“Nyu nyakasumbama la ushinga a wulu”
“Nyu nyakasumbama la ushinga a wulu. Okone nyutumbuli [Nzambi].”—1 KORETO 6:20.
1, 2. a) Lo ndjela Ɛlɛmbɛ wa Mɔsɛ, ngande wakawahombaka salɛ ɛhɔmbɔ w’ase Isariyɛlɛ akambo? b) Ɔsɔnwɛlɔ akɔna wakasalaka ɔhɔmbɔ wakalangaka nkumɛnde?
DIBUKU Dictionnaire illustré de la Bible (Angɛlɛ) diaki Holman mbutaka ɔnɛ: “Lɔhɔmbɔ laki efula ndo laketawɔmaka l’ahole efula lo nshi y’edjedja.” Diɔ mbutaka nto ɔnɛ: “Ekondjelo ka wodja w’Edjibito, wa Ngirika, ndo wa Rɔma kakayaka oma l’olimu w’ɛhɔmbɔ. L’atei w’Akristo wa lo ntambe ka ntondo, onto ɔtɔi l’atei w’anto asato aki ɔhɔmbɔ lo wodja w’Italie, ndo l’ahole akina l’atei w’anto atanu onto ɔtɔi aki ɔhɔmbɔ.”
2 Kânga mbele lɔhɔmbɔ lakikɔ nto lo Isariyɛlɛ w’edjedja, Ɛlɛmbɛ wa Mɔsɛ wakadjanga dia ɛhɔmbɔ w’ase Heberu kondjaka ekokelo. Ɛnyɛlɔ, Ɛlɛmbɛ wakadjanga dia ose Isariyɛlɛ akakokaka kamba oko ɔhɔmbɔ paka l’edja k’ɛnɔnyi esamalo eto. L’ɔnɔnyi w’esambele, nde akahombaka ndjala ‘la lotshungɔ aha la futa ndoko ɛngɔ.’ Koko ɛlɛmbɛ wakendanaka la woho wa salɛ ɔhɔmbɔ akambo akalɔmbaka dia mbasala lo yoho ya dimɛna ndo la kɛtshi. Diakɔ diakadjanga Ɛlɛmbɛ wa Mɔsɛ didjango diayela nɛ: “Naka fumbi ambuta ati: Dimi mbukaka khumemi la wademi ndu an’ami ngandji, dimi haletawo ntshungo dia ndjala la ndjadjasela, ku khumendi ayuwela la ntundu ka [Nzambi], ayûsukanya la suku kana lasuki la ekoho, ayûtundula wushu lu tui diandi la wuulu, ku ndi ayûkambelaka ulimu pundju.”—Etumbelu 21:2-6; Akambu w’Asi Lewi 25:42, 43; Euhwelu k’Elembe 15:12-18.
3. a) Woho akɔna wa lɔhɔmbɔ laketawɔ Akristo wa lo ntambe ka ntondo? b) Kakɔna katotshutshuya dia kambɛ Nzambi?
3 Tɛdikɔ takendanaka la ɔhɔmbɔ wakalangaka ndjakimɔ la lolango lande aki didjidji dia lɔhɔmbɔ lele Akristo wa mɛtɛ lɔkɔ. Ɛnyɛlɔ, afundji wa Bible Paulo, Jakɔba, Petero ndo Jude wakayaɛnya vɔamɛ oko ɛhɔmbɔ wa Nzambi ndo wa Kristo. (Tito 1:1; Jakoba 1:1; 2 Petero 1:1; Jude 1) Paulo akohola Akristo wa la Tɛsalɔnika dia vɔ ‘wakoke dikishi diawɔ ɔkɔngɔ ko kadimɔ le Nzambi dia monga ɛhɔmbɔ waki Nzambi kasɛna ndo ka mɛtɛ.’ (1 Tesalonika 1:9) Kakɔna kakatshuya Akristo asɔ dia vɔ koma ɛhɔmbɔ waki Nzambi la lolango lawɔ na? Ko, wolo akɔna wakatshutshuyaka ɔhɔmbɔ w’ose Isariyɛlɛ dia nde mbetawɔ dia tetemala la kambɛ nkumɛnde? Shi ngandji kakandokaka nkumɛnde? Lɔhɔmbɔ l’Akristo ndjaka oma lo ngandji kokaso Nzambi. Lam’eyaso ndo wokaso Nzambi ka mɛtɛ ndo kasɛna ngandji, sho tshutshuyamaka dia mbokambɛ ‘la otema aso tshɛ ndo la anima aso tshɛ.’ (Euhwelu k’Elembe 10:12, 13) Ko kakɔna kahombama dia monga ɛhɔmbɔ waki Nzambi ndo waki Kristo? Ngande wele dikambo sɔ la shɛngiya lo lɔsɛnɔ laso la lushi la lushi?
‘Nyosale akambo tshɛ dia lotombo la Nzambi’
4. Ngande wakomaso ɛhɔmbɔ wa Nzambi ndo wa Kristo?
4 Ɔhɔmbɔ kɛdikɛdi “onto lakasombama oma le onto okina kana anto akina ndo lahomba monga la okitanyiya lo akambo tshɛ.” Sho komaka ɛhɔmbɔ waki Jehowa etena kakimɔso nsɛnɔ yaso le nde ndo kalongolaso batismu. Ɔpɔstɔlɔ Paulo akalembetshiya ate: “Alimba waha wanyu; ne dia nyu nyakasumbama la ushinga a wulu.” (1 Koreto 6:19, 20) Oshinga ɔsɔ, ekɔ olambo wa tshungo waki Yeso Kristo, wele oma lɔkɔ mbatetawɔ Nzambi oko ekambi ande, oyadi tekɔ Akristo w’akitami w’esɔ kana asekawɔ wele l’elongamelo ka nsɛna la nkɛtɛ. (Efeso 1:7; 2:13; Enyelo 5:9) Ɔnkɔnɛ, oma lo etena kalongolaso batismu, ‘sho mongaka waki Jehowa.’ (Romo 14:8) Lam’ele takasombama la dikila di’oshinga wolo diaki Yeso Kristo, sho komaka nto ɛhɔmbɔ ande ndo sho pombaka kitanyiya ɛlɛmbɛ ande.—1 Petero 1:18, 19.
5. Oko weso ɛhɔmbɔ waki Jehowa, ɔkɛndɛ akɔna woleki ohomba wele laso, ndo ngande wakokaso kotsha ɔkɛndɛ ɔsɔ?
5 Ɛhɔmbɔ pombaka kitanyiya ewandji awɔ. Lɔhɔmbɔ laso ekɔ la la lolango ndo lɔ ndjaka oma lo ngandji kokaso Owandji. 1 Joani 5:3 mbutaka ɔnɛ: “Ngandji ka [Nzambi] kene, dia shu nama elembe andi: ku elembe andi hawuleki wutshu.” Ɔnkɔnɛ leso, okitanyiya aso ekɔ djembetelo ya ngandji ndo ya dietawɔ diaso. Kɛsɔ mɛnamaka lo akambo tshɛ wasalaso. Paulo akate ate: “Kana nyayole, kana nyayono, kana dikambu tshe diayunyutsha, nyutshi dia lutumbu la [Nzambi].” (1 Koreto 10:31) Lo lɔsɛnɔ laso la lushi la lushi, sho pombaka mɛnya dia tekɔ ‘ɛhɔmbɔ waki Jehowa,’ oyadi kânga lo tokambokambo ta totshitshɛ.—Romo 12:11.
6. Ngande wele woho weso ɛhɔmbɔ waki Nzambi ekɔ la shɛngiya lo tɛdikɔ tɔsaso lo lɔsɛnɔ? Lembetshiya dikambo sɔ la ɛnyɛlɔ.
6 Ɛnyɛlɔ, etena kɔsaso tɛdikɔ, sho pombaka sala woho wa tɔ mbɔtɔnɛ la lolango laki Owandji aso wele l’olongo, Jehowa. (Malaki 1:6) Tɛdikɔ ta wolo mbeyaka mbidja okitanyiya aso otsha le Nzambi lo ohemba. Onde tayoyela dako diande lo dihole dia ndjela tokanyi ta l’otema aso ta “lukesu” ndo ta “kolo efula?” (Jeremiya 17:9) Okristo wa womoto w’onyemba welɛwɔ Melisa, aki ma la nongola batismu l’ɔkɔngɔ wa nshi ngana tsho, koko ɔlɔngɔlɔngɔ ɔmɔtshi akatatɛ mbolanga wadi. Ɔlɔngɔ ɔsɔ akɛnamaka oko onto l’ɔlɔlɔ, ndo nde akekaka Bible kâmɛ la Ɛmɛnyi wa Jehowa. Koko, ekumanyi kɛmɔtshi akasawola la Melisa lo kɛnɛ kendana la ohomba wa ndjela didjango diaki Jehowa dia tshukama “paka lu lulangu la Khumadiondjo.” (1 Koreto 7:39; 2 Koreto 6:14) Melisa akate ate: “Komonga dikambo dia wɔdu lemi dia dimi ndjela dako sɔ. Koko, dimi lakɔshi yɛdikɔ dia lam’ele lakayakimɔ le Nzambi dia sala lolango lande, layɔlɛmiya wadjango ande wokɛma hwe asɔ.” Etena kakandakanyiya kɛnɛ kakayotombaka, nde akate ate: “Lekɔ la ɔngɛnɔngɛnɔ heyama nɛ dia lakayele dako sɔ. Kombeta edja ɔlɔngɔlɔngɔ ɔsɔ akayotshikaka mbeka. Otondonga lakatetemala la lɔngɛnyi lɔsɔ, tshike kakianɛ lambotshukama la onto lele kema ombetawudi.”
7, 8. a) Lande na kahatahombe ndjakiyanya amboleka dia ngɛnyangɛnya anto? b) Sha ɛnyɛlɔ kɛnya woho wakokaso tondoya wɔma w’anto.
7 Oko weso ɛhɔmbɔ waki Nzambi, sho hatohombe monga ɛhɔmbɔ waki anto. (1 Koreto 7:23) Lo mɛtɛ, ndoko onto l’atei aso lahalange nangema oma le anto akina, koko sho hatohombe mbohɛ dia Akristo wekɔ la ɛlɛmbɛ wotshikitanyi la wɛnɛ wele l’anto wa l’andja ɔnɛ. Paulo akambola ate: “Undi ololo w’antu mbayangami?” Nde akakumiya ate: “Utunduyala dimi latongenyangenyaka antu, tshiki dimi kema [ɔhɔmbɔ w]a Kristu.” (Ngalatiya 1:10) Lâsɔ hatokoke mbetawɔ tɔsɛngiya t’asekaso ndo mona dia ngɛnyangɛnya anto. Ko lâsɔ, akokaso sala etena keso la ntondo ka tɔsɛngiya ta ngasɔ?
8 Tɔshi ɛnyɛlɔ kaki Elena, osekaseka w’Okristo wa lo wodja wa Espagne. Nde aki la asekande amɔtshi wa la kalasa waketawɔka dia kimɔ akila awɔ. Vɔ wakeyaka dia oko wele Elena Ɔmɛnyi wa Jehowa, nde hatetawɔ dia kimɔ dikila diande kana mbetawɔ dia vɔ mbodja dikila. Etena kakandakondja diaaso dia nembetshiya kalasa k’otondo dietawɔ diande, Elena aketawɔ dia mbisha sawo dimɔtshi. Nde akate ate: “Lo mɛtɛ, laki la wɔma dia sala dikambo sɔ. Koko lakayalɔngɔsɔla dimɛna, ndo etombelo wakonge waki diambo efula. Asekami ambeki efula wakatatɛ nɛmiyami, ndo ombetsha akambutɛ dia nde akangɛnangɛna woho wakamakambaka. Kɛnɛ kakaleke tshɛ ele, laki la ɔngɛnɔngɛnɔ nɛ dia lakâmɛ lokombo la Jehowa ndo lakakoke nembetshiya hwe dia mɛnya lande na kakametawɔka Afundelo.” (Etatelu 9:3, 4; Etsha 15:28, 29) Eelo, oko weso ɛhɔmbɔ waki Nzambi ndo waki Kristo, sho tshikitana. Koko, anto mbeyaka tɔlɛmiya naka tayoyalɔngɔsɔla dia mamɛ dietawɔ diaso la dilɛmiɛlɔ tshɛ.—1 Petero 3:15.
9. Wetshelo akɔna wakondjaso oma le ondjelo wakɛnama le ɔpɔstɔlɔ Joani?
9 Naka sho mbohɔka dia tekɔ ɛhɔmbɔ waki Nzambi, kete dikambo sɔ koka tokimanyiya nto dia sho monga la okitshakitsha. Lushi lɔmɔtshi, ɔpɔstɔlɔ Joani akambe heyama l’ɔtɛ wa ɛnɛlɔ kakandɛnyi ka Jerusalɛma ya l’olongo ko nde akakusama la ntondo ka ondjelo waki yɛmba awui yaki Nzambi dia mbɔtɛmɔla. Koko, ondjelo ɔsɔ akawotɛ ate: “Endi, tutshaki wuhu uku! Dimi leko ukambi uku we, ndu uku ananyo, amvutshi, ndu wane watulamaka aui wa lu buku ne. Otemole [Nzambi].” (Enyelo 22:8, 9) Ondjelo ɔsɔ mɛtɛ akasha ɛhɔmbɔ waki Nzambi tshɛ ɛnyɛlɔ ka dimɛna efula! Akristo amɔtshi mbeyaka monga la waɛsɛ wa kondja ɛkɛndɛ wa lânde l’atei w’etshumanelo. Koko, Yeso akate ate: “One lalanga ndjala wuki l’atei anyu, dieli la ndi dia ndjala ukambi anyu. One lalanga ndjala la ntundu kanyu, dieli landi dia ndjala fumbi kanyu.” (Mateu 20:26, 27) Oko weso ambeki waki Yeso, sho tshɛ tekɔ ɛhɔmbɔ.
“Shu tambutsha akambu waki la su dia ntsha”
10. Sha bɛnyɛlɔ di’oma l’Afundelo dia mɛnya ɔnɛ komonga wɔdu le ekambi waki Nzambi wa kɔlamelo dia ntshaka lolango lande nshi tshɛ.
10 Sala lolango laki Nzambi hatongaka nshi tshɛ dikambo dia wɔdu le anto wele kema kokele. Ɔprɔfɛta Mɔsɛ aki l’okandokando dia kitanyiya etena kakɔlɔmbɛ Jehowa dia nde ntshɔ dia totshungola ase Isariyɛlɛ oma lo lɔhɔmbɔ l’Edjibito. (Etumbelu 3:10, 11; 4:1, 10) L’ɔkɔngɔ wa nde nongola ɔkɛndɛ wa tewoya anto wa la Niniva losango l’elombwelo, Jona “akunela dia ndawo uma lu ashu wa [Jehowa] utsha la Tarashishi.” (Jona 1:2, 3) Baruka, laki sekeletɛlɛ kakafundɛka ɔprɔfɛta Jeremiya awui, akangunanguna etena kakandakɔmɔ otema. (Jeremiya 45:2, 3) Ngande wahombaso ntsha naka nsaki yaso kana kɛnɛ kakombolaso ɔlɔshana la osalelo wa lolango laki Nzambi na? Ɛnyɛlɔ kɛmɔtshi kakasha Yeso mbishaka okadimwelo.
11, 12. a) Lo tshena pe kɔndɔla ɛnyɛlɔ kaki Yeso kofundami lo Luka 17:7-10. b) Wetshelo akɔna wakondjaso oma lo ɛnyɛlɔ kaki Yeso?
11 Yeso akatɛkɛta dikambo di’ɔhɔmbɔ waki ma la namɛ owandji ande ɛkɔkɔ lushi l’otondo l’ekambɔ. Lam’akakalola ɔhɔmbɔ ɔsɔ la ngelo, demba kɔmɔ l’ɔkɔngɔ wa kamba wenya oko 12, owandji ande kombelɛ dia nde ndjodjasɛ ko ndɛ dimɛna la dikɔlɔ. Koko, owandji ande akawotɛ ate: “Onongoswele diango dia dimi nde, olote uya, unkambeli ulimu, edja ndu lam’ayumushila nde la no, ku l’okongo diku we ayole, ayono.” Ɔhɔmbɔ ɔsɔ akakoke ndjokotsha ehomba ande hita paka l’ɔkɔngɔ wa nde kambɛ owandji ande. Yeso akakumiya ɛnyɛlɔ kɛsɔ lo mbuta ate: “Okone ndu nyu, lam’ayunyushidiya ntsha paka akambu tshe wakawanyosengola, kanyuti nyati: Ekambi w’anyanya mbesu. Shu tambutsha akambu waki la su dia ntsha.”—Luka 17:7-10.
12 Yeso kombisha ɛnyɛlɔ kɛsɔ dia mɛnya ɔnɛ Jehowa hangɛnangɛna kɛnɛ tshɛ kasalaso l’olimu ande. Bible mbutaka hwe ɔnɛ: “[Nzambi] kema kolo, dia ndi mbuhela ulimu anyu la ngandji kakanyenya antu lu lukumbu landi.” (Heberu 6:10) Koko, wetshelo wakondjaso oma lo wɛla waki Yeso ele ɔhɔmbɔ hahombe ndjangɛnyangɛnya ndamɛ kana ndjasha paka lo wahɔ ande hita. Lam’ayakimɔso shɔamɛ le Nzambi ndo wasɔnaso dia monga ɛhɔmbɔ ande, sho mbetawɔka dia mbetsha lolango lande la ntondo ka lolango laso. Sho pombaka mbetsha lolango laki Nzambi la ntondo ka lakiso hita.
13, 14. a) Tena diakɔna diakokaso sala kɛnɛ kahatalange? b) Lande na kahombaso mbetsha lolango laki Nzambi lo dihole dia ntondo?
13 Wekelo wa mbala la mbala w’Ɔtɛkɛta wa Nzambi ndo w’ekanda waki ‘ɔhɔmbɔ wa kɔlamelo ndo wa kɛsɔ’ mbeyaka tɔlɔmba dia mbidja welo efula. (Mateu 24:45) Dui sɔ mbeyaka monga wolo djekoleko naka wadielo okongaka tshondo y’okakatanu le so kana naka okanda wadiaso wekɔ lo tɛkɛta “akambu a waki wa [Nzambi].” (1 Koreto 2:10) Onde, hatokoke ndjatshungwɛ etena ka sala ekongelo ka wekelo w’onto ndamɛ? Sho mbeyaka ndjaekiya shɔamɛ dia mbidjasɛ ko tshungola etena ka sala wekelo. Nɛ dia naka hatosadi ngasɔ, ngande wakokaso mboka nsaki ka ndɛ mbo ya “wulu ne dia etshundju w’antu”?—Heberu 5:14.
14 Kayotota dikambo di’etena kakalolaso la ngelo tambɔlɛmba l’ɔkɔngɔ wa kamba olimu lushi l’otondo? Sho mbeyaka sala la wolo dia mbɔtɔ lo nsanganya y’Akristo. Ondo sho bu la mbekelo ka sambisha angɛndangɛnda. Paulo ndamɛ akɛnyi dia mbeyaka monga tena diakokaso sambisha lokumu l’ɔlɔlɔ aha oma lo ‘lolango laso.’ (1 Koreto 9:17) Koko, sho salaka akambo asɔ nɛ dia Jehowa lele Owandji aso wa l’olongo, ndo wokaso ngandji mbatotɛ dia sho pombaka mbâsala. Ndo onde hatotongaka la ɔngɛnɔngɛnɔ ndo la ekeketshelo nshi tshɛ l’ɔkɔngɔ wa sho mbidja welo dia mbeka, dia mbɔtɔ lo nsanganya ndo dia sambisha?—Esambu 1:1, 2; 122:1; 145:10-13.
Aha mbɛwɔ ‘diangɔ diele l’ɔkɔngɔ’
15. Ngande wakatotshikɛ Yeso ɛnyɛlɔ k’okitanyiya otsha le Nzambi?
15 Yeso Kristo akɛnya okitanyiya ande otsha le She lele l’olongo lo yoho yoleki tshɛ. Nde akatɛ ambeki ande ate: “Dimi lakayi uma l’ulungu, aha dia ndjutsha lulangu lami, keli lulangu la one lakantumi.” (Joani 6:38) Etena kakinde lo shɔkɔ l’ekambɔ ka Ngɛtɛsɛmanɛ, nde akalɔmbɛ ate: “Papa, naka nkukaka, dikoho ne diamumweli. Keli aha uku alangami, paka uku alangaye.—Mateu 26:39.
16, 17. a) Ngande wahombaso mbɔsa diangɔ diakatatshike l’ɔkɔngɔ? b) Ɛnya dia Paulo aki la kanyi y’ɔlɔlɔ etena kakandɔshi wahɔ waki la nde l’andja oko “diango dia mbikadja.”
16 Yeso Kristo nangaka dia sho tshikala la kɔlamelo lo yɛdikɔ yakatɔshi ya monga ɛhɔmbɔ waki Nzambi. Nde akate ate: “Naka untu ayudja lunya lu lungu la nkutula ngombe, naka ndi ayewo, ku ndi hakuki mboto lu diulelu dia [Nzambi].” (Luka 9:62) Tetemala la kanyiya diangɔ diakatatshike l’ɔkɔngɔ bu dikambo dia dimɛna dia sala etena kakambɛso Nzambi. Koko, sho pombaka ngɛnangɛna kɛnɛ kakatakondja etena kakatasɔnɛ dia monga ɛhɔmbɔ waki Nzambi. Paulo akafundɛ ase Filipi ate: “Dimi lambete diango so tshe anyanya dia ololo wa nimbitela Kristu Jesu Khumemi. Dimi lakashisha diango tshe dikambu diandi, lambudiala uku diango dia mbikadja, dia dimi kundja Kristu.”—Filipi 3:8.
17 Ohokanyiya diangɔ diaketɛ Paulo anyanya ndo diakandasɛkɛ dia nde monga la difuto dia lo nyuma lo monga ɔhɔmbɔ waki Nzambi. Nde kotshika tsho lɔsɛnɔ la dimɛna la l’andja koko ndo diaaso diaki lande dia ndjonga owandji lo ɔtɛmwɛlɔ w’ase Juda. Otondongaka Paulo akatetemala l’ɔtɛmwɛlɔ w’ase Juda, tshike nde otokoka ndjɔsɔnwama lo dihole diele oko nɛ diaki la Simɛyɔna, ɔna aki Ngamaliɛlɛ laki ombetsha waki Paulo. (Etsha 22:3; Ngalatiya 1:14) Simɛyɔna akakome owandji w’Afarisɛ ndo akayala la shɛngiya y’efula etena kakatɔmbɔkwɛ ase Juda ase Rɔma lo 66-70 T.D., kânga mbakokaka anto amɔtshi wɔma. Nde akayodiakemaka l’ɔlɔshamelo ɔsɔ l’anya waki atɔmbɔki amɔtshi w’ase Juda kana waki alembe w’ase Rɔma.
18. Sha ɛnyɛlɔ dia mɛnya woho wele kɛnɛ kasalaso lo nyuma mbelaka difuto.
18 Ɛmɛnyi wa Jehowa efula wakayele ɛnyɛlɔ ka Paulo. Jean akate ate: “Ɛnɔnyi engana l’ɔkɔngɔ wa dimi shidiya kalasa, lakakondja olimu wa monga sekeletɛlɛ ka woke kaki avɔka ɔmɔtshi wa lokumu wa l’osomba wa Londres. Dimi lakangɛnangɛnaka olimu ami ndo lakakondjaka falanga efula, koko lakeyaka l’otema ami dia lakakokaka kambɛ Jehowa efula. L’ekomelo lakayofundaka mukanda dia tshika olimu ɔsɔ ko ntatɛ olimu w’ombatshi mboka. Lekɔ l’ɔngɛnɔngɛnɔ efula lo woho wamomokamba olimu ɔsɔ l’edja ka suke l’ɛnɔnyi 20! Olimu ami wa lo tena tshɛ wambɔngɔnya lɔsɛnɔ lami oleki olimu wa sekeletɛlɛ tshɛ. Ndoko ɛngɔ kasha ɔngɛnɔngɛnɔ ko ndeka mɛna woho wakoka Ɔtɛkɛta waki Jehowa tshikitanya lɔsɛnɔ l’onto. Kamba olimu ɔsɔ ekɔ dikambo dia diambo efula. Diangɔ dialongolaso oma le Jehowa hadiokoke mbɛdikama kânga yema la nɛ diawoshaso.”
19. Yɛdikɔ yakɔna yahombaso mbɔsa, ndo lande na?
19 Akoka aso mbeyaka ndjotshikitana l’edjedja ka wonya. Koko, ndjakimɔ kaso le Nzambi tshikalaka paka woho akɔ wâmɛ. Tayotshikalaka paka ɛhɔmbɔ waki Jehowa, ndo nde totshikaka dia shoamɛ sɔna woho wakokaso kamba la tena diaso, la wolo aso, la akoka aso ndo la kɛnɛ kele laso. Diakɔ diele, tɛdikɔ tɔsaso l’akambo asɔ mbeyaka kɛnɛmɔla ngandji kaso otsha le Nzambi. Tɔ nto mɛnyaka polo lo yɛdikɔ yakɔna yalangaso ndjahombia. (Mateu 6:33) Oyadi akoka wele lasɔ, onde hatokoke mbɔsa yɛdikɔ ya mbisha Jehowa kɛnɛ koleki dimɛna? Paulo akafunde ate: “Naka lulangu leko, layetawoma uku yediko le untu, aha yediko yaha la ndi.”—2 Koreto 8:12.
“Waho walungulanyu”
20, 21. a) Wahɔ akɔna wakondjama lo monga ɛhɔmbɔ waki Nzambi? b) Ngande wafuta Jehowa wanɛ wawosha kɛnɛ koleki dimɛna?
20 Ɛhɔmbɔ waki Nzambi hawɔsɔkishama. Koko dikambo sɔ tohandolaka oma lo yoho ya lɔhɔmbɔ ya kɔlɔ yatoshishɛ ɔngɛnɔngɛnɔ aso. Paulo akafunde ate: “Nyambutshungwama uma lu akambu wa kolo, nyambuyala fumbi ya [Nzambi]. Waho walungulanyu lu dikambu ne eli ekidiamelu, ku l’ekumelu lumu la pundju.” (Romo 6:22) Woho weso ɛhɔmbɔ waki Nzambi telaka wahɔ wa ekidiamelo lo yoho nyɛ yakondjaso wahɔ wa monga la lɔkɛwɔ l’ekila kana la pudipudi. Lâdiko dia lâsɔ, kɛsɔ tɔtɔlaka otsha lo lɔsɛnɔ la pondjo lo nshi yayaye.
21 Jehowa ekɔ la lokaho otsha le ɛhɔmbɔ ande. Etena kasalaso olimu ande la wolo aso tshɛ, nde todiholɛka “adidishi wa l’ulungu” ndo totshulwɛka “otshoko, wuhu wahaweyi nkuka lu luudu.” (Malaki 3:10) Ayonga mɛtɛ ɔngɛnɔngɛnɔ efula dia tetemala kamba oko ɛhɔmbɔ waki Jehowa pondjo pondjo!
Onde wɛ akohɔ?
• Lande na kakomaso ɛhɔmbɔ waki Nzambi?
• Ngande wɛnyaso okitanyiya aso lo lolango laki Nzambi?
• Lande na kahombaso ndjalɔngɔsɔla dia mbetsha lolango laki Jehowa la ntondo ka lolango laso?
• Lande na kahatahombe ‘mbɛwɔ diangɔ diakatatshike l’ɔkɔngɔ’?
[Osato wa lo lɛkɛ 14]
Tɛdikɔ takendanaka la ɔhɔmbɔ wakalangaka ndjakimɔ la lolango lande lo Isariyɛlɛ aki didjidji dia lɔhɔmbɔ lele Akristo wa mɛtɛ lɔkɔ
[Osato wa lo lɛkɛ 15]
Sho komaka ɛhɔmbɔ waki Nzambi etena kalongolaso batismu
[Esato wa lo lɛkɛ 15]
Akristo mbetshaka lolango laki Nzambi la ntondo