Anto w’eyoyo wa lo Olui-walɔmbɔla
LA PINDJU ka Lushi la sato, Ngɔndɔ k’enanɛi 24, 2005, nkumbo ya Bɛtɛlɛ ya l’États-Unis ndo ka la Canada, wakayelaka l’ekimanyielo ka video ɔkɛtshanyelo wa divɛsa dia lushi la lushi oma lo Bɛtɛlɛ ka la Brooklyn wakoke diewoyelo di’ɔngɛnɔngɛnɔ efula. Tatɛ Ngɔndɔ ka divwa 1, 2005, ɔnangɛso Geoffrey Jackson la ɔnangɛso Anthony Morris III wakakotshama lo Olui-walɔmbɔla w’Ɛmɛnyi wa Jehowa.
Ɔnangɛso Jackson akatatɛ olimu w’ombatshi mboka lo Ngɔndɔ ka hende 1971 la Tasmanie, disɛnga dimɔtshi dia lo wodja wa Australie. Lo Ngɔndɔ ka samalo 1974, nde akatshukana la kadiyɛso Jeanette, (lelɛwɔ lo tshena pe Jenny). Kombeta edja, vɔ wakasɔnama dia kamba oko ambatshi mboka wa lânde. Oma lo 1979 polo lo 2003, vɔ wakakambe oko waa misiɔnɛrɛ la Tuvalu, la Samoa, ndo la Fidji, asɛnga wa lo sidɛ ka Pacifique. Lam’akiwɔ lɛsɔ, ɔnangɛso Jackson nde la kadiyɛso Jeannette wakasha lonya efula lo okadimwelo w’ekanda walembetshiya Bible. Tatɛ lo 1992, ɔnangɛso Jackson akakambaka lo kɔmite ka filialɛ ka la Samoa, ndo oma lo 1996, lo kɔmite ka filialɛ ka la Fidji. Lo Ngɔndɔ ka nɛi 2003, wakawelɛ nde la kadiyɛso Jeannette dia tokamba lo Bɛtɛlɛ ka l’États-Unis ndo vɔ wakatatɛ kamba lo departɛma di’okadimwelo. Kombeta edja oma lâsɔ, wakasɔnɛ ɔnangɛso Jackson dia kamba oko okimanyedi lo Kɔmite ka wetshelo ka Olui-walɔmbɔla.
Ɔnangɛso Morris akatatɛ olimu w’ombatshi mboka lo 1971 lo wodja w’États-Unis. Lo Ngɔndɔ ka dikumi l’ahende k’ɔnɔnyi akɔ, nde akatshukana la kadiyɛso Susan, ko vɔ wakatetemala la olimu w’ombatshi mboka l’edja ka suke l’ɛnɔnyi ɛnɛi polo lo eotwelo ka Jesse, ɔnawɔ la ntondo. L’ɔkɔngɔ wa ngɔndɔ oko 20, vɔ wakote Paul, ɔnawɔ la hende. Ɔnangɛso Morris akayokawola l’olimu wa lo tena tshɛ oko ombatshi mboka wa pondjo lo 1979. Wadɛnde nde lawɔ akayotatɛka olimu akɔ nto etena kaki ana wɔtɔ kalasa. Nkumbo kawɔ kakakambaka lɛnɛ aki ohomba w’efula, mbuta ate la Rhode Island ndo la Caroline du Nord, lo wodja w’États-Unis. Etena kakiwɔ la Caroline du Nord, ɔnangɛso Morris akakambaka oko ɔhɛna wa omendji w’otshimbedi lo tshanda mɔtshi, ndo anande wakakambaka oko ambatshi mboka wa pondjo. Lam’akawakotsha ɛnɔnyi 19, wakelɛ Jesse nde la Paul dia tokamba lo Bɛtɛlɛ ka l’États-Unis. Oma ko etena kɛsɔ, ɔnangɛso Morris akatatɛ kamba oko omendji w’otshimbedi. Oma lâsɔ, lo 2002 wakawelɛ nde la Susan lo Bɛtɛlɛ ndo wakatatɛ olimu lo Ngɔndɔ k’enanɛi 1. Ɔnangɛso Morris akakambaka lo departɛma diendana l’awui w’esambishilo la Patterson ndo l’ɔkɔngɔ diko oko okimanyedi lo Kɔmite k’olimu ka Olui-walɔmbɔla.
Lâdiko di’anto ahende w’eyoyo asɔ, Olui-walɔmbɔla kengama la anto anɛ: Carey Barber; John Barr; Samuel Herd; Stephen Lett; Gerrit Lösch; Teodore Jaracz; Guy Pierce; Albert Schroeder; David Splane; ndo Daniel Sydlik. Anto tshɛ wakenga Olui-walɔmbɔla wekɔ Akristo w’akitami.