔnɔmbɔdi ayɔlɔmba wanɛ wele l’asawo lo etenyi kendana la Lɔsɛnɔ l’Okristo dia nsusa asawo awɔ lo yɛdikɔ yahombama. (Enda odingɔ 13 ndo 17.) Losanganya layokomɛka l’osambo ndo la dɔmbɛlɔ.

YASHA LO WADIELO NDO LO WETSHELO

15. Ombeki tshɛ pombaka ndja la biukubuku Wetshelo, oyadi ya l’akatshi kana ya lo telefɔnɛ, tablɛtɛ, kana ɔrdinatɛrɛ lo losanganya la Lɔsɛnɔ ndo olimu aso. Ɔnɔmbɔdi wa pombaka nkamba la biukubuku Wetshelo dia mandola ndo ndaka ambeki. Ombeki tshɛ pombaka nkamba la dako diatanema lo ekombi dioyelanyi l’ɔkɛndɛ wa lo Dikatshi dia losanganya la Lɔsɛnɔ ndo olimu aso. Ombeki mbahomba nkamba la etenyi ka lo biukubuku nyɛ kofundjiwɔ ɔnɛ: “Funda ehamelo ayɛ,” koko aha ɔnɔmbɔdi.

DAKO

16. L’ɔkɔngɔ wa sawo tshɛ di’ombeki, ɔnɔmbɔdi wa losanganya la Lɔsɛnɔ ndo olimu aso ayongaka la minitɛ oko ɔtɔi dia mandola ndo mbisha ombeki dako diotombi oma lo biukubuku Wetshelo. Etena kewoya ɔnɔmbɔdi sawo diayanga mbisha ombeki, nde hatota dako diakawɔlɔmbɛ. Koko, lam’ashidiya ombeki mbisha sawo ndo l’ɔkɔngɔ w’ɔnɔmbɔdi mbaandola lo yoho yakoka, ɔnɔmbɔdi koka mbewoya dako diakawɔlɔmbɛ ndo mbuta lande na kɛnande di’ombeki akakambi la dako sɔ dimɛna kana l’ɔkɔmi tshɛ nde kokaka nembetshiya lande na kele ombeki pombaka nyomoleka mbidja yimba lo dako diakawɔlɔmbɛ sɔ. Ɔnɔmbɔdi mbeyaka nto mbuta awui akina wakandɛnyi lo wɛnyɛlɔ wɛnande dia wayonga la wahɔ le ombeki kana le ampokami. Alako akina wakeketsha wɔsami oma lo biukubuku Wetshelo kana oma lo dibuku Kalasa k’olimu koka ndjoshama lo shɔpɔ, l’ɔkɔngɔ wa losanganya kana lo wonya okina, oyadi lo dionga di’ɔtɛkɛtshi diakawɔɔlɔmbɛ kana lo dionga di’ɔtɛkɛtshi dikina.—⁠⁠Dia mbeya awui akina wendana la ɔkɛndɛ w’omendji wa losanganya la Lɔsɛnɔ ndo olimu aso ndo w’ondaki okina, enda odingɔ 17, 22 ndo 24.

YƐDIKƆ YA WONYA

17. Ndooko sawo diahomba ndɛ wenya, ndo ɔnɔmbɔdi wa losanganya la Lɔsɛnɔ ndo olimu aso atolekanyake yɛdikɔ ya wonya yakawawosha. Naka wonya wakawasɛkɛ ombeki lo sawo diande wambokoka, kete pombaka memadja ombeki la ɔkɔmi tshɛ. Naka wenya wakalɛmi lo tenyi dikina dia losanganya, kete ondaki okina pombaka ndjowasha alako lo shɔpɔ. (Enda odingɔ 24.) Losanganya l’otondo la dia nshila l’ɔkɔngɔ wa wonya a tango ɔtɔi la minitɛ 45 mbidja ndo esambo l’alɔmbɛlɔ.

WEMBWELO W’OMENDJI W’OTSHIMBEDI

18. Naka omendji w’otshimbedi ekɔ lo membola etshumanelo, kete ekongelo pombaka salema lo yoho yɛnyami lo Dikatshi dia losanganya la Lɔsɛnɔ ndo olimu aso onyake akambo wayela anɛ mbahatosalema: Wekelo wa Bible wa l’etshumanelo wele l’etenyi ka Lɔsɛnɔ l’Okristo wayɔhɛnyama la sawo di’olimu diayosha omendji w’otshimbedi l’edja ka minitɛ 30. La ntondo ka sawo di’olimu, ɔnɔmbɔdi wa losanganya la Lɔsɛnɔ ndo olimu aso ayota lo tshena pe, kɛnɛ kamboteka lo losanganya, kɛnɛ kayekama lomingu layela, nde ayosha diewoyelo tshɛ diele ohomba ndo ayadia mukanda tshɛ wele ohomba, oma laasɔ nde ayɔtshiya omendji w’otshimbedi. L’ɔkɔngɔ wa sawo di’olimu, omendji w’otshimbedi ayokomiya losanganya la osambo wayondɔsɔna. Nde mbeyaka mbelɛ ɔnangɛso okina dia ndjokomiya la dɔmbɛlɔ. Lomingu lɔsɔ, ndooko kalasa nkina yayosalema laadiko wa kɛnɛ kasalema lo mbalasa ka woke. Naka nyekɔ la olui ɔmɔtshi wasala nsanganya l’ɔtɛkɛta okina, kete olui akɔ kokaka nsala nsanganya yawɔ hita, koko vɔ pombaka ndjosangana la etshumanelo lo sawo di’olimu diaki omendji w’otshimbedi.

LOMINGU LASALEMA LOSANGANYA L’OTSHIMBEDI KANA LA RƐJƆ

19. Lo lomingu lɔsɔ, ndooko nsanganya ya l’etshumanelo yahomba salema. Awui wele l’ekongelo ka nsanganya ya lo lomingu lakɔ wayekama lo wekelo w’onto ndaamɛ kana wa lo nkumbo.

LOMINGU LASALEMA EOHWELO

20. Naka Eohwelo kayosalema lo lushi lɔmɔtshi la l’atei wa lomingu, kete ndooko losanganya la Lɔsɛnɔ ndo olimu aso layosalema. Lo mɛtɛ, nsanganya y’otsha l’esambishelo pombaka salema lushi la Eohwelo.

OMENDJI WA LOSANGANYA LA LƆSƐNƆ NDO OLIMU ASO

21. Ekumanyi kakasɔnama oma le olui wa dikumanyi mbayokambaka oko omendji wa losanganya la Lɔsɛnɔ ndo olimu aso. Nde mbele l’ɔkɛndɛ wa ndjashikikɛka ɔnɛ losanganya lɔsɔ lekɔ lo kongɛma dimɛna ndo lekɔ lo salema lo ndjela alako wele lanɛ. Nde la dia sawolaka l’ondaki okina dimɛna. Kam’alongolanyu Dikatshi dia losanganya la Lɔsɛnɔ ndo olimu aso dia lo ngɔndɔ, omendji wa losanganya la Lɔsɛnɔ ndo olimu aso ayosala ekongelo k’asawo w’ambeki wa ngɔndɔ kakɔ. (Enda odingɔ 5-11.) Sawo tshɛ di’ombeki pombaka kahanyema naka yema tshitshɛ kete mingu shato la ntondo ka nkoma lo datɛ diahombande ndjosha sawo diande lo nkamba la fɔrmilɛrɛ ka Sawo dia lo losanganya la Lɔsɛnɔ ndo olimu aso w’Okristo (S-89).

ƆNƆMBƆDI WA LOSANGANYA LA LƆSƐNƆ NDO OLIMU ASO

22. Lomingu tshɛ, ekumanyi kɛmɔ ayokambaka oko ɔnɔmbɔdi wa losanganya la Lɔsɛnɔ ndo olimu aso. (Lɛnɛ ele dikumanyi bu efula, nyu koka nkamba l’ekambi wakimanyiya wele l’akoka, naka ekɔ ohomba.) Nde mbele l’ɔkɛndɛ wa nɔngɔsɔla ɛtɛkɛta wa mbɔtwɛlɔ ndo wa ndjihelo ndo w’ɔkɛtshanyelo wa tovidɛo ta bɛnyɛlɔ di’asawo, mbidja ndo tovidɛo tɔtshiya dako di’oyoyo di’oma lo biukubuku Wetshelo. Nde mbɔɔtshiya nto asawo w’ambeki tshɛ, ndo lo ndjela lofulo la dikumanyi diele la nyu, nde koka mbisha ndo asawo akina wa lo losanganya, djekoleko asawo walɔmba dia mɛnya tsho vidɛo aha la nkɛtshanya awui wa lo vidɛo yakɔ. Kɔmatɛrɛ ya lam’asa sawo la sawo yashande yonge ya lo tshena pe. Olui wa dikumanyi mbayɔsɔna dikumanyi diakoka mɛmba ɔkɛndɛ ɔsɔ. Dikumanyi diele l’akoka mbayokambaka oko ɛnɔmbɔdi mbala la mbala. Lo ndjela awui wa l’etshumanelo, omendji wa losanganya la Lɔsɛnɔ ndo olimu aso ayokokaka nkamba mbala la mbala oko ɔnɔmbɔdi oleki dikumanyi dikina diele l’akoka. Naka ekumanyi kɛmɔ ekɔ l’akoka wa nɔmbɔla Wekelo wa Bible wa l’etshumanelo, kete nde koka monga l’akoka wa nkamba oko ɔnɔmbɔdi wa losanganya. Koko, tambonyɔsɛngasɛnga dia nyu mbohɔka ɔnɛ dikumanyi diakamba oko ɛnɔmbɔdi nɔmbamaka dia mandolaka ambeki la ngandji tshɛ ndo lo yoho ya dimɛna ndo mbashaka alako wa la ngandji ndo wayowakimanyiya. Ɔnɔmbɔdi ekɔ nto l’ɔkɛndɛ wa ndjashikikɛ dia nsanganya yayoshila la wonya. (Enda 6 odingɔ 14 ndo 17.) Naka ɔnɔmbɔdi kombolaka ndo naka dihole diekɔ lo lɔyɛnga, kete vɔ pombaka mbokitshɛ mikro dia nde mbɔtshiyaka etenyi tshɛ etena kayalɔngɔsɔla ɔnangɛso layosha sawo lo lɔyɛnga. Woho akɔ waamɛ mbele, ɔnɔmbɔdi koka mɛna ɔlɔlɔ mbidjasɛ lo kɔsa lo lɔyɛnga etena kasalema sawo diendana la wadielo wa Bible ndo l’etenyi ka Yasha l’olimu w’esambishelo. Dui sɔ diayokimanyiya diaha wenya ndɛma.

ƆNƆMBƆDI W’OLUI WA DIKUMANYI

23. Ɔnɔmbɔdi w’olui wa dikumanyi kana ekumanyi kɛmɔtshi kookimanyiya mbasha ɛkɛndɛ tshɛ wa lo losanganya, onyake asawo w’ambeki. Lomingu tshɛ, nde ayɔsɔnaka ekumanyi kayokamba oko ɔnɔmbɔdi wa losanganya l’atei wa dikumanyi diakasɔnama oma le olui wa dikumanyi. Lo nkamba kaamɛ la omendji wa losanganya la Lɔsɛnɔ ndo olimu aso, nde pombaka ndjashikikɛ dia kɔpi kɛmɔtshi k’ekongelo k’asawo wa losanganya l’otondo akahanema lo dibaya dia waewoyelo.

ONDAKI OKINA

24. Naka kokaka, kete ayoleka dimɛna nsɔna ekumanyi kɛmɔtshi kele ɔtɛkɛtshi wa manamana dia mɛmba ɔkɛndɛ ɔnɛ. Ɔkɛndɛ ande ekɔ wa mbishaka dikumanyi kana ekambi wakimanyiya alako lo shɔpɔ naka ekɔ ohomba, ɛnyɛlɔ l’etena kashawɔ asawo, oyadi lo losanganya la Lɔsɛnɔ ndo olimu aso, etena kashawɔ asawo wa lo sɛkɛ, kalɔmbɔlawɔ wekelo wa Tshoto y’Etangelo kana Wekelo wa Bible wa l’etshumanelo kana kasalawɔ wadielo lo wekelo ɛsɔ. (Enda odingɔ 17.) Naka dikumanyi diele atɛkɛtshi ndo embetsha w’eshika diekɔ efula l’etshumanelo, kete vɔ wayengɔnyaka ɔkɛndɛ wa ondaki okina ɔnɔnyi tshɛ. Keema ohomba di’ondaki okina mbisha anto alako l’ɔkɔngɔ w’oseka ɔkɛndɛ tshɛ.

KALASA NKINA

25. Lo ndjela lofulo l’ambeki, tshumanelo koka nɔmbɔla kalasa nkina lo dikambo di’asawo w’ambeki. Kalasa kekina tshɛ pombaka monga la ondaki wele l’akoka ndo ayoleka dimɛna ondaki monga ekumanyi kɛmɔtshi. Lɛnɛ ele ohomba, okambi wakimanyiya ɔmɔtshi wa manamana koka mɛmba ɔkɛndɛ ɔsɔ. Olui wa dikumanyi pombaka nsɔna onto lakoka mɛmba ɔkɛndɛ akɔ ndo menda kana ayonga ohomba mengɔnyaka ɔkɛndɛ akɔ. Ondaki pombaka ndjela elembetshiyelo watanema l’odingɔ 16. Naka kalasa kekina kana nkina yekɔ, kete l’ɔkɔngɔ wa etenyi kata ɔnɛ Toyange diangɔ di’oshinga wolo dia lo nyuma katanema l’etenyi ka losanganya ka Akambo w’ohomba w’oma l’Ɔtɛkɛta wa Nzambi, pombaka nɔmba ambeki dia ntshɔ lo kalasa yakɔ. Oma l’ɔkɔngɔ w’etenyi ka losanganya kata ɔnɛ: Yasha l’olimu w’esambishelo, vɔ pombaka nkalola oma lɛkɔ dia ndjoonga kaamɛ l’ase etshumanelo akina. Etena kakɛtshanyema vidɛo mɔtshi, wanɛ wele lo kalasa kekina lo mbalasa ka tshitshɛ pombaka ndjiɛna ndo mpokamɛ ɔkɛtshanyelo wasalema lo mbalasa ka woke, naka kokaka. Ko naka vɔ hawokoke mboka kɛnɛ kakɛtshanyema, kete ondaki kokaka mbaɛnya vidɛo yakɔ l’ekimanyielo k’ehomɔ kɛmɔtshi, oma laasɔ ko nde nɔmbɔla ɔkɛtshanyelo.

TOVIDƐO

26. Lo losanganya lɔnɛ, tayokamba la tovidɛo takasɔnama. Tovidɛo ta lo losanganya la l’atei wa lomingu tayotanemaka lo JW LibraryVR-35HS.3®VR35 app ndo prɔgramɛ kakɔ koka mbɔtshiyama lo aparɛyɛ wotshikitanyi. Tena dimɔtshi, tovidɛo ta bɛnyɛlɔ di’asawo kokaka mɛnyama lo nsanganya y’otsha l’olimu w’esambishelo.

S-38-OT 11/21

[DO NOT SET]