Ɛlɔngɔlɔngɔ la esekaseka, nyɔsɔnɛ dia kambɛ Jehowa
“Nyosonole [ɔnɛ l]alanganyu ntemola.”—JASHUA 24:15.
1, 2. Weho akɔna wa batismu ka kɔlɔ kakawalongɔnyaka lo Lokristokristo?
OYA l’ekomelo ka ntambe ka hende ka tena diaso nɛ, Tertullien akafunde ate: “Ekɔ dimɛna tshika dia [ana] koma Akristo naka waya l’akoka wa mbeya Kristo dimɛna.” Nde kombetawɔka batismu ka ana w’ashashi, kakalongoyaka Akristo w’apɔsta wa lo nshi yande. Otshikitanyi la kanyi yaki la Tertullien ndo ya Bible, Augustin, ofundji ɔmɔtshi w’edjedja akate dia batismu minyaka pɛkato ka lôtɔ, ndo ɔnɛ ana wavɔ aha la batizama tshɔka lo lowenga la dja. Dietawɔ sɔ diakayotondjaka etshelo ka batiza ana w’ashashi esadi eto kama wotɔwɔ.
2 Efula k’ɛtɛmwɛlɔ wa lo Lokristokristo wetawɔma oma le anto efula batizaka ana w’ashashi. Ndo nto, l’ɔkɔndɔ w’anto, emboledi ndo ewandji w’ɛtɛmwɛlɔ wa lo wedja wakasɛmaka ɔnɛ wedja w’Akristo mbewɔ wakabatizaka la wolo anto wakawalɛndjaka. Koko Bible hetawɔ batismu k’ana w’ashashi ndo ka batiza epalanga w’anto la wolo.
Ɛlɔ kɛnɛ onto tshɛ ndjakimɔka la lolango
3, 4. Kakɔna kakoka kimanyiya ɛlɔngɔlɔngɔ la esekaseka wele ambutshi awɔ wakayakimɔ le Nzambi dia vɔ ndjakimɔ vɔamɛ?
3 Bible mɛnyaka dia Nzambi mbɔsaka ana w’akɛnda oko wekɔ ekila oyadi ombutshi awɔ ɔtɔi oto mbele Okristo wele la kɔlamelo. (1 Koreto 7:14) Onde lâsɔ kɛsɔ mbetɛka ana asɔ oko ekambi waki Jehowa wamboyakimɔ? Ndooko. Koko, ana wôdiama le ambutshi wakayakimɔ le Jehowa nongolaka wetshelo wakoka mbakonya dia vɔ ndjakimɔ vɔamɛ le Jehowa. Sɔlɔmɔna, nkumekanga ka lomba akafunde ate: “On’ami, ulamaki elembe wa sho, tukadjaki wetshelu wa nyo. . . . Lam’ayuyokendakendaka, vo wayukolombola; lam’ayuyetama, vo wayukulama, ndu lam’ayuyeto, vo wayusawula la ye. Olembe awo eli tala, la wetshelu awo eli usasi, luhangu l’ekiyelu eli mbuka ka lumu.”—Tukedi 6:20-23.
4 Ɛlɔmbwɛlɔ k’ambutshi w’Akristo koka kokɛ ɛlɔngɔlɔngɔ la esekaseka, naka vɔ wayokiyela. Sɔlɔmɔna akate nto ate: “Ona leli la yimba, atongenyangenyaka shi. Keli one l’enginya atunyangiaka nyangu.” Nde akakotsha ate: “On’ami ulungi, uyali kanga yimba; olombole utema aye lu mbuka k’usimbwi.” (Tukedi 10:1; 23:19) Eelo, dia nyu kondja wahɔ oma lo wetshelo w’ambutshi, nyu ɛlɔngɔlɔngɔ la esekaseka pombaka mbetawɔ alako ndo engwelo. Nyu kombotɔ akanga wa tomba, koko nyu kokaka ‘koma akanga a tomba’ ndo ndjela ‘mboka ka lɔsɛnɔ’ la lolango lanyu.
Wetshelo kɛdikɛdi na?
5. Dako diakɔna diakasha Paulo ambutshi la ana?
5 Ɔpɔstɔlɔ Paulo akafunde ate: “Ana, nyukitanyia ambutshi anyu le Khumadiondjo, osoku mbeli ololo. Olemia sho la nyo (oso keli olembe a ntundu weli la daka loko), dia we mpumo lukulu l’olo, la dia we ndjala la lulumbi la kete. Ndu nyu washi, tanyutshaki ananyu kele, keli nyuwaudia lu elembe la lu wetshelu wa Khumadiondjo.”—Efeso 6:1-4.
6, 7. Kakɔna kalembetshiya mbodia ana lo ndjela ‘wetshelo wa Jehowa,’ ndo lande na kele kɛsɔ hɛnya ɔnɛ ambutshi wekɔ lo mbasɛngiya lo yoho ya kɔlɔ?
6 Onde ambutshi w’Akristo wekɔ lo sɛngiya anawɔ lo yoho ya kɔlɔ etena kawaodiawɔ lo “elembe ndo wetshelu wa Khumadiondjo”? Ndooko. Akɔna akoka mɔnyɔla ambutshi ɔnɛ lengole vɔ mbetsha anawɔ kɛnɛ kɔsawɔ dia kekɔ ɔlɔlɔ ndo la wahɔ le wɔ? Wanɛ wahetawɔ ɔnɛ Nzambi ekɔ hawɔnywama l’ɔtɛ wetshawɔ anawɔ ɔnɛ Nzambi bu. Aseka Mupɛ ndjaokaka dia wekɔ l’ɔkɛndɛ wa mbodia anawɔ lo ndjela mbetawɔ k’aseka Mupɛ, ndo vɔ hawoleki mɔnywama lo woho wayatshutshuyawɔ dia sala dui sɔ. Woho akɔ wâmɛ mbele, anto hawohombe mɔnyɔla Ɛmɛnyi wa Jehowa, lo mbuta ɔnɛ vɔ mbafundɛ anawɔ etena kawaetshawɔ dia mbɔsa akambo wa mɛtɛ ndo atɔndɔ wendana la lɔkɛwɔ l’ɔlɔlɔ oko awaɔsa Jehowa.
7 Lo ndjela diksiɔnɛrɛ dimɔtshi (Theological Dictionary of the New Testament), tshɛkɛta ya lo Grɛkɛ k’etatelo yokadimɔmi ɔnɛ “wetshelu” lo Efeso 6:4 nembetshiyaka tshelo ya “nyanga dia mingola yimba, nɔngɔsɔla kɛnɛ kambolana, ndo kimanyiya onto dia monga la dionga di’ɔlɔlɔ otsha le Nzambi.” Ko kayotota naka ɔlɔngɔlɔngɔ kana osekaseka ekɔ lo tona wetshelo w’ambutshi l’ɔtɛ wa tɔsɛngiya t’asekande kana nɛ dia nde nangaka sala kɛnɛ kasala asekande? Akokaso mbuta, asɛngiya ɔna, onde ombutshi ande kana asakande? Ko naka ɔlɔngɔlɔngɔ kana osekaseka ekɔ lo sɛngiyama oma le asekande dia ndjakimɔ lo didjoyadjoya, lo nɔnɔ dia wolo kana l’awui wa mindo, onde ambutshi pombaka mɔnywama l’ɔtɛ wasalawɔ la wolo dia nɔngɔsɔla yimba yaki ɔnawɔ ndo mbokimanyiya dia nde shihodia etombelo wakoka monga la dionga dia kɔlɔ dia ngasɔ?
8. Kakɔna kakalɔmbama dia Timɔtɛ ndjokoma lo “mbetawo”?
8 Ɔpɔstɔlɔ Paulo akafundɛ ɔlɔngɔlɔngɔ Timɔtɛ ate: “Keli we, ushikikali lu akambu wakayeki ndu wakayetawo wati: Mete; ndu eyi akona akaketsha akambu ako. Uho wati: Umaka dikenda, we akeyi afundelu w’ekila weya nkewuya dia panda uma lu mbetawo le Kristu Jesu.” (2 Timote 3:14, 15) Oma ko nshi yaki Timɔtɛ dikɛnda, nyango nde la tshɛnde wakahike mbetawɔ kande otsha le Nzambi wolo lo ewo ka lo Afundelo w’Ekila. (Etsha 16:1; 2 Timote 1:5) L’ɔkɔngɔ diko, etena kakawayokomaka Akristo, vɔ kotshutshuya Timɔtɛ la wolo dia nde mbetawɔ koko nde akayokomaka lo “mbetawo” oma lo woho wakawakane la nde yimba lo ndjela ewo k’Afundelo kakiwɔ la tɔ.
Jehowa nyɔlɔmbaka dia sɔna
9. a) Ngande wakasha Jehowa anto nɛmɔ, ndo lande na? b) Ngande wakakambe Ɔna ɛtɔi laki Nzambi lakandote la lotshungɔ lande la sala ɔsɔnwɛlɔ?
9 Jehowa otokoka tonga anto oko waa nyama, mbuta ate wotokoka sala lolango lande woho wakandakongɛ ndo totowonga l’akoka wa sala ɔsɔnwɛlɔ. Koko Nzambi kosala ngasɔ, nɛ dia nde akawasha lotshungɔ la sala ɔsɔnwɛlɔ. Nzambi kaso nangaka anto wokambɛ la lolango lawɔ. Nde ngɛnangɛnaka dia mɛna anto ande epalanga ndo ɛlɔngɔlɔngɔ la esekaseka, wôkambɛ oma lo ngandji kawokawɔ. Ɛnyɛlɔ koleki dimɛna k’onto lakasale lolango laki Nzambi la ngandji tshɛ ele kaki Ɔnande ɛtɔi lakandote, ɔnɛ lele Jehowa akate lo dikambo diande ate: “On’ami la ngandji one, ndi atongenyangenyaka ololo.” (Mateu 3:17) Ɔna enondo ɔsɔ akatɛ She ate: “Dimi latongenangenaka dia ntsha lulangu laye, we [Nzambi k]ami. Ee, olembe aye ambufundama l’utema ami.”—Osambu 40:8; Heberu 10:9, 10.
10. Kakɔna katokimanyiya dia kambɛ Jehowa lo yoho yetawɔnde?
10 Jehowa nongamɛka dia wanɛ wokambɛ l’ɛlɔmbwɛlɔ ka Ɔnande sala lolango lande woho akɔ wâmɛ. Lo ɛtɛkɛta wa prɔfɛsiya, omembi w’esambo akembe ate: “Lu lushi layuyuyala khum’ekanga, wudja aye wayuyakimo l’ongenongeno, uku alimbi aye wolotshami eloto w’ekila. Ku wulu aye wayuyalaka la kesekese uku lopopo.” (Usambu 110:3) Okongamelo waki Jehowa lo tshɛ kawɔ, mbuta ate etenyi ka l’olongo ndo ka la nkɛtɛ, salaka lolango laki Nzambi la ngandji tshɛ.
11. Ɔsɔnwɛlɔ akɔna wambokitshama la ntondo ka ɛlɔngɔlɔngɔ la esekaseka wôdiama oma le ambutshi wakayakimɔ le Jehowa?
11 Ɔnkɔnɛ, nyu ɛlɔngɔlɔngɔ la esekaseka pombaka shihodia dia aha ambutshi anyu kana dikumanyi dia l’etshumanelo mbahomba nyotshutshuya la wolo dia nyu batizama. Nyu nyamɛ mbahomba monga la mposa ka kambɛ Jehowa. Jashua akatɛ wodja w’Isariyɛlɛ ate: “Nyûkambelaki [Jehowa] ulimu lu mete ndu la kolamelu. . . . Nyosonole [ɔnɛ l]alanganyu ntemola.” (Jashua 24:14-22) Woho akɔ wâmɛ mbele nyamɛ mbahomba sɔna, dia ndjakimɔ le Jehowa ndo salaka lolango lande lɔsɛnɔ lanyu l’otondo.
Nyɛmbɛ ɔkɛndɛ anyu
12. a) Kânga mbele ambutshi kokaka mbetsha anawɔ, kakɔna kahawakoke mbâsalɛ? b) Etena kakɔna kakoma ɛlɔngɔlɔngɔ la esekaseka l’ɔkɛndɛ la ntondo ka Jehowa lo ɛsɔnwɛlɔ wasalawɔ?
12 Etena kayokoka kele nyu ɛlɔngɔlɔngɔ l’esekaseka, hanyotokokamɛ nto oma le ambutshi anyu wa kɔlamelo. (1 Koreto 7:14) Ombeki Jakɔba akafunde ate: “Untu leya ntsha dikambu di’ololo, keli haditshi, dikambu diako dieko kolo le ndi.” (Jakoba 4:17) Ambutshi hawokoke kambɛ Nzambi l’ɔtɛ w’anawɔ ndo ana hawokoke kambɛ Nzambi l’ɔtɛ w’ambutshi awɔ. (Ezekiyele 18:20) Onde nyambeka akambo wendana la Jehowa ndo l’asangwelo ande? Onde wɛ aya la ɛnɔnyi wakokimanyiya dia shihodia kɛnɛ kamboyeka ndo tatɛ monga la diɔtɔnganelo la Jehowa? Shi sho koka nongamɛ dia Nzambi mɛnaka dia wɛ aya l’akoka wa mbɔsa yɛdikɔ ya mbokambɛ?
13. Ambola akɔna wahomba ɔlɔngɔlɔngɔ ndo osekaseka wahatabatizama ndjambola?
13 Onde wɛ ekɔ ɔlɔngɔlɔngɔ kana osekaseka wakodiama oma le ambutshi woka Nzambi wɔma, lɔtɔ lo nsangaya y’Akristo ndo ondo lasambisha lokumu l’ɔlɔlɔ la Diolelo? Naka ɔsɔku mbediɔ, kete yambola ɔnɛ: ‘Lande na kasalami akambo asɔ? Onde lekɔ lo mbɔtɔ lo nsanganya ndo lekɔ lo sambisha dikambo ambutshi ami tshutshuyakami la wolo dia dimi sala awui asɔ ko kana dimi nangaka ngɛnyangɛnya Jehowa?’ Onde wɛ shihodiaka wɛmɛ kɛnɛ kele “lulangu la [Nzambi] l’ololo latôngenyangenyaka, ndu l’uluwanyi”?—Romo 12:2.
Bonde katshimbatshimbayɛ dia batizama?
14. Bɛnyɛlɔ diakɔna dia lo Bible diɛnya di’onto hahombe tshimbatshimba tshanana dia batizama?
14 “Kakona kanshimba dimi batizama?” Pami k’ose Etiyɔpiya lakoke osambisha Filipɛ dimbola sɔ aki oma la mbeka dia Yeso mbaki Mɛsiya. Koko ose Etiyɔpiya ɔsɔ aki la ewo k’efula k’Afundelo kakokimanyiya dia shihodia dia nde hahombe tshimbatshimba nto dia mɛnya hwe dia oma k’etena kɛsɔ, nde pombaka kambɛ Jehowa la etshumanelo k’Akristo, ndo dui sɔ diakawela ɔngɛnɔngɛnɔ efula. (Etsha 8:26-39) Woho akɔ wâmɛ mbele, womoto ɔmɔtshi lakawelɛka Ludiya, lakadihola otema ande “dia ndi mpukama akambu wakati Paulo” ‘akabatizama,’ aha la tshimbatshimba nde la wa lo luudu lande. (Etsha 16:14, 15) Woho akɔ wâmɛ, mbele olami wa lokanu wa la Filipi akahokamɛ Paulo nde la Silasi etena “[kakawawotɛ] dui dia Khumadiondjo, ndi la wane waki lu luudu landi tshe” ko “ndi akabatizama, ndu antu andi tshe.” (Etsha 16:25-34) Ɔnkɔnɛ, naka wɛ ekɔ la ewo ka Jehowa la k’asangwelo ande, ndo ekɔ la nsaki k’oma k’ɛse otema ka sala lolango lande, ndo anto tɛkɛtaka dimɛna lo lokombo layɛ l’atei w’etshumanelo ndo ekɔ lo mbɔtɔ lo nsanganya mbala la mbala ndo ekɔ lo sambisha lokumu l’ɔlɔlɔ la Diolelo, lande na katshimbatshimbayɛ dia batizama?—Mateu 28:19, 20.
15, 16. a) Naa kanyi ya kɔlɔ yakoka shimba ɛlɔngɔlɔngɔ la esekaseka ɛmɔtshi diaha vɔ batizama? b) Ngande wakoka ndjakimɔ ndo batismu monga tshondo y’ekokelo le ɛlɔngɔlɔngɔ la esekaseka?
15 Onde mbeyaka monga ko wɛ ekɔ lo mboka wɔma takola nna di’ohomba sɔ l’ɔtɛ w’ɔnɛ wayoyokoya la yɛ naka wɛ ambosala dikambo dia kɔlɔ? Naka ngasɔ, kete kana yimba lo dikambo nɛ: Onde wɛ ayotona dia mbeka dikalo la wɔma w’ɔnɛ lushi lɔmɔtshi wɛ ayosala aksida? Ndooko! Woho akɔ wâmɛ mbele wɛ hahombe mboka wɔma dia batizama naka wɛ kokaka. Naka wɛ ambolambolaka Jehowa lɔsɛnɔ layɛ dia sala lolango lande, kete wɛ ayosala la wolo ayɛ tshɛ dia shika ekolo la ntondo ka ditshelo dia kɔlɔ. (Filipi 4:13) Ɛlɔngɔlɔngɔ la esekaseka lee, tanyɔfɔnyake ɔnɛ naka nyu tshimbatshimba dia batizama kete lâsɔ hanyotoyokoya la Nzambi. Etena kayonyokotsha ɛnɔnyi wa monga la ɔkɛndɛ, nyayoyokoya la Jehowa lo woho wasalanyu awui oyadi nyambobatizama kana bu.—Romo 14:11, 12.
16 Ɛmɛnyi wa Jehowa efula wa l’andja w’otondo mɛnaka dia yɛdikɔ yakawɔsɛ ya ndjakimɔ ndo batizama etena kakiwɔ ɛlɔngɔlɔngɔ la esekaseka ambakimanyiya heyama. Tɔshi ɛnyɛlɔ kaki Ɔmɛnyi ɔmɔtshi wa Jehowa wele lo Erɔpɛ wa l’Ɛstɛ wele l’ɛnɔnyi 23. Nde mbohɔka dia woho wakandalongola batismu l’ɛnɔnyi 13 akokimanyiya dia nde monga la yewo dia nɛndja “saki ya kolo y’elongo w’apami.” (2 Timote 2:22) Etena kakinde eke dikɛnda, nde akɔshi yɛdikɔ ya ndjokoma okambi wa lo tena tshɛ. Ɛlɔ kɛnɛ, nde ekɔ lo kamba l’ɔngɛnɔngɛnɔ tshɛ lo filialɛ kɛmɔtshi ka Ɛmɛnyi wa Jehowa. Ɛtshɔkɔ efula wekɔ lo kongɛ ɛlɔngɔlɔngɔ la esekaseka tshɛ, mbidja ndo nyu wanɛ wasɔna dia kambɛ Jehowa.
17. L’akambo akɔna wele ekɔ ohomba shihodia ele ‘lolango la Jehowa’?
17 Ndjakimɔ ndo batismu ekɔ etatelo ka yoho ya lɔsɛnɔ yatotshutshuya dia mbidjaka yimba lo lolango laki Nzambi l’akambo tshɛ wasalaso. Nsɛna lo yoho yɔtɔnganɛ la ndjakimɔ kaso nɔmbaka dia sho ‘ndjatshungwɛ etena.’ Ngande wakokaso sala dui sɔ? Ele lo mbɔsa wenya wototokamba lawɔ l’eyango w’anyanya ko mbaetshaka dia mbekaka Bible, mbɔtɔka lo nsanganya mbala la mbala, ndo lo ndjasha efula dia sambishaka “lukumu l’ololo la diulelu.” (Efeso 5:15, 16; Mateu 24:14) Ndjakimɔ kaso le Jehowa ndo nsaki ka sala lolango lande ayonga la shɛngiya l’akambo tshɛ wa lo lɔsɛnɔ laso, mbidja ndo woho wakambaso la wenya aso dia kɔkɔla demba, lo mbekelo yaso yendana la olelo ndo l’ɔnwɛlɔ, ndo l’ɔsɔnwɛlɔ aso wa mishiki. Lande na kahayasɔnɛ woho wa tɔkɛnyɔ tayokokimanyiya dia wɛ ngɛnangɛnaka pondjo pondjo? Nunu di’Ɛmɛnyi wa Jehowa w’ɛlɔngɔlɔngɔ la esekaseka wele l’ɔngɛnɔngɛnɔ wayokotɛ dia ekɔ toho efula t’ɛlɔlɔ ta ndjangɛnyangɛnya aha la mɔnyɔla ‘lolango la Jehowa.’—Efeso 5:17-19.
“Shu tayutsho kame la nyu”
18. Dimbola diakɔna diahomba ɛlɔngɔlɔngɔ la esekaseka ndjaoka?
18 Tatɛ oma lo 1513 ntondo ka tena diaso nɛ polo lo Pɛntɛkɔsta 33 tena diaso nɛ, Jehowa akikɔ la wodja wokongɛmi wakandasɔnɔla dia vɔ mbɔtɛmɔlaka ndo monga ɛmɛnyi ande. (Isaya 43:12) Ɛlɔngɔlɔngɔ la esekaseka wa l’Isariyɛlɛ wakotɔka lo wodja ɔsɔ. Tatɛ oma lo Pɛntɛkɔsta kɛsɔ, Jehowa akakenge “wudja” w’oyoyo la nkɛtɛ, wodja akɔ ko Isariyɛlɛ wa lo nyuma, mbuta ate ‘anto amɔtshi dikambo dia lokombo lande.’ (1 Petero 2:9, 10; Etsha 15:14; Ngalatiya 6:16) Ɔpɔstɔlɔ Paulo akate dia Kristo akayaɛdiya ‘wodja ande hita, wele l’ohetoheto l’etsha w’ɔlɔlɔ.’ (Tito 2:14) Nyu ɛlɔngɔlɔngɔ la esekaseka nyekɔ la lotshungɔ la shikikɛ nyamɛ lɛnɛ atanema anto asɔ. Waa na akɔna ɛlɔ kɛnɛ wele “wudja w’ololo weli la kolamelu,” wasɛna lo yoho yɔtɔnɛ la atɔndɔ wa lo Bible, wele Ɛmɛnyi wa Jehowa wa kɔlamelo ndo wasambisha dia Diolelo diande mbele elongamelo kâmɛ le anto? (Isaya 26:2-4) Nyende l’ɛtɛmwɛlɔ wa lo Lokristokristo ndo ɛtɛmwɛlɔ ekina, kele nyɛdike waonga awɔ la kɛnɛ kalɔmba Bible ekambi waki Nzambi wa mɛtɛ.
19. Miliyɔ y’anto wa l’andja w’otondo wambosuya dikambo diakɔna?
19 Miliyɔ y’anto l’andja w’otondo mbidja ndo ɛlɔngɔlɔngɔ la esekaseka, wambosuya dia atshikadi w’akitami w’esɔ wa Ɛmɛnyi wa Jehowa mbakenga “wudja w’ololo” ɔsɔ. Vo mbutɛka ase Isariyɛlɛ wa lo nyuma asɔ ɔnɛ: “Shu tayutsho kame la nyu, ne dia shu takuki lukumu ati: [Nzambi] eko kame la nyu.” (Zekariya 8:23) Tekɔ mɛtɛ l’elongamelo ndo sho nɔmbaka dia nyu ɛlɔngɔlɔngɔ la esekaseka mbɔsa yɛdikɔ ya monga l’atei w’ekambi waki Nzambi ndo ‘sɔna lɔsɛnɔ,’ mbuta ate lɔsɛnɔ la pondjo l’andja w’oyoyo waki Jehowa.—Euhwelu k’Elembe 30:15-20; 2 Petero 3:11-13.
Ovuswelo
• Wetshelo kɛdikɛdi na?
• Woho akɔna w’olimu wetawɔma le Jehowa?
• Ɔsɔnwɛlɔ akɔna wambokitshama la ntondo ka ɛlɔngɔlɔngɔ la esekaseka tshɛ wodiama le ambutshi wakayakimɔ le Nzambi?
• Lande na kahahombe onto tshimbatshimba tshanana dia nde batizama?
[Esato wa lo lɛkɛ 28]
Onto akɔna ayoyohokamɛ?
[Osato wa lo lɛkɛ 30]
Ngande wakoka ndjakimɔ ndo batismu nyokokɛ?
[Osato wa lo lɛkɛ 31]
Kakɔna kakoshimba dia wɛ batizama?