Awala wele la nɛmɔ lo washo wa Nzambi ndo w’anto
“Tshuki diakayala la Kana . . . waketi ndu Jesu la ambeki andi lu [fɛtɛ ka] tshuki.”—JOANI 2:1, 2.
1. Ɔkɔndɔ wendana la Yeso lam’akinde la Kana kotolaka yambalo yaso lo dui diakɔna?
YESO, nyango ndo ambeki ande amɔtshi wakeyaka ɔngɛnɔngɛnɔ wakoka monga la diwala dia nɛmɔ l’atei w’ekambi wa Nzambi. Kristo akasha fɛtɛ kɛmɔtshi ka diwala lokumu lo sala dihindo diande dia ntondo diofundami lo Bible ndo tshelo shɔ yakafudia ɔngɛnɔngɛnɔ w’anto lo diaaso sɔ. (Joani 2:1-11) Ondo wɛ ambongaka lo fɛtɛ y’awala w’Akristo walanga kambɛ Jehowa oko atshukanyi wele la ɔngɛnɔngɛnɔ ndo akangɛnangɛna fɛtɛ y’awala akɔ. Kana ondo wɛ ekɔ lo nongamɛ dia sala diwala dia ngasɔ kana kimanyiya ɔngɛnyi ayɛ ɔmɔtshi dia sala diwala dia dimɛna. Kakɔna kakoka salema dia diɔ mbeta dimɛna?
2. Awui akɔna wata Bible lo dikambo di’awala?
2 Akristo wambɛna dia alako wa l’Ɔtɛkɛta wa Nzambi wakasambiyama wekɔ ohomba efula etena kalanga pami la womoto tshukana. (2 Timote 3:16, 17) Lo mɛtɛ, Bible hɛnya shikaa woho wahomba diwala di’Okristo salema. Ekɔ ngasɔ, nɛ dia mbekelo ndo ɛlɛmbɛ wa lɛɛta lo dikambo sɔ tshikitana lo ndjela dihole la dihole. Ɛnyɛlɔ, l’Isariyɛlɛ w’edjedja, ndoko yoho ya shikaa yendana la sɛlɛmɔnyi ya diwala yakahombaka anto ndjela. Lushi la tshuki, otshuki akatshɔka la wadɛnde lakande kana lo luudu la she. (Etatelu 24:67; Isaya 61:10; Mateu 1:24) Dui diakasalemaka lo washo w’anto sɔ mbakelamɛka tshuki ndo awui wasalema lo awala efula wa nshi nyɛ kosalemaka lo awala wa nshi shɔ.
3. Naa dui dimɔtshi diakasalema la Kana diele Yeso akasha lonya lɔkɔ?
3 Le ase Isariyɛlɛ, nna sɔ mbaki oko diwala kana tshuki. L’ɔkɔngɔ diko, vɔ wakakokaka sala fɛtɛ ka diwala, oko kɛnɛ kɔtɛkɛtshiwɔ lo Joani 2:1. Dikadimwelo efula dia Bible kadimolaka divɛsa sɔ lo yoho yele oko nyɛ: “Tshuki diakayala la Kana.” Koko tshɛkɛta ya lo Hɛbɛru shɔ kadimɔmaka dimɛna ɔnɛ “dambu dia tshuki.”a (Mateu 22:2-10; 25:10; Luka 14:8) Ɔkɔndɔ mɛnyaka hwe dia Yeso aki lo fɛtɛ kɛsɔ ndo akasale dui dimɔtshi diakafudia ɔngɛnɔngɛnɔ w’anto oko wakongaka lo awala w’ase Juda. Koko dui dioleki ohomba ele, woho wakasalemaka awala lo nshi ya Yeso tshikitana la kɛnɛ kasala anto efula nshi nyɛ.
4. Naa weho w’awala wasɔna Akristo amɔtshi dia sala ndo lande na?
4 Lo wedja efula ɛlɔ kɛnɛ, Akristo walanga tshukana la dia kotsha awui amɔtshi walɔmba lɛɛta. Etena kakotshawɔ awui asɔ, vɔ koka tshukana lo yoho tshɛ yetawɔma le lɛɛta. Sɛlɛmɔnyi kɛmɔtshi ka tshitshɛ koka salema oma le shushi kana okambi ɔmɔtshi wa l’ɔtɛmwɛlɔ wokondjisha lotshungɔ oma le Lɛɛta. Amɔtshi sɔnaka dia tshukana lo yoho shɔ ndo vɔ nɔmbaka ewotɔ ndo angɛnyi awɔ amɔtshi w’Akristo dia vɔ monga oko ɛmɛnyi awɔ la ntondo ka lɛɛta kana dia vɔ tɔngɛnangɛna la wɔ kâmɛ lo diaaso di’ohomba sɔ. (Jeremiya 33:11; Joani 3:29) Woho akɔ wâmɛ mbele, Akristo akina koka mɛna ɔlɔlɔ sala fɛtɛ ka diwala ka tshitshɛ kahatowalɔmba falanga ndo ɛlɔngɔswɛlɔ efula. Vɔ mbeyaka mɛna ɔlɔlɔ mbelɛ angɛnyi angana ato ndo nɔngɔsɔla yangɔ ya ndɛ ya tshitshɛ. Oyadi kɛnɛ kakombolaso lo dikambo sɔ, sho la dia mbeya dia Akristo akina wambotshunda lo nyuma koka tosha tokanyi totshikitanyi la taso.—Romo 14:3, 4.
5. Lande na kakombola Akristo efula dia sawo dia diwala mbishama etena katshukanawɔ ndo diɔ tɛkɛtaka dia na?
5 Atshukanyi efula mɛnaka ɔlɔlɔ dia sawo dimɔtshi di’oma lo Bible mbishama lo diwala diawɔ.b Vɔ mbeyaka dia Jehowa mbele kiɔkɔ ya diwala ndo nde mbishaka alako wa lomba l’Ɔtɛkɛta ande lo woho wakoka diwala tondoyama ndo mbela ɔngɛnɔngɛnɔ. (Etatelu 2:22-24; Mako 10:6-9; Efeso 5:22-33) Ndo atshukanyi efula nangaka dia angɛnyi awɔ w’Akristo ndo ewotɔ awɔ monga lo diaaso di’ɔngɛnɔngɛnɔ sɔ. Ko ngande wahombaso mbɔsa awui wotshikitanyi walɔmba lɛɛta ndo kutimɛ yasalema lo ɛtshi kaso ka nkɛtɛ? Sawo nɛ diayɔtɛkɛta dia awui wasalema l’ahole wotshikitanyi. Awui amɔtshi mbeyaka tshikitana efula la kɛnɛ keyanyu ndo kasalema lo ɛtshi kanyu ka nkɛtɛ. Koko, nyu koka mɛna atɔndɔ kana awui amɔtshi wayela anto efula wele ohomba le ekambi wa Nzambi.
Diwala dia nɛmɔ ekɔ nɛ diosalemi lo ndjela ɛlɛmbɛ wa lɛɛta
6, 7. Lande na kahombaso mbidja yimba lo awui walɔmba lɛɛta lo dikambo dia diwala ndo ngande wakokaso sala dui sɔ?
6 Kânga mbele Jehowa kiɔkɔ ya diwala, mandji y’ana w’anto yekɔ la yema ya lowandji lâdiko dia wanɛ watshukana. Dui sɔ kema kɔlɔ, nɛ dia Yeso akate ate: “Nyusha Kayisa diango dia Kayisa. Nyusha [Nzambi] diango dia [Nzambi].” (Mako 12:17) Ndo ɔpɔstɔlɔ Paulo akate ate: “Untu tshe alembele embuledi andi. Nduku diulelu diaha uma le [Nzambi], ne dia waulelu tshe weli uma le [Nzambi].”—Romo 13:1; Tito 3:1.
7 Lo wedja efula, Kayisa kana ewandji wa lɛɛta mbashikikɛ ɛnɔnyi wakoka onto tshuka kana tshukama. Ɔnkɔnɛ, etena katshukana Akristo ahende lo ndjela Afundelo, vɔ kitanyiyaka nto ɛlɛmbɛ wa lɛɛta wa lo wodja awɔ. Dui sɔ koka mendana la okondjelo wa mukanda wa diwala ndo mbala mɔtshi la wodjelo adiɔ lo buku dia lɛɛta. Etena kakalɔmbɛ Kayisa Angusta anto dia “ndjofundja nkombo,” Mariya la Yɔsɛfu wakakitanyiya lo didjango sɔ lo munda lɔkɛndɔ otsha la Bɛtɛlɛhɛma dia ‘tofundja nkombo.’—Luka 2:1-5.
8. Mbekelo yakɔna yatona Ɛmɛnyi wa Jehowa ndo lande na?
8 Etena katshukana Akristo ahende lo yoho yetawɔ lɛɛta, tshuki sɔ mbetawɔmaka lo washo wa Nzambi. Koko Ɛmɛnyi wa Jehowa hawosale diwala mbala ko mbala lo sala sɛlɛmɔnyi ya laka lɛɛta mbala efula, kana nyomota dɔkɔlɔkɔ diawɔ dia diwala etena kasalawɔ fɛtɛ ka woho wambowokotsha ɛnɔnyi 25 kana 50 wa diwala. (Mateu 5:37) (Ɛtɛmwɛlɔ ɛmɔtshi hawɔshi wodjelo wa diwala lo buku dia lɛɛta la nɛmɔ ndo vɔ mbutaka ɔnɛ naka ɔlɔmbɛdi kana owandji w’ɔtɛmwɛlɔ ɔmɔtshi atasale waa sɛlɛmɔnyi mɔtshi kana mbuta ɔnɛ kapanda la kapanda waya wadi l’omi, kete diwala sɔ bu dia dimɛna.) Lo wedja efula, lɛɛta mbetawɔka dia okambi ɔmɔtshi w’Ɛmɛnyi wa Jehowa tshukanya anto. Okambi ɔsɔ salaka dui sɔ etena kashande sawo dia diwala lo Mbasala ka Diolelo. Mbalasa ka Diolelo ekɔ dihole di’ɔtɛmwɛlɔ wa mɛtɛ dia lo ngelo diakoka dia sawo dia diwala mbishama nɛ dia Jehowa mbele Otungi adiɔ.
9. a) Lo kɛnɛ kendana la wodjelo wa diwala lo buku dia lɛɛta, kakɔna kakoka sɔna atshukanyi dia sala? b) Ngande wakoka dikumanyi mendana la ɛlɔngɔswɛlɔ wa diwala?
9 Lo wedja ekina, ɛlɛmbɛ nɔmbaka dia atshukanyi tshukana la ntondo ka biro ɔmɔtshi wa lɛɛta kana la ntondo ka ɔnɛnɛ ɔmɔtshi wa lɛɛta wele la lotshungɔ la sala dui sɔ. Mbala efula Akristo kitanyiyaka didjango sɔ lo sala sawo dia diwala lo Mbalasa ka Diolelo ko lushi lakɔ lâmɛ kana lushi layela. (Vɔ hawohombe mbetsha nshi efula lam’asa wodjelo wa diwala lo buku dia lɛɛta la lushi lahomba salema sawo dia diwala, nɛ dia wambotshukana lo yoho yetawɔma le Nzambi ndo le anto ndo le etshumanelo k’Akristo.) Naka atshukanyi wanɛ wambodja diwala diawɔ lo buku dia lɛɛta kombolaka dia sawo dia diwala salema lo Mbalasa kɛmɔtshi ka Diolelo, kete vɔ la dia takondjisha lotshungɔ la ntondo oma le dikumanyi diakenga Kɔmite k’olimu ka lo etshumanelo. Lâdiko dia vɔ ndjashikikɛ dia atshukanyi asɔ wekɔ la lokumu l’ɔlɔlɔ, emendji ɛsɔ wayohomba ndjashikikɛ dia etena kayosalema sawo sɔ, diɔ hadiotofukutanya ekongelo ka nsanganya ndo ka awui akina wahomba salema lo mbalasa. (1 Koreto 14:33, 40) Lo kɛnɛ kendana la mbalasa, vɔ wayɔsɛdingola nto dia kana ɛlɔngɔswɛlɔ wakombola wanɛ walanga tshukana wekɔ amɛna ndo ndjashikikɛ dia kana koka mbisha diewoyelo diendana la woho wayangema mbalasa.
10. Naka atshukanyi wakatatshiki alɔkɔlɔkɔ la ntondo ka ɔnɛnɛ wa lɛɛta, ayowosala lo wonya wa sawo dia diwala?
10 Ekumanyi kayosha sawo dia diwala la dia sala la wolo dia disha la wangasanu, la kɛnɛmɔ ndo lo yoho yakeketsha. Naka atshukanyi wakatasadi ntondo sɛlɛmɔnyi ya laka lɛɛta, kete ɔtɛkɛtshi ayolembetshiya hwe dia vɔ wambotshukana lo ndjela ɛlɛmbɛ wa Kayisa. Naka vɔ kotatshiki alɔkɔlɔkɔ la ntondo ka ɔnɛnɛ wa lɛɛta, kete atshukanyi kokaka sala dui sɔ wonya wa sawo dia diwala.c Naka vɔ wakatatshiki alɔkɔlɔkɔ la ntondo ka ɔnɛnɛ wa lɛɛta, koko atshukanyi w’eyoyo asɔ nangaka mbuta alɔkɔlɔkɔ awɔ la ntondo ka Jehowa ndo k’etshumanelo dia mɛnya dia “wambuyala untu otoi,” kete wayotshika alɔkɔlɔkɔ asɔ lo yoho yɛnya dia wakatasadi dui sɔ la ntondo ka ɔnɛnɛ wa lɛɛta.—Mateu 19:6; 22:21.
11. Lo ahole amɔtshi, ngande watshukana anto ndo shɛngiya yakɔna yele la dui sɔ lo sawo dia diwala?
11 L’ahole amɔtshi, lɛɛta hahike atshukanyi dia sala sɛlɛmɔnyi kɛmɔtshi kânga la ntondo ka ɔndɛlɛ wa lɛɛta. Diwala salemaka etena kasha atshukanyi ɔndɛlɛ wa lɛɛta mukanda wa diwala wakawalodjisha awui wahombama ndo wakawasinyisha. Oma lâsɔ ko, ɔndɛlɛ mbɔsa mukanda akɔ ko fundja diwala diawɔ lo buku dia lɛɛta. Yoho shɔ mbɔsama atshukanyi oko wadi l’omi ndo lushi lɔsɔ mbayonga lushi la diwala diawɔ. Oko wakatadiɛnyi la diko, atshukanyi mbeyaka kombola di’ɔnangɛwɔ ɔmɔtshi lambotshunda lo nyuma mbasalɛ sawo dia diwala lo Mbalasa ka Diolelo, nshi ngana tsho l’ɔkɔngɔ wa vɔ mbidja diwala diawɔ lo buku dia lɛɛta. Ɔtɛkɛtshi ayewoya anto tshɛ woye ndjolonga sawo sɔ dia kapanda la shishadjɛndɛ wambotshukana nɛ dia atete edja kodjishawɔ diwala diawɔ lo buku dia lɛɛta. Dɔkɔlɔkɔ tshɛ la dia mbishama lo yoho yɔtɔnɛ la kɛnɛ kotami lo odingɔ 10 ndo lo nɔtɛ ka l’ɛse ka dikatshi k’odingɔ ɔsɔ. Wanɛ wayoya lo Mbalasa ka Diolelo wayɔngɛnangɛna kâmɛ la atshukanyi ndo wayokondja wahɔ oma l’alako wotumbi oma l’Ɔtɛkɛta wa Nzambi wayoshama.—Limbu la Solomona 3:11.
Awala wasalema lo ndjela kutimɛ ndo ɛlɛmbɛ wa lɛɛta
12. Elɛwɔ diwala dia kutimɛ ndo kakɔna kele ɔlɔlɔ sala l’ɔkɔngɔ wa woho wa diwala sɔ?
12 Lo wedja ɛmɔtshi, atshukanyi salaka diwala diakoka mbelamɛ ɔnɛ dia kutimɛ (kana dia lo dioho). Diwala sɔ hendana la anto ahende wodjashi kâmɛ oko eseka, kana la diwala dia omandju.d Koko diwala diatɛkɛtaso lanɛ ekɔ diwala diasalema lo ndjela mbekelo yetawɔma le anto tshɛ wa lo dioho kana lo ɛtshi ka nkɛtɛ kodjashiwɔ. Dui sɔ mendanaka la okimwelo w’okundji, wele naka wambokimɔma, kete lâsɔ atshukanyi wambotshukana lo yoho yetawɔ lɛɛta ndo Afundelo. Lɛɛta mbɔsaka diwala dia kutimɛ oko diwala dia dimɛna, dietawɔma le nde ndo mbidjangaka dia anto tshukana lo yoho shɔ. L’ɔkɔngɔ wa lâsɔ, diwala dia kutimɛ sɔ koka mbidjama lo buku dia lɛɛta ndo lo sala ngasɔ, atshukanyi koka nongola mukanda wɛnya dia diwala diawɔ diambodjama lo buku dia lɛɛta. Wodjelo wa diwala lo buku dia lɛɛta koka monga tshondo y’ekokelo le atshukanyi ndo le wadi naka omɛnde ambovɔ ndo le ana wayowota. Etshumanelo la dia keketsha anto tshɛ watshukana lo ndjela kutimɛ dia mbidja diwala diawɔ lo buku dia lɛɛta aha la tshimbatshimba. Dui dia diambo ko lo Ɛlɛmbɛ wa Mɔsɛ, awala ndo wotwelo w’ana wakadjamaka lo abuku wa lɛɛta.—Mateu 1:1-16.
13. L’ɔkɔngɔ wa diwala dia kutimɛ, ɔtɛkɛtshi ayondewoya anto wonya wa sawo dia diwala?
13 Wanɛ watshukana lo ndjela ɛlɛmbɛ wa lɛɛta oma l’ɔkɔngɔ wa vɔ tshukana lo yoho yalɔmba kutimɛ komaka wadi l’omi etena kasalema diwala diawɔ. Oko wakataditshi la diko, atshukanyi wadja diwala diawɔ lo buku dia lɛɛta mbeyaka kombola dia vɔ mbasalɛ sawo dia diwala ndo tshika alɔkɔlɔkɔ lo Mbalasa ka Diolelo. Naka dui sɔ diambosalema, kete ɔtɛkɛtshi ayewoya anto dia atshukanyi wakashile tshukana lo yoho yɔtɔnɛ la ɛlɛmbɛ wa Kayisa. Lâsɔ sawo sɔ diayoshama. Tayota dia anto waya wadi la omi naka wakakimɔ kɛnɛ kalɔmbama lo kutimɛ ndo wambasalɛ sawo dimɔtshi di’oma lo Afundelo. Naka awui ahende asɔ salema aha la nshi efula mbeta, kana salema lushi lakɔ lâmɛ, kete diɔ diayonga diwala di’Akristo dia nɛmɔ lo ngelo kakɔ.
14. Kakɔna kakoka Akristo sala naka vɔ kokaka sala diwala dia kutimɛ ndo dia laka lɛɛta?
14 Lo wedja ɛmɔtshi wele awala wa kutimɛ mbetawɔmaka le lɛɛta, ekɔ nto tɛdikɔ tokina tendana la diwala dia laka lɛɛta. Mbala efula diwala dia laka lɛɛta salemaka la ntondo ka ɔndɛlɛ ɔmɔtshi wa lɛɛta. Lo diwala sɔ, atshukanyi koka sala alɔkɔlɔkɔ ndo sinya lo buku dia lɛɛta. Atshukanyi amɔtshi w’Akristo ndekaka mɛna dimɛna sala woho wa diwala sɔ lo dihole dia diwala dia kutimɛ. Koko awala akɔ ahende tshɛ mbetawɔmaka lo washo wa lɛɛta. Kɛnɛ kotami l’odingɔ 9 ndo 10 lo dikambo dia sawo dia diwala ndo dia alɔkɔlɔkɔ mendanaka ndo la diwala dia laka lɛɛta. Dui dioleki ohomba ele anto tshukana lo yoho yetawɔma lo washo wa Nzambi ndo w’anto.—Luka 20:25; 1 Petero 2:13, 14.
Diwala diongake la nɛmɔ nshi tshɛ
15, 16. Ngande wahomba nɛmɔ monga dui di’ohomba efula lo diwala?
15 Etena kakatombe okakatanu ɔmɔtshi lo diwala dia nkumekanga ka Pɛrɛsiya, ondaki ande wa woke wakawelɛka Memukana akasha dako diakakoke monga la etombelo w’ɛlɔlɔ ‘ɔnɛ wamato tshɛ la dia nɛmiya waomɛwɔ.’ (Esta 1:20) Lo awala w’Akristo, kema ohomba dia nkumekanga k’anto mbidja didjango sɔ. Waa wadi la dia nɛmiya waomɛwɔ. Ndo waomi w’Akristo la dia mbisha wadɛwɔ nɛmɔ ndo mbâtombola. (Tukedi 31:11, 30; 1 Petero 3:7) Aha paka l’ɔkɔngɔ w’ɛnɔnyi efula mbahombawɔ ndjɛna ohomba wa mbisha diwala diawɔ nɛmɔ. Koko nɛmɔ sɔ la dia mɛnama tatɛ oma lo lushi la tshuki.
16 Anto tshɛ, koko aha wadi l’omi ato mbahomba mɛnya dia vɔ mbɔsaka lushi la tshuki la nɛmɔ. Naka ekumanyi kɛmɔtshi k’Okristo ayosha sawo dia diwala, kete nde la dia disha la nɛmɔ tshɛ. Sawo sɔ la dia sembɔnɛ la atshukanyi. Dia mɛnya nɛmɔ diawashande, ɔtɛkɛtshi hatodja awui wa shɛkɛsɛkɛ kana wɔdja anto. Nde hahombe mbidja awui ande hita wakoka nyangiya atshukanyi ndo ampokami. Koko nde la dia sala la wolo dia disha la wangasanu ndo lo yoho yakeketsha lo mbika epole ɔsɛkɛ lo kɛnɛ kendana la ɔnɛ lele Otungi wa diwala ndo lo alako ande woleki tshɛ amɛna. Sawo dia diwala diasha ekumanyi diayokimanyiya dia diwala monga diwala diasha Jehowa Nzambi lotombo.
17. Lande na kele ekɔ awui amɔtshi walɔmbama lo dikambo dia diwala di’Okristo?
17 Ondo lo sawo nɛ tambɛna awui efula walɔmbama lo kɛnɛ kendana la diwala. Mbeyaka monga ko awui amɔtshi hawoleke mendana la ɛtshi kanyu ka nkɛtɛ. Koko, sho tshɛ la dia mbeya dia ekɔ ohomba efula dia ɛlɔngɔswɛlɔ wendana la diwala dia l’atei w’Ɛmɛnyi wa Jehowa mɛnya dia vɔ nɛmiyaka ɛlɛmbɛ wa lo ɛtshi kawɔ ka nkɛtɛ ndo awui walɔmba Kayisa. (Luka 20:25) Paulo akatokeketsha ate: “Nyusha antu tshe diango diahumbawo nungula: ulambu le one lahumba nungula elambu, okongo le one lahumba nungula okongo, woma le one lahumba mbukama woma, la kenemo le one lahumba nemiama.” (Romo 13:7) Eelo, oma ko lushi la diwala, ekɔ ɔlɔlɔ dia Akristo nɛnya tɛdikɔ takɔshi Nzambi lo dikambo dia diwala.
18. Naa dui dimɔtshi diendana la diwala diahombaso mbidja yimba lɔkɔ ndo lende akokaso tana awui wendana la dui sɔ?
18 Awala efula w’Akristo ndjelanaka la fɛtɛ kana dambo dia diwala. Tohɔ dia Yeso aki lo fɛtɛ kɛmɔtshi ka diwala. Naka fɛtɛ ka ngasɔ kayosalema, ngande wakoka alako w’oma lo Bible tokimanyiya dia ndjashikikɛ dia ndo fɛtɛ kɛsɔ kayosha Nzambi lotombo ndo mɛnya ɔnɛ anto hawotɔtɛkɛta kɔlɔ dikambo dia wanɛ wotshukanyi ndo dikambo di’etshumanelo? Sawo diayela diayɔtɛkɛta dia dui di’ohomba sɔ.
[Nɔte ya l’ɛse ka dikatshi]
b Ɛmɛnyi wa Jehowa kambaka la sawo dia diwala dia minitɛ 30 diele l’ɔtɛ a dui ɔnɛ: “Diwala dia nɛmɔ lo washo wa Nzambi.” Diɔ diekɔ l’alako w’eshika w’oma l’Afundelo wɔsami oma lo dibuku Sheke y’ɔngɛnɔngɛnɔ wa lo nkumbo ndo ekanda ekina w’Ɛmɛnyi wa Jehowa. Sawo sɔ diekɔ ohomba efula le atshukanyi ndo le anto tshɛ wakaye lo tshuki sɔ.
c Naka ɛlɛmbɛ wa lo ngelo hawɔlɔmbɛ dui dimɔtshi diotshikitanyi, kete atshukanyi koka kamba la alɔkɔlɔkɔ anɛ washa Nzambi nɛmɔ. Pami ayota ate: “Dimi [lokombo la otshuki] lambokɔsa wɛ [lokombo la otshukami] dia wɛ monga wadɛmi ndo lambotshika dɔkɔlɔkɔ dia kolanga efula lo ndjela ɛlɛmbɛ wa Nzambi oko wofundamiwɔ l’Afundelo w’Ekila lo dikambo dia waomi w’Akristo, lo edja tshɛ kayotoyalaka sho akɔ ahende la lɔsɛnɔ lanɛ la nkɛtɛ lo ndjela yɛdikɔ ya Nzambi lo dikambo dia diwala.” Otshukami ayota ate: “Dimi [lokombo l’otshukami] lambokɔsa wɛ [lokombo l’otshuki] dia wɛ monga omɛmi ndo lambotshika dɔkɔlɔkɔ dia kolanga ndo kɔlɛmiya efula, lo ndjela ɛlɛmbɛ wa Nzambi oko wofundamiwɔ l’Afundelo w’Ekila lo dikambo dia wâdi w’Akristo, l’edja tshɛ kayotoyalaka sho akɔ ahende la lɔsɛnɔ lanɛ la nkɛtɛ lo ndjela yɛdikɔ ya Nzambi lo dikambo dia diwala.”
d Tshoto y’Etangelo ya Ngɔndɔ ka divwa 15, 1963, lɛkɛ 575 lo Falase, nembetshiyaka awui amɔtshi lo kɛnɛ kendana la pami la womoto wodjashi aha la tshukana lo yoho ya dimɛna.
Onde wɛ akohɔ?
• Lande na kahombaso mbidja yimba lo awui wa lɛɛta ndo wa lo nyuma wendana la diwala?
• Naka Akristo ahende wambotshukana laka lɛɛta, kakɔna kakokawɔ sala nto aha la tshimbatshimba?
• Lande na kashama sawo dia diwala lo Mbalasa ka Diolelo?
[Osato wa lo lɛkɛ 12]
Lo awala wakasalemaka l’Isariyɛlɛ w’edjedja, otshuki akatshɔka la wadɛnde lakande kana laka she
[Osato wa lo lɛkɛ 15]
L’ɔkɔngɔ wa diwala dia kutimɛ, Akristo koka kombola dia vɔ mbasalɛ sawo dia diwala lo Mbalasa ka Diolelo