Lɔtɔngɔ L’olui—Ngande Wambolotomba Sɛkɛ?
“Dimi layodja lohetsho lam’asayɛ la omoto, ndo lam’asa lɔtɔngɔ layɛ la lɔtɔngɔ lande.”—ETATELO 3:15, NW.
JEHOWA ekɔ Nzambi k’ɔngɛnɔngɛnɔ, ndo nde mɛtɛ sunganaka monga l’ɔngɛnɔngɛnɔ. Nde mbele Onkahi woleki woke ndo wa ntondo wa diangɔ di’ɛlɔlɔ, ndoko kɛnɛ kakoka fukutanya ekotshamelo k’asangwelo ande. (Isaya 55:10, 11; 1 Timote 1:11; Jakoba 1:17) Nde nangaka ekambi ande ngɛnangɛna ndo vɔ lawɔ, ndo nde mbashaka ɛkɔkɔ wasungana dia vɔ monga l’ɔngɛnɔngɛnɔ. Ɔnkɔnɛ, l’etena kɛmɔtshi koleki tshɛ lonyangu lo lɔsɛnɔ l’anto—lam’akatɔmbɔkɔ atshukanyi wa ntondo l’Ɛdɛna—nde akatosha ɔkɔkɔ wa sho monga l’elongamelo ka lo nshi yayaye.—Romo 8:19-21.
2 Lam’akandahangakalɛ Nzambi ko mbomamatanyiyɛ akambo a kashi, ɔn’aki Jehowa ɔmɔtshi la lo nyuma akayoyaetɛ ndamɛ Satana Diabolo. Anto wa ntondo, Eva ko Adama, wakayɔsɛngiyama oma le nde ko wakasekola ɔlɛmbɛ wakokɛmaka hwe wakawadjɛ Jehowa. Diɔ diakɔ mɛtɛ diakawafundamɛ nyɔi lo ndjela losembwe. (Etatelu 3:1-24) Koko, lam’akandahembolaka onongo w’atɔmbɔki asɔ, Jehowa akasha ana w’Adama l’Eva ɔkɔkɔ ɔmɔtshi wa vɔ monga l’elongamelo. Lo yoho yakɔna na? Oko wofundamidiɔ l’Etatelo 3:15 (NW), Jehowa akate ate: “Dimi layodja lohetsho lam’asayɛ la omoto, ndo lam’asa lɔtɔngɔ layɛ la lɔtɔngɔ lande. Nde ayokominola l’ɔtɛ ndo wɛ ayowolumata l’etshindji.” Pɔlɔfɛsi kɛsɔ tokimanyiyaka dia sho shihodia Bible k’otondo la akambo wa lo nshi yakete ndo wa lo nshi nyɛ w’endana l’andja ɔnɛ ndo l’ekambi wa Jehowa.
Kitshimudi ya Pɔlɔfɛsi Kakɔ
3 Dia sho shihodia kitshimudi ya pɔlɔfɛsi kakɔ, ɛsɔ tênde tenyi diotshikitanyi dia lɔkɔ. Ɔnɛ lakawatɛka l’Etatelo 3:15 (NW) ele Olui—aha olui k’olui, koko ɔnɛ lakatɛkɛta lo tshimbo y’olui. (Enyelo 12:9) “Omoto” bu Eva, koko ɔlɔngɔswamelo wa Jehowa wa l’olongo, nyango ekambi ande w’akitami wa nyuma wele lanɛ la nkɛtɛ. (Ngalatiya 4:26) “Lɔtɔngɔ” l’Olui kɛdikɛdi lɔtɔngɔ la Satana, mbuta ate tokanula tande—ɛdiɛngɛ, anto la ɛlɔngɔswamelo w’anto wakɛnɛmɔla waonga wa Satana ndo wɛnya woho wahetshawɔ “lɔtɔngɔ” la omoto. (Joani 15:19; 17:15) “Lɔtɔngɔ” la omoto ele ntondotondo Yeso Kristo, ɔnɛ lakakitama nyuma k’ekila l’ɔnɔnyi 29 T.D. Anto 144 000, wanɛ ‘wambotɔ nto . . . oma l’ashi ndo oma lo nyuma,’ ndo wele ekitɔ wa Diolelo dia l’olongo kâmɛ la Kristo, wekɔ etenyi ka hende ka lɔtɔngɔ lɔsɔ la daka. Vɔ wakatatɛ kotshama lo lɔtɔngɔ lɔsɔ la omoto tatɛ oma lo Pɛntɛkɔsta ka l’ɔnɔnyi 33 T.D.—Joani 3:3, 5; Ngalatiya 3:16, 29.
4 Olui wa mɛtɛ mɛtɛ waki l’Ɛdɛna akɔsama oko onyɔ waki ɔnɛ lakate kashi kakayoshishɛka anto Paradiso. Etatelu 3:15 akɛnya etena kayɔtɛtshatɛtshama ɔnɛ lakakambe l’olui ɔsɔ. Etena kɛsɔ kayodihɔ mboka nto le anto wakambɛ Nzambi dia vɔ mbidjasɛ lo Paradiso, wambotshungɔ oma lo pɛkato la nyɔi. Ɔsɔ mɛtɛ ayonga etena k’ɔngɛnɔngɛnɔ!—Enyelo 20:1-3; 21:1-5.
5 L’ɔkɔngɔ w’ɔtɔmbɔkwɛlɔ wa l’Ɛdɛna, anto la ɛlɔngɔswamelo wakatatɛ mɛnama wakakɛnɛmɔla waonga wele oko waki Satana Diabolo—ɔtɔmbɔkwɛlɔ, kashi, omamatanyielo, ndo odiakanelo la yimba ya ndɔshana la lolango la Jehowa ndo la wanɛ wɔ̂tɛmɔla. Waonga asɔ wakɛnyaka ɔnɛ wanɛ mbele tokanula ta Diabolo, kana anande wa lo nyuma. L’atei w’anto asɔ mbaki ndo Kɛna, ɔnɛ lakadiake Abɛlɛ lam’aketawɔ Jehowa ɔtɛmwɛlɔ w’Abɛlɛ ko tona wa Kɛna. (1 Joani 3:10-12) Nimirɔdɛ aki onto lele tshondo ya lokombo lande akɛnyaka ɔnɛ nde ekɔ ɔtɔmbɔki ndo ɔnɛ lakayoyalaka mengenga ka woke ndo owandji wakahetshanaka la Jehowa. (Etatelu 10:9) Lâdiko dia lâsɔ, waolelo wakayahɔnaka lo nshi y’edjedja, ndo Babilɔna, kâmɛ l’ɛtɛmwɛlɔ awɔ wa kashi wakasukamɛka oma le Lɛɛta, wakahɛnyahɛnyaka atɛmɔdi wa Jehowa woho w’anyanya.—Jeremiya 50:29.
“Lohetsho Lam’asayɛ la Omoto”
6 L’etena kɛsɔ tshɛ, lohetsho lakikɔ l’asa Olui nde la wadi aki Jehowa, l’asa Satana Diabolo nde l’ɔlɔngɔswamelo wa Jehowa wa l’olongo wokengami la ditongami dia lo nyuma diele la kɔlamelo. Lohetsho la Satana lakɛnama lam’akandasole Jehowa ndo lam’akandayange dia fukutanya ɔlɔngɔswamelo wa Jehowa wa l’olongo, lo tshutshuya andjelo amɔtshi dia vɔ tshika dihole dia dimɛna diakawadjasɛka. (Tukedi 27:11; Jude 6) Lohetsho lakɔ lakɛnama lo sɛkɛ lam’akakambe Satana l’ɛdiɛngɛ ande dia vɔ pemba dia kengɛ andjelo wakatome Jehowa la nsango ya vɔ ndjewoya lanɛ la nkɛtɛ. (Danyele 10:13, 14, 20, 21) Lɔ lakɛnama hwe l’eleko kɛnɛ ka 20 lam’akayange Satana nanya Diolelo dia Mɛsiya lam’akadiotɔ.—Enyelo 12:1-4.
7 Wadi aki Jehowa ndo nde lawɔ, mbuta ate lemba l’andjelo wele la kɔlamelo, akahetsha Olui wa didjidji. Satana akamamatanyɛ Nzambi akambo wa kashi; nde akadje ndo tamu lo kɔlamelo y’oseka etongami tshɛ kele la yimba kaki Nzambi, mbidja ndo andjelo tshɛ, ndo nde akayatshutshuyaka l’ohetoheto tshɛ dia nanya kɔlamelo yawɔ le Nzambi. (Enyelo 12:4a) Andjelo wa kɔlamelo, akɛruba la asarafu, wakahombe mɛtɛ mpetsha ɔnɛ lakayoyaetɛ ndamɛ Diabolo ndo Satana. Koko, vɔ wakatshike tshɛ l’anya wa Jehowa dia nde ndjosembola akambo l’etena kakandashikikɛ ndo lo woho wakandalɔngɔsɔla.—Ɛdika la Jude 9.
Lohetsho Otsha le Lɔtɔngɔ la Wadi Aki Nzambi
8 L’etena kɛsɔ tshɛ, Satana akashishimaka wonya tshɛ dia mbeya akɔna ele Lɔtɔngɔ la omoto lakalakema, ɔnɛ lakate Jehowa ɔnɛ nde mbayoyominola ɔtɛ w’Olui. Etena kakaye ondjelo oma l’olongo dia ndjota ɔnɛ Yeso lôtwe la Bɛtɛlɛhɛma, mbele ‘Oshimbedi, ɔnɛ lele Kristo Nkumadiɔndjɔ,’ ɔsɔ aki eshikikelo ka wolo k’ɔnɛ nde mbayoyala Lɔtɔngɔ la omoto lakalakema.—Luka 2:10, 11.
9 Lohetsho la mamba laki Satana lakɛnama esadi eto lam’akandatshutshuya ase tomba w’apanganu dia vɔ ntshɔ l’olimu ɔmɔtshi wakâtɔlɛ ntondo le Nkumekanga Hɛrɔdɛ la Jerusalɛma, oma lɛkɔ ko vɔ ndjokoma lo luudu lɔmɔtshi la Bɛtɛlɛhɛma, lɛnɛ akawatotanaka dikɛnda dia pami diakawelɛka Yeso nde la Mariya wa nyango. Yema l’ɔkɔngɔ wa dikambo sɔ, Nkumekanga Hɛrɔdɛ akatome dui dia vɔ ndjaka ana w’apami w’akɛnda tshɛ waki l’ɛnɔnyi oma l’ehende oya l’ɛse, la Bɛtɛlɛhɛma la lo ngelo ya l’emamu. Lam’akandasale ɔsɔku, Hɛrɔdɛ akɛnya lohetsho la mamba lahetshande Lɔtɔngɔ oko alihetsha Satana. Hɛrɔdɛ akeyaka mɛtɛ dia nde akayangaka ndjaka ɔnɛ lakahombe ndjoyala Mɛsiya. (Mateu 2:1-6, 16) Ɔkɔndɔ w’akambo wa lo nshi yakete mɛnyaka ɔnɛ Nkumekanga Hɛrɔdɛ aki onto l’otema mindo, kanga lokeso, ndo ondjakanyi—nde mɛtɛ aki ɔmɔtshi a l’atei wa lɔtɔngɔ l’Olui.
10 L’ɔkɔngɔ wa Yeso kitama nyuma k’ekila l’ɔnɔnyi 29 T.D., ko Jehowa tɛkɛta oma l’olongo dia nde mɛnya ɔnɛ nde mbetawɔka Yeso oko Ɔnande, Satana akayatshutshuya mbala la mbala dia kɔsha Yeso l’ehemba, ate kele sangwelo dia Jehowa di’endana l’Ɔnande diɔtɔ l’ashi. (Mateu 4:1-10) Oko wakandakite tatala lo dikambo sɔ, nde akayɔsaka anto dia kotsha eyango ande. L’atei a wanɛ wakandɔshi dia mɔnyɔla Yeso mbaki ndo ewandji w’ɛtɛmwɛlɔ wa dungi pende. Vɔ wakate akambo wa kashi ndo wakômamatanyiyɛ awui, oko atotshaka Satana. Lam’akatɛ Yeso kanga ekuse ɔmɔtshi ate: “Ongenengene, . . . kolo yaye yambudimanyema,” afundji wakate ɔnɛ Yeso ambɔtɛnga Nzambi, aha la vɔ tokokonga dia mɛna kana onto akɔ mɛtɛ ambɔkɔnɔ. (Mateu 9:2-7) Lam’akakɔnɔla Yeso anto lushi la Sabato, Afarisɛ wakawɔshi oko ɔmɔnyɔdi w’ɔlɛmbɛ wa lushi la Sabato ko wakɔtɔ sheke dia mbodiaka. (Mateu 12:9-14; Joani 5:1-18) Lam’akatondjaka Yeso ɛdiɛngɛ, Afarisɛ wakataka ɔnɛ nde mbokanaka la “Belezebulu, uwandji w’edienge.” (Mateu 12:22-24) L’ɔkɔngɔ wa Lazaro mbolɔ oma lo nyɔi, anto efula wakayala la mbetawɔ le Yeso, koko ɛlɔmbɛdi a weke vɔ l’Afarisɛ wakôtshwɛ sheke nto dia mbodiaka.—Joani 11:47-53.
11 Kânga mbakandeyaka kɛnɛ kakawayangaka mbosalɛ, lo ngɔndɔ ka Nisana 11, l’ɔnɔnyi 33 T.D., Yeso akatshu otsha lo tɛmpɛlɔ ka la Jerusalɛma la dihonga tshɛ ko akatodja ewandji w’ɛtɛmwɛlɔ mananu lo sɛkɛ. L’olui awɔ tshɛ, afundji l’Afarisɛ wakatetemalaka mɛnya woho w’anto wewɔ; diɔ diakɔ diakate Yeso ate: “Fono kayayi le nyu, afundji la Afarise, akanga a lukesu! ne dia nyu nyatudihelaka antu lukuki la diulelu dia l’ulungu. Nyu nyame hanyoto loko, ku hanyetawo dia wane walanga mboto woto.” Lo yoho yasungana mɛtɛ, Yeso akate ɔnɛ ndo vɔ mbele l’atei a lɔtɔngɔ l’Olui, lam’akandate ate: “Nyu elui, ndu diuhu dia akhuha, ukundi ayunyuhanda elumbwelu ka [Ngɛhɛna, NW]?” (Mateu 23:13, 33) Woho w’ɛtɛkɛta wakandatɛkɛta toholaka pɔlɔfɛsi ka l’Etatelu 3:15.
12 Lam’akawoke ɛtɛkɛta wa Yeso, onde vɔ wakandama la kandji l’asolo ndo wakasɛngasɛnga Nzambi dia nde mbaoka kɛtshi? Onde vɔ wakayatshumuya lo kɔlɔ yawɔ? Atonga! Mako 14:1 mbutaka ɔnɛ la wedi a pindju, lo losanganya lɔmɔtshi lakawɔtɔ lo mbalasa kaki ɔlɔmbɛdi wa lâdiko, “Elombedi a waki la afundji wakayangaka wuhu wa munda Jesu la lukesu, dia mbudiaka.” Vɔ wakatetemala kɛnɛmɔla yimba ya Satana ya ndjakana, ɔnɛ lakelamɛ ntondo oma le Yeso ɔnɛ ondjakanyi. (Joani 8:44) Kem’edja, Judasɛ Isakariyɔtɛ, ɔnɛ lakatshutshuyama oma le Satana dia nde tɔmbɔkɔ, akayɔtɔ l’ɔnɔngɔ awɔ. Judasɛ akasɛkɛ Lɔtɔngɔ laha l’onongo laki omoto, ko akɔtɔ lo lokolo la lɔtɔngɔ l’Olui.
13 La pindju ka pɛ ka lo ngɔndɔ ka Nisana 14, ase tuminadi ta l’ɔtɛmwɛlɔ w’Ase Juda wakande Yeso oko ose lokanu ko wakɔ̂tɔlɛ le nguvɛrnɛrɛ k’Ose Rɔmɔ. L’etena kɛsɔ, ɛlɔmbɛdi a weke mbakatatɛ pangɔhangɔ ɔnɛ wɔ̂kɔkɔmɛ l’otamba. Lam’akambola Pilato ate: ‘Mpanɛ nkumekanga kanyu?,’ ɛlɔmbɛdi a weke mbakakadimola ɔnɛ: “Shu kema la khum’ekanga, paka Kayisa.” (Joani 19:6, 15) Mɛtɛ, vɔ wakayaɛnya lo weoho tshɛ ɔnɛ ndo vɔ mbele l’atei wa lɔtɔngɔ l’Olui. Koko mɛtɛ aha vamɛ ato mbaki l’atei wa lɔtɔngɔ l’Olui. Ɔkɔndɔ wa lo Mateu 27:24, 25 wakafundama l’ɛlɔmbwɛlɔ ka nyuma ka Nzambi mbutaka ɔnɛ: “Pilata . . . akose ashi, akotsha anya la ntundu ka ului w’antu.” Ko anto tshɛ wakate vate: “Dikila diandi diayali l’ete asu, ndu l’ete wa an’asu.” Ɔsɔku mbakayaɛnya Ase Juda efula wa lo lɔlɔnga lɔsɔ ɔnɛ ndo vɔ mbele l’atei wa lɔtɔngɔ l’Olui. Lushi lɔsɔ, la ntondo ka wonya mbidja, Yeso akavu. L’ekimanyielo ka lɔtɔngɔ lande lɛnama, Satana akalumata Lɔtɔngɔ la wadi aki Nzambi l’etshindji.
14 Onde Satana akadje otshumba? Kema! Yeso Kristo akalɛmbia andja ɔnɛ ndo akadje owandji awɔ otshumba. (Joani 14:30, 31; 16:33) Nde akalame kɔlamelo yande le Jehowa polo ndo lo nyɔi. Nyɔi kakandavu oko onto la kokele kakakimɔ oshinga wa tshungo dia tshungola dikimɔ dia monga la lɔsɛnɔ diakashisha Adama. Ɔsɔku mbakandadiholɛ wanɛ wele la mbetawɔ lo yɛdikɔ shɔ ndo wakitanyiya awui wa Nzambi mboka k’otsha lo lɔsɛnɔ la pondjo. (Mateu 20:28; Joani 3:16) Jehowa akolola Yeso oma lo nyɔi ko akawosha lɔsɛnɔ lahakomɛki l’olongo. L’etena kakashikikɛ Jehowa, Yeso ayoshila Satana oshiki. L’Etatelu 22:16-18, Jehowa akalake ɔnɛ nde ayɔtshɔkɔla nkumbo tshɛ y’anto wa lanɛ la nkɛtɛ yatsha kɛnɛ kahombama dia vɔ kondja ɛtshɔkɔ lo tshimbo ya Lɔtɔngɔ lɔsɔ.
15 L’ɔkɔngɔ wa nyɔi ka Yeso, Akristo w’akitami wa nyuma wakatetemala la tondja ditshelo dia lɔtɔngɔ l’Olui lo sɛkɛ, oko akatshaka Nkumɛwɔ. Lam’akandasokoyama la nyuma k’ekila, ɔpɔstɔlɔ Paulo akatatewudi lo dikambo di’“onto lɔ̂nyɔla ɛlɛmbɛ” lahomba ndja ‘lo wolo wa Satana.’ (2 Tesalɔnika 2:3-10, NW) “Onto” ɔsɔ lele olui w’anto kɛdikɛdi ewandji w’ɛtɛmwɛlɔ wa Lokristokristo. Lɔtɔngɔ l’Olui, ndo lɔ lawɔ, lakahɛnyahɛnya ambeki wa Yeso Kristo woho w’anyanya. Lo pɔlɔfɛsi kofundami l’Enyelo 12:17, ɔpɔstɔlɔ Joani akatatshi ɔnɛ Satana ayotetemala ndɔsha atshikadi wa lɔtɔngɔ la wadi aki Nzambi polo ndo nshi nyɛ. Dikambo sɔ diakasalema mɛtɛ. Lo wedja efula, wakashimbe olimu w’Ɛmɛnyi wa Jehowa, elui w’anto wakawaɔtwɛ dia mbakɔmɔla, wakawadje lo nkanu kana lo mpango ya nkanu ya wolo nɛ dia vɔ ndjaɛkɛka la wolo tshɛ lo Diolelo diaki Nzambi ndo lo mboka yande y’osembwe.
Woho Wambotomba Lɔtɔngɔ l’Olui Sɛkɛ Nshi Nyɛ
16 Lo ndjela ɛnyɛlɔ ka Yeso Kristo, Akristo wa mɛtɛ hawɔlɛmbɛ l’olimu wasalawɔ la dihonga tshɛ, olimu wa tondja ditshelo di’Olui la dia lɔtɔngɔ lande lo sɛkɛ. Lo 1917, Ambeki wa Bible, oko akawelɛka Ɛmɛnyi wa Jehowa nshi shɔ, wakatondja dibuku diele l’ɔtɛ a dui ɔnɛ: Le mystère accompli, lo dibuku diakɔ vɔ wakatondja lokeso l’ewandji w’ɛtɛmwɛlɔ wa Lokristokristo lo sɛkɛ. Oma lâsɔ, lo 1924, wakayotondjaka yɛdikɔ mɔtshi yakafundama lo kiatshikatshi mɔtshi yakawelɛka ɔnɛ: Acte d’accusation contre le clergé. Miliyɔ akumi atanu ya kɔpi ya kiatshikatshi shɔ yakadianganyema lo wedja efula. Lo 1937, J. F. Rutherford, ɔnɔmbɔdi wa la Société Watch Tower wa l’etena kɛsɔ, akatondja ditshelo dia lɔtɔngɔ la Satana lo sɛkɛ la wolo tshɛ lo alako wa mamba wakandasha, dimɔtshi diaki l’ɔtɛ a dui ɔnɛ: “Wamboshɔma” ndo dikina: “Ɛtɛmwɛlɔ la Lokristo.” L’ɔnɔnyi wakayoyela, nde akasha dako diaki l’ɔtɛ a dui ɔnɛ: “La Ntondo k’Akambo wa Mɛtɛ” l’eshinga wa telefɔnɛ la Londres, l’Angleterre, ko anto wakatshumana lo ahole 50 wakasalemaka losanganya la woke wakadihokamɛka. L’ɔkɔngɔ wa ngɔndɔ ɔtɔi, tshunda dimɔtshi di’aladiyo dia l’États-Unis diakadianganya dako diaki l’ɔtɛ a dui ɔnɛ: “Lowandji la Hiadi la Lotshungɔ.” Aki nto ndo awui wa mamba wakafundama l’oyango wa tondja ditshelo dia kɔlɔ di’ɛtɛmwɛlɔ lo sɛkɛ, ɛnyɛlɔ oko awui wa lo dibuku Ennemis la Religion ndo lo biukubuku yakawelɛka ɔnɛ Dévoilés. Lo ndjela kɛnɛ kakafundama l’ekanda wakawatondja tatɛ oma l’ɛnɔnyi wa 1920, dibuku La Révélation: le grand dénouement est proche!,a dibuku diambofundama kakianɛ l’ɛtɛkɛta 65, mɛnyaka ɔnɛ ewandji wa kɔlɔ ndo wa lohehe wa pɔlitikɛ kâmɛ l’amundji w’ekanda wa lokeso wekɔ l’atei w’anto woleki weke wakenga lɔtɔngɔ l’Olui lɛ̂nama. Lam’ele ewandji wa pɔlitikɛ wambekɛ mbutaka kashi dia vɔ kesa anto awɔ, hawɔsɛ dikila oko ɛngɔ k’ekila, ndo pɛnyahɛnyaka ekambi wa Jehowa (wɛ̂nya woho wahetshawɔ lɔtɔngɔ la wadi aki Nzambi), vɔ mɛtɛ ndjaɛnyaka ɔnɛ ndo vɔ mbele l’atei wa lɔtɔngɔ l’Olui. Ngasɔ mbele ndo amundji w’ekanda wa kɔlɔ, vɔ mbutaka kashi dia kondja falanga, koko nkum’etema yawɔ hayɔkɛtɛ kânga yema, vɔ tshulaka kana sondjaka diangɔ dieya anto ɔnɛ diɔ kokaka mbasha hemɔ.
17 Aha onto tshɛ lamboyasanya l’ɛtɛmwɛlɔ wa l’andja ɔnɛ, l’akambo wa pɔlitikɛ wa l’andja ɔnɛ, ndo l’awui w’ekanda, mbayɔsama l’ekomelo oko ndo nde mbele l’atei wa lɔtɔngɔ l’Olui. Amɔtshi wa l’atei w’anto asɔ ndjɔngɛnangɛnaka Ɛmɛnyi wa Jehowa. Vɔ kambaka la lowandji lawɔ dia mbakimanyiya, ndo amɔtshi ndjɔ̂tɔka l’ɔtɛmwɛlɔ wa mɛtɛ. (Ɛdika la Etsha 13:7, 12; 17:32-34.) Leeta lɔnɛ lakashama le anto tshɛ wa ngasɔ: “Kakiane nyu khumi ya dikanga, nyuyalombole la ewu; nyu embadi wa la kete, nyuyakimeli. Nyukambeli [Jehowa] ulimu la woma, nyongenengene la lukumba. Nyonone ona pami, ndi atukumala kele, ku nyu nanyema lu mbuka kanyu. Kele kandi kayufulanela esadi. Wane tshe watekamaka le ndi, wayongenangenaka.” (Osambu 2:10-12) Mɛtɛ, ekɔ ohomba efula le wanɛ tshɛ walanga Jehowa mbaoka kɛtshi dia vɔ tɔ̂shi tɛdikɔ tahombama kakianɛ, la ntondo ka Shushi ya l’olongo ndjodiha lokuke ko vɔ ndjohomba diaaso!
18 Paka wanɛ wayokenga Diolelo dia l’olongo ato mbele l’atei wa lɔtɔngɔ la omoto. Anto asɔ bu efula. (Enyelo 7:4, 9) Koko, ekɔ olui ɔmɔtshi wa woke w’anto akina, eelo, miliyɔ y’anto watɛmɔla Jehowa wakongɛ l’ɔngɛnɔngɛnɔ tshɛ dia kondja lɔsɛnɔ la pondjo lo paradiso ka lanɛ la nkɛtɛ. Oyadi l’ɛtɛkɛta kana lo ditshelo, vɔ mbutɛka akitami wa Jehowa vate: “Shu tayutsho kame la nyu, ne dia shu takuki lukumu ati: [Nzambi, NW] eko kame la nyu.”—Zekariya 8:23.
19 Kakianɛ, etena kahomba anto tshɛ mbɔsa yɛdikɔ mɔtshi kambokoka. Onde vɔ nangaka tɛmɔla Jehowa ndo sukɛ lowandji lande, kana wayosha Satana diaaso dia nde monga owandji awɔ lo salaka akambo wɔ̂ngɛnyangɛnya? Anto oko miliyɔ tshanu woye oma lo wedja wambɛkama lo wedi wa Jehowa kâmɛ l’atshikadi wa lɔtɔngɔ la omoto, wanɛ wele ekitɔ wa Diolelo. Miliyɔ enanɛi y’anto akina wekɔ lo mɛnya saki kawɔ lo mbeka Bible l’Ɛmɛnyi wa Jehowa kana lo mbɔtɔka lo nsanganya yawɔ. Ɛmɛnyi wa Jehowa mbutɛka anto asɔ tshɛ vate: He lokuke lêke hwe. Yaɛkɛ la tshondo lo wedi wa Jehowa aha la kandakanda. Etawɔ Kristo Yeso oko Lɔtɔngɔ lakalakema. Ɔtɔ l’ɔngɛnɔngɛnɔ tshɛ l’atei w’ɔlɔngɔswamelo wa Jehowa wɛ̂nama. Ntsha tshɛ dia ndo wɛ lawɔ nongola ɛtshɔkɔ wayondosha anto lo tshimbo ya diolelo dia Nkumekanga, Kristo Yeso.
[Footnote]
a Dibuku diakatondja Watchtower Bible and Tract Society of New York, Inc.
[Study Questions]
1. (a) Lande na kele Jehowa Nzambi k’ɔngɛnɔngɛnɔ? (b) Akandasale dia ndo sho lawɔ monga l’ɔngɛnɔngɛnɔ?
2. Lam’akandahembolaka onongo w’atɔmbɔki wa l’Ɛdɛna, ngande wakasha Jehowa ana w’Adama l’Eva ɔkɔkɔ ɔmɔtshi wa vɔ monga l’elongamelo?
3. Oko wofundamidiɔ l’Etatelo 3:15 (NW), otote ele (a) Olui, (b) “omoto,” (c) “lɔtɔngɔ” l’Olui, (d) “lɔtɔngɔ” la omoto.
4. Ngande w’endana Etatelu 3:15 la woho wayokadimɔ nkɛtɛ paradiso koludi l’anto wambotshungɔ oma lo pɛkato la nyɔi?
5. Waonga akɔna wɛnama le ana wa Diabolo wa lo nyuma?
6. Ngande wakɛnya Satana woho wahetshande wadi aki Jehowa?
7. Lande na kakahetsha andjelo wa Jehowa wa kɔlamelo Olui wa didjidji, ko akawasale?
8. Satana akandashishimaka wonya tshɛ?
9. L’ɔkɔngɔ w’eotwelo ka Yeso, ngande wakɛnya Satana lohetsho lande la mamba?
10. (a) L’ɔkɔngɔ wa batismu ka Yeso, ngande wakahembe Satana ndamɛ dia fukutanya sangwelo dia Jehowa di’endana la Lɔtɔngɔ lakalakema? (b) Ngande wakakambe Satana l’ewandji w’ɛtɛmwɛlɔ w’Ase Juda dia nde kotsha eyango ande?
11. Nshi shato la ntondo ka nde mvɔ, anto akɔna wakɛnya Yeso ɔnɛ ndo vɔ mbele l’atei wa lɔtɔngɔ l’Olui, ndo lande na?
12, 13. (a) Ɛlɔmbɛdi a weke l’afundji akawasale nto dia mɛnya ɔnɛ kapanda mbele shɛwɔ ka lo nyuma? (b) Akɔna akayɔtɔ l’ɔnɔngɔ awɔ? (c) Lo ndjela Etatelu 3:15, ngande wakalumatama Lɔtɔngɔ la omoto l’etshindji?
14. Lande na kahatakoke mbuta ɔnɛ Satana akadje otshumba lam’akandalumata Lɔtɔngɔ la omoto l’etshindji?
15. (a) L’ɔkɔngɔ wa nyɔi ka Yeso, ngande wakatetemala apɔstɔlɔ tondja ditshelo dia lɔtɔngɔ l’Olui lo sɛkɛ? (b) Ngande wakanyomoyɛnama lohetsho laki lɔtɔngɔ l’Olui polo ndo nshi nyɛ?
16. Lo nshi yaso nyɛ, wa na wambowotondja sɛkɛ ɔnɛ ndo vɔ mbele lɔtɔngɔ l’Olui, ndo woho akɔna?
17. Diaaso diakɔna diekekɔ le anto wa weke wakoka tomba oma l’andja ɔnɛ?
18. Wa na wele atɛmɔdi wa Jehowa kânga mbewɔ bu l’atei wa lɔtɔngɔ la omoto?
19. (a) Yɛdikɔ yakɔna yahomba anto tshɛ mbɔsa? (b) Wa na watɛwɔ dia tɔ̂shi tɛdikɔ oko akanga a tomba kam’eke lokuke hwe?
[Caption]
[Notɛ ka l’ɛsɛ ka dikatshi]
[Caption]
[Wembola]
[Caption on page 21]
[Diombwɛlo di’osato wa lo lɛkɛ 21]
Yeso akatondja ewandji w’ɛtɛmwɛlɔ wa dungi pende sɛkɛ, nde akɛnya ɔnɛ ndo vɔ mbele l’atei wa lɔtɔngɔ l’Olui
[Caption on page 24]
Onde Wɛ Mbohɔka?
◻ Ele Olui watawɔ l’Etatelu 3:15? Ele omoto?
◻ Waonga akɔna wɛ̂nama le lɔtɔngɔ l’Olui?
◻ Ngande wakatondja Yeso lɔtɔngɔ l’Olui sɛkɛ?
◻ Wa na wambowotondja sɛkɛ nshi nyɛ ɔnɛ ndo vɔ mbele l’atei wa lɔtɔngɔ l’Olui?
◻ Kakɔna kahomba onto ntsha esadi esadi di’aha vɔ ndjowɔsa oko ndo nde mbele l’atei wa lɔtɔngɔ l’Olui?