Onde Nzambi akalange di’aha anto monga popo?

Kema, aha nde mbakalange ngasɔ. Tênde bonde kakadimolaso ngasɔ.

SANGWELO diaki Nzambi aki di’anto tshɛ monga la waaso wa ngɛnangɛna la lɔsɛnɔ ndo monga l’ɔngɛnɔngɛnɔ lo yoho yɛdimi. Lo dikambo di’etongelo k’onto, sho mbadiaka ɔnɛ: “[Nzambi] akati ati: tutungi untu lufanyi la su, lu efanelu kasu. Ndi kuleli nsi ya lu ashi a waki, fudu ya l’ulungu, dungalunga dia la kete tshe, la tulambalamba tshe talamba ladiku dia kete.” L’ɔkɔngɔ wa nde shidiya la tonga diangɔ dia la nkɛtɛ, ‘Nzambi akɛnyi kɛnɛ tshɛ kakandatonge ate: kekɔ dimɛna efula.’​—⁠Etatelu 1:​26, 31.

Onde lo menda woho wele anto amɔtshi ndeka asekawɔ nshi nyɛ Nzambi kokaka mbuta ɔnɛ ‘dimɛna efula’? Kema, nɛ dia ‘Nzambi ekɔ ngandji.’ (1 Joani 4:⁠8) Lo dikambo dia nde, Bible mbutaka ɔnɛ nde ‘kema la shɔnɔdi y’anto,’ ndo ɔnɛ “ulimu andi weli uluwanyi; ne dia mbuka yandi tshe yeli sambu k’ololo. [Nzambi] a kolamelu, aha la kolo, ndi eli ololo ndu usimbwi.” (Euhwelu k’Elembe 10:17; 32:4; enda ndo lo Jobo 34:19.) Ndo ɔpɔstɔlɔ Petero akayɛnaka ate: “Mete, dimi lambeya nti: [Nzambi] kema la shonodi y’antu. Keli ndi mbetawoka wa lu wedja tshe, wane wawuka woma la watsha akambu w’ololo.”​—⁠Etsha 10:​34, 35.

Lam’ele Nzambi ekɔ ngandji, bu la shɔnɔdi ndo ekɔ la losembwe ngande wotondokoka tonga anto wele amɔtshi wekɔ l’ɔngɛnɔngɛnɔ ko akina bu na? Naka nde tshika diatɔnelo l’atei w’anto ndo etshikitanu lam’asawɔ, kete tayɛna dia dikambo sɔ hɔtɔnɛ la lonto lande. Sangwelo diande aki di’anto tshɛ ‘mbotɔ la lotshungɔ la ntsha kɛnɛ kalangawɔ ndo monga la nɛmɔ diamɛ.’ Koko, aha yoho yakandasangoya shɔ mbɛnaso ɛlɔ kɛnɛ. Lande na na?

Ɔkɔkɔ wahɛdimi anto

Yoho yakatonge Nzambi anto dia vɔ monga popo hɛnya dia kanyi yande aki dia vɔ tshɛ mbɛdima l’oseka kiambokambo tshɛ. Vɔ kokaka tshikitana lo diewo, lo saki ndo lo lonto. Vɔ kokaka tshikitana nto lo dihole kana lowandji lele l’onto lo tshunda di’anto. Oko ɛnyɛlɔ, pami la womoto kema popo l’akambo tshɛ, koko Nzambi akatonge womoto ‘oko okotsha’ wa pami. (Etatelu 2:18) Ambutshi l’ana kema la lowandji lâmɛ. Koko, kânga mbele etshikitanu ɛsɔ, apami tshɛ, la wamato tshɛ kâmɛ ndo ana wakakondja lotshungɔ lâmɛ oma le Nzambi dia vɔ ntsha kɛnɛ kakoka mbasha ɔngɛnɔngɛnɔ. La ntondo ka Nzambi, vɔ tshɛ wekɔ la nɛmɔ diamɛ.

Lo yoho yakɔ yâmɛ, ana waki Nzambi wa lo nyuma wanɛ wakatongama la ntondo k’anto wakalongola elimu ndo ɛkɛndɛ wotshikitanyi. (Etatelu 3:24; 16:​7-11; Isaya 6:6; Jude 9) Koko, aha la ndekanya elelo wakawawadjɛ, vɔ tshɛ waki l’akoka wa ngɛnangɛna la tɛdikɔ takɔshi Jehowa lo kɛnɛ kendana la lɔsɛnɔ ndo monga l’ɔngɛnɔngɛnɔ lo yɛdikɔ yâmɛ. Ɔsɔku mbakawakɛnɛmɔlaka dionga dia Nzambi di’aha la shɔnɔdi lo yoho ya diambo efula.

Lonyangu ko, etongami kɛmɔtshi ka lo nyuma kɔngɛnangɛna la tɛdikɔ taha la shɔnɔdi takɔshi Nzambi. Nde kɔngɛnangɛna la kɛnɛ kakawosha Nzambi, koko akakombola dihole dia lâdiko efula. Lo fudia saki kɛsɔ l’atei w’otema ande, nde akasɛmanɛ la Jehowa, ɔnɛ lele lo woho wende Otungi, nde ekɔ la lotshungɔ la monga lo dihole dioleki tshɛ lâdiko. Ɔnaki Nzambi la lo nyuma lakatɔmbɔkɔ ɔsɔ akayotshutshuyaka anto dia vɔ mpika Nzambi kɛnɛ koleki kɛnɛ kakandawasha. (Etatelu 3:​1-6; enda ndo l’Isaya 14:​12-14.) Omalɔkɔ, tɛdikɔ takɔshi Jehowa di’anto ngɛnangɛna la lɔsɛnɔ ndo monga l’ɔngɛnɔngɛnɔ takayɛnama dia taya oko bu popo. Etongami ka lo nyuma kakatɔmbɔkɔ kɛsɔ, mbelɛwɔ l’Ɛnyɛlɔ 20:2 ɔnɛ ‘Satana Diabolo,’ ɔnɛ lele lo kiɔkɔ y’etshikitanu wele lam’asa anto ɛlɔ kɛnɛ.

Onde anto wokonga popo lushi lɔmɔtshi?

Eelo, anto wayonga popo lushi lɔmɔtshi.

Ko akɔna ayɔlɔngɔsɔla akambo oko ɔnkɔnɛ akombolawɔ na? Aya ɛnɔnyi nkama wele mandji mɔtshi y’anto yekɔ lo ndjatshutshuya l’otema ɔtɔi dia kotsha dikambo sɔ. Lo menda woho wambowohekɔ dikotsha, anto efula wota ɔnɛ ndoko lushi lokɛdima anto tshɛ. Koko, l’Isaya 55:​10, 11 sho tanaka kanyi yaki Nzambi. Divɛsa sɔ mbutaka ɔnɛ: “Uku atolokaka mvula la lungi l’ekama la tshitshi uma l’ulungu, ku yo hayukalula utsha leko edja ndu yo yambutaloyisha kete, edja ndu yo yambutayitemisha, yambutatumbisha tumbatumba, edja ndu yo yambutasha umbuki a wuhu wehu, la undeshi wa ma ma. Osoku mbatuyalaka diui diatutumbaka uma l’unyo ami: Dio hadiutukalulaka le mi ukalulakalula. Keli dio diatutshaka lulangu lami ndu diatushidiyaka kene kakamasanguya.”

Ande ekeketshelo dia mboka ɔnɛ Jehowa Nzambi ayokotsha sangwelo diande di’oma l’etatelo dia mbisha anto tshɛ waaso wâmɛ wa vɔ ngɛnangɛna la lɔsɛnɔ ndo monga l’ɔngɛnɔngɛnɔ lee! Oko wende Nzambi k’akambo wa mɛtɛ, nde ekɔ l’ɔkɛndɛ wa kotsha kɛnɛ kakandalake. Diɛsɛ ko, nde ekɔ la lolango ndo la nkudu ka ntsha dikambo sɔ. Ko woho akɔna wayondodikotsha na?

Diɔ diayokotshama lo Diolelo nɛ diaketsha Yeso Kristo ambeki ande dia vɔ nɔmbaka ɔnɛ: ‘Shɛso lele l’elongo . . . Diolelo diayɛ diaye. Lolango layɛ latshame la nkɛtɛ oko watshamalɔ l’olongo.’ (Mateu 6:​9, 10) Eelo, Diolelo diaki Nzambi mbele ehomɔ kɛnɛ kayokamba la Jehowa dia ‘tɛtshatɛtsha waolelo tshɛ [wele ɛlɔ kɛnɛ] ko diɔ diamɛ diayotshikala pondjo la pondjo.’​—⁠Danyele 2:⁠44.

Lo ɛlɔmbwɛlɔ ka Diolelo di’oma l’olongo, tshunda di’oyoyo di’anto diayoyala. Lo dikambo sɔ, ɔpɔstɔlɔ Joani akafunde l’Enyelo, dibuku di’ekomelo dia lo Bible, ɔnɛ: “Dimi lakenyi ulungu w’uyuyu la kete k’uyuyu, ne dia ulungu wa ntundu la kete ya ntundu wakadimana.” (Enyelo 21:⁠1) Pâ tshɛ yɛna anto l’ɔtɛ wewɔ kema popo yayoshila, ɛnyɛlɔ oko: wola, hemɔ, monga ebelebese kana hawɔtwɛ kalasa, shɔnɔdi la asui akina wɛnya anto pâ.a

Ambolekana ɛnɔnyi lokama wele Ɛmɛnyi wa Jehowa wekɔ lo sanyɛ anto akambo wa Diolelo sɔ. (Mateu 24:14) L’ekimanyielo k’abuku ndo oma lo weolo awɔ vamɛ, vɔ ntshaka tshɛ dia kimanyiya anto akina dia kondja ewo kendana la sangwelo diaki Nzambi oko wofundamidiɔ lo Bible. Koko, olimu awɔ wa wetshelo wakambema l’andja w’otondo akasha anto elongamelo ka monga la lɔsɛnɔ ndo l’ɔngɛnɔngɛnɔ wa woho wâmɛ lo nshi yayaye ndo ambakondjiyɛ ɛlɔlɔ oma ko kakianɛ lo woho wayawɔ kema la shɔkɔ efula yaya oma lo dikɛngisha. Nyɛsɔ tende woho wasalema dikambo sɔ.

[Footnote]

[Caption]

[Footnote]

[Caption on page 5]

[Blurb on page 5]

Sangwelo diaki Nzambi ele di’anto tshɛ mbɛdima lo lɔsɛnɔ ndo ngɛnangɛna woho ɔtɔi