Wɛ kokaka kondja ɛtshɔkɔ wa Diolelo

ƆPƆSTƆLƆ Paulo akeyaka tɛkɛta dimɛna ɛtɛkɛta ɛmɔtshi wakatɛkɛtamaka lo nshi yande. Nde akalongola wetshelo wɛdimi la wɔnɛ walongola anto wele lo kalasa y’adidi ɛlɔ kɛnɛ. Nde aki la waɛsɛ ndo la lotshungɔ lakawashaka anto tshɛ waki ase Rɔma. (Etsha 21:37-40; 22:3, 28) Akambo asɔ wakakoke mbokimanyiya dia nde ngɔna ndo koma onto la lokumu. Koko, nde akate ate: “Keli akambo waki waho le mi, akambu aso lambuwaete anyanya dikambu dia Kristu . . . lambudiala uku diango dia mbikadja, dia dimi kundja Kristu.” (Filipi 3:7, 8) Bonde kakate Paulo ngasɔ na?

Paulo ɔnɛ lakeyamaka ntondo oko Saulo k’ose Tarsisi ndo osoyanyi wa wanɛ “wa[ki] lu Mbuka,” akayokomaka ombetawudi l’ɔkɔngɔ wa nde nongola ɛnɛlɔ ka Yeso ɔnɛ lakolwama ndo laki lo lotombo. (Etsha 9:1-19) Le Paulo, dikambo sɔ diakôkomɛ lo mboka k’otsha lo Damasɛkɛ akawetawoya dimɛna dia Yeso aki Mɛsiya wakalakema, kana Kristo, ɔnɛ layoyonga owandji wa lo Diolelo diakalakema. Ɛnɛlɔ kɛsɔ kakela nto otshikitanu wa mamba lo lɔsɛnɔ laki Paulo, oko wadiɛnya ɛtɛkɛta ande engo wa la diko. Lo wedi okina, oma l’otema ande w’ɔlɔlɔ ndo wosembwe, Paulo akayatshumoya.​—Ngalatiya 1:13-16.

Lo Bible, tshɛkɛta, “ndjatshumoya” kadimɔmaka mbala efula oma lo tshɛkɛta ya lo Grɛkɛ yalembetshiya mɛtɛ mɛtɛ ɔnɛ “l’ɔkɔngɔ wa mbeya,” tshɛkɛta yotshikitanyi la “mbeya la ntondo.” Ɔnkɔnɛ, ndjatshumoya kɛdikɛdi tshikitanya kanyi, dionga, oyango, kana mbikadja yoho ya lɔsɛnɔ ya kɔlɔ yaki l’onto ntondo. (Etsha 3:19; Enyelo 2:5) Lo dikambo dia Paulo, nde kɔmbɔsa dikambo sɔ diakôkomɛ lo mboka ka Damasɛkɛ oko dui diakokashimoya tsho kana oko dikambo dimɔtshi dia lo nyuma diele anyanya. Le nde dui sɔ diakodihola washo dia nde shihodia ɔnɛ yoho ya lɔsɛnɔ yaki lande la ntondo ka mbeya Kristo yaki kɔlɔ. Nde akashihodia nto ɔnɛ, dia nde kondja wahɔ oma l’ewo k’oyoyo kamondoyoshola kendana la Kristo, nde pombaka sala dui dimɔtshi dia ndowanya yoho yande ya lɔsɛnɔ.​—Romo 2:4; Efeso 4:24.

Otshikitanu wakawela ɛtshɔkɔ

Ewo kaki Nzambi kaki la Paulo ntondotondo kakaye lo yɛdikɔ y’efula oma lo yato y’ɔtɛmwɛlɔ y’Afarisɛ, lɛnɛ akinde ntondo. Dietawɔ diawɔ diaki la filozofi efula yaki anto ndo l’awui w’ashidi. L’ɔtɛ wa dikanyiyakanyiya diaki l’ase ɛtɛmwɛlɔ, ohetoheto ndo weolo wakadjaka Paulo wakalɔmbwama lo yoho ya kɔlɔ. Diakɔ diele, kânga mbakandafɔnyaka dia Nzambi mbakambɛnde, nde akalɔshanaka la Nzambi.​—Filipi 3:5, 6.

L’ɔkɔngɔ wa nde kondja ewo k’oshika kendana la Kristo ndo ɔkɛndɛ wele lande lo sangwelo diaki Nzambi, Paulo akakoke mɛna dia nde aki la ntondo k’ɔsɔnwɛlɔ ɔmɔtshi: Onde nde akahombe tshikala Ofarisɛ ko tetemala monga la dihole dia lokumu ndo dia nɛmɔ, kana tshikitanya yoho yande ya lɔsɛnɔ ndo tatɛ sala tshɛ kahombama dia mbetawɔma le Nzambi? Diɛsɛ ko, Paulo akasale ɔsɔnwɛlɔ wa dimɛna, nɛ dia nde akate ate: “Dimi haluki lukumu l’ololo sonyi, ne dia lo mbeli wulu wa [Nzambi] utsha lu panda le untu tshe letawo, ntundu le usi Juda, ku le usi Ngirika.” (Romo 1:16) Paulo akakome osambisha wele la waasaso wa lokumu l’ɔlɔlɔ lendana la Kristo ndo la Diolelo.

Ɛnɔnyi efula l’ɔkɔngɔ, Paulo akatɛ anyande Akristo ate: “Dimi hayadia uku untu lakalungula. Keli dikambo otoi mbatumutshaka: dimi lambuhela akambu wa l’okongo, lambokolamela utsha lu akambu weli la ntundu. Dimi lambusamanya utsha lu dihuli diatamatshu, dia nungula difutu dia leta l’uma l’ulungu, lakambeti [Nzambi] le Kristu Jesu.” (Filipi 3:13, 14) Paulo akakondja wahɔ oma lo lokumu l’ɔlɔlɔ nɛ dia nde akatshike la lolango lande kakokakitolaka la Nzambi ndo nde akayele l’otema ɔtɔi eyango wakɔtɔnganɛka la lolango laki Nzambi.

Ko wɛ ayoyosala na?

Ondo atonge edja kamboyoka lokumu l’ɔlɔlɔ la Diolelo diaki Nzambi. Onde elongamelo ka sɛna pondjo pondjo lo paradiso ka kokele kɔngɛnyangɛnyaka? Pombaka monga ngasɔ, nɛ dia sho tshɛ takotɔ la nsaki ka sɛna ndo ka monga la wɔladi ndo la lotui tshitshi. Bible mbutaka dia Nzambi akadje “kanyi ya pundju” l’etema aso. (Undaki 3:11) Lâsɔ kema kɔlɔ sho nongamɛ etena kayɔsɛna anto pondjo lo wɔladi ndo l’ɔngɛnɔngɛnɔ. Ndo elongamelo kɛsɔ mbatosha lokumu l’ɔlɔlɔ la Diolelo.

Koko, di’elongamelo kɛsɔ monga dikambo dia mɛtɛ, wɛ pombaka nyangiayangia ndo mbishola oma lo wekelo kɛnɛ kalembetshiya lokumu l’ɔlɔlɔ. Ɔpɔstɔlɔ Paulo akatolake ate: ‘Nyoshihodia nyamɛ kɛnɛ kalembetshiya lolango laki Nzambi l’ɔlɔlɔ, letawɔma ndo la kokele.’ (Romo 12:2) Ɔnkɔnɛ, l’ɛnyɛlɔ ka Paulo, l’ɔkɔngɔ wa wɛ kondja ewo ndo eokelo, wɛ pombaka sala ɔsɔnwɛlɔ ɔmɔtshi.

Lo wedi okina, mbeyaka monga ko wɛ ekɔ la tokanyi tɔmɔtshi lo kɛnɛ kendana la nshi yayɛ yayaye. Ohɔ dia Saulo aki la tokanyi takinde hita lo dikambo diaki Nzambi la ntondo ka nde ndjokoma ɔpɔstɔlɔ Paulo. Koko, lo dihole dia wɛ nongamɛ ɛnɛlɔ kɛmɔtshi ka lo dihindo oma le Nzambi, bonde kahayakane yimba dimɛna lo dikambo sɔ na? Yambola wate: ‘Onde dimi mɛtɛ mbeyaka lolango laki Nzambi lo kɛnɛ kendana l’anto ndo la nkɛtɛ? Djembetelo yakɔna yakokami mbisha dia shikikɛ awui wetawɔmi? Onde djembetelo yami kokaka monga shikaa lo ndjela kɛnɛ kalembetshiya Bible, Ɔtɛkɛta waki Nzambi?’ Ndoko kɔlɔ naka wɛ sala ɔsɛdingwelo wa ngasɔ lo kɛnɛ kendana l’akambo wa l’ɔtɛmwɛlɔ wetawɔyɛ. Lo mɛtɛ, wɛ pombaka sala dikambo sɔ nɛ dia Bible tokeketshaka ɔnɛ: “Nyedikaki akambu tshe: nyukimeli weli ololo.” (1 Tesalonika 5:21) Lâdiko di’akambo asɔ tshɛ, kema mbetawɔma le Nzambi mbele dikambo dioleki ohomba?​—Joani 17:3; 1 Timote 2:3, 4.

Ewandji w’ɛtɛmwɛlɔ mbeyaka tolaka nshi yayaye y’aha l’ekomelo. Koko, hatokokaki kondja ɛtshɔkɔ wayela Diolelo diaki Nzambi, naka daka sɔ hadioki etshina lo wetshelo w’oma lo Bible. Lo Dako diande dia lo Dikona dieyama efula, Yeso akatewola la wolo tshɛ ate: “Aha untu tshe latumbetaka ati: Khumadiondjo, Khumadiondjo, kayoto lu diulelu dia l’ulungu. Keli paka one latutshaka lulangu la Papa leli l’ulungu.”​—Mateu 7:21.

Lanɛ, Yeso ekɔ lo mbidja dikako vɔlɛ ɔnɛ wanɛ wasala lolango la She mbayolongola ɛtshɔkɔ wa Diolelo diaki Nzambi. Lo ɛtɛkɛta ekina, aha kɛnɛ kakoka mɛnama lo washo oko ɔlɔlɔ mbele tshɔyi ya dikambo yalembetshiya mbetawɔma le Nzambi. Diɔ diakɔ diakatetemala Yeso mbuta ate: “Lushi loso, antu efula wayumvutela vati: Khumadiondjo, Khumadiondjo, shu kumvutaka akambu wahatayi lu lukumbu laye, shu kuntundjaka edienge lu lukumbu laye, shu kuntshaka akambu wa mamba efula lu lukumbu laye? Ku dimi layâhunwela nti: Dimi halanyeyi nduku yema. Nyumanganeli, nyu atshi wa kolo.” (Mateu 7:22, 23) Mbokɛmaka hwe dia, dikambo dioleki ohomba ele sho ndjashikikɛ ɔnɛ sho shihodiaka dimɛna dimɛna kɛnɛ kalembetshiya lokumu l’ɔlɔlɔ la Diolelo ndo l’ɔkɔngɔ diko sho kɛndakɛnda lo yoho yɔtɔnganɛ lalɔ.​—Mateu 7:24, 25.

Wɛ Kokaka Kondja Ekimanyielo

Aya ndekana ɛnɔnyi 100, Ɛmɛnyi wa Jehowa wekɔ lo sambisha lokumu l’ɔlɔlɔ la Diolelo diaki Nzambi. Oma lo tshimbo y’ekanda watondjawɔ, oma l’ɛtɛkɛta watomba l’enyɔ awɔ, vɔ wekɔ lo kimanyiya anto l’andja w’otondo dia kondja ewo k’oshika ka kɛnɛ kalembetshiya Diolelo diaki Nzambi, ɛtshɔkɔ wayela Diolelo sɔ, ndo kɛnɛ kahomba onto sala dia kondja ɛtshɔkɔ akɔ.

Tambokokeketsha dia mbetawɔ losango lasambisha Ɛmɛnyi wa Jehowa. Lo mbetawɔ ndo lo mbɔtɔnganyiya lɔsɛnɔ layɛ la lokumu l’ɔlɔlɔ, wɛ kokaka kondja ɛtshɔkɔ efula, aha tsho oma ko kakianɛ, koko ndo lo nshi yayaye etena kayɔlɔmbɔla Diolelo diaki Nzambi nkɛtɛ k’otondo.​—1 Timote 4:8.

Ɔsa yɛdikɔ oma ko kakianɛ, nɛ di’ɛtshɔkɔ w’oma lo Diolelo diaki Nzambi waya suke!

[Esato wa lo lɛkɛ 7]

Oma l’ekimanyielo k’ekanda watondjawɔ ndo oma l’esambishelo ka l’onyɔ, Ɛmɛnyi wa Jehowa sambishaka lokumu l’ɔlɔlɔ la Diolelo diaki Nzambi