Akɔna akitanyiyayɛ, Nzambi kana anto?

‘Sho pombaka kitanyiya Nzambi oko wende owandji lo dihole dia anto.’​—ETSHA 5:29.

1. a) Naa divɛsa diosuke wekelo ɔnɛ? b) Lande na kakadjama apɔstɔlɔ lo lokanu?

TOSHUSHI ta lo tuminadi ta lâdiko t’ase Juda wakahombe mɛtɛ monga la kɛlɛ. Ase lokanu wakashishɔ. Vɔ waki apɔstɔlɔ waki Yeso Kristo, pami kakanyema oma le tuminadi ta lâdiko dia ndjakema mingu ngana la ntondo ka lâsɔ. Kakianɛ, ase tuminadi waki suke la mbikoya la ambeki ande wakalekaka mbokana la nde. Koko etena kakatshu alami dia towaɔsa, vɔ wakatane mvudu yawɔ ya lokanu hwe, kânga mbaki nkuke ndihama. Oshimu kele edja, alami wakayeyaka dia apɔstɔlɔ waki lo tɛmpɛlɔ ka la Jerusalɛma, wetsha anto akambo wendana la Yeso Kristo aha la mboka wɔma, mbuta ate olimu wakawandama l’ɔtɛ awɔ! Aha la tshimbatshimba, alami wakatshu lo tɛmpɛlɔ, wakande apɔstɔlɔ nto lo lokanu ndo oma lâsɔ wakatɔlɛ lo tuminadi.​—Etsha 5:17-27.

2. Kakɔna kakadjangɛ ondjelo ɔmɔtshi apɔstɔlɔ dia sala?

² Ondjelo ɔmɔtshi akatshungola apɔstɔlɔ oma lo lokanu. Onde dui sɔ diakashimbɛ oma lo ɛhɛnyɔhɛnyɔ ekina? Kema. Akikɔ nɛ dia ase Jerusalɛma tshɛ wakahombe mboka lokumu l’ɔlɔlɔ lendana la Yeso Kristo. Didjango diaki ondjelo le apɔstɔlɔ diaki ɔnɛ: “Nyututeli antu aui tshe wa lumu lone.” (Etsha 5:19, 20) Diakɔ diele, etena kakaye alami lo tɛmpɛlɔ, vɔ wakatane apɔstɔlɔ wakitanyiya didjango sɔ.

3, 4. a) Ngande wakakadimola Petero nde la Joani etena kakawawadjangɛ dia tshika sambisha? b) Ko ngande wakayokadimolaka apɔstɔlɔ akina?

³ Ɔpɔstɔlɔ Petero nde la Joani, esambisha ehende l’atei w’esambisha waki la dihonga ɛsɔ, wakatɔlama la ntondo ka tuminadi ndo Joseph Kayifasi, owandji wa tuminadi akawaohola la kɛlɛ tshɛ ate: “Shu takanyokokomiya shati: Tanyetshaki antu lu lukumbu [laki Yeso]. Enda, nyu nyambukutsha Jerusalema la wetshelu anyu.” (Etsha 5:28) Kayifasi takandahombe mamba dia mɛna Petero nde la Joani nto la ntondo ka tuminadi. Etena ka ntondo kakandadjangɛ apɔstɔlɔ dia tshika sambisha, vɔ wakokadimola ɔnɛ: “Naka eko ololo lu ashu a [Nzambi] dia nyukela uleki mbukela [Nzambi], nyusambuli nyame. Ne dia shu hateyi ntsha dikambu dikina, paka mvuta akambu wakatenyi la wakatuki.” Lo ɛnyɛlɔ ka ɔprɔfɛta w’edjedja Jeremiya, Petero nde la Joani kokoka tshika dia kotsha ɔkɛndɛ awɔ wa sambisha.​—Etsha 4:18-20; Jeremiya 20:9, sho mbɛnganyisha alɛta ango.

⁴ Kakianɛ, aha tsho Petero nde la Joani, koko apɔstɔlɔ tshɛ mbidja ndo Matiyasi ɔnɛ laki ka sɔnama waki la diaaso dia mɛnya lɛkɛ lakiwɔ la ntondo ka tuminadi. (Etsha 1:21-26) Etena kakawawadjangɛ dia tshika sambisha, vɔ wakakadimola la dihonga tshɛ ɔnɛ: ‘Sho pombaka kitanyiya Nzambi oko wende owandji lo dihole dia anto.’​—Etsha 5:29.

Kitanyiya Nzambi kana kitanyiya anto?

5, 6. Lande na kaki apɔstɔlɔ kokitanyiya didjango di’ase tuminadi?

⁵ Apɔstɔlɔ waki apami wakalɛnyaka ɛlɛmbɛ ndo waki kokoka tona kitanyiya didjango dia tuminadi. Koko, ndoko onto, oyadi wolo wa ngande wele lande lele la lotshungɔ la mbidjangɛ onto okina diaha kitanyiya didjango dimɔtshi diaki Nzambi. Jehowa ekɔ “Khum’Ulungu, umbuledi wa kete tshe.” (Osambu 83:18) Nde kema tsho “Umbadi wa kete tshe” koko nde ekɔ nto Ombidji w’ɛlɛmbɛ Woleki tshɛ ndo Nkumekanga ka pondjo. Ndoko didjango dia tuminadi diakakoke mbahemɛ kânga didjango ɔtɔi di’oma le Nzambi.​—Etatelu 18:25; Isaya 33:22.

⁶ Dui sɔ diaketawɔma oma le ambewi amɔtshi w’ɛlɛmbɛ wa tomanamana. Ɛnyɛlɔ, William Blackstone ombewi ɔmɔtshi w’ɛlɛmbɛ wa lo ntambe 18 w’ose Angleterre akafunde dia ndoko ɔlɛmbɛ w’onto wahomba ndɔshana la ‘ɛlɛmbɛ wa ɛnɛlɔ’ watanema lo Bible. Ɔnkɔnɛ, ase Tuminadi ta lâdiko wakatambe elelo etena kakawadjangɛ apɔstɔlɔ dia vɔ tshika sambisha. Apɔstɔlɔ kokoka kitanyiya didjango sɔ.

7. Lande na kele olimu w’esambishelo akotsha ɛlɔmbɛdi a wake kɛlɛ?

⁷ Woho wakayashikikɛ apɔstɔlɔ dia tetemala sambisha akotsha ɛlɔmbɛdi a wake kɛlɛ. Anto amɔtshi wa lo dioho di’ɛlɔmbɛdi, mbidja ndo Kayifasi ndamɛ, waki Asadukɛ waki kombetawɔka eolwelo. (Etsha 4:1, 2; 5:17) Koko, apɔstɔlɔ wakatetemala mbuta dia Yeso akolɔ oma lo nyɔi. Ndo nto, ɛlɔmbɛdi ɛmɔtshi a wake wakadje welo efula dia mbetawɔma oma le ewandji w’ase Rɔma. Lo kilombo kaki Yeso, etena kakasha Pilato anto diaaso dia vɔ mbetawɔ Yeso oko nkumekanga, ɛlɔmbɛdi a wake wakangana etale ndo wakahangɔhangɔ ɔnɛ: “Shu kema la khum’ekanga, paka Kayisa.” (Joani 19:15)a Apɔstɔlɔ kombuta tsho dia Yeso akolwama koko vɔ waketsha dia lâdiko dia lokombo la Yeso, “nduku lukumbu lukina la tshina di’ulungu lamboyama le antu, leya ntushimbela.” (Etsha 2:36; 4:12) Ɛlɔmbɛdi wakokaka wɔma dia naka anto tatɛ mendɛ le Yeso oko Owandji awɔ, kete ase Rɔma wakakoke ndja ndo ewandji w’ase Juda wakakoke shisha ‘ahole awɔ ndo wodja awɔ.’​—Joani 11:48.

8. Dako diakɔna dia lomba diakasha Ngamaliyɛlɛ ase Tuminadi ta lâdiko?

⁸ Nshi yayaye yaki apɔstɔlɔ waki Yeso Kristo yaki wodjima oto. Toshushi ta lo Tuminadi ta lâdiko wakayashikikɛ dia mbadiaka. (Etsha 5:33) Koko, ngala yakakadimɔ. Ngamaliyɛlɛ, ombewi ɔmɔtshi w’Ɛlɛmbɛ, akemala ndo akewola asekande diaha vɔ mbɔsa yɛdikɔ la esasesase. Nde akate la lomba tshɛ ɔnɛ: “Naka dikambu ne kana ulimu one weko uma le antu, ayuyala anyanya. Keli naka dio dieli uma le [Nzambi], nyu hanyeyi mbalembia.” Oma lâsɔ, Ngamaliyɛlɛ akakotsha dui dimɔ di’ohomba ɔnɛ: “Nyutukuyala uku wane walosha [Nzambi] ta.”​—Etsha 5:34, 38, 39.

9. Kakɔna kakɛnya dia olimu w’apɔstɔlɔ wakaye mɛtɛ oma le Nzambi?

⁹ Aha la onto nongamɛ, ase tuminadi waketawɔ dako diaki Ngamaliyɛlɛ. Ase tuminadi ta lâdiko “wakâkomola; wakâkokomiya vati: Tanyutaki diui lu lukumbu la Jesu, ku wakâkimo.” Lo dihole dia vɔ mboka wɔma, apɔstɔlɔ wakayashikikɛ dia kitanyiya didjango diaki ondjelo dia sambisha. Ɔnkɔnɛ, l’ɔkɔngɔ wa vɔ mbatshungola, “la lushi la lushi lu etemwelo ndu la wakawo, [apɔstɔlɔ] kumpeko mbetsha antu la nsambisha lukumu l’ololo vati: Jesu keli Kristu.” (Etsha 5:40, 42) Onde Jehowa akatshɔkɔla welo awɔ? Ko polo lo yɛdikɔ yakɔna yakandatshɔkɔla welo awɔ na? “Diui dia [Nzambi] diakafuli. Ambeki wakafuli la Jerusalema otekoya.” Ɔnkɔnɛ, ‘lemba la woke la ɛlɔmbɛdi wakatatɛ monga la mbetawɔ.’ (Etsha 6:7) Dui sɔ diakahombe mɛtɛ nyangiya ɛlɔmbɛdi a wake! Akɛnama hwe dia: Olimu wa apɔstɔlɔ wakaye mɛtɛ oma le Nzambi!

Wanɛ walɔshana la Nzambi wayɛmba ɛkɔndjɔ

10. Lo kanyi y’anto, lande na kakakoke Kayifasi fɔnya dia nde hamɔki oma lo dihole diande, koko lande na kele wɛkamu ande ɔsɔ aki wa kɔlɔ?

¹⁰ Lo ntambe ka ntondo, ewandji w’ase Rɔma mbakasɔnaka ɛlɔmbɛdi a lâdiko w’ase Juda. Joseph Kayifasi kanga ɔngɔnyi akadjama lo dihole diande oma le Valerius Gratus ndo akakambe olimu akɔ edja efula oleki ɛlɔmbɛdi efula waki la ntondo kande. Ondo Kayifasi akataka dia l’ɔtɛ w’akoka ande wa diplomatɛ ndo l’ɔtɛ wa lɔngɛnyi lande la Pilato mbakandakondja dihole sɔ koko aha l’ɔtɛ wa ɛlɔmbwɛlɔ kaki Nzambi. Lo weho akɔ tshɛ, nde akatshe munga lo ndjaɛkɛ le anto. Ɛnɔnyi esato eto l’ɔkɔngɔ w’apɔstɔlɔ tɔlama la ntondo k’ase Sheke, Kayifasi kombetawɔma nto le ewandji w’ase Rɔma ndo wakawonya ɔlɔmbɛdi a lâdiko.

11. Kakɔna kakakomɛ Pɔnsɔ Pilato ndo dikongɛ di’ase Juda di’akambo, ndo kakɔna kakokaso mbuta oma lo dui sɔ?

¹¹ Didjango dia minya Kayifasi oma lo dihole diande diakaye oma le Lucius Vitellius owandji waki Pilato, laki nguvɛrnɛrɛ ka Suriya. Ɔnkɔnɛ Pilato laki ɔngɛnyi waki Kayifasi wa ma ma kokoka mbɔtɛkɛtɛ. Ɔnɔnyi oko ɔtɔi l’ɔkɔngɔ wa Kayifasi minyɛma oma lo dihole diande, Pilato lawɔ akanyema oma lo dihole diande ndo akelamɛ la Rɔma dia tolomboyama l’ɔtɛ w’awui wa weke wakawɔsɔngwɛ. Oko wakidiɔ lo kɛnɛ kendana la ewandji w’ase Juda wakɛkamaka Kayisa, ase Rɔma wakayɔsaka ‘ahole ndo wodja awɔ.’ Dui sɔ diakasalema lo ɔnɔnyi 70 tena diaso (T.D.) etena kakalanya alembe w’ase Rɔma osomba wa Jerusalɛma mbidja ndo tɛmpɛlɔ la mbalasa k’ase Sheke. Ɛtɛkɛta ɛnɛ waki omembi w’esambo wakakotshama mɛtɛ lo dikambo sɔ! Vɔ mbutaka ɔnɛ: “Tanyekamaki ana wa khumi ya dikanga, kuyanga le untu laheyi nyushimbela”!​—Joani 11:48; Osambu 146:3.

12. Ngande wɛnya dikambo diakakomɛ Yeso dia okitanyiya le Nzambi ekɔ yoho ya lɔsɛnɔ ya lomba?

¹² Lo yoho yotshikitanyi, Nzambi akasɔnɛ Yeso Kristo lakolwama oko Ɔlɔmbɛdi a Lâdiko wa lo tɛmpɛlɔ ka woke ka lo nyuma. Ndoko onto lakoka mbonya lo dihole sɔ. Lo mɛtɛ, ‘olimu waki Yeso w’ɔlɔmbɛdi hoshama le onto okina.’ (Heberu 2:9; 7:17, 24; 9:11) Nzambi akasɔnɛ Yeso oko Shushi ya wasɛna ndo wakavu. (1 Petero 4:5) Lo olimu ɔsɔ, Yeso ayoshikikɛ kana Joseph Kayifasi ndo Pɔnsɔ Pilato kokaka monga la elongamelo ka ndjɔsɛna lo nshi yayaye.​—Mateu 23:33; Etsha 24:15.

Esambisha wa Diolelo wa nshi nyɛ wahoke wɔma

13. Nshi yaso nyɛ, olimu akɔna wɛnama dia vɔ ndja oma le anto, ndo olimu akɔna wɛnama dia vɔ ndja oma le Nzambi? Ngande weyayɛ dui sɔ?

¹³ Oko wakidiɔ lo ntambe ka ntondo, lo nshi yaso nyɛ, anto efula ‘ndɔshaka Nzambi.’ (Etsha 5:39) Ɛnyɛlɔ, etena kakatone Ɛmɛnyi wa Jehowa wa lo Allemagne dia mbetawɔ Adolf Hitler oko Führer kawɔ kana Ɔnɔmbɔdi awɔ, Hitler akatshibe dia mbashila oshiki. (Mateu 23:10) Ɔlɔngɔswamelo ande wa mbashila oshiki akɛnamaka diele oko nde akakoke mɛtɛ kotsha dikambo sɔ. Aseka Nazi wakatondoya dia munda nunu di’Ɛmɛnyi wa Jehowa ndo mbatoma lo pango ya nkanu. Vɔ wakadiake Ɛmɛnyi wa Jehowa ɛmɔtshi. Koko, aseka Nazi kokoka ndanya yɛdikɔ yakɔshi Ɛmɛnyi wa Jehowa ya tɛmɔla Nzambi ndamɛ oto ndo wakahekɔ dia shila ekambi waki Nzambi oshiki. Olimu wa Akristo asɔ wakaye oma le Nzambi, koko aha oma le anto ndo ndoko onto lakoka mbidja wekamu l’olimu wa Nzambi. Ɛnɔnyi akumi asamalo l’ɔkɔngɔ diko, akanga wa kɔlamelo wakake oma lo pango ya nkanu yaki Hitler wekɔ lo tetemala kambɛ Jehowa ‘la etema awɔ tshɛ, la anima awɔ tshɛ ndo la yimba yawɔ tshɛ,’ etena kɛnɛ kele Hitler ndo anto ande w’aseka Nazi wambotakilaka lɛhɔ ndo wohɔmaka paka l’ɔtɛ w’awui awɔ wa kɔlɔ.​—Mateu 22:37.

14. a) Welo akɔna wakadje andɔshi dia mamatanyɛ ekambi wa Nzambi awui wa kashi ndo naa etombelo wakonge la dui sɔ? b) Onde welo ɛsɔ wayela ekambi wa Nzambi pâ kahashile? (Heberu 13:5, 6)

¹⁴ Lo ɛnɔnyi wa tatɛ lam’akadje aseka Nazi welo awɔ, mandji nkina yakayele lokolo lawɔ lo ndɔshana la Jehowa ndo la ekambi ande, koko wakakite tatala. Lo wedja efula wa lo Erɔpɛ, ase ɛtɛmwɛlɔ ndo ewandji wa pɔlitikɛ wa nkeso salaka la wolo dia mɔnyɔla Ɛmɛnyi wa Jehowa lo mbuta ɔnɛ vɔ wekɔ ‘yaato y’ɔtɛmwɛlɔ ya wâle,’ dui diâmɛ diakawate lo dikambo di’Akristo wa lo ntambe ka ntondo. (Etsha 28:22) Ɔnkɔnɛ, Tuminadi ta lo Erɔpɛ tendana la lotshungɔ lele la anto aketawɔ Ɛmɛnyi wa Jehowa oko ɔtɛmwɛlɔ koko aha oko yaato y’ɔtɛmwɛlɔ. Aha la tâmu, andɔshi asɔ mbeyaka dimɛna kɛnɛ kakate tuminadi. Koko, vɔ wekɔ lo tetemala mbuta awui wa kashi lo lokombo la Ɛmɛnyi wa Jehowa. Oko etombelo wakonge la awui wa kashi asɔ ele, Akristo amɔtshi wakatshanyema oma lo elimu awɔ. Ana wele Ɛmɛnyi wa Jehowa wakahɛnyahɛnyama lo waa kalasa. Akanga a mvudu wa wɔma efula wakahembola kɔtra yawɔ yendana la mvudu yele aya edja kambokamba Ɛmɛnyi wa Jehowa layɔ oko ahole wa nsanganya. Lo awui amɔtshi, lɛɛta akatonaka mbɔsa anto amɔtshi oko ase wodja paka nɛ dia vɔ wekɔ Ɛmɛnyi wa Jehowa! Koko, Ɛmɛnyi wa Jehowa hawɔkɔmɔ demba.

15, 16. Ngande wakasale Ɛmɛnyi wa Jehowa wa la France lo menda woho walɔshawɔ olimu awɔ w’Okristo ndo lande na katetemalawɔ sambisha?

¹⁵ Ɛnyɛlɔ, lo wodja wa France anto mongaka la ekanelo k’ɔlɔlɔ ndo wamɔmbɔ wɔɔngɔ. Koko, andɔshi amɔtshi wakasukɛ ɛlɛmbɛ waki la oyango wa shimba olimu wa Diolelo. Ngande wakasale Ɛmɛnyi wa Jehowa wa lɛkɔ? Vɔ wakaleke ndjasha lo olimu awɔ lo yoho yahatasalemaka ndo dui sɔ diakonge la etombelo w’amɛna efula. (Jakoba 4:7) Paka lo ngɔndɔ shamalo tsho, lofulo l’ambeki wa Bible lakadɛ polo lo pursa 33 lo wodja ɔsɔ! Dui sɔ pombaka mɛtɛ mbotsha Satana kɛlɛ dia mɛna anto wele la etema w’ɛlɔlɔ lo wodja wa France wetawɔ lokumu l’ɔlɔlɔ. (Enyelo 12:17) Asekaso Akristo wa lo wodja wa France wekɔ la mbetawɔ lo ɛtɛkɛta waki ɔprɔfɛta Isaya wayokotshama lo dikambo diawɔ: “Ehumo tshe kambutshulama dia ndo la ye huluwana. Lulimi tshe layukutungela dikambo l’elumbwelu, we ayuludja mananu.”​—Isaya 54:17.

¹⁶ Ɛmɛnyi wa Jehowa hawɔngɛnangɛna pɛnyahɛnyama. Koko, dia kitanyiya didjango diaki Nzambi diashande Akristo tshɛ, vɔ hawokokaki ndo hawototshika dia tɛkɛta lo kɛnɛ kendana la akambo wakawoke. Vɔ ndjatshutshuyaka dia monga ase ngelo w’ɛlɔlɔ. Lɛnɛ alɔshana ɛlɛmbɛ waki Nzambi la ɛlɛmbɛ w’anto, vɔ pombaka kitanyiya Nzambi oko wende owandji.

Tatowaokake wɔma

17. a) Lande na kahatahombe mboka atunyi aso wɔma? b) Ngande wahomba monga dionga diaso otsha le wanɛ watɔhɛnyahɛnya?

¹⁷ Atunyi aso wekɔ lo wâle wa mamba. Vɔ wekɔ lo ndɔshana la Nzambi. Ɔnkɔnɛ, lo yoho yɔtɔnɛ la didjango diaki Yeso, sho nɔmbaka dikambo dia wanɛ watɔhɛnyahɛnya lo dihole dia sho mbaoka wɔma. (Mateu 5:44) Sho nɔmbaka dia naka onto ɔmɔtshi ekɔ lo ndɔsha Nzambi aha la nde mbeya oko waki Saulo ka la Taraso, kete la kɛtshi tshɛ Jehowa ayowodihola washo dia nde mɛna akambo wa mɛtɛ. (2 Koreto 4:4) Saulo akakome ɔpɔstɔlɔ w’Okristo wakawelɛka ɔnɛ Paulo ndo akasowe heyama lo anya wa ewandji wa lo nshi yande. Koko, nde akatetemala mbohola asekande ambetawudi “dia mbetawo embuledi, ndu ewandji, la dia ndjala la ukitanyia, la dia ndjalongosola lu elimu w’ololo tshe. Tawotengaki untu, tawuyalaki la ngala, keli wayali la memakana, wenya antu tshe ndjakitshakitsha lu akambu tshe.” (Tito 3:1, 2) Ɛmɛnyi wa Jehowa wa la France ndo wa lo ahole akina ndjatshutshuyaka dia kamba la dako sɔ.

18. a) Lo toho takɔna takoka Jehowa tshungola ekambi ande? b) Kakɔna kayotomba lo ekomelo?

¹⁸ Nzambi akatɛ ɔprɔfɛta Jeremiya ɔnɛ: “Dimi leko kame la ye dia nkutshungula.” (Jeremiya 1:8) Ngande wakoka totshungola Jehowa oma lo ɛhɛnyɔhɛnyɔ wa nshi nyɛ? Nde koka monyiya shushi mɔtshi yaha la shɔnɔdi yele oko Ngamaliyɛlɛ. Kana nde mbeyaka mɛna dimɛna dia owandji ɔmɔtshi wele la ekanelo k’ɔlɔlɔ pɛna owandji okina wa ngala kana wa kɔlɔ efula. Koko tena dimɔtshi, Jehowa mbeyaka tshika dia ɛhɛnyɔhɛnyɔ w’ekambi ande tokotetemala. (2 Timote 3:12) Naka Nzambi ambotshika dia sho pɛnyahɛnyama, kete mbala tshɛ nde ayotoshaka wolo wa sho mbikikɛ ɛhɛnyɔhɛnyɔ akɔ. (1 Koreto 10:13) Oyadi dui diakɔna tshɛ diakoka Nzambi tshika, sho mbeyaka shikaa dia l’ekomelo, wanɛ walɔsha ekambi wa Nzambi wekɔ lo ndɔshana la Nzambi ndo onto tshɛ lalɔsha Nzambi hatodja otshumba.

19. Naa divɛsa diaso di’ɔnɔnyi 2006 ndo lande na kele divɛsa sɔ kokaka mɛtɛ?

¹⁹ Yeso akatɛ ambeki ande dia vɔ nongamɛ asui. (Joani 16:33) Lo kɛnɛ kendana la dui sɔ, ɛtɛkɛta wele le Etsha 5:29 wekɔ mɛtɛ ɛtɛkɛta w’ohomba efula: ‘Sho pombaka kitanyiya Nzambi oko wende owandji lo dihole di’anto.’ Lo ɔkɔkɔ ɔsɔ, ɛtɛkɛta w’amɛna efula ɛsɔ wakasɔnama dia monga divɛsa dia Ɛmɛnyi wa Jehowa di’ɔnɔnyi 2006. Nyɛsɔ toyashikikɛ dia kitanyiyaka Nzambi oko wende owandji ɔnɔnyi wayaye w’otondo ndo lo pondjo pondjo oyadi kakɔna kakoka tokomɛ lo awui tshɛ!

[Nɔte ka l’ɛse ka dikatshi]

Onde wɛ koka kadimola?

• Ɛnyɛlɔ kakɔna kakeketsha kakatotshikɛ apɔstɔlɔ lo yoho yakawadiɛnɛ la ɔlɔshamelo?

• Lande na kahombaso kitanyiyaka Nzambi tena tshɛ oko wende owandji lo dihole di’anto?

• Andɔshi aso wekɔ lo ndɔsha onto akɔna mɛtɛ?

• Etombelo akɔna wakokaso nongamɛ lo dikambo dia wanɛ wakikɛ ɛhɛnyɔhɛnyɔ?

[Efundelo wa l’etei w’odingɔ wa lo lɛkɛ 7]

Divɛsa di’ɔnɔnyi 2006 diayonga ɔnɛ: ‘Sho pombaka kitanyiya Nzambi oko wende owandji lo dihole dia anto.’​—Etsha 5:29

[Osato wa lo lɛkɛ 3]

‘Sho pombaka kitanyiya Nzambi oko wende owandji lo dihole dia anto’

[Osato wa lo lɛkɛ 5]

Kayifasi akayaɛkɛka le anto koko aha le Nzambi