Tekɔ Lo Sɛna Lo Dikambo Dia Lɔsɛnɔ La Nshi Nyɛ Kana Dia Lɔsɛnɔ La Pondjo Lo Nshi Yayaye?
“Sho takashimbamɛ lo elongamelo kɛnɛ.”—RƆMƆ 8:24, NW.
ƆPƆSTƆLƆ Paulo akafundɛ Akristo wakadjasɛka la Kɔrɛtɔ ate: “Okonde wata amɔtshi wa l’atei anyu vate ndoko eolwelo ka wanɛ wakavu?” (1 Kɔrɛtɔ 15:12, NW) Mbokɛmaka lâsɔ di’ondo filozofi ka kɔlɔ efula kaki nomb’ewo k’Ose Ngirika kakawelɛka Epikura kakɔtɔ yema l’atei w’Akristo wa l’eleko ka ntondo. Diɔ diakɔ diakatɛkɛta Paulo dikambo dia wetshelo waki Epikura w’ɔnɛ: ‘Nyɛsɔ tɔlɛke ndo tɔnɔke, nɛ dia lui kete tambokamɛ oma lonya.’ (1 Koreto 15:32) Lam’ele vɔ wakɔnyɔlaka elongamelo tshɛ k’onto monga la lɔsɛnɔ l’ɔkɔngɔ wa nyɔi, ambeki waki Epikura wakafɔnyaka ɔnɛ ɛngɛnɔngɛnɔ wa lo demba mbele tshɔi yakɔ ya dikambo di’ohomba kana wahɔ woleki woke lo lɔsɛnɔ. (Etsha 17:18, 32) Filozofi kaki Epikura kakashaka onto yimba ya ndjâkanɛka paka ndamɛ oto, tɔ kakalakanyaka onto dia mɔnyɔlaka tokanyi l’awui w’anto akina tshɛ ndo kakalanyaka lɔkɛwɔ lande.
2 Wangunelo ɔsɔ wa wetshelo w’eolwelo waki la akambo efula. Paulo akakane yimba ɔnkɔnɛ ate: “Naka mɛtɛ eolwelo ka wanɛ wakavu bu, kete lâsɔ ndo Kristo kombolɔ. Ko naka Kristo kombolɔ, kete lâsɔ esambishelo kaso kekɔ mɛtɛ anyanya, ndo mbetawɔ kaso kekɔ anyanya. . . . Naka lo lɔsɛnɔ lɔnɛ loto mbakatalongamɛ le Kristo, kete sho mbahomba ndeka mbokama kɛtshi l’atei w’anto tshɛ.” (1 Kɔrɛtɔ 15:13-19, NW) Eelo mɛtɛ, naka ndoko elongamelo ka lɔsɛnɔ la pondjo lo nshi yayaye, kete ɔtɛmwɛlɔ w’Akristo wotoyala “anyanya.” Tshike totowoyala ndoko ohomba. Lâsɔ mɛtɛ, hatokoke mamba lo mboka ɔnɛ ekakatanu efula wakatombaka l’etshumanelo ka la Kɔrɛtɔ l’ɔtɛ wa tɔsɛngiya t’oma lo tokanyi tɔsɔ t’apanganu. (1 Koreto 1:11; 5:1; 6:1; 11:20-22) Diɔ diakɔ diakayange Paulo woho wa keketsha mbetawɔ kawɔ lo eolwelo. Nde akakambe l’ɛtɛkɛta wa mamba wa yimba, l’avɛsa wa lo Bible, ndo la bɛnyɛlɔ dimɔtshi ko akɛnya lo yoho yahakoke mbidjama tamu ɔnɛ elongamelo k’eolwelo bu dikambo dia kashi dia lokanyiya koko ekɔ dikambo dia mɛtɛ diayokotshama lo weho akɔ tshɛ. Oma lo dikambo diakɔ mbakandakoke kɔkɔmiya anyande ambetawudi ate: “Nyutetemali, nyushikikali, nyutamanya ntsha ulimu wa Khumadiondjo nshi tshe, ne dia nyu mbeyaka nyati: pa kanyu le Khumadiondjo kema anyanya.”—1 Koreto 15:20-58.
‘Nyambalɛke’
3 Ɛlɔ kɛnɛ, anto efula fɔnyaka ɔnɛ ndoko dui di’ɔlɔlɔ diayosalema lo nshi yayaye ndo vɔ sɛnaka paka lo dikambo dia lɔsɛnɔ la nshi nyɛ loto. (Efeso 2:2) Akambo asɔ fɔnaka la kɛnɛ kakatatshi ɔpɔstɔlɔ Petero. Nde akatɛkɛta dikambo di’‘ansɔki wayoya la lɔsɔkɔ lawɔ . . . wata vate: Shi nde akatatshi ɔnɛ layoya, ko ende? Oma ko lushi lakalale watshɛso djɔ lo nyɔi, awui tshɛ wekɔ ɔnkɔnɛ wakiwɔ oma k’etatelo k’etongelo k’andja.’ (2 Petero 3:3, 4) Naka atɛmɔdi wa mɛtɛ monga la tokanyi ta ngasɔ, kete vɔ mbeyaka ndjoyala oko anto ‘wambɔla yɔɔ kana wahatɔ elowa.’ (2 Petero 1:8) Diɛsɛ ko, suke l’ekambi wa Nzambi tshɛ wa nshi nyɛ bu la tokanyi ta ngasɔ.
4 Kema kɔlɔ onto ndjasha dia mbeya awui efula lo kɛnɛ kendana la ekomelo kayaye ka dikongɛ di’akambo nɛ dia kɔlɔ. Ohɔ dia kânga apɔstɔlɔ wa Yeso wakɛnya mposa ka ngasɔ kaki la wɔ lam’akawawombola ɔnɛ: ‘Nkumadiɔndjɔ, onde etena kɛnɛ mbayoyokaloyɛ Isariyɛlɛ diolelo?’ Yeso akâkadimola ate: “Aha dikambu dianyu dia mbeya tena kana enonyi wakashikike Papa lu wulu andi.” (Etsha 1:6, 7) Ɛtɛkɛta ɛsɔ shikikɛka dui di’ohomba efula diakandawatɛ lo Dikona di’Ɔlivɛ ate: “Nyu hanyeyi lushi layuya Khumenyu. . . . On’a untu ayuya lu unya wahanyalungamela.” (Mateu 24:42, 44) Sho pombaka mbohɔka dako sɔ nshi tshɛ! Amɔtshi mbeyaka ndjohembama la kanyi y’ɔnɛ: ‘Ondo dimi kokaka tokɔlɛngɔla demba yema l’olimu wa Nzambi ndo tshika ndjashaka efula nganɛ.’ Ko tete ɔsɔ ekɔ munga ka woke! Enda ɛnyɛlɔ kaki Jakɔba nde la Joani, “Ana wa dikhungula dia mvula.”—Mako 3:17.
5 Sho mbeyaka ɔnɛ Jakɔba aki ɔpɔstɔlɔ waki l’ohetoheto wa mamba. (Luka 9:51-55) Nde mɛtɛ akakambaka olimu wa woke efula l’ɔkɔngɔ w’etshumanelo k’Akristo tongama. Koko lam’aki Jakɔba eke ɔlɔngɔlɔngɔ, Hɛrɔdɛ Angiripa wa Ntondo akôdiake. (Etsha 12:1-3) Onde wɛ fɔnyaka dia lam’akandɛnyi ɔnɛ nde ayanga mvɔ lo yoho yakinde konongamɛka, Jakɔba akanyange ɔnɛ otomeya nganɛ tshike dimi komonga l’ohetoheto efula ndo tshike totomoyasha efula l’olimu wa Nzambi? Ndoko! Nde mɛtɛ aki l’ɔngɛnɔngɛnɔ lo woho ɔnɛ wakandetsha ɛnɔnyi woleki ɔlɔlɔ lo lɔsɛnɔ lande la mondo dia kambɛka Jehowa. Ɛlɔ kɛnɛ, ndoko ɔtɔi l’atei aso lakoka mbeya kana nyɔi mbeyaka mboyɛ la shashimoya. (Ondaki 9:11, NW; ɛdika la Luka 12:20, 21.) Lâsɔ, mbokɛmaka hwe dia kanga lomba pombaka mongaka nshi tshɛ l’ohetoheto w’efula ndo tetemala kambɛ Jehowa la wolo ande tshɛ. Lo yoho shɔ mbayotolama lokombo laso l’ɔlɔlɔ la ntondo ka Nzambi ndo mbahatatoshisha elongamelo kaso ka ndjokondja lɔsɛnɔ la pondjo lo nshi yayaye.—Undaki 7:1.
6 Sho kokaka mbɔsa wetshelo wa ngasɔ oma l’ɛnyɛlɔ k’ɔpɔstɔlɔ Joani; nde aki lâwɔ lam’akakɔkɔmiya Yeso ambeki ande ate: ‘Nyambalɛke.’ (Mateu 25:13; Mako 13:37; Luka 21:34-36) Joani akadje dako sɔ l’atei w’otema ande ko akakambaka olimu wa Nzambi l’ohetoheto l’edja k’ɛnɔnyi efula. Ondo nde mɛtɛ akayovɔka l’ɔkɔngɔ w’apɔstɔlɔ akina tshɛ. Lam’akayala Joani osombe wa lokosombe, l’etena kakandakoke mbohɔ efula k’ɛnɔnyi wakandakambe olimu la kɔlamelo, onde nde akɛnyi ate: lakasale munga, lakadje lɔsɛnɔ lami lo mboka ka kɔlɔ ndo lakalifukutanya? Ndoko! Nde akatetemala kongɛ lɔsɛnɔ la lo nshi yayaye l’asolo walomɔlomɔ. Lam’akate Yeso, l’ɔkɔngɔ wa nde mbolɔ, ate: “Eelo, dimi laya kaa n[d]ja!,” Joani akakaloya dui esadi eto ate: “Ɛɛ! Ayaale ɔsɔku! Ha yaka Owandji Yeeso lee!” (Oshwelo 22:20, Dyookaneelo dy’oyooyo) Joani mɛtɛ kɔsɛnaka lo dikambo dia lɔsɛnɔ la lo nshi shɔ, nde kokombolaka yoho ya lɔsɛnɔ l’ɔkɔkɛ ndo la ki lasɛmawɔ ɔnɛ ‘lɔsɛnɔ lahombama.’ Nde akɔshi tɛdikɔ ta wolo dia tetemala kambɛ Nzambi la lɔsɛnɔ lande tshɛ ndo la wolo ande tshɛ, oyadi etena kakɔna kayoya Nkumadiɔndjɔ. Ko sho ngande?
Etshina ka Monga la Mbetawɔ lo Lɔsɛnɔ la Pondjo
7 Eya ndo shikikɛ wate: lɔsɛnɔ la pondjo bu dɔ kana lokanyi l’anyanya. Oko wadita Tito 1:2, sho mamemaka Nzambi l’ɔtɛ w’‘elongamelo ka lɔsɛnɔ la pondjo lakalake Nzambi lahakoke mbuta kashi la ntondo ka tena di’edjedja.’ Sangwelo diaki la Nzambi oma l’etatelo ele di’anto tshɛ wele l’okitanyiya sɛna pondjo pondjo. (Etatelu 1:28) Oyadi kânga ɔtɔmbɔkwɛlɔ w’Adama l’Eva, ndoko dui diakoka fukutanya ekotshamelo ka sangwelo sɔ. Oko wofundamidiɔ l’Etatelu 3:15, kombeta ndoko edja l’ɔkɔngɔ w’ɔtɔmbɔkwɛlɔ akɔ, Nzambi akalake dia tondja “lɔtɔngɔ” lɔmɔtshi lahomba ndjoshidiya pâ tshɛ yɛna anto. Lam’akayoya “lɔtɔngɔ” lakɔ lɔsɔ, mbut’ate Mɛsiya, Yeso, nde aketɛ elongamelo ka lɔsɛnɔ la pondjo oko ɔtɔi ɔmɔtshi a wetshelo ande wa weke. (Joani 3:16; 6:47, 51; 10:28; 17:3) Lam’akandakimɔ lɔsɛnɔ lande la kokele oko olambo w’etshungwelo, Kristo akakondja lotshungɔ lakoka dia mbisha anto lɔsɛnɔ la pondjo. (Mateu 20:28) Ambeki ande amɔtshi, 144000 lo tshɛ, wayɔsɛna pondjo pondjo l’olongo. (Enyelo 14:1-4) Ɔnkɔnɛ, anto amɔtshi waki ntondo ase nyɔi ‘wayɔlɔta eongelo kahavɔki’!—1 Koreto 15:53.
8 ‘Eongelo kahavɔki’ hɛnya paka ɔnɛ onto havɔki pondjo. Ɔsɔ ekɔ nto “nkudu ka lɔsɛnɔ lahakoke nanyema.” (Hɛbɛru 7:16, NW; ɛdika la Enyelo 20:6.) Oyango akɔna wakotsha Nzambi lam’ashande anto losha la ngasɔ la woke efula na? Ohɔ dia Satana akadje la Nzambi tɔfwɛfwɛ ɔnɛ ndoko etongami kande ɔtɔi kakokande mbɛkɛ otema le nde. (Jobo 1:9-11; 2:4, 5) Lam’ashande anto 144000 eongelo kahavɔki, Nzambi mɛnyaka ɔnɛ nde mbɛkɛka otema ande tshɛ le olui ɔsɔ w’anto wakɛnya lo yoho yɛnama hwe ɔnɛ tɔfwɛfwɛ taki Satana tekɔ kashi. Ko kayotota lo dikambo di’anto akina na? Yeso akatɛ ambeki wa ntondo wakasɔnama dia mbɔtɔ l’atei wa ‘lemba la tshitshɛ l’ɛkɔkɔ’ lɔsɔ lokengami l’ekitɔ wa Diolelo ate: ‘Nyayodjasɛ lo ekudi dia nomboya waoho dikumi l’ahende w’Isariyɛlɛ.’ (Luka 12:32; 22:30) Dikambo sɔ mɛnyaka ɔnɛ anto akina wayokondja lɔsɛnɔ la pondjo lanɛ laa nkɛtɛ oko ambolami wa Diolelo diande. Koyanga mbahawasha ‘ɛkɔkɔ ekina’ ɛsɔ eongelo kahavɔki, vɔ mbashaka ‘lɔsɛnɔ la pondjo.’ (Joani 10:16; Mateu 25:46) Ɔnkɔnɛ, lɔsɛnɔ la pondjo ekɔ elongamelo k’Akristo tshɛ. Ɔsɔ kema lokanyi l’anyanya, koko ɛngɔ kɛmɔtshi kakalakema lo sɛkɛ oma le ‘Nzambi lahakoke mbuta kashi,’ ndo nde akakimɔ dikila dia Yeso di’oshinga wolo l’ɔtɛ wa dikambo sɔ.—Tito 1:2.
Êke Edja Efula di’Awui Asɔ Ndjokotshama?
9 Ɔpɔstɔlɔ Paulo akatatshi ɔnɛ “tena dia pâ, dia wolo mbikikɛ” diayɛnya ɔnɛ taya mɛtɛ lo “nshi y’ekomelo.” Etena kɛnɛ katalana andja ɔnɛ l’akambo wele oko: oshilelo wa ngandji, lohehe, mbekelo k’onto nyangaka dia ndjângɛnyangɛnya paka ndamɛ, ndo akambo watona Nzambi, onde hatɛnyi ɔnɛ lushi la Jehowa nanya andja ɔnɛ wa kɔlɔ lekɔ lo ndjasukana esadi esadi? Etena kɛnɛ katafulanɛ akambo wa ngala la lohetsho, onde hatɛnyi ekotshamelo k’ɛtɛkɛta ɛnɛ wa Paulo w’ɔnɛ: “Antu wa kolo la akanga a lukesu wayuhama lu akambu awo wa kolo”? (2 Timote 3:1-5, 13) Amɔtshi mbeyaka fɔnya ɔnɛ akambo wayɔlɔngɔswama lo nshi yayaye ko vɔ mbidja mbeka y’ɔnɛ: “Wɔladi la lotui tshitshi,” ko tete wɔladi walongamɛwɔ hawotonga ndo monga, nɛ dia “elanyelo ka shashimoya [kayoya] le wɔ wonya akɔ wâmɛ, oko lɔɔnɔ le omoto lele la diemi; ndo ndoko woho wayowohandɔ.” Sho kema lo wodjima lo kɛnɛ kendana la kitshimudi y’akambo wasalema lo tena diaso nɛ. Ɔnkɔnɛ, ‘aha sho ndala djɔ ndo tolame yimba yaso ɔlɔlɔ.’—1 Tɛsalɔnika 5:1-6, NW.
10 Lâdiko dia lâsɔ, Bible mɛnyaka ɔnɛ nshi y’ekomelo yekɔ ‘etena ka tshitshɛ.’ (Enyelo 12:12; ɛdika la 17:10.) Mɛnamaka dia etenyi koleki woke k’‘etena kɛsɔ ka tshitshɛ’ kamboshila mbeta. Sho mbeyaka mbɔsa ɛnyɛlɔ ka pɔlɔfɛsi ka Danyɛlɛ; tɔ kɔndɔlaka lo yoho ya shikaa ta dia l’asa “khum’ekanga ka la diku dia kushi” nde la “khum’ekanga ka la ngel’a kushi,” ta diakɔ diakakome polo ndo l’eleko kaso kɛnɛ. (Danyele 11:5, 6) Kɛnɛ tshɛ kambotshikala dia kotshama ele ta dia komelo diayɔhɔhɔla “khum’ekanga ka la ngel’a kushi,” ta diɔkɔndwami lo Danyele 11:44, 45.—Enda lo Tshoto y’Etangelo ya Ngɔndɔ k’Esambele 1, 1987 ndo ya Ngɔndɔ ka Dikumi l’Ɔtɔi 1, 1993 (tshɛ lo Falase), dia wɛ mɛna woho wakawalembetshiya pɔlɔfɛsi kɛsɔ.
11 Sho kokaka tɛkɛta ndo dikambo dia pɔlɔfɛsi ka Yeso k’ɔnɛ: “Lukumu l’ololo lone la diulelu layusambishama lu kete tshe, uku omenyi le wedja tshe. L’okongo diku, ekumelu kayuya.” (Mateu 24:14) Ɛlɔ kɛnɛ, Ɛmɛnyi wa Jehowa wekɔ lo sala olimu awɔ lo wedja 233, lo asɛnga ndo lo bɛtshi dia nkɛtɛ dikina. Eelo mɛtɛ, ekɔ bɛtshi dimɔtshi dia nkɛtɛ diahatasambishama, koko ondo l’etena kakashikikɛ Jehowa ndamɛ, diaaso diayotanema dia lokumu l’ɔlɔlɔ koma lɛkɔ. (1 Koreto 16:9) Koko, ɛtɛkɛta wa Yeso wofundami lo Mateu 10:23 totshutshuyaka dia sho kana yimba efula: “La ntundu nyatashidiya nkindula lu esumba tshe wa lu Isariyele, On’a untu ayuya.” Kânga mbayosambishama lokumu l’ɔlɔlɔ mɛtɛ lo nkɛtɛ k’otondo, etondo wakiso shamɛ hatotokoma lo ahole tshɛ wa lo nkɛtɛ kɛnɛ dia tasambishaka losango la Diolelo la ntondo ka Yeso ‘ndja’ dia ndjokotsha tɛdikɔ ta Jehowa.
12 Tênde Enyelo 7:1, 3, lɛnɛ atawɔ ɔnɛ “pepe nyei” y’elanyelo yakakimamɛ “edja ndu lam’ayutudja ekambi a [“Nzambi kaso,” NW] tulimbitelu lu fumu yawo.” Ɔsɔ kema wodjelo wa tshapa ya ntondo yatowodjaka ase olui w’anto 144000 lam’akondjawɔ leeta l’otsha l’olongo. (Efeso 1:13) Ɔsɔ ekɔ wodjelo wa tshapa ya komelo, etena kambowɔsama lo pondjo oko ‘ɛhɔmbɔ wa Nzambi kaso’ wambohembama ndo wambotshikala la kɔlamelo. Lofulo l’akitami wa mɛtɛ, ana wa Nzambi, wanɛ wêke la lɔsɛnɔ lanɛ laa nkɛtɛ, lambokitakita efula. Ndo nto, Bible mbutaka hwe ɔnɛ ‘lo dikambo di’ɛsɔnami mbayosusama’ etatelo ka fɔnu ka woke. (Mateu 24:21, 22) Efula ka wanɛ wayaelɛ akitami waya esombe efula. Kema dikambo sɔ nto mɛnyaka ɔnɛ ekomelo kaya kaa suke?
Nsɛtɛdi ka Kɔlamelo
13 L’etena kɛnɛ, ekɔ ɔlɔlɔ sho mpokɛka lotui lo alako watosha ‘ɔhɔmbɔ wa kɔlamelo.’ (Mateu 24:45) Aya ɛnɔnyi ndekana lokama w’etondo wele “ɔhɔmbɔ” wa nshi nyɛ ekɔ lo kamba olimu la kɔlamelo oko ‘nsɛtɛdi.’ (Ezekiyele 3:17-21) Tshoto y’Etangelo ya Ngɔndɔ ka Nɛi 1, 1984 (lo Falase), yakalembetshiya ɔnɛ: “Nsɛtɛdi kɛsɔ mendaka ɔnkɔnɛ watete akambo lanɛ laa nkɛtɛ dia kotsha pɔlɔfɛsi ya lo Bible, nde mbewolaka anto ɔnɛ ‘fɔnu ka woke kahatayalaka oma k’etatelo k’andja’ kayanga ndja ndo nde sambishaka ‘lokumu l’ɔlɔlɔ l’ɛngɔ kɛmɔtshi ka dimɛna efula.’ ”—Mateu 24:21; Isaya 52:7.
14 Tohɛke wate: Nsɛtɛdi ekɔ l’ɔkɛndɛ wa mbidja mbeka di’anto mboka ‘akambo wɛnande.’ (Isaya 21:6-8) Lo nshi yakafundamaka Bible, nsɛtɛdi akadjaka mbeka dia mbewola anto, oyadi kânga wâle akɔ wakoka tomba wêke tshalola ndo watakoke mɛnama dimɛna. (2 Khumi ya Dikanga 9:17, 18) Lo nshi shɔ mɛtɛ, mbala mɔtshi nsɛtɛdi yakewolaka anto ɔnɛ wâle wekɔ lo ndjaye ko tete ndoko ndo dikambo. Koko, nsɛtɛdi k’ɔlɔlɔ hadihe onyɔ la wɔma w’ɔnɛ watokoyɔmɔndɔla. Naka luudu layɛ lekɔ lo nongola dja, ngande wayonga asolo ayɛ naka anyimi wa tɔya hawoye nɛ dia vɔ wambɔfɔnyaka ɔnɛ ondo kioko ya wodada mbadande? Sho nangaka di’anto wa ngasɔ ndjâka esadi eto kam’okawɔ ɔnɛ wâle wekɔ! Lo yoho yakɔ yâmɛ, olui wa nsɛtɛdi mbidjaka mbeka lam’ɛnawɔ di’oko akambo weta mbashaka ɔkɔkɔ wakoka dia vɔ mbewola anto.
15 Koko, l’etena katasalema akambo wa l’andja ɔnɛ, sho talekaka mpotɔ pɔlɔfɛsi yakatama. Awui wa lo nshi yakete mɛnyaka ɔnɛ paka lo pai, ndo ondo ndoko lushi lakahotɔ anto pɔlɔfɛsi ya Nzambi tshɛ la ntondo ka yɔ kotshama. Nzambi akatɛ Abarama lofulo l’ɛnɔnyi shikaa wakahombe tokanula tande monga “angendangenda lu kete ya kana,” ɔnɛ ɛnɔnyi 400. (Etatelu 15:13) Koko Mɔsɛ akayaetɛ oko otshungodi la ntondo k’etena kakashikikɛma.—Etsha 7:23-30.
16 Tênde ndo pɔlɔfɛsi yendana la Mɛsiya. Lo menda awui wakawatatshi lo nshi ya ntondo, mbokɛmaka hwe dia wakatatshi ɔnɛ Mɛsiya ayoyovɔ ndo ayoyolɔ. (Isaya 53:8-10) Koko, ambeki wa Yeso koshihodiaka dikambo sɔ. (Mateu 16:21-23) Vɔ kombeyaka ɔnɛ Danyele 7:13, 14 ayohomba kotshama lo pa·rou·siʹa ka Kristo ka lo nshi yayaye, mbut’ate lo nshi ya “wôngelo” ande. (Mateo 24:3, NW) Ɔnkɔnɛ, vɔ wakohɛ ɛnɔnyi 2000 w’etondo lo akumi wakawakambaka lam’akawambola Yeso vate: ‘Nkumadiɔndjɔ, onde etena kɛnɛ mbayoyokaloyɛ Isariyɛlɛ diolelo?’ (Etsha 1:6) Koyanga l’ɔkɔngɔ w’etshumanelo k’Akristo shikikala dimɛna, anto wakatetemala ndjâkesa ndo wakalongamɛka akambo wele bu mɛtɛ. (2 Tesalonika 2:1, 2) Kânga mbakongaka amɔtshi la tokanyi ta kashi lo tena dimɔtshi, Jehowa mɛtɛ akatshɔkɔlaka olimu w’ambetawudi asɔ wa l’eleko ka ntondo!
17 Ndo lo nshi yaso nyɛ nto, nsɛtɛdi ka nshi nyɛ ndjohombaka nɔngɔsɔla tokanyi tande lo tena la tena. Koyanga mbediɔ ɔsɔku, onde onto ɔmɔtshi kokaka mbidja tamu ɔnɛ Jehowa hatshɔkɔla ‘ɔhɔmbɔ wa kɔlamelo’? Ndo nto, naka sho menda akambo akɔ tshɛ, shi suke l’awui tshɛ wakayɔlɔngɔswama wekɔ towuiwui ta totshitshɛ? Otondo wa eokelo kaso ka Bible hatshikitanyi. Eshikikelo kaso k’ɔnɛ tekɔ lo sɛna lo nshi y’ekomelo kamboleka keketala!
Tɔsɛnɛ lo Dikambo dia Lɔsɛnɔ la Pondjo lo Nshi Yayaye
18 Ase andja ɔnɛ mbeyaka mbuta ɔnɛ: ‘Nyɛsɔ tole, tɔnɔ, nɛ dia lui kete tambovɔ,’ koko sho hatohombe monga la dionga dia ngasɔ. Bonde kayaɛnyayɛ pâ ka tshanana lo dikambo di’ɛngɛnɔngɛnɔ wakokayɛ kondja lo lɔsɛnɔ la nshi nyɛ lo dihole dia wɛ ntsha tshɛ dia ndjokondja lɔsɛnɔ la pondjo lo nshi yayaye na? Elongamelo kɛsɔ, oyadi ka lɔsɛnɔ lahakoke nanyema l’olongo kana ka lɔsɛnɔ la pondjo lanɛ laa nkɛtɛ, kema dɔ ndo kema lokanyi l’anyanya. Ɔsɔ ekɔ dikambo dia mɛtɛ diakalake Nzambi ‘lahakoke mbuta kashi.’ (Tito 1:2) Tolembetelo mɛnyaka hwe ɔnɛ kɛnɛ kalongamɛso kayanga ndja kem’edja nto! ‘Etena kambotshikala kaya bu efula.’—1 Koreto 7:29.
19 Lo mɛtɛ, dikongɛ di’akambo nɛ diambotshikala edja efula, ndo anto efula kɔfɔnyaka ɔnɛ diɔ diayotshikala edja nganɛ. Nshi nyɛ, atɔi amɔtshi mbeyaka ndjokanyiya ɔnɛ: otomeya ɔnkɔnɛ tshike ondo totometawɔ ndjâhombia awui amɔtshi lo lɔsɛnɔ. Koko, onto hakoke monga la lonyangu lo dikambo sɔ. Hatohombe mbohɛ ɔnɛ mbetawɔ ndjâhombia awui amɔtshi lo lɔsɛnɔ ekɔ dionga dimɔtshi dia woke di’Okristo. Akristo ‘ndjâsɛkaka.’ (Mateu 16:24) Hatohombe kanyiya kânga lushi ɔtɔi ɔnɛ tekɔ lo mvɔ olimu wa kombo lam’ayatshutshuyaso dia ngɛnyangɛnya Nzambi. Yeso akalake ate: “Nduku untu layutshika luudu, anangu, akadiyendi, nyangu, shi, ana kana [di]kambo dikambu diami ndu ne dia lukumu l’ololo, lahulungula kakiane l’etena kene . . . tena lukama . . . ku l’etena kayayi, lumu la pundju.” (Mako 10:29, 30) Ngande wayoyala olimu ayɛ, luudu layɛ, kana ekundji ayɛ l’ɔkɔngɔ w’ɛnɔnyi kinunu? Koko, akambo wakayasale oma lo woho wakayetawɔ ndjâhombia dia kambɛka Jehowa wayoyala la nɛmɔ efula kânga l’ɔkɔngɔ w’ɛnɔnyi miliyɔ—kânga l’ɔkɔngɔ w’ɛnɔnyi miliyara! ‘Nɛ dia Nzambi bu kanga kɔlɔ dia nde mbohɛ olimu anyu.’—Heberu 6:10.
20 Lâsɔ, lo nshi nyɛ yasɛnaso, aha sho mbohɛ lɔsɛnɔ la pondjo, toshikikɛ asho aso, ‘aha lo diangɔ diɛnama, koko lo diangɔ diahɛnama. Nɛ dia diangɔ diɛnama diekɔ dia tshanda tsho, koko diangɔ diahɛnama tshikalaka pondjo pondjo.’ (2 Koreto 4:18) Omvutshi Habakuka akafunde ate: “Enelo kene keko ne dia etena kakasonwama. To kutsha nkuma lu ekumelu kato, to huta kashi. Kuyanga to kayutshimbatshimba, nyukikungeli. To kayuya mete, hakiutshimbatshimba.” (Habakuka 2:3) ‘Dikongelo’ dia ekomelo diekɔ la shɛngiya yakɔna lo woho wakotshaso ɛkɛndɛ aso w’onto l’onto ndo wa lo nkumbo na? Tayenda akambo asɔ lo sawo diayela.
[Study Questions]
1. Awui akɔna wakalakanyaka Aseka Epikura ndo filozofi ka woho ɔsɔ kaki la shɛngiya yakɔna le Akristo amɔtshi?
2. (a) Bonde kele manguna eolwelo aki dikambo dia wâle efula? (b) Ngande wakakeketsha Paulo mbetawɔ k’Akristo wa la Kɔrɛtɔ?
3, 4. (a) Lo ndjela Petero, naa dionga dia kɔlɔ efula diakahombe ndjoyala l’anto amɔtshi lo nshi y’ekomelo? (b) Dikambo diakɔna diahombaso mbohɔka nshi tshɛ?
5, 6. Wetshelo akɔna wakokaso mbɔsa oma l’ɛnyɛlɔ ka Jakɔba la Joani?
7. (a) Ngande waki elongamelo ka lɔsɛnɔ la pondjo ‘lakalakema la ntondo ka tena di’edjedja’? (b) Ngande wakayɔsɛnɛkɔlaka Yeso elongamelo ka lɔsɛnɔ la pondjo?
8. (a) ‘Eongelo kahavɔki’ kɛdikɛdi na, ndo lande na kakisha Jehowa anto 144000? (b) Elongamelo kakɔna kakasha Yeso ‘ɛkɔkɔ ekina’?
9, 10. Tolembetelo takɔna tɛnya hwe ɔnɛ ekomelo kaya suke?
11. (a) Lo yɛdikɔ yakɔna yambokotshama Mateu 24:14? (b) Ɛtɛkɛta wa Yeso wofundami lo Mateu 10:23 ɛnyawɔ?
12. (a) Naa ‘wodjelo wa tshapa’ watawɔ l’Enyelo 7:3? (b) Okitekitelo wa lofulo l’akitami wele lanɛ laa nkɛtɛ ɛnyawɔ?
13, 14. Ɔkɛndɛ akɔna wele l’olui wa nsɛtɛdi?
15, 16. (a) Bonde kayotɔlɔngɔsɔlaka akambo amɔtshi lo eokelo kaso ka pɔlɔfɛsi ya lo Bible? (b) Wetshelo akɔna wakokaso mbɔsa oma le ekambi wa Nzambi wa kɔlamelo wakayakesaka mbala mɔtshi lo kɛnɛ kendana la eokelo ka pɔlɔfɛsi?
17. Ngande wahombaso mbɔsaka ɛlɔngɔswɛlɔ wasalema lo eokelo kaso k’Afundelo?
18. Bonde kahombaso mbewɔ dia sɛnaka paka lo dikambo dia lɔsɛnɔ la nshi nyɛ loto?
19, 20. (a) Jehowa ngande wɔsande kɛnɛ kakatasale dia mbetawɔ ndjâhombia awui amɔtshi lo lɔsɛnɔ lo dikambo dia Diolelo? (b) Lande na kahatahombe mbohɛ kanyi ya lɔsɛnɔ la pondjo?
[Caption]
[Questions]
[Caption on page 6]
[Review on page 6]
Awui Walangaso Mbohola
◻ Anto amɔtshi ambowosala ɛlɔ kɛnɛ lam’akanawɔ ɔnɛ ekomelo ka dikongɛ di’akambo nɛ kambotshimbatshimba?
◻ Ele etshina k’elongamelo kaso ka lɔsɛnɔ la pondjo?
◻ Ngande wahombaso mbɔsaka kɛnɛ kakatasale dia mbetawɔ ndjâhombia awui amɔtshi lo lɔsɛnɔ lo dikambo dia wahɔ wa Diolelo?
[Caption on page 7]
[Caption on page 7]
Olimu w’esambishelo ka lo nkɛtɛ k’otondo pombaka shila la ntondo k’ekomelo ndja