Onde wɛ ndjambolaka ɔnɛ ‘lend’ele Jehowa?’
“[Vɔ wakamɔ] uma le mi . . . Vo kumumbula vati: Lend’eli [Jehowa]?”—JEREMIYA 2:5, 6.
1. Kakɔna kele lo timba t’anto etena kambolawɔ ɔnɛ, “Lend’ele Nzambi?”
“LEND’ELE Nzambi?” Dimbola sɔ mimbɔmaka oma le anto efula. Amɔtshi nangaka tsho mbeya awui amɔtshi wendana l’Otungi, ɛnyɛlɔ dimbola di’ɔnɛ lende odjashinde? Akina mimbolaka dimbola sɔ l’ɔkɔngɔ wa mpokoso kɛmɔtshi komɛ anto efula kana etena kahomanawɔ vamɛ l’ekakatanu wa wolo ko hawoke bonde kaki Nzambi kombekɛ lonya lo dikambo diakɔ. Koko, ekɔ anto akina wahadje kânga yema ya yimba tshitshɛ lo dimbola sɔ nɛ dia vɔ hawetawɔ ɔnɛ Nzambi ekɔ.—Osambu 10:4.
2. Waa na watondoya lo welo wasalawɔ wa nyanga Nzambi na?
2 Ekɔ mɛtɛ, di’anto efula wetawɔ tolembetelo tɛnya dia Nzambi ekɔ. (Osambu 19:1; 104:24) Amɔtshi l’atei awɔ ngɛnangɛnaka tsho monga lo yoho mɔtshi y’ɔtɛmwɛlɔ. Koko ngandji k’efula k’akambo wa mɛtɛ kambotshutshuya miliyɔ y’anto wa lo wedja tshɛ, dia vɔ nyanga Nzambi ka mɛtɛ. Welo wasalawɔ hawɔtɔ l’ashi nɛ dia “ndi kema etali uma le untu la untu.”—Etsha 17:26-28.
3. (a) Lend’ele dihole diadjasɛ Nzambi? (b) Kakɔna kalanga mbuta Afundelo lam’ambolawɔ ɔnɛ: ‘Lend’ele Jehowa?’
3 Etena konga onto l’ewo ka mɛtɛ ka Jehowa, nde shihodiaka dia ‘Nzambi ekɔ nyuma,’ lâsɔ nde hɛnama la washo. (Joani 4:24) Yeso akelɛ Nzambi ka mɛtɛ ate, ‘Shɔmi lele l’olongo.’ Dikambo sɔ alangadiɔ nembetshiya na? Diɔ nembetshiyaka ɔnɛ dihole diadjasɛ Shɛso lele l’olongo diekɔ dihole dia lo nyuma, dioleki la diko tshɛ, oko wele olongo etale la diko dia nkɛtɛ. (Mateu 12:50; Isaya 63:15) Kânga mbahatakoke mɛna Nzambi la washo, nde mbetawɔka dia sho mbeya ndo mbeka akambo efula wendana l’asangwelo ande. (Etumbelu 33:20; 34:6,7) Nde kadimolaka wembola w’anto w’ɔlɔlɔ walanga mbeya kitshimudi ya lɔsɛnɔ. L’akambo wele la shɛngiya lo lɔsɛnɔ laso, nde toshaka etshina ka shikaa ka sho mbeya kanyi yande, mbut’ate woho wɔsande akambo akɔ ndo dia kana nsaki yaso mbɔtɔnɛka l’asangwelo ande. Nde nangaka dia sho sɛdingola akambo wele la shɛngiya lo lɔsɛnɔ laso, ndo dia sho sala la wolo l’otema ɔtɔi dia tana ekadimwelo. Lo tshimbo y’omvutshi Jeremiya, Jehowa akahangwɛ ase Isariyɛlɛ w’edjedja nɛ dia vɔ kosala dikambo sɔ. Vɔ wakeyaka lokombo laki Nzambi, koko vɔ komimbolaka ɔnɛ: ‘Lend’ele Jehowa?’ (Jeremiya 2:6) Sangwelo diaki Jehowa komonga dikambo diakawetshaka la ntondo. Vɔ konyangaka ɛlɔmbwɛlɔ kande. Etena kɔsayɛ tɛdikɔ tɔmɔtshi oyadi ta weke kana ta totshitshɛ, onde wɛ ndjambolaka wate: ‘Lend’ele Jehowa?’
Wanɛ wakayange ɛlɔmbwɛlɔ kaki Nzambi
4. Ngande wakokaso kondja wahɔ oma l’ɛnyɛlɔ kaki Davidi lo woho wakandayangaka ɛlɔmbwɛlɔ kaki Jehowa?
4 Lo dikɛnda diande, Davidi di’ɔnaki Jɛse aki la mbetawɔ ka wolo otsha le Jehowa. Nde akeyaka dia Jehowa ekɔ ‘Nzambi kasɛna.’ Davidi akɛnyi woho wakokokɛ Jehowa. Oma lo mbetawɔ ndo ngandji kaki lande lo ‘lokombo laki Jehowa,’ Davidi akadiake Ngɔliyatɛ, dikongote di’ose Filistiya diaki la dihomɔ dia ta efula. (1 Samuele 17:26, 34-51) Koko, Davidi kondjaɛkɛ le nde ndamɛ lo woho wakandasale dikambo sɔ. Nde komonga la kanyi y’ɔnɛ, kɛnɛ tshɛ kakandasalaka etena kɛsɔ, Jehowa akahombaka mbɔtshɔkɔla. L’ɛnɔnyi wakayele, mbala la mbala, Davidi akayangaka ɛlɔmbwɛlɔ kaki Jehowa etena tshɛ kakandahombaka mbɔsa tɛdikɔ. (1 Samuele 23:2; 30:8; 2 Samuele 2:1; 5:19) Nde akatetemala la nɔmba Nzambi ate: “Unimbitshiya esese aye, we [Jehowa]! Umbetsha mbuka yaye. Onombolaki lu mete kaye, umbetshaki, ne dia we keli [Nzambi k]a panda kami. Dimi latukulungamelaka yanyi tshe.” (Osambu 25:4, 5) Ɔsɔ ekɔ mɛtɛ ɛnyɛlɔ ka dimɛna efula kahombaso ndjela!
5, 6. Ngande wakayange Jɛhɔshafata Jehowa lo tena diotshikitanyi dia lo lɔsɛnɔ lande?
5 Lo nshi yakolɛka Nkumekanga Jɛhɔshafata laki owandji wa tanu lo ndjela ɔlɔndji wa Davidi, alembe wa wedja esato wakasangana wakaye dia ndjɔlɔsha Juda. Lam’akinde la ntondo k’okakatanu wa lo wodja wakahombe kandɔma esadi ɔsɔ, Jɛhɔshafata “akadji utema dia nyanga [Jehowa].” (2 Ekondo 20:1-3) Ɔsɔ komonga mbala ka ntondo kakayange Jɛhɔshafata Jehowa. Nkumekanga akanya ɔtɛmwɛlɔ wa Baala wakasalemaka oma le waa apɔsta wa lo Diolelo di’Isariyɛlɛ dia lo nɔrdɛ ndo nde akasɔnɛ dia kɛndakɛnda lo mboka ya Jehowa. (2 Ekondo 17:3, 4) Lâsɔ, ngande ‘wakayange Jɛhɔshafata Jehowa’ lam’akinde l’etena k’okakatanu na?
6 Lo dɔmbɛlɔ dia lo sɛkɛ diakandasale la Jerusalɛma l’etena ka wolo kɛsɔ, Jɛhɔshafata akɛnya dia nde akohɔka wolo wele la Jehowa woleki tshɛ. Nde akakane yimba efula lo dikambo dia sangwelo diaki Jehowa, oko wakadiɛnyama lo woho wakandanya wedja ekina dia mbisha ase Isariyɛlɛ ɛtshi kɛmɔtshi ka nkɛtɛ oko sango. Nkumekanga akeye dia nde akahombe nyanga ekimanyielo oma le Jehowa. (2 Ekondo 20:6-12) Onde Jehowa aki suke la nde l’etena kɛsɔ? Eelo. Oma lo tshimbo yaki Jahaziyɛlɛ laki ose Lɛwi, Jehowa akasha ɛlɔmbwɛlɔ ka lânde, ndo la wedi a pindju, Nde akakimanyiya ekambi Ande dia vɔ mbidja otshumba. (2 Ekondo 20:14-28) Ngande wakokayɛ ndjashikikɛ dia Jehowa ayoyakimɔ dia wɛ mbotana etena kayoyanga ɛlɔmbwɛlɔ kande na?
7. Alɔmbɛlɔ w’anto akɔna woka Nzambi?
7 Jehowa kema la shɔnɔdi. Nde nɔmbaka anto wa lo wedja tshɛ dia mboyanga lo dɔmbɛlɔ. (Osambu 65:2; Etsha 10:34, 35) Nde mbeyaka kɛnɛ kele l’etema w’anto w’ɔlɔmba. Nde toshikikɛka dia nde mbokaka alɔmbɛlɔ w’anto w’ɔlɔlɔ. (Tukedi 15:29) Nde ekɔ suke l’anto waki kombidjaka awui ande yimba l’etatelo koko woyanga kakianɛ ɛlɔmbwɛlɔ kande la ndjakitshakitsha. (Isaya 65:1) Nde mbokaka ndo alɔmbɛlɔ w’anto waki kokitanyiyaka ɛlɛmbɛ ande, koko wamboyatshumoya kakianɛ la ndjakitshakitsha. (Osambu 32:5, 6; Etsha 3:19) Koko naka onto bu l’otema w’okitanyiya otsha le Jehowa, kete nde hetawɔ alɔmbɛlɔ w’onto ɔsɔ. (Mako 7:6, 7) Tende bɛnyɛlɔ dimɔtshi.
Vɔ wakalɔmbɛ koko kokondja ekadimwelo
8. Lande na kaki Jehowa kombetawɔ dɔmbɛlɔ diaki Saulo?
8 L’ɔkɔngɔ w’omvutshi Samuɛlɛ mbutɛ Nkumekanga Saulo dia Nzambi ambowokadja l’ɔtɛ wende kema l’okitanyiya, Saulo akakusɛ adwe la ntondo ka Jehowa. (1 Samuele 15:30, 31) Koko ɔsɔ aki dilɛmiɛlɔ dia l’ɛlɔmɔ. Nsaki kaki la Saulo komonga ka kitanyiya Nzambi, koko ka monga la lokumu la ntondo k’anto. L’ɔkɔngɔ diko, lam’akayɔlɔshaka ase Filistiya ase Isariyɛlɛ, Saulo akasale oko onto layanga ɛlɔmbwɛlɔ kaki Jehowa. Koko lam’akinde kokondja okadimwelo, nde akatshu dia tɛnana la wetshi kânga mbakandeyaka dia Jehowa akasekɛ dikambo sɔ. (Euhwelu k’Elembe 18:10-12; 1 Samuele 28:6, 7) Lo tshena pe, 1 Ekondo 10:14 mbutaka lo dikambo diaki Saulo ɔnɛ: “Ndi kumumbula [Jehowa].” Lande na kata Bible ngasɔ na? Nɛ dia dɔmbɛlɔ diaki Saulo kosalema la mbetawɔ. Ɔnkɔnɛ, aki oko nde kɔnɔmba Nzambi.
9. Kakɔna kaki kɔlɔ lo woho wakalɔmbɛ Zedekiya ɛlɔmbwɛlɔ kaki Jehowa?
9 Woho akɔ wâmɛ mbaki, lam’akayasukanaka ekomelo ka diolelo dia Juda, alɔmbɛlɔ efula wakasalema ndo wakambola amvutshi waki Jehowa awui. Koko, anto wakataka dia wekɔ atɛmɔdi waki Jehowa, wakatɛmɔlaka nto ndo dikishi. (Zefaniya 1:4-6) Kânga mbakawayange ɛlɔmbwɛlɔ kaki Nzambi, vɔ kosalaka lolango lande l’otema ɔtɔi. Nkumekanga Zedekiya akalɔmbɛ Jeremiya dia nde mbayangɛ ɛlɔmbwɛlɔ kaki Jehowa. Jehowa akashile mbutɛ nkumekanga kɛsɔ kɛnɛ kakandahombe sala. Koko l’ɔtɛ wakinde komonga la mbetawɔ ndo wakandoke anto wɔma, nkumekanga kokitanyiya dui diaki Jehowa, ndo Jehowa kombosha okadimwelo okina wakandalangaka.—Jeremiya 21:1-12; 38:14-19.
10. Kakɔna kaki kɔlɔ lo woho wakayange Johanana ɛlɔmbwɛlɔ kaki Jehowa ndo wetshelo akɔna wakondjaso oma lo munga kakandasale?
10 L’ɔkɔngɔ wa Jerusalɛma ndanyema ndo w’alembe w’ase Babilɔna tɔla ase Juda lo fumbe, Johanana akalɔngɔsɔla dia tshɔ otsha l’Edjibito la djui y’ase Juda yakatshikala. Vɔ wakakongɛ akambo, koko la ntondo ka vɔ tshɔ, vɔ wakatɛ Jeremiya dia mbalɔmbɛ Jehowa woho wa mbayangɛ ɛlɔmbwɛlɔ kande. Koko lam’akiwɔ kokondja okadimwelo wakawalangaka, vɔ wakatshininala ndo wakasale paka kɛnɛ kakawakongɛ. (Jeremiya 41:16–43:7) Onde wɛ kondjaka wetshelo oma l’akambo wakete asɔ wɛnya dia naka wɛ nyanga elungi ka Jehowa, kete nde ayetawɔ dia wɛ mbotana?
‘Totetemale la shikikɛ’
11. Lande na kahombaso kamba la dako diele l’Efeso 5:10?
11 Ɔtɛmwɛlɔ wa mɛtɛ hendana tsho la wɛnyɛlɔ wa ndjakimɔ kaso lo batizama l’ashi, wɔtwɛlɔ wa lo nsanganya ya l’etshumanelo, ndo l’otombelo wa l’olimu w’esambishelo. Lɔsɛnɔ laso l’otondo mendanaka la dikambo sɔ. Lushi tshɛ sho pomanaka la tɔsɛngiya tele, tɔmɔtshi ta lo mayɛlɛ ndo tokina tɛnama hwe. Tɔsɛngiya tɔsɔ koka tonya oma lo mboka kɔtɔnɛ l’omamemelo le Nzambi. Ngande wayotosala la ntondo ka tɔsɛngiya tɔsɔ? Lam’akandafundɛka Akristo wa kɔlamelo wa l’Ɛfɛsɔ, ɔpɔstɔlɔ Paulo akâlake ate: ‘Nyotetemale la shikikɛ kɛnɛ kangɛnyangɛnya Nkumadiɔndjɔ.’ (Efeso 5:10) Ohomba wa sala dikambo sɔ mɛnyamaka l’akambo efula wɔkɔndwami l’Afundelo.
12. Lande na kaki Jehowa kɔngɛnangɛna lam’akatɔlɛ Davidi ɔshɛtɛ wa sheke otsha la Jerusalɛma?
12 L’ɔkɔngɔ w’ɔshɛtɛ wa sheke kalola le ase Isariyɛlɛ ndo wa vɔ namema ɛnɔnyi efula la Kiriyatɛ-Jearima, Nkumekanga Davidi akalange dia tɔla ɔshɛtɛ ɔsɔ la Jerusalɛma. Nde akasawola l’ewandji wa wodja ndo akawatɛ dia Ɔshɛtɛ wayotshɔ ‘naka vɔ nangaka ndo naka Jehowa mbetawɔka.’ Koko nde kɔsɛdingola dimɛna dia mbeya lolango laki Jehowa lo dikambo sɔ. Otondosala dikambo sɔ, tshike totowɛmba Ɔshɛtɛ lo pusupusu. Koko Ɔshɛtɛ wotɛmbama l’ahɛka oma le dioho di’ase Lɛwi dia Kohata oko wakadite Nzambi hwe. Kânga mbakayangaka Davidi ɛlɔmbwɛlɔ kaki Jehowa, nde kosala dikambo sɔ lo yoho ya dimɛna. Etombelo wa kɔlɔ wakatombe. Davidi akayetawɔka l’ɔkɔngɔ ate: ‘Jehowa Nzambi kaso akatosoya nɛ dia sho komboyanga lo ndjela mbekelo kaso.’—1 Ekondo 13:1-3; 15:11-13; Walelu 4:4-6, 15; 7:1-9.
13. Waohwelo akɔna wakashama lo lembo lakembama etena kakɛmbama Ɔshɛtɛ lo yoho ya dimɛna?
13 Lam’akayɛmbaka ase Lɛwi Ɔshɛtɛ oma lo luudu laki Ɔbɛdɛ-Ɛdɔmɛ polo la Jerusalɛma, vɔ wakembe lembo lakakongɛ Davidi. Lɔ laki l’ɛtɛkɛta wa eohwelo k’oshika ɔnɛ: “Nyuyangi [Jehowa] la wulu andi, nyokolameli nyanga elundji kandi! Nyuho etsha wa mamba wakandatshi, akambu andi wa mamba, la dumbwelu uma l’unyo andi.”—1 Ekondo 16:11, 12.
14. Ngande wakokaso kondja wahɔ oma l’ɛnyɛlɔ ka dimɛna kaki Sɔlɔmɔna ndo oma lo munga yakandayosalaka l’ekomelo ka lɔsɛnɔ lande?
14 La ntondo ka nyɔi kande, Davidi akalake ɔnande Sɔlɔmɔna ate: “Naka we ayûyanga [Jehowa], ndi ayuyakimo dia we mbutana.” (1 Ekondo 28:9) Lam’akandahema l’okudi, Sɔlɔmɔna akatshu la Ngibiyɔna, lɛnɛ aki ɛtɛmwɛlɔ ka dipɛma, ndo akatolambolaka Jehowa olambo. Lɛkɔ, Jehowa akatɛ Sɔlɔmɔna ate: “Onombe kene kalangaye, keli nkusha.” Dia mbisha Sɔlɔmɔna kɛnɛ kakandalɔmbɛ, Jehowa akawosha lomba ndo yimba ya nɔmbɔla Isariyɛlɛ, ndo lâdiko wa diangɔ sɔ Nde akôkotshɛ ɔngɔnyi ndo lotombo. (2 EKondo 1:3-12) Sɔlɔmɔna akakambe l’ekongelo kakasha Jehowa Davidi dia mbika tɛmpɛlɔ ka dimɛna efula. Koko lo kɛnɛ kendana l’otshukelo wa wadi, Sɔlɔmɔna konyanga ɛlɔmbwɛlɔ kaki Jehowa. Nde akatshuke wamato waki komonga atɛmɔdi waki Jehowa. L’ekomelo ka lɔsɛnɔ lande, wamato asɔ wakayonyaka otema ande oma lo mboka ka Jehowa. (1 Nkumi ya Dikanga 11:1-10) Oyadi lokumu, lomba, kana diewo diokoki monga laso, ekɔ ohomba dia ‘tetemala shikikɛ kɛnɛ kangɛnyangɛnya Nkumadiɔndjɔ’!
15. Lande na kakakoke Asa nɔmba Jehowa l’eshikikelo dia nde ayowakimanyiya lam’akaye Zɛra k’ose Etiyɔpiya dia ndjɔlɔsha Juda?
15 Ohomba wa dikambo sɔ wakaleke keketshama l’ɔkɔndɔ w’ɛlɔmbwɛlɔ kaki Asa laki okana waki Sɔlɔmɔna. Ɛnɔnyi dikumi l’ɔtɔi l’ɔkɔngɔ wa Asa mbahema lo lowandji, Zɛra k’ose Etiyɔpiya akaye la miliyɔ ɔtɔi k’alembe dia ndjɔlɔsha Juda. Onde Jehowa akahombe kokɛ Juda? Ɛnɔnyi ndekana 500 la ntondo ka lâsɔ, Jehowa akɛnya hwe kɛnɛ kakahombe anto nongamɛ naka vɔ mbohokamɛ ndo kitanyiya ɛlɛmbɛ ande, ndo kɛnɛ kakahombe mbakomɛ naka hawosadi dikambo sɔ. (Euhwelu k’Elembe 28:1, 7, 15, 25) L’etatelo k’ɛlɔmbwɛlɔ kande, Asa akanya ahole w’elambwelo ndo dikishi di’ɔtɛmwɛlɔ wa kashi lo Juda. Nde akakeketsha anto dia vɔ ‘nyanga Jehowa.’ Asa kokonga dia paka amboyohomana l’ekakatanu ko nde ndjosala dikambo sɔ. Diakɔ diele la mbetawɔ tshɛ, Asa akalɔmbɛ Jehowa dia nde mbakimanyiya. Etombelo akɔna wakonge na? Jehowa akakimanyiya ase Juda dia vɔ mbidja otshumba wa mamba.—2 Ekondo 14:2-12.
16, 17. (a) Kânga mbakadje Asa otshumba, naa waohwelo waki Jehowa wakawawosha? (b) Lam’akatakɔ Asa mboka, ekimanyielo kakɔna kakawawosha, ndo kakɔna kakandasale? (c) Ngande wakokaso kondja wahɔ etena kasɛdingolaso dionga diaki la Asa?
16 Koko, lam’akayakalolaka Asa oma la tondja otshumba, Jehowa akatome Azariya dia tohomana la nkumekanga ndo dia towotɛ ate: “Asa, we la asi Juda tshe, la asi Bendjamina nyumbukeli. [Jehowa] a[y]uyalaka la nyu lam’ayunyuyalaka kame la ndi. Naka nyu nyayûyanga, nyu nyayûtana; keli naka nyu nyayôseka, ndi ayunyoseka.” (2 Ekondo 15:2) Oma l’ohetoheto wakandayokondjaka nto oma lâsɔ, Asa akasukɛ ɔtɛmwɛlɔ wa mɛtɛ. Koko, ɛnɔnyi 24 l’ɔkɔngɔ, etena kakandahombe ndɔ ta dimɔtshi, Asa konyanga Jehowa. Nde kɔsɛdingola Ɔtɛkɛta wa Nzambi, ndo akohɛ kɛnɛ tshɛ kakasale Jehowa etena kakaye alembe w’ase Etiyɔpiya dia ndjɔlɔsha Juda. Nde akasale dikambo di’enginya dia mbɔtɔ sheke nde la Asuriya.—2 Ekondo 16:1-6.
17 L’ɔtɛ wa dikambo sɔ, Jehowa akatome omvutshi Hanani dia tɛnya Asa munga kande. Kânga l’etena kɛsɔ kakawawɛnya kanyi yaki la Jehowa lo dikambo diakɔ, ndoko kakalana le Asa dia nde kondja wahɔ. Koko nde akomala ko akadje Hanani lo lokanu. (2 Ekondo 16:7-10) Ɔsɔ mɛtɛ aki dikambo dia kɔlɔ efula! Kayotota dikambo diaso? Onde sho nyangaka Nzambi koko hatetawɔ dako? Naka ekumanyi kɛmɔtshi kayakiyanya dikambo diaso ndo kele la ngandji ambokamba la Bible dia tolaka lo woho wambotoyasha tshɛ l’andja ɔnɛ, onde sho mongaka la lowando l’ekimanyielo ka la ngandji kambotolongola kɛsɔ katɛnya ‘kɛnɛ kangɛnyangɛnya Nkumadiɔndjɔ’?
Tatohɛke dia mimbola
18. Ngande wakokaso kondja wahɔ oma l’ɛtɛkɛta wakatɛ Elihu Jɔbɔ?
18 L’etena k’ekakatanu, kânga onto lambokambɛ Jehowa olimu efula la kɔlamelo mbeyaka mbɔsa dia Jehowa ambowohɛ. Etena kakadiɛnɛka Jɔbɔ la hemɔ ka wolo, kakandavusha anande, kakandashisha diangɔ diande tshɛ, ndo kakohindɛ asekande akambo, tokanyi taki Jɔbɔ tshɛ takasembɔnɛ paka la nde ndamɛ. Elihu akawohola ate: “Nduku lambula ati: Lend’eli [Nzambi], Utungi ami.” (Jobo 35:10) Yimba ya Jɔbɔ yakahombe sembɔ otsha le Jehowa ndo nde akahombe sɛdingola dia mbeya woho wakɔsaka Jehowa dikambo sɔ. La ndjakitshakitsha tshɛ, Jɔbɔ aketawɔ waohwelo asɔ, ndo ɛnyɛlɔ kande mbeyaka tokimanyiya dia sho sala woho akɔ wâmɛ.
19. Kakɔna kaki ase Isariyɛlɛ kosalaka tena efula?
19 Ase Isariyɛlɛ wakeyaka ɔkɔndɔ wendana la kɛnɛ kakasalɛ Jehowa wodja awɔ. Koko mbala efula, vɔ wakohɛka kɛnɛ kakâsalɛ Jehowa l’akambo amɔtshi wa lânde wa lo nsɛnɔ yawɔ. (Jeremiya 2:5, 6, 8) Etena kakawahombaka mbɔsa tɛdikɔ lo lɔsɛnɔ, vɔ wakayangaka ɛngɛnɔngɛnɔ awɔ hita lo dihole dia vɔ mbidja yimba dia mbeya, ‘Lend’ele Jehowa’?—Isaya 5:11, 12.
Totetemale la mimbola ɔnɛ: ‘lend’ele Jehowa?’
20, 21. (a) Waa na wɛnya yimba yele oko nyɛ yaki la Elisha lo nyanga ɛlɔmbwɛlɔ kaki Jehowa? (b) Ngande wakokaso mbokoya ndo kondja wahɔ oma lo mbetawɔ kawɔ?
20 Lam’akakomɛ olimu waki Elidja, okambi ande wakawelɛka Elisha akɔshi okutu w’omvutshi wakatshike Elidja ko akatshu otsha l’ɔkɛdi wa Jɔrɔdana, nde akakɔmɔla okutu akɔ l’ashi ndo akambola ate: “Lend’eli [Jehowa, Nzambi] kaki Elidja?” (2 Khumi ya Dikanga 2:14) Jehowa akôkadimola dia mɛnya ɔnɛ l’etena kɛsɔ nyuma kande kaki le Elisha. Wetshelo akɔna wakondjaso oma lo dikambo sɔ?
21 Dikambo dia woho ɔsɔ diakasalema lo nshi yaso nyɛ. Akristo amɔtshi w’akitami w’esɔ wakalɔmbɔlaka olimu w’esambishelo wakavu. Wanɛ wakasɔnama dia nɔmbɔla wakasɛdingola Afundelo ndo wakalɔmbɛ Jehowa dia nde mbalɔmbɔla. Vɔ wakatetemala la mimbola ɔnɛ: ‘Lend’ele Jehowa?’ Etombelo w’oma lo dikambo sɔ ele Jehowa akatetemala la nɔmbɔla ekambi ande ndo akatshɔkɔla olimu awɔ. Onde sho mbokoyaka mbetawɔ kawɔ? (Heberu 13:7) Naka ɔsɔku mbediɔ, kete tayomamatanaka nshi tshɛ l’ɔlɔngɔswamelo waki Jehowa, tayetawɔka ɛlɔmbwɛlɔ kande, ndo tayolekaka ndjasha l’olimu wakambema l’ɛlɔmbwɛlɔ kaki Yeso Kristo.—Zekariya 8:23.
Ngande wayoyokadimola?
• La kanyi yakɔna yahombaso mimbola ɔnɛ: ‘Lend’ele Jehowa?’
• Ngande wakokaso ɛlɔ kɛnɛ kondja okadimwelo lo dimbola di’ɔnɛ: ‘Lend’ele Jehowa?’
• Lande na kahakadimola Nzambi alɔmbɛlɔ amɔtshi wɔlɔmba anto ɛlɔmbwɛlɔ?
• Naa bɛnyɛlɔ dia lo Bible diɛnya ohomba ‘wa tetemala la shikikɛ kɛnɛ kangɛnyangɛnya Nkumadiɔndjɔ’?
[Osato wa lo lɛkɛ 18]
Lande na kakatshu Saulo otsha le wetshi?
[Esato wa lo lɛkɛ 20]
Dɔmbɛlɔ, wekelo, ndo okanelo wa yimba la kɛnɛ kekaso kimanyiyaka dia mbeya ‘lɛn’ele Jehowa’