Waa na wele ekambi waki Nzambi ɛlɔ kɛnɛ?

“Keli ekukelu kasu keko uma le [Nzambi]. Ndi akatuhilula dia shu nkuka uku ekambi wa sheki y’uyuyu.”​—2 KORETO 3:5, 6.

1, 2. Ɔkɛndɛ akɔna waki l’Akristo tshɛ wa lo ntambe ka ntondo, ndo ngande wakayotshikitanaka akambo?

LO NTAMBE ka ntondo ka lo Tena Diaso nɛ, Akristo tshɛ waki l’ɔkɛndɛ wa sambisha lokumu l’ɔlɔlɔ. Vɔ tshɛ waki akitami w’esɔ ndo ekambi wa lo sheke y’oyoyo. Amɔtshi waki l’ɛkɛndɛ wa lâdiko, ɛnyɛlɔ oko mbetsha l’etshumanelo. (1 Koreto 12:27-29; Efeso 4:11) Ambutshi waki l’ɛkɛndɛ wa weke l’atei wa nkumbo. (Kolosai 3:18-21) Koko vɔ tshɛ wakayashaka l’olimu w’ohomba efula w’esambishelo. Lo Grɛkɛ ka ntondo kakafundama Afundelo w’Akristo, wakelɛka ɔkɛndɛ ɔsɔ ɔnɛ diakonia kitshimudi ate: lotumu, kana olimu.​—Kolosai 4:17.

² L’edjedja ka wonya, akambo wakayotshikitanaka. Olui ɔmɔtshi w’anto, wakawelɛka ɔnɛ ɛlɔmbɛdi kana andjashi Nzambi wakayotombaka, ndo wakate dia vɔ ato mbele la diɛsɛ dia sambisha. (Etsha 20:30) Ɛlɔmbɛdi ɛsɔ oko akawawaelɛka, waki djui ya tshitshɛ l’atei w’Akristo. Oma l’etena kɛsɔ wakayomɛ mbelɛ anto akina ɔnɛ waa laikɛ. Kânga mbaketshama wa laikɛ ɔnɛ vɔ wekɔ l’ɛkɛndɛ ɛmɔtshi, mbidja ndo okimwelo wa weshasha dia sukɛ ɛlɔmbɛdi kana andjashi Nzambi, efula wakayokomaka paka ampokami ato, mbut’ate wakayɔlaka yɔɔ lo kɛnɛ kendana l’esambishelo.

3, 4. (a) Ngande wakoma anto wa lo Lokristokristo ekambi? (b) Akɔna ɔsama oko okambi lo Lokristokristo, ndo lande na kele aha ngasɔ mbasalema akambo l’atei w’Ɛmɛnyi wa Jehowa?

³ Ɛlɔmbɛdi kana andjashi Nzambi ndjataka dia vɔ wekɔ ekambi (nɛ dia okambi, ekɔ ekadimwelo ka tshɛkɛta ya lo Latin yelɛwɔ diakonos, kitshimudi ate “os’olimu”).a Ɔnkɔnɛ, la ntondo ka vɔ koma ekambi, vɔ shidiyaka ntondo petit séminaire ko l’ɔkɔngɔ vɔ ndjoshidiya grand séminaire, oma lâsɔ ko vɔ mbalongoya losasɛrdɔsɛ. Dibuku dimɔtshi dielɛwɔ (The International Standard Bible Encyclopedia) mbutaka ɔnɛ: “‘Nongoya losasɛrdɔsɛ’ ndo ‘olongoyelo wa losasɛrdɔsɛ’ mendanaka mbala tshɛ l’ɔkɛndɛ wa laande washawɔ ekambi kana ɛlɔmbɛdi lo sala sɛlɛmɔnyi mɔtshi lo sɛkɛ, ndo lo mbakɔkɔmiya ohomba wa mbewoya Ɔtɛkɛta kana nongoya anto nsakramɛntɔ, kana sala awui akɔ ahende asɔ.” Onto akɔna alongoya ekambi losasɛrdɔsɛ na? Dibuku Nouvelle encyclopédie Britanique mbutaka ɔnɛ: “L’ɛtɛmwɛlɔ ɛnɛ wele la diɔsɛzɛ, mbala tshɛ opiskɔpɔ mbalongoyana losasɛrdɔsɛ. L’ɛtɛmwɛlɔ w’Asɔnyi wele ndo wa laikɛ mbalɔmbɔla, losasɛrdɔsɛ mbishamaka oma le waa Sirɛtanda kana ekambi wodjashi lo parɔwasɛ.”

⁴ Oma lɔkɔ mbele, l’ɛtɛmwɛlɔ wa lo Lokristokristo, tɔtɔi toto mbele la diɛsɛ dia koma okambi. Koko, dikambo sɔ bu ngasɔ l’atei w’Ɛmɛnyi wa Jehowa. Lande na na? Nɛ dia aha ngasɔ mbaketaka akambo l’etshumanelo k’Akristo ka lo ntambe ka ntondo.

Waa na wele ekambi wa mɛtɛ waki Nzambi?

5. Lo ndjela Bible, waa na wele l’atei wa wanɛ wakamba oko ekambi?

⁵ Lo ndjela Bible, atɛmɔdi tshɛ waki Jehowa, oyadi wa l’olongo kana wa la nkɛtɛ wekɔ ekambi. Andjelo wakakambɛ Yeso olimu. (Mateu 4:11; 26:53; Luka 22:43) Andjelo “nkambela[ka] wane wayukita panda ulimu.” (Heberu 1:14; Mateu 18:10) Yeso ndamɛmɛ aki okambi. Nde akate ate: “On’a untu, kundja dia antu mbukambela ulimu.” (Mateu 20:28; Romo 15:8) Lam’ele ambeki waki Yeso wakahombe ‘ndjela wanya ande dimɛna dimɛna,’ hatohombe mamba dia vɔ lawɔ mbelamɛ ekambi.​—1 Petero 2:21.

6. Ngande wakɛnya Yeso dia ambeki ande pombaka monga ekambi?

⁶ Yema tshitshɛ la ntondo ka nde mbudɛ l’olongo, Yeso akatɛ ambeki ande ate: “Nyutshu, nyete wedja tshe ambeki, nyâbatiza lu lukumbu la Papa ndu l’Ona ndu la Nyuma k’[ekila]. Nyuwaetshaki dia ntsha akambu tshe wamumunyutela.” (Mateu 28:19, 20) Ambeki waki Yeso wakahombe sala olimu ɔmɔtshi, mbut’ate mbetɛ anto ambeki. Anto wakawetɛ ambeki w’eyoyo wakahombe mbeka dia sɛdingola akambo tshɛ wakadjanga Yeso, mbidja ndo didjango dia mbetɛ anto ambeki. Ombeki wa mɛtɛ waki Yeso Kristo pombaka monga okambi oyadi pami, womoto, opalanga kana dikɛnda mende.​—Joele 2:28, 29.

7, 8. (a) Avɛsa akɔna wɛnya di’Akristo tshɛ wa mɛtɛ wekɔ ekambi? (b) Wembola akɔna wambɔma lo kɛnɛ kendana l’olowamelo?

⁷ Diɔ diakɔ diele lo Pɛntɛkɔsta ka l’ɔnɔnyi 33 T.D., ambeki waki Yeso tshɛ waki lawɔ, mbut’ate, apami la wamato, wakatatɛ mbewoya ‘akambo wa diambo waki Nzambi.’ (Etsha 2:1-11) Ndo nto, ɔpɔstɔlɔ Paulo akafunde ate: “Ne dia untu letawo l’utema andi, atuyindjamaka; la one lashula l’unyo andi, atushimbamelaka.” (Romo 10:10) Paulo kombita ɛtɛkɛta ɛsɔ paka dikambo dia djui mɔtshi y’ɛlɔmbɛdi kana andjashi Nzambi ato, koko dikambo dia ‘wanɛ tshɛ [waki] la Rɔma, oko elangimi waki Nzambi.’ (Romo 1:1, 7) Yoho yakɔ yamɛ mbele, ‘ekilami tshɛ wa l’Ɛfɛsɔ ndo akanga wa kɔlamelo waki kâmɛ la Kristo Yeso’ wakahombe ‘ndɔta dihomɔ dia lokumu l’ɔlɔlɔ la wɔladi l’ekolo wakiwɔ.’ (Efeso 1:1; 6:15) Ndo wanɛ tshɛ wakoke ɛtɛkɛta wa lo mukanda wakawatomɛ ase Hɛbɛru wakahombe ‘tetemala la etelo ka lo sɛkɛ k’elongamelo kawɔ aha la ndjɛkayɛka.’​—Heberu 10:23.

⁸ Ko lâsɔ, etena kakɔna kakoma onto okambi na? L’ɛtɛkɛta ekina, etena kakɔna kalowɔmande kana ketawɔmande oko okambi na? Ndo onto akɔna awolowola na?

Etena kakɔna kalowɔma onto oko okambi na?

9. Etena kakɔna kakalowɔma Yeso, ndo oma le onto akɔna?

⁹ Ɛnyɛlɔ kaki Yeso Kristo tokimanyiyaka dia mbeya etena kakɔna kakoma onto okambi ndo onto akɔna lolowola. Nde konongola ndoko dipɔlɔmɛ kana mbɔtɔ kalasa kɛmɔtshi lo waa seminɛrɛ dia nde mɛnya ɔnɛ nde aki okambi, ndo nde kondowɔma oma le onto. Ko lâsɔ, bonde kakokaso mbuta ɔnɛ nde aki okambi na? Sho kokaka mbuta ngasɔ nɛ dia ɛtɛkɛta waki Isaya wakandafunde lo wolo wa nyuma wakakotshama le nde: “Nyuma ka Khumadiondjo, [Jehowa] keli la mi, ne dia [Jehowa] akakiti iso dia dimi sambisha amenyi fono lukumu l’ololo.” (Luka 4:17-19; Isaya 61:1) Ɛtɛkɛta ɛsɔ wakasambiyama oma le Nzambi mɛnyaka dia Yeso akalongola ɔkɛndɛ wa mbewoya lokumu l’ɔlɔlɔ. Akawosha ɔkɛndɛ akɔ na? Lam’ele nyuma kaki Jehowa kakokite esɔ dia nde kamba olimu, lâsɔ Yeso akalowɔma mɛtɛ oma le Jehowa Nzambi. Etena kakɔna kakasalema dikambo sɔ na? Nyuma kaki Jehowa kakaye lâdiko dia Yeso lam’akandabatizama. (Luka 3:21, 22) Lâsɔ etena kakandalongola batismu mbakandalowɔma.

10. Oma le onto akɔna ahomba okambi w’Okristo ‘ndowanyema’?

¹⁰ Ko kayotota dikambo di’ambeki wa Yeso wa lo ntambe ka ntondo na? Ndo vɔ lawɔ, Jehowa mbakâsɔnɛ dia vɔ koma ekambi. Paulo akate ate: “Ekukelu kasu keko uma le [Nzambi]. Ndi akatuhilula dia shu nkuka uku ekambi wa sheki y’uyuyu.” (2 Koreto 3:5, 6) Ngande wahilola Jehowa atɛmɔdi ande dia vɔ koma ekambi na? Tɔshi ɛnyɛlɔ kaki Timɔtɛ, ɔnɛ lele Paulo akawelɛ ate “ukambi a [Nzambi] lu lukumu l’ololo la Kristu.”​—1 Tesalonika 3:2.

11, 12. Ngande wakahame Timɔtɛ edja ndo nde ndjokoma okambi?

¹¹ Ɛtɛkɛta wayela ɛnɛ wakandatɛ Timɔtɛ tokimanyiyaka dia mboka nganɛ wakandakome okambi: “Keli we, ushikikali lu akambu wakayeki ndu wakayetawo wati: Mete; ndu eyi akona akaketsha akambu ako. Uho wati: Umaka dikenda, we akeyi afundelu w’ekila weya nkewuya dia panda uma lu mbetawo le Kristu Jesu.” (2 Timote 3:14, 15) Etshina ka mbetawɔ kaki Timɔtɛ, kɛnɛ kakotshutshuya dia sala etelo ka lo sɛkɛ, aki ewo k’Afundelo. Onde nde aki paka l’ohomba wa wadielo w’onto ndamɛ lo dikambo sɔ? Kema. Timɔtɛ aki l’ohomba w’ekimanyielo dia nde kondja ewo k’oshika ndo eokelo ka lo nyuma ka kɛnɛ kakandadiaka. (Kolosai 1:9) Ɔnkɔnɛ, Timɔtɛ ‘aketawoyama.’ Lam’ele nde akeyaka Afundelo ‘oma ko dikɛnda,’ lâsɔ embetsha ande wa ntondo wakahombe monga nyango ndo tshɛnde ka womoto, nɛ dia papa kande komonga ombetawudi.​—2 Timote 1:5.

¹² Koko, dia Timɔtɛ ndjokoma okambi, akambo efula waki ohomba le nde. Ntondo, mbetawɔ kande kakakeketshama oma lo woho wakandasanganaka l’Akristo waki lo tshumanelo diaki suke la wɔ. Ngande weyaso dikambo sɔ na? Sho dieyaka nɛ dia mbala ka ntondo kakahomana Paulo nde la Timɔtɛ, ‘anangɛso wa la Lustɛra la Ikɔniyo wakandolaka’ dikɛnda dia pami sɔ. (Etsha 16:2) Lâdiko dia lâsɔ, lo nshi shɔ, anangɛso amɔtshi wakafundɛka tshumanelo mikanda l’oyango wa mbâkeketsha. Ndo emendji weteta wakawaembolaka dia mbâkeketsha. Tɛdikɔ tɔsɔ tshɛ takakimanyiya Okristo Timɔtɛ dia nde pama lo nyuma.​—Etsha 15:22-32; 1 Petero 1:1.

13. Etena kakɔna kakalowɔma Timɔtɛ oko okambi, ndo lande na kakokayɛ mbuta dia ehamelo kande ka lo nyuma kokomɛ lâsɔ?

¹³ Lo ndjela didjango diaki Yeso dia lo Mateu 28:19, 20, sho kokaka monga l’eshikikelo ɔnɛ lo yɛdikɔ mɔtshi mbetawɔ kaki Timɔtɛ kakotshutshuya dia mbokoya Yeso ndo batizama. (Mateu 3:15-17; Heberu 10:5-9) Batismu kɛsɔ aki djembetelo ya woho wakayakimɔ Timɔtɛ l’otema ɔtɔi le Nzambi. Lam’akabatizama Timɔtɛ mbakandakome okambi. Tatɛ oma l’etena kɛsɔ, wolo wakinde, ndo kɛnɛ tshɛ kaki lande kakakome kaki Nzambi. Ɔsɔ aki etenyi kɛmɔtshi k’ɔtɛmwɛlɔ ande, mbut’ate ‘olimu w’ekila.’ Koko, Timɔtɛ kombuta ɔnɛ lam’ele lambokoma okambi lâsɔ amboshila. Nde akatetemala la pama lo nyuma, ndo akakome okambi w’Okristo wambotshunda. Timɔtɛ akakome okambi wambotshunda nɛ dia nde akekesanɛ efula l’Akristo wambotshunda, oko Paulo, ndo nto wekelo w’onto ndamɛ akokimanyiya, kamɛ ndo ohetoheto wakinde l’olimu w’esambishelo.​—1 Timote 4:14; 2 Timote 2:2; Heberu 6:1.

14. Ɛlɔ kɛnɛ, ngande wahama onto ‘lasungana nongola lɔsɛnɔ la pondjo’ polo lo nde ndjokoma okambi?

¹⁴ Nshi nyɛ, ngasɔ mbalowɔma onto lo kɛnɛ kendana l’olimu w’Okristo. Onto ‘lasungana nongola lɔsɛnɔ la pondjo’ kimanyiyamaka dia mbeka awui wendana la Nzambi ndo l’asangwelo wakinde l’ekimanyielo ka wekelo wa Bible. (Etsha 13:48) Ngasɔ mbeka onto dia kitanyiya atɔndɔ wa lo Bible lo lɔsɛnɔ lande ndo woho wa nɔmba Nzambi l’oyango ɔmɔtshi wa shikaa. (Osambu 1:1-3; Tukedi 2:1-9; 1 Tesalonika 5:17, 18) Nde sanganaka kamɛ l’ambetawudi akina ndo kondjaka wahɔ oma lo mbo ya ndɛ yashama ndo oma l’ɛlɔngɔswamelo ekina wasalema oma le ‘ɔhɔmbɔ wa kɔlamelo ndo wa kɛsɔ.’ (Mateu 24:45-47; Tukedi 13:20; Heberu 10:23-25) Ɔnkɔnɛ, ombeki wa Bible pamaka lo ndjela ekongelo kɛmɔtshi ka wekelo.

15. Kakɔna katomba lam’abatizama onto? (Enda ndo lo nɔtɛ ka l’ɛse ka dikatshi.)

¹⁵ Oma lâsɔ, l’ɔkɔngɔ w’ombeki wa Bible pamia ngandji kande otsha le Jehowa Nzambi ndo monga la mbetawɔ ka wolo l’olambo wa tshungo, mbayondokombolaka ndjâkimɔ la tshondo yande tshɛ le She lele l’olongo. (Joani 14:1) Nde ndjakimɔka le Nzambi lo dɔmbɛlɔ diayondosala ndamɛ, oma lâsɔ ko nde ndjobatizama oko djembetelo ya lo sɛkɛ ya dɔmbɛlɔ dia ndjâkimɔ diakandasale lo ndamɛ. Batismu kande mbele sɛlɛmɔnyi kɛnya dia nde ambolowɔma dia ndjala okambi wamboyakimɔ tshɛ le Nzambi, mbut’ate diakɔnɛsɛ, diaki Nzambi. Nde pombaka ndjakakitola l’andja ɔnɛ. (Joani 17:16; Jakoba 4:4) Nde amboyakimɔ la tshondo yande tshɛ oko “olambo wasɛna, w’ekila, wetawɔma le Nzambi” aha la ndjakimɛ ndo aha la onyake. (Rɔmɔ 12:1, NW)b Nde ekɔ okambi waki Nzambi, l’ɛnyɛlɔ ka Kristo.

Olimu w’Okristo kɛdikɛdi na?

16. Naa ɛkɛndɛ ɛmɔtshi waki la Timɔtɛ oko wakinde okambi?

¹⁶ Olimu waki Timɔtɛ akawalembetshiyaka na? Nde aki l’ɛkɛndɛ wa lânde, ɛnyɛlɔ nde akatetetaka la Paulo. Ndo lam’akandayokomaka ekumanyi, Timɔtɛ akakambe efula l’olimu wa mbetsha ndo keketsha anyande Akristo. Koko, etenyi ka woke k’olimu ande aki esambishelo ka lokumu l’ɔlɔlɔ ndo mbetɛ anto ambeki, oko wakasale Yeso nde la Paulo. (Mateu 4:23; 1 Koreto 3:5) Paulo akatɛ Timɔtɛ ate: “Keli we, uyakimeli lu akambu tshe, enaki pa, utshaki ulimu w’usambisha, ukutshaki ekambelu kaye.”​—2 Timote 4:5, sho mbɛnganyisha alɛta ango.

17, 18. (a) L’olimu akɔna wamboyakimɔ Akristo? (b) Ohomba akɔna wele l’olimu w’esambishelo le okambi w’Okristo?

¹⁷ Ɔsɔku mbediɔ ndo le ekambi w’Akristo wa nshi nyɛ. Vɔ ndjakimɔka l’olimu wa lo sɛkɛ, olimu w’esambishelo, dia mbitsha anto akina oma l’ekimanyielo k’olambo waki Yeso ndo mbetsha akanga wa memakana dia vɔ tɛndɛ lokombo laki Jehowa. (Etsha 2:21; 4:10-12; Romo 10:13) Vɔ mɛnyaka oma l’ekimanyielo ka Bible ɔnɛ Diolelo mbele elongamelo kamɛ lo kɛnɛ kendana l’asui w’anto ndo vɔ mɛnyaka dia kânga ɛlɔ kɛnɛ, naka sho kitanyiya atɔndɔ (principes) waki Nzambi, kete tayonga la lɔsɛnɔ la dimɛna efula. (Osambu 15:1-5; Mako 13:10) Koko okambi w’Okristo hetsha ɔnɛ naka onto ambokitanyiya atɔndɔ waki Nzambi kete ekakatanu wa lo lɔsɛnɔ wambôkolɔ. Koko, nde mbetshaka ɔnɛ ‘omamemelo wa Nzambi wekɔ la daka dia lɔsɛnɔ la kakianɛ ndo dia lɔsɛnɔ lokoya.’​—1 Timote 4:8.

¹⁸ Lo mɛtɛ, ekambi efula wekɔ la toho tokina ta kamba, totshikitanyi lam’asa Okristo l’Okristo. Efula wekɔ l’ɛkɛndɛ wa lo nkumbo. (Efeso 5:1​—6:4) Dikumanyi la ekambi w’olimu wekɔ l’ɛkɛndɛ l’atei w’etshumanelo. (1 Timote 3:1, 12, 13; Tito 1:5; Heberu 13:7) Akristo efula mbishaka lonya lo wokelo wa Mbalasa ya Diolelo. Amɔtshi wekɔ la diɛsɛ dia woke dia kamba oko anto wayakimɔ la lolango lo waa Bɛtɛlɛ mɔtshi yaki Société. Koko, ekambi tshɛ w’Akristo ndjakimɔka l’olimu w’esambishelo ka lokumu l’ɔlɔlɔ. Ndoko lata ate olimu ɔsɔ hendana la mi. Oma l’olimu ɔsɔ mbeyama onto le anto dia nde ekɔ okambi wa mɛtɛ w’Okristo.

Dionga diele l’okambi w’Okristo

19, 20. Naa dionga diahomba monga l’ekambi w’Akristo?

¹⁹ Ekambi efula wa lo Lokristokristo nongamɛka dia nongola dilɛmiyɛlɔ dia lânde lo mbɔsa nkombo yele oko “owandji” ndo “mɔpɛrɛ.” Koko, okambi w’Okristo mbeyaka dia Jehowa ndamɛ mbasungana tombɔma kana tɛmɔma. (1 Timote 2:9, 10) Ndoko okambi w’Okristo wa mɛtɛ wayanga woho wa dilɛmiyɛlɔ dia ngasɔ kana nongamɛ nongola mpɛtɛ mɔtshi yotshikitanyi. (Mateu 23:8-12) Nde mbeyaka dia kitshimudi ya tshɛkɛta diakonia ele “olimu.” Ndo mbala efula Bible kambaka la vɛrbɛ yokakatanyemi la tshɛkɛta shɔ dia tɛkɛta dikambo di’onto lele l’olimu w’anto akina, ɛnyɛlɔ onto lâlɛ anto mɛsa wa diangɔ dia ndɛ. (Luka 4:39; 17:8; Joani 2:5) Kânga mbele yoho yakambawɔ la yɔ lo kɛnɛ kendana l’olimu w’Okristo mbidiyaka onto, diakrɛ ekɔ paka okambi.

²⁰ Ndoko okambi ɔtɔi w’Okristo wahomba fɔnya dia nde mamboleka ohomba. Ekambi wa mɛtɛ w’Akristo, oyadi kânga wekɔ l’ɛkɛndɛ wa weke l’etshumanelo, wekɔ ɛhɔmbɔ wele la ndjakitshakitsha. Yeso akate ate: “One lalanga ndjala wuki l’atei anyu, dieli la ndi dia ndjala ukambi anyu. One lalanga ndjala la ntundu kanyu, dieli la ndi dia ndjala fumbi kanyu.” (Mateu 20:26, 27) Dia mɛnya ambeki ande dionga di’ɔlɔlɔ diahomba monga lawɔ, Yeso akawaɔtsha ekolo, olimu watotshaka ɔhɔmbɔ woleki tshɛ l’ɛse. (Joani 13:1-15) Ɔsɔ aki mɛtɛ olimu wa ndjakitshakitsha! Ɔnkɔnɛ, ekambi w’Akristo kambɛka Jehowa Nzambi la Yeso Kristo la ndjâkitshakitsha tshɛ. (2 Koreto 6:4; 11:23) Vɔ mɛnyaka yimba ya ndjakitshakitsha lam’akambanɛwɔ olimu lam’asawɔ. Ndo lam’asambishawɔ lokumu l’ɔlɔlɔ, vɔ kambɛka anyawɔ anto waha ambetawudi l’otema ɔtɔi.​—Romo 1:14, 15; Efeso 3:1-7.

Totetemale l’olimu

21. Ngande wakafutama Paulo lo woho wakandatetemala l’olimu wakinde?

²¹ Lo ndjela Paulo, dia monga okambi, pombaka monga l’etete. Nde akatɛ ase Kɔlɔsai ate nde akasowe efula l’oyango wa mbasambisha lokumu l’ɔlɔlɔ. (Kolosai 1:24, 25) Lam’ele nde akatetemala, anto efula wakayetawɔka lokumu l’ɔlɔlɔ ndo wakayokomaka ekambi. Vɔ wakotɔ oko ana waki Nzambi ndo anango Yeso Kristo, l’elongamelo ka koma ditongami dia lo nyuma kâmɛ la nde l’olongo. Ɔsɔ mɛtɛ aki difuto dia woke di’oma l’etetemalelo kawɔ!

22, 23. (a) Bonde kele ekambi w’Akristo wa nshi nyɛ wekɔ l’ohomba w’etetemalelo? (b) Naa etombelo w’ɛlɔlɔ waya oma lo etetemalelo k’Okristo?

²² Etetemalelo ekɔ ohomba ɛlɔ kɛnɛ le wanɛ wele ekambi waki Nzambi wa mɛtɛ. Efula wekɔ lo ndɔshana lushi la lushi la hemɔ ndo l’asui waya oma lo lotshundu l’osombe. Ambutshi wekɔ lo kamba la wolo ndo efula l’atei awɔ wekɔ lo mbodia anawɔ vamɛ aha la monga l’olonganyi. La dihonga tshɛ, ana wâkɔtɔ kalasa shikaka ekolo la ntondo ka tɔsɛngiya ta kɔlɔ t’oma le anto wâdingi. Akristo efula wekɔ lo diɛnɛ l’ekakatanu wendana l’ekondjelo. Ndo efula wekɔ lo soyama kana diɛnɛ l’ɔtɛ wa ‘tena dia pâ dia wolo mbikikɛ’ diasɛnaso nɛ! (2 Timote 3:1) Eelo, suke la miliyɔ shamalo y’ekambi waki Jehowa ɛlɔ kɛnɛ kokaka mbuta kamɛ l’ɔpɔstɔlɔ Paulo ɔnɛ: “Keli lu akambu tshe, shu tayuyaenyanyaka uku ekambi wa [Nzambi]: lu ekikelu ka mamba.” (2 Koreto 6:4) Ekambi waki Nzambi hawohekɔ. Vɔ mɛtɛ pombaka mandɔma oma l’etetemalelo kawɔ.

²³ Lâdiko dia lâsɔ, oko wakidiɔ lo dikambo dia Paulo, etetemalelo mongaka l’etombelo wa diambo efula. Oma l’etetemalelo, sho kokɛka diɔtɔnganelo diele lam’asaso la Jehowa ndo ngɛnyangɛnyaka otema ande. (Tukedi 27:11) Sho keketshaka mbetawɔ kaso ndo mbetɛka anto ambeki, dia nunya nkumbo kaso k’Akristo. (1 Timote 4:16) Jehowa sukɛka ekambi ande ndo tshɔkɔlaka olimu awɔ lo nshi nyɛ y’ekomelo. Diɛsɛ oma lɔkɔ mambotshumanyema atshikadi wa 144 000, ndo mbalongamɛ miliyɔ y’anto kondja lɔsɛnɔ la pondjo lo paradiso ka lanɛ la nkɛtɛ. (Luka 23:43; Enyelo 14:1) Lo mɛtɛ, olimu w’Okristo wekɔ djembetelo ya kɛtshi kaki Jehowa. (2 Koreto 4:1) Nyɛsɔ sho tshɛ tɔshi olimu ɔsɔ la nɛmɔ ndo tonge l’ɔngɛnɔngɛnɔ nɛ dia elowa w’oma l’olimu akɔ wayotshikala pondjo.​—1 Joani 2:17.

[Nɔtɛ ya l’ɛse ka dikatshi]

Onde wɛ kokaka nembetshiya?

• Ɔkɛndɛ akɔna waki l’Akristo tshɛ wa lo ntambe ka ntondo?

• Etena kakɔna kalowɔma okambi w’Okristo ndo oma le onto akɔna?

• Dionga diakɔna diahomba monga l’okambi w’Okristo?

• Bonde kahomba okambi w’Okristo tetemala kânga lam’ende l’atei w’ekakatanu?

[Esato wa lo lɛkɛ 15]

Timɔtɛ aketshama Ɔtɛkɛta waki Nzambi oma ko dikɛnda. Nde akayokomaka okambi wambolowɔma lam’akandabatizama

[Osato wa lo lɛkɛ 17]

Batismu ekɔ djembetelo ya ndjakimɔ k’onto le Nzambi ndo tɔ mbɛnya di’onto ambolowɔma dia koma okambi

[Osato wa lo lɛkɛ 18]

Ekambi w’Akristo mbetawɔka kambɛ anto akina l’otema ɔtɔi