‘Nyote ehomba anyu le Nzambi’
“Lu akambu tshe, nyuti ehumba anyu le [Nzambi] lu dombelo la osengosengo kame la eukelu ka lusaka.”—FILIPI 4:6.
1. Tekɔ la diɛsɛ dia sawolaka la onto akɔna ndo lande na kele ɔsɔ ekɔ dikambo dia diambo efula?
NAKA wɛ nɔmba dia sawola la owandji wa lo wodja anyu, okadimwelo akɔna wayowokosha na? Anto wakamba lo biro kande koka kosha okadimwelo ɔmɔtshi la loshilambo tshɛ, koko ayonga wolo wa mamba dia vɔ kosha diaaso dia wɛ tɛkɛta la owandji ndamɛ. Koko le Jehowa Nzambi, Omboledi waheme lâdiko dia tshɛ, awui hawosalema ngasɔ. Sho kokaka tɛkɛta la nde, oyadi dihole diakɔna dieso ndo wonya tshɛ walangaso. Alɔmbɛlɔ tshɛ wetawɔma komaka le nde. (Tukedi 15:29) Ɔsɔ ekɔ mɛtɛ dikambo dia diambo efula! Shi lowando lele laso lo dikambo sɔ pombaka totshutshuya dia nɔmbaka mbala la mbala ɔnɛ “Latukaka dombelo”?—Osambu 65:2.
2. Kakɔna kele ohomba dia alɔmbɛlɔ aso mbetawɔma le Nzambi?
2 Koko onto kokaka ndjambola ɔnɛ: ‘Alɔmbɛlɔ akɔna wetawɔma le Nzambi?’ Bible nembetshiyaka dui dimɔtshi diele ohomba di’alɔmbɛlɔ aso mbetawɔma le Nzambi lo mbuta ɔnɛ: “Untu laha la mbetawo, heyi mbôngenyangenya. Ne dia dieli la one layuya le [Nzambi] mbetawo ati: Ndi eko, la ndi keli ufutshi a wane watûyangaka.” (Heberu 11:6) Eelo, oko wakatadiɛnyi lo sawo dia mbala ketshi, dui dimɔtshi di’ohomba dialɔmbama dia ndjasukanya la Nzambi ele monga la mbetawɔ. Nzambi mbokaka alɔmbɛlɔ wa wanɛ wayasukanya la nde, koko vɔ pombaka mbɔ̂lɔmba la mbetawɔ ndo mbetawɔ kakɔ pombaka mɛnama oma lo etsha ndo otema w’ɔlɔlɔ.
3. a) Oko wadiɛnya alɔmbɛlɔ w’ekambi waki Nzambi wa kɔlamelo wa lo nshi y’edjedja, naa weho w’ɛtɛkɛta wakokaso mbidja lo alɔmbɛlɔ aso? b) Naa weho w’alɔmbɛlɔ wotshikitanyi wakokaso sala?
3 Ɔpɔstɔlɔ Paulo akakeketsha Akristo wa lo nshi yande ate: “Tanyuyakananyaki, keli lu akambu tshe, nyuti ehumba anyu le [Nzambi] lu dombelo la osengosengo kame la eukelu ka lusaka.” (Filipi 4:6, 7) Bible kekɔ la bɛnyɛlɔ efula dia wanɛ wakalɔmbɛ Nzambi dikambo di’ekiyanu awɔ. L’atei awɔ mbele, Hana, Elidja, Hezekiya la Danyɛlɛ. (1 Samuele 2:1-10; 1 Khumi ya dikanga 18:36, 37; 2 Khumi ya dikanga 19:15-19; Danyele 9:3-21) Sho pombaka ndjela ɛnyɛlɔ kawɔ. Tolembete nto dia ɛtɛkɛta waki Paulo mɛnyaka dia sho kokaka sala weho w’alɔmbɛlɔ wotshikitanyi. Nde akatɛkɛta dia eokelo ka losaka, mbuta ate, dɔmbɛlɔ dia mboka Nzambi losaka l’ɔtɛ wa kɛnɛ kotosalende. Dɔmbɛlɔ sɔ mbeyaka ndjelana la lotombo. Ɛsɛngɔsɛngɔ mendanaka la dɔmbɛlɔ dia la ndjakitshakitsha ndo dia la dui di’ɔsɛngɔsɛngɔ. Ndo sho kokaka nɔmba dia ehomba aso, kana dia dui dimɔtshi dia shikaa. (Luka 11:2, 3) Shɛso lele l’olongo ngɛnangɛnaka dia sho ndjasukanya la nde lo toho tɔsɔ tshɛ.
4. Kânga mbeya Jehowa ehomba aso, lande na kahombaso mbêwoya ehomba akɔ?
4 Anto amɔtshi mbeyaka ndjambola ɔnɛ: ‘Shi Jehowa okeyaka ehomba aso tshɛ?’ Eelo, nde okeyaka. (Mateu 6:8, 32) Ko lâsɔ, lande na kalangande dia sho ndjasukanya la nde dia mbotɛ ehomba aso? Tɔshi ɛnyɛlɔ kɛnɛ: Kanga makashinyi ɔmɔtshi mbeyaka ndaka waa kidiya yande woshasha ɔmɔtshi. Koko, dia vɔ nongola woshasha ɔsɔ, waa kidiya pombaka ndja le nde ndo mbɔlɔmbawɔ. Wanɛ wahatodja welo dia sala dikambo sɔ wayɛnya dia hawɔngɛnangɛna woshasha ɔsɔ mɛtɛ. Woho akɔ wâmɛ mbele, tona dia mbuta ehomba aso lo dɔmbɛlɔ ayɛnya dia hatɔngɛnangɛna kɛnɛ katosha Jehowa. Yeso akate ate: “Nyolombe, [ko] nyayulungula.” (Joani 16:24) Lo sala ngasɔ, sho mɛnyaka dia sho ndjaɛkɛka le Nzambi.
Ngande wahombaso ndjasukanya la Nzambi?
5. Lande na kahombaso nɔmbaka lo lokombo la Yeso?
5 Jehowa hatodjɛ ɛlɛmbɛ wa wolo wolo lo kɛnɛ kendana la woho wahombaso nɔmba. Koko, sho pombaka mbeya yoho ya dimɛna ya ndjasukanya la Nzambi, oko watɛnya Bible. Ɛnyɛlɔ, Yeso aketsha ambeki ande ate: “Dikambu tshe diayunyolomba Papa lu lukumbu lami, ndi ayunyushadio.” (Joani 16:23, sho mbɛnganyisha alɛta ango.) Lâsɔ, sho pombaka nɔmba lo lokombo la Yeso, lo mbeya dia nde mbele ehomɔ kâmɛ kayokamba la Nzambi dia mbisha anto tshɛ ɛtshɔkɔ.
6. Etena kalɔmbaso, kiongamu ya ngande yahomba monga laso?
6 Kiongamu yakɔna yahomba monga laso etena kalɔmbaso? Dia alɔmbɛlɔ aso mbokɛma le Nzambi, Bible hɛnya dia ekɔ kiongamu mɔtshi ya shikaa yahomba monga laso. (1 Khumi ya dikanga 8:22; Nehemiya 8:6; Mako 11:25; Luka 22:41) Kɛnɛ kele ohomba ele nɔmba Nzambi l’otema ɔtɔi ndo la dionga di’ɔlɔlɔ.—Joele 2:12, 13.
7. a) Naa kitshimudi ya tshɛkɛta “amen”? b) Ngande wakambawɔ la yɔ dimɛna lo alɔmbɛlɔ?
7 Ko kayotota dikambo dia okambelo wa la tshɛkɛta “amen”? Afundelo mɛnyaka dia mbala efula ɔsɔ ekɔ yoho ya dimɛna ya komiya la alɔmbɛlɔ aso, djekoleko etena kalɔmbaso la ntondo k’anto. (Osambu 72:19; 89:52) Tshɛkɛta ya lo Hɛbɛru ʼa·menʹ nembetshiyaka “mɛtɛ.” Dibuku dimɔtshi (McClintock and Strong’s Cyclopedia) mɛnyaka dia anto mbutaka “Amen” l’ekomelo k’alɔmbɛlɔ dia “shikikɛ ɛtɛkɛta wotami la ntondo ndo shikikɛ ekotshamelo kawɔ.” Ɔnkɔnɛ, lo komiya l’otema ɔtɔi ɔnɛ “Amen,” onto lalɔmba mɛnyaka nsaki k’oma k’ɛse otema kele lande lo kɛnɛ komande la mbuta. Etena kakomiya Okristo walɔmba lo dikambo dia etshumanelo la tshɛkɛta shɔ, wanɛ wahokamɛ dɔmbɛlɔ diande mbeyaka vɔ lawɔ mbuta ɔnɛ “Amen” l’etema awɔ kana la dui diokɛma dia mɛnya ɔnɛ wambetawɔ kɛnɛ kotami.—1 Koreto 14:16.
8. Ngande wakoka alɔmbɛlɔ aso amɔtshi fɔna la dɔmbɛlɔ diaki Jakɔba kana diaki Abarahama ndo kakɔna kayɛnya dui sɔ lo dikambo diaso?
8 Ekɔ tena dimɔtshi diakoka Nzambi totshika dia sho mɛnya woho wayashaso efula lo awui wɔlɔmbaso. Sho mbeyaka koma oko Jakɔba ka lo nshi y’edjedja, lakalɔshana otsho w’otondo la ondjelo dia nde tshɔkwama. (Etatelu 32:24-26) Kana awui amɔtshi koka nɔmba dia sho koma oko Abarahama lakalɔmbɛ Jehowa mbala ko mbala lo wahɔ wa Lɔta ndo wa onto ɔlɔlɔ tshɛ lakakoke tanema la Sɔdɔma. (Etatelu 18:22-33) Oko wele Jehowa, Nzambi ka losembwe, ka ngandji ndo ka kɛtshi, sho kokaka mbɔ̂lɔmba woho akɔ wâmɛ lo kɛnɛ kendana l’awui wele ohomba efula le so.
Awui akɔna wakokaso nɔmba?
9. Etena kalɔmbaso, sho pombaka ndeka ndjakiyanya dikambo dia na?
9 Tohɔ dia Paulo akate ate: “Lu akambu tshe, nyuti ehumba anyu le [Nzambi] lu dombelo.” (Filipi 4:6, sho mbɛnganyisha alɛta ango.) Ɔnkɔnɛ, alɔmbɛlɔ aso mbeyaka mendana la dui tshɛ dia lo lɔsɛnɔ laso. Koko, dui dia ntondo diahombaso ndjakiyanya lo dɔmbɛlɔ, ele dia wahɔ wa Jehowa. Danyɛlɛ akatotshikɛ ɛnyɛlɔ k’ɔlɔlɔ lo dikambo sɔ. Etena kakalongola ase Isariyɛlɛ dilanya l’ɔtɛ wa pɛkato yawɔ, Danyɛlɛ akasɛngasɛnga Jehowa dia mbaoka kɛtshi, lo mbuta ate: “Ne dia dikambu diaye, we [Nzambi k]ami, ndu ne dia . . . lukumbu laye, utshi, tutshimbatshimbaki.” (Danyele 9:15-19) Onde ndo alɔmbɛlɔ aso mbɛnya dia sho ndekaka ndjakiyanya dia okidiamelo wa lokombo la Jehowa ndo dia ekotshamelo ka lolango lande?
10. Ngande weyaso dia ekɔ ohomba nɔmba ndo lo dikambo dia awui aso hita?
10 Ekɔ nto ohomba nɔmbaka dikambo di’awui aso hita. Lo ɛnyɛlɔ k’omembi w’esambo, sho koka nɔmba dia shihodia awui w’ohomba efula waki Nzambi. Nde akalɔmbɛ ate: “Umbisha yimba, ku layulamaka elembe aye, layêlamaka l’utema tshe.” (Osambu 119:33, 34; Kolosai 1:9, 10) Yeso “akasengasengaka one laki la wulu a mbushimbela uma lu nyoi.” (Heberu 5:7) Lo sala ngasɔ, nde akɛnya ohomba w’onto nyanga wolo oma le Nzambi etena kahomanande la wâle ndo la ehemba. Etena kakandetsha ambeki ande dɔmbɛlɔ di’ɛnyɛlɔ, Yeso akadje ndo awui wakahombaka anto nɔmba, ɛnyɛlɔ edimanyielo ka kɔlɔ yawɔ ndo dia kondja mbo ya ndɛ ya lushi la lushi.
11. Ngande wakoka dɔmbɛlɔ tokimanyiya diaha sho nkɔ l’ehemba?
11 Lo dɔmbɛlɔ di’ɛnyɛlɔ sɔ, Yeso akadje ndo dikambo nɛ ate: “Tutukumiaki lu ehimba, keli utushimbeli uma [le kanga] kolo.” (Mateu 6:9-13) L’ɔkɔngɔ diko, nde akalake ate: “Nyewoki, nyolombaki, nyutukoko l’ehimba.” (Mateu 26:41) Dɔmbɛlɔ diekɔ ohomba efula etena keso l’ehemba. Sho mbeyaka pembama dia mɔnyɔla atɔndɔ wa lo Bible lo dihole di’olimu kana la kalasa. Anto wele kema Ɛmɛnyi wa Jehowa koka tɔlɔmba dia sho sala kâmɛ la wɔ awui wele ondo bu amɛna le Akristo. Vɔ mbeyaka tɔlɔmba dia sala dui dimɔtshi diahɔtɔnɛ l’atɔndɔ wosembwe wendana la lɔkɛwɔ. Etena kɛsɔ, sho la dia ndjela dako diaki Yeso diata dia nɔmba, oyadi la ntondo kana etena keso lo ohemba dia Nzambi tokimanyiya diaha sho nkɔ.
12. Awui akɔna watokiyanya wakoka totshutshuya dia nɔmba ndo kakɔna kakokaso nongamɛ oma le Jehowa?
12 Ekambi waki Nzambi wa nshi nyɛ wekɔ lo diɛnɛ l’ekakatanu ndo l’ekiyanu wa weho la weho. Hemɔ ndo ɔkɔmwɛlɔ mboleki monga lo kiɔkɔ y’ekiyanu le anto efula. Awui wa ngala wɛnaso nshi nyɛ tonyangiyaka efula. Ekakatanu wendana la ekondjelo mbetɛka lɔsɛnɔ ololo. Ekɔ mɛtɛ ekeketshelo dia mbeya ɔnɛ Jehowa mbokaka alɔmbɛlɔ w’ekambi ande wawotɛ ekakatanu wele lawɔ! Lo dikambo dia Jehowa, Osambu 102:17 mbutaka ɔnɛ: “Ndi atulungaka dombelo dia amenyi fono, hatutunaka dombelo diawo.”
13. a) Awui akɔna wakokaso mbidja lo alɔmbɛlɔ aso? b) Kɔndɔla ɛnyɛlɔ kɛmɔtshi k’onto lakasale dɔmbɛlɔ dia ngasɔ.
13 Lo alɔmbɛlɔ aso, sho koka mbidja dui tshɛ diele la shɛngiya l’olimu wakambɛso Jehowa ndo lo diɔtɔnganelo diasaso la nde. (1 Joani 5:14) Naka tekɔ la tɛdikɔ ta mbɔsa lo dikambo dia diwala, di’olimu kana dia pamia olimu aso, kete tatengengake dia mbutɛ Nzambi dikambo sɔ lo dɔmbɛlɔ dia nyanga ɛlɔmbwɛlɔ kande. Ɛnyɛlɔ, osekaseka ɔmɔtshi wa lo wodja wa Philippines akalangaka kamba olimu wa lo tena tshɛ. Koko nde komonga l’olimu wakakokaka mbokimanyiya dia ndjakotshɛka ehomba ande. Nde mbutaka ate: “Lushi la samalo lɔmɔtshi, lakalɔmbɛ Jehowa lo dikambo di’olimu w’ombatshi mboka. Lushi lakɔ lâmɛ lɔsɔ, lam’akimi l’esambishelo, lakasha osekaseka ɔmɔtshi dibuku diaso dimɔtshi. Aha la dimi nongamɛ, osekaseka ɔsɔ akambutɛ ate: ‘Dui dia ntondo diahombayɛ sala la pindju ka Lushi l’ɔtɔi, ele ndja lo kalasa kami.’ Lakawombola nte: ‘Andjotshana?’ Nde akambutɛ ate tekɔ l’olimu weso l’ohomba w’onto esadi. Lakatshu ko wakambɔshi l’olimu ko lushi lakɔ. Awui wakete esadi wa mamba.” Awui wa ngasɔ wakakomɛ Ɛmɛnyi wa Jehowa efula. Ɔnkɔnɛ, tatengengake dia mbutɛ Nzambi ehomba aso lo dɔmbɛlɔ!
Ngande wahombaso mbɔsa dɔmbɛlɔ naka tambosala pɛkato?
14, 15. a) Lande na kahahombe onto mboka sɔnyi dia nɔmba naka nde ambosala pɛkato? b) Lâdiko w’alɔmbɛlɔ w’onto ndamɛ, kakɔna kakoka kimanyiya onto nto dia kɔlɔngana oma lo pɛkato?
14 Ngande wakoka dɔmbɛlɔ kimanyiya onto lambosala pɛkato? Sɔnyi mbeyaka shimba onto lambosala pɛkato dia nɔmba. Koko, ɔsɔ bu dionga dia dimɛna dia monga ladiɔ. Tɔshi ɛnyɛlɔ kɛnɛ: Pilɔtɛ mbeyaka dia naka wambonganɛ l’aviyɔ, vɔ kokaka sawola l’anto wendana la okitelo ndo ofumbwelo wa waa aviyɔ dia kondja ekimanyielo. Ko kayotota naka pilɔtɛ kambonganɛ kɛsɔ, ambengenga dia sawola la anto asɔ nɛ dia nde amboka sɔnyi lo woho wambondonganɛ? Dui sɔ kokaka mbakonya lo mpokoso! Woho akɔ wâmɛ mbele, onto lambosala pɛkato ndo loka sɔnyi nɔmba Nzambi kokaka pomɔ mpokoso kekina. Sɔnyi konga l’onto etena kasalande pɛkato hahombe mboshimba dia sawola la Jehowa. Ɔnkɔnɛ, Nzambi nɔmbaka wanɛ wambosala pɛkato ya weke dia mbɔlɔmba. Ɔprɔfɛta Isaya akakeketsha akanga wa pɛkato wa lo nshi yande dia nɔmba Jehowa, “ne dia ndi ayetawo mb[a]dimanyia tshe.” (Isaya 55:6, 7) Lo mɛtɛ, onto mbeyaka mɛna ohomba wa ‘tutsha solo dia Jehowa,’ ntondotondo lo ndjakitshakitsha, lo mboka lɔkɛwɔ la kɔlɔ lɔsɔ ɔkɔngɔ ndo lo ndjatshumoya l’otema ɔtɔi.—Osambu 119:58; Danyele 9:13.
15 Ekɔ ɔkɔkɔ okina wahomba onto sala dɔmbɛlɔ naka nde ambosala pɛkato. Ombeki Jakɔba mbutaka lo dikambo di’onto lele l’ohomba w’ekimanyielo ka lo nyuma ate: “Ndi eti dikumanyi dia ekelizia, vo wôlombele, . . . ku Khumadiondjo ayuwulula.” (Jakoba 5:14, 15) Eelo, onto pombaka mbisholɛ Jehowa pɛkato kande lo dɔmbɛlɔ, koko nde kokaka nto nɔmba dikumanyi dia nɔmba dikambo diande. Dui sɔ diayowokimanyiya dia nde kɔlɔngana lo nyuma.
Nzambi kadimolaka alɔmbɛlɔ
16, 17. a) Ngande wakadimola Jehowa lo alɔmbɛlɔ? b) Bɛnyɛlɔ diakɔna diɛnya dia dɔmbɛlɔ ndo olimu w’esambishelo kakatana?
16 Ngande wakadimɔma alɔmbɛlɔ? Alɔmbɛlɔ amɔtshi mbeyaka kadimɔma esadi eto ndo lo yoho yɛnama hwe. (2 Khumi ya Dikanga 20:1-6) Alɔmbɛlɔ akina koka mbeta etena k’otale la ntondo ka vɔ kadimɔma ndo mbeyaka monga yema wolo shihodia dia Jehowa ambâkadimola. Oko wadiɛnya wɛla waki Yeso wendana la wadi aki odo lakatetemala la ndja le shushi, mbele kokaka monga ohomba sho tetemala nɔmba Nzambi. (Luka 18:1-8) Koko, sho kokaka ndjashikikɛ dia etena kalɔmbaso lo yoho yɔtɔnɛ la lolango laki Nzambi, nde hatotɛki pondjo ate: ‘Takonyofukutanya.’—Luka 11:5-9.
17 Ekambi wa Jehowa wekɔ la bɛnyɛlɔ efula diɛnya woho wakadimola Jehowa alɔmbɛlɔ awɔ. Dui sɔ mɛnamaka mbala efula l’olimu aso w’esambishelo. Ɛnyɛlɔ, akadiyɛso amɔtshi ahende wa lo wodja wa Philippines wakatakahanyaka ekanda walembetshiya Bible lo shamba mɔtshi ya lo wodja ɔsɔ. Etena kakawasha mama kɛmɔtshi traktɛ, mama kɛsɔ akakɛdia ndo asɔi. Nde akate ate: “La dikɔlɔ dia loyi, lakalɔmbɛ Nzambi dia nde tomɛmi onto ɔmɔtshi dia ndjombetsha Bible ndo dimi fɔnyaka dia nde mambokadimola lo dɔmbɛlɔ diami.” Yema tshitshɛ oma lâsɔ, mama kɛsɔ akatatɛ ndja lo nsanganya lo Mbalasa ka Diolelo. Lo ɛtshi kɛmɔtshi ka nkɛtɛ ka lo lɛkɛ la sidɛ ɛstɛ k’Asie, ɔnangɛso ɔmɔtshi akokaka wɔma sambisha lo lokombo lɔmɔtshi lakadjasɛka anto ndo lakalamemaka oma le asɔlayi. Koko nde akalɔmbɛ Jehowa, akakeketsha otema ko akɔtɔ lo lokombo lɔsɔ. Nde akakɔkɔla lo soko dimɔtshi ko osekaseka ɔmɔtshi akaye. Etena kakawotɛ ɔnangɛso ɔkɔkɔ woyende ndjowenda, osekaseka ɔsɔ akatatɛ ndela. Nde akatɛ ɔnangɛso dia nde aki lo nyanga Ɛmɛnyi wa Jehowa ndo nde akalɔmbɛ Jehowa dia mbokimanyiya dia mɛnana la Ɛmɛnyi wa Jehowa. L’ɔngɛnɔngɛnɔ tshɛ, ɔnangɛso akokimanyiya dia nde mbeya lɛnɛ ele etshumanelo k’Ɛmɛnyi wa Jehowa.
18. a) Ahombaso sala etena kakadimɔma alɔmbɛlɔ aso? b) Eshikikelo kakɔna kakoka monga laso naka sho nɔmbaka lo diaaso tshɛ?
18 Dɔmbɛlɔ ekɔ mɛtɛ yɛdikɔ ya diambo efula. Jehowa ekɔ suke dia mpokamɛ ndo kadimola alɔmbɛlɔ aso. (Isaya 30:18, 19) Koko, sho pombaka monga la shɛnɔdi dia mbeya woho wakadimola Jehowa alɔmbɛlɔ aso. Aha mbala tshɛ mbatokadimolande lo woho walongamɛso. Ɔnkɔnɛ, etena kɛnaso dia nde ambokadimola lo dɔmbɛlɔ diaso, hatohombe pondjo mbohɛ dia mbokaloya losaka ndo mbotombola. (1 Tesalonika 5:18) Ndo nto, tatohɛke pondjo dako diaki ɔpɔstɔlɔ Paulo diata ɔnɛ: “Lu akambu tshe, nyuti ehumba anyu le Nzambi lu dombelo la osengosengo.” Eelo, tokambe la diaaso tshɛ diele laso dia sawola la Nzambi. Lo yoho shɔ, mbayototetemala mɛna mɛtɛ ka kɛnɛ kakate Paulo lo dikambo di’anto wele alɔmbɛlɔ awɔ kadimɔmaka ate: “Ki ka [Nzambi], kuleki yimba tshe, ayulama etema anyu la tukanyi tanyu.”—Filipi 4:6, 7.
Onde wɛ kokaka kadimola?
• Weho w’alɔmbɛlɔ wa ngande wakokaso sala?
• Ngande wahombaso nɔmbaka?
• Awui akɔna wakokaso mbidja lo alɔmbɛlɔ aso?
• Naa ohomba wa dɔmbɛlɔ etena kasala onto pɛkato?
[Esato wa lo lɛkɛ 29]
Alɔmbɛlɔ w’oma k’ɛse otema tokimanyiyaka diaha nkɔ l’ehemba
[Esato wa lo lɛkɛ 31]
Oma lo dɔmbɛlɔ, sho mɛnyaka Nzambi lowando laso, mbotɛka ekiyanu ndo ehomba aso