Kem’edja asui tshɛ wayanga komɛ
“Dive dia wuki, ulimu andi weli uluwanyi.”—EUHWELU K’ELEMBE 32:4.
1, 2. a) Lande na kangɛnangɛnayɛ elongamelo ka nsɛna pondjo pondjo? b) Kakɔna kashimba anto efula dia monga la mbetawɔ le Nzambi kasha alaka wa diambo wendana la nshi yayaye?
ONDE wɛ ngɛnangɛnaka kanyiya woho wayonga lɔsɛnɔ lo Paradiso? Ondo wɛ ekɔ lo ndjaɛna atakindola okama aso wa nkɛtɛ wa diambo ɔnɛ ndo ateke dia mbeya akambo suke la tshɛ wendana la lokema la diangɔ diele la lɔsɛnɔ lɔkɔ. Kana ondo wɛ ekɔ lo kanyiya ɔlɔ wayonga layɛ lo kamba kâmɛ l’anto akina dia kokɛ nkɛtɛ ndo mbisha lonya dia kikadimola tshɛ jardɛ ya dimɛna. Kana ondo wɛ ekɔ lo kanyiya akoka wayoyokoka pamia l’awui wa sɛlasɛla, wa wokelo, lo mishiki kana l’akambo akina wahayakoke kondja etena kambasala lo lɔsɛnɔ la nshi nyɛ lêso la wesanu efula ndo latete esadi esadi. L’akambo tshɛ, wɛ ngɛnangɛnaka efula elongamelo ka ndjɔsɛna woho wa lɔsɛnɔ welɛ Bible ɔnɛ ‘lɔsɛnɔ l’oshika,’ mbuta ate woho wa lɔsɛnɔ lakalange Jehowa dia sho nsɛna tele l’elongamelo ka nsɛna pondjo pondjo.—1 Timote 6:19.
2 Ekɔ mɛtɛ ɔngɛnɔngɛnɔ ndo diɛsɛ dia woke efula dia mbewoya anto akina elongamelo k’oma lo Bible kɛsɔ, shi mɛtɛ? Koko, anto efula wekɔ lo mbikadja elongamelo kɛsɔ. Vɔ kiɔsaka oko ɛngɔ k’anyanya, oko dɔ diele paka anto waha la timba mbadietawɔ. Mbeyaka monga wolo le wɔ dia monga la mbetawɔ le Nzambi kalaka lɔsɛnɔ la pondjo lo Paradiso. Lande na? Le amɔtshi, okakatanu ɔsɔ ndja l’ɔtɛ wa akambo wa kɔlɔ wɛnawɔ. Vɔ mbɔsaka dia otondongaka Nzambi ekɔ ndo ekɔ kanga wolo tshɛ ndo la ngandji tshike ndoko akambo wa kɔlɔ ndo asui wotonga. Vɔ mbutaka nto ɔnɛ ndoko Nzambi kakoka mbetawɔ awui wa kɔlɔ, ko naka nde ekɔ, kete nde bu kanga wolo tshɛ ndo hatokanɛ. Le amɔtshi, yoho y’ekanelo ka yimba kɛsɔ kekɔ mɛtɛ. Satana aya mɛtɛ manyi lo mbetɛ anto totshungu lo timba.—2 Koreto 4:4.
3. Dimbola diakɔna dia wolo diakokaso kimanyiya anto la okadimwelo adiɔ ndo lande na kele paka sho ato mbakoka sala dui sɔ?
3 Oko weso Ɛmɛnyi wa Jehowa, paka sho ato mbakoka kimanyiya anto wakesama oma le Satana ndo oma lo lomba l’andja ɔnɛ. (1 Koreto 1:20; 3:19) Sho shihodiaka lande na kele anto efula bu la mbetawɔ l’alaka wa lo Bible nɛ dia vɔ haweye Jehowa. Ondo vɔ haweye lokombo lande ndo kitshimudi ya lɔ. Ondo haweye nto awui efula ndo mbala mɔtshi haweye ndoko dui lo kɛnɛ kendana la waonga ande kana woho weyamande oko ɔnɛ lakotsha alaka ande. Sho tekɔ la diɛsɛ dia mbeya akambo asɔ. Ekɔ ohomba dia sho vusolaka tena la tena woho wakokaso kimanyiya anto wele “tukanyi tawo tambuyala udjima lu ewu kawo” dia vɔ kondja okadimwelo lo dimbola dioleki tshɛ wolo diayambola anto. Dimbola diakɔ di’ɔnɛ: “Lande na katshika Nzambi akambo wa kɔlɔ ndo asui”? (Efeso 4:18) Ntondotondo, tayɛna woho wakokaso nɔngɔsɔla yimba y’onto dia mbosha okadimwelo wa dimɛna. Oma lâsɔ, tayɛna woho wakɛnɛmɔma waonga wa Jehowa lo woho wakandakandola dikambo diendana la kɔlɔ.
Yoho ya dimɛna ya kadimola
4, 5. Kakɔna kakokaso mimɛ sala etena katombola onto ɔmɔtshi ɔnɛ lande na katshika Nzambi asui? Lembetshiya.
4 Ngande wakokaso kadimola etena katombola onto ɔmɔtshi ɔnɛ lande na katshika Nzambi asui? Sho mbeyaka mbala kakɔ ɔtɔi mbolembetshiya awui efula, lo tatɛ la kɛnɛ kakatombe l’ekambɔ k’Ɛdɛna. Tena dimɔtshi okadimwelo ɔsɔ mbeyaka monga dimɛna. Koko paka kɛba nɛ dia ekɔ awui amɔtshi wakoka salema la ntondo. (Tukedi 25:11; Kolosai 4:6) Tende awui asato wakoka kamba laso dia kimanyiya onto la ntondo ka mbisha okadimwelo lo dimbola sɔ.
5 Ntondotondo, naka mɛnamaka di’onto ekɔ lo ndjakiyanya efula lo woho wamboleka awui wa kɔlɔ salema l’andja w’otondo, kete ondo ndamɛ kana lakinde ɔmɔtshi la ngandji ekɔ lo diɛnɛ l’etombelo w’oma l’akambo wa kɔlɔ. Ɔnkɔnɛ, mbeyaka monga ohomba sho tatɛ mbowɛnya kɛtshi ka mɛtɛ kawokaso. Ɔpɔstɔlɔ Paulo akalake Akristo ɔnɛ: “Nyuleli la wane walela.” (Romo 12:15) Mɛnya woho wayadjaso lo dihole diande ndo ‘kɛtshi kawokaso’ mbeyaka minanda otema w’onto. (1 Petero 3:8) Naka nde mɛna dia tekɔ lo ndjakiyanya dikambo diande, kete nde ayoleka mbetawɔ dia mpokamɛ kɛnɛ kayotowotɛ.
6, 7. Lande na kahombaso mɛtɛ mandola onto latoka dimbola l’otema ɔtɔi lo dikambo dimɔtshi di’ohomba efula dia lo Bible di’otshindja wɔɔngɔ?
6 Dui dia hende, sho mbeyaka mbowandola lo woho wombodinde dimbola sɔ l’otema ɔtɔi. Anto amɔtshi mbɔsaka dia woho wayakiyanyawɔ dia ambola asɔ, mɛnyaka dia vɔ bu la mbetawɔ kana hawɔlɛmiya Nzambi. Mbeyaka monga ko ngasɔ mbakawatɛ ewandji ɛmɔtshi w’ɛtɛmwɛlɔ. Ko tete le, aha ngasɔ mbediɔ. Anto waki la kɔlamelo wakasɛnaka lo nshi yakafundamaka Bible wakambola ambola wa woho ɔsɔ. Ɛnyɛlɔ, omembi w’esambo Davidi akambola ate: “[Jehowa] li, ukundi emalaye tshalula? Ukundi atuyushamaka lu nshi y’asui?” (Osambu 10:1) Woho akɔ wâmɛ mbele, ɔprɔfɛta Habakuka akambola ate: “[Jehowa] li, edja ndu kaandi ayumulela ekimanyelu, ku we hambukela? Dimi lambukulelela dia akambu wa ngala, keli we hatushimbela. Dikambu kuna dia menyaye uhedia, ndu dia menyaye kolo? Elanyelu la akambu wa ngala weko la ntundu kami. Ta dieko, tamu tambufulanela.”—Habakuka 1:2, 3.
7 Anto asɔ waki anto waki la kɔlamelo ndo wakalɛmiyaka Nzambi efula. Onde Nzambi akâhangwɛ lo woho wakawawombola ambola asɔ? Lo dihole dia mbahangwɛ, Jehowa akɛnyi dimɛna dia ambola awɔ w’eshika fundama l’Ɔtɛkɛta ande. Ɛlɔ kɛnɛ, onto layakiyanya efula lo woho wambokokanɛ akambo wa kɔlɔ l’ahole tshɛ, mbeyaka monga ko ekɔ la ndjala ka lo nyuma, mbuta ate ekɔ lo nomɔlomɔ dia kondja ekadimwelo wakoka tanema paka lo Bible. Tohɔ dia Yeso akatɛkɛta dimɛna lo dikambo dia wanɛ wele la ndjala ka lo nyuma, kana wanɛ ‘weya ehomba awɔ wa lo nyuma.’ (Mateu 5:3) Ekɔ mɛtɛ tshondo ya diɛsɛ dia kimanyiya anto asɔ dia vɔ kondja ɔngɛnɔngɛnɔ wakalake Yeso!
8. Wetshelo akɔna wa kɔlɔ wambokonya di’anto mbetawɔ ɔnɛ Nzambi mbele kiɔkɔ y’asui, ndo ngande wakokaso mbakimanyiya?
8 Dui dia sato, mbeyaka monga ohomba kimanyiya onto dia nde mɛna dia Nzambi bu kiɔkɔ y’akambo wa kɔlɔ wasalema l’andja w’otondo. Anto efula mbetshamaka ɔnɛ Nzambi mbalɔmbɔla andja wasɛnaso ɔnɛ. Vɔ wambetshamaka nto dia Nzambi ambotashikikɛki edja efula la ntondo dui tshɛ diatokomɛ ndo ɔnɛ nde ndoko l’ɔkɔkɔ w’oshika wasoyande anto. Ɔsɔ ekɔ wetshelo wa kashi. Wetshelo ɔsɔ mɔnyɔlaka Nzambi ndo mɛnyaka dia nde mbele kiɔkɔ y’akambo wa kɔlɔ ndo y’asui wele l’andja ɔnɛ. Ɔnkɔnɛ, sho koka kamba l’Ɔtɛkɛta wa Nzambi dia mɛnya dia awui asɔ wekɔ kashi. (2 Timote 3:16) Aha Jehowa, koko Satana Diabolo mbalɔmbɔla dikongɛ di’akambo dia kɔlɔ nɛ. (1 Joani 5:19) Jehowa kôkongɛ la ntondo akambo wayokomɛka ditongami diande diele la yimba; nde mbashaka lotshungɔ ndo waaso wa vɔ sɔna lam’asa kɛnɛ kele ɔlɔlɔ la kɛnɛ kele kɔlɔ. (Euhwelu k’Elembe 30:19) Ndo Jehowa kema pondjo kiɔkɔ y’akambo wa kɔlɔ; nde mpetshaka akambo wa kɔlɔ ndo kanɛka wanɛ wasoyama osoyamasoyama.—Jobo 34:10; Tukedi 6:16-19; 1 Petero 5:7.
9. Naa dihomɔ dimɔtshi diakatondja ‘ɔhɔmbɔ wa kɔlamelo ndo wa kɛsɔ’ dia kimanyiya anto dia vɔ mbeya lande na katshika Jehowa Nzambi asui?
9 L’ɔkɔngɔ wa wɛ sala awui asɔ, wɛ mbeyaka mɛna dia ompokami ayɛ aya suke dia mbeya lande na katshika Nzambi dia asui tetemala. Dia kokimanyiya, ‘ɔhɔmbɔ wa kɔlamelo ndo wa kɛsɔ’ ambotondja ekanda efula. (Mateu 24:45-47) Ɛnyɛlɔ, lo losanganya la distrikɛ lakasalema lo 2005/2006 laki l’ɔtɛ a dui ɔnɛ: “Okitanyiya le Nzambi,” traktɛ kele l’ɔtɛ a dui ɔnɛ Asui tshɛ wayanga komɛ! kakatombe. Naka traktɛ kɛsɔ kekɔ l’ɔtɛkɛta anyu, lande na kahanyayaekesanyiya la kɛnɛ kofundami lɔkɔ? Ndo nto, dibuku Bible etshatɔ mɛtɛ? diatanema kakianɛ l’ɛtɛkɛta 157 diekɔ la tshapita y’otondo yatɛkɛta dia dimbola di’ohomba sɔ. Kamba dimɛna la dihomɔ di’ohomba sɔ. Dihomɔ sɔ nembetshiyaka dimɛna dikambo dia lowandji la l’andja w’otondo diatɛkɛtama lo Bible diakatombe lo Ɛdɛna ndo lande na kakakandola Jehowa dikambo sɔ woho wakandadikandola. Ohɔka nto dia etena kakɛtshanyayɛ dikambo sɔ l’onto ɔmɔtshi, wɛ ekɔ lo mbosha woho w’ewo koleki tshɛ ohomba. Mbuta ate ewo ka Jehowa ndo ka waonga ande wa diambo.
Leka kotola yambalo lo waonga waki Jehowa
10. Kakɔna kɛna anto efula wolo shihodia lo kɛnɛ kendana la ɔkɔkɔ watshika Nzambi asui ndo naa ewo kakoka mbakimanyiya?
10 Etena kakimanyiyayɛ anto dia vɔ mbeya lande na katshika Jehowa dia anto ndjalɔmbɔla lo shɛngiya yaki Satana, yanga dia kotola yambalo yawɔ lo waonga wa diambo waki Jehowa. Efula k’anto mbeyaka dia Nzambi ekɔ la nkudu k’efula; vɔ mbokaka mbala efula wawelɛ ɔnɛ Kanga-Wolo-Tshɛ. Koko, vɔ mbeyaka monga l’okakatanu dia shihodia lande na kahandakambe la wolo ande dia komiya wɛngiya ndo asui. Ondo vɔ haweye waonga akina waki Jehowa, wele oko eongelo kande k’ekila, losembwe, lomba ndo ngandji kande. Jehowa kɛnɛmɔlaka waonga asɔ lo yoho ya kokele ndo la wɛdimo. Bible totɛka lo dikambo sɔ ɔnɛ: “Ulimu andi weli uluwanyi.” (Euhwelu k’Elembe 32:4) Ngande wakokayɛ mbidja dikako vɔlɛ lo waonga asɔ etena kakadimolayɛ ambola wayambola anto mbala efula lo dikambo sɔ? Tende bɛnyɛlɔ dimɔtshi.
11, 12. a) Bonde kele edimanyielo komonga ohomba etena kakasale Adama la Eva pɛkato? b) Lande na kahatetawɔ Jehowa dia tshika pɛkato lo pondjo?
11 Onde Jehowa takandakoke tsho nimanyiya Adama l’Eva? Edimanyielo komonga ohomba kânga yema tshitshɛ lo dikambo sɔ. Oko wakiwɔ anto wa kokele, Adama la Eva wakasɔnɛ la lolango lawɔ dia tona lowandji la Jehowa ndo mbetawɔ ɛlɔmbwɛlɔ kaki Satana. Aha la tâmu, atɔmbɔki asɔ kondjatshumoya kânga yema. Ɔnkɔnɛ, etena kambola anto lande na kaki Jehowa kombadimanyiya, ekɔ oko wekɔ lo ndjambola lande na kaki Jehowa kokitshakitsha ɛlɛmbɛ ande ndo tshika dia pɛkato la ɔtɔmbɔkwɛlɔ monga. Okadimwelo mendanaka efula la dionga diele ohomba lo tshondo ya lonto laki Jehowa, mbuta ate eongelo kande k’ekila.—Etumbelu 28:36; 39:30.
12 Bible tɛkɛtaka mbala efula dikambo dia eongelo k’ekila ka Jehowa. Lonyangu ko, anto yema tshitshɛ tsho l’andja wa kɔlɔ ɔnɛ mbeya dionga sɔ. Jehowa ekɔ pudipudi ndo nde kakitɔna l’akambo tshɛ wa kɔlɔ. (Isaya 6:3; 59:2) Lo kɛnɛ kendana la pɛkato, nde ambɔsaka yɛdikɔ mɔtshi lo dikambo sɔ, mbuta ate nde hatetawɔ dia tɔ tshikala pondjo. Jehowa otondetawɔ dia tshika pɛkato lo pondjo, tshike sho ndoko l’elongamelo lo kɛnɛ kendana la nshi yayaye. (Tukedi 14:12) L’etena kakandashikikɛ, Jehowa ayokaloya etongelo tshɛ lo eongelo k’ekila. Ngasɔ mbediɔ mɛtɛ, nɛ dia ɔsɔ mbele lolango la Ɔnɛ lele Ekila.
13, 14. Lande na kaki Jehowa kondjaka atɔmbɔki l’Ɛdɛna?
13 Onde Jehowa takandakoke tsho ndjaka atɔmbɔki l’Ɛdɛna ko tonga anto akina? Nde aki mɛtɛ la wolo wa sala dui sɔ ndo kem’edja nde ayanga kamba la wolo ɔsɔ dia ndjaka anto wa kɔlɔ tshɛ. Amɔtshi koka ndjambola ɔnɛ: ‘Ko lande na kakinde kosala dikambo sɔ etena kaki paka atshi wa pɛkato asato ato l’andja w’otondo? Shi otondosala dui sɔ tshike odianganelo wa pɛkato, ndo asui tshɛ wɛnaso l’andja ɔnɛ totowonga?’ Lande na kaki Jehowa kosala dikambo sɔ? Euhwelu k’Elembe 32:4 mbutaka ɔnɛ: “Mbuka yandi tshe yeli sambu k’ololo.” Jehowa nangaka losembwe woho w’anyanya. Ngasɔ mbediɔ mɛtɛ nɛ dia “[Jehowa] atulangaka sambu k’ololo.” (Osambu 37:28) L’ɔtɛ walangande losembwe, Jehowa kondjaka atɔmbɔki l’Ɛdɛna. Lande na?
14 Ɔtɔmbɔkwɛlɔ waki Satana akonyiya dimbola diendana la lotshungɔ lele la Jehowa la nɔmbɔla. Woho walanga Jehowa losembwe akalɔmbɛ dia Satana kondja okadimwelo lo yoho ya losembwe lo kɛnɛ kakandate. Kânga mbakawakoke nongola dilanya sɔ, odiakelo wa mbala ɔtɔi w’atɔmbɔki asɔ, totondosha woho w’okadimwelo wa ngasɔ. Odiakelo ɔsɔ otɛnya dia Jehowa ekɔ la nkudu kaheme tshɛ, koko kɛnɛ kakatombe komonga tâmu dia kana Jehowa ekɔ la wolo waheme tshɛ. Ndo nto, Jehowa akatɛ Adama la Eva sangwelo diande. Vɔ wakahombe mbota ana, ndo ndodia nkɛtɛ, mboyolela ndo mbolela diangɔ tshɛ diakatongama la nkɛtɛ. (Etatelu 1:28) Otondonga Jehowa akadiake Adama la Eva, tshike sangwelo diande diendana la anto diotɔtɔ l’ashi. Losembwe la Jehowa takalahombe pondjo mbetawɔ etombelo wa ngasɔ nɛ dia sangwelo diande diatokotshamaka nshi tshɛ.—Isaya 55:10, 11.
15, 16. Ngande wakokaso kimanyiya anto etena kashawɔ tokanyi tawɔ lo woho wakahombe okakatanu wakatombe l’Ɛdɛna kandɔma?
15 Onde ekɔ onto ɔmɔtshi l’andja ɔnɛ lakoka kandola dikambo di’ɔtɔmbɔkwɛlɔ sɔ la lomba la mamba ko ndeka Jehowa? Anto amɔtshi mbeyaka nyanga dia mbisha tokanyi tawɔ dia kandola dikambo diendana la ɔtɔmbɔkwɛlɔ wakatombe l’Ɛdɛna. Koko lo sala ngasɔ, shi vɔ mɛnyaka dia tokanyi tele lawɔ l’okandwelo wa dikambo sɔ, ndeka tele la Jehowa la fwa? Vɔ mbeyaka sala dikambo sɔ l’eyango w’ɔlɔlɔ, koko vɔ haweye Jehowa ndo lomba lande lahadjama anya. Lam’akandafundɛka Akristo wa la Rɔma, ɔpɔstɔlɔ Paulo akasɛdingola dimɛna dimɛna lomba laki Nzambi, mbidja ndo ‘sheke y’ekila’ yendana la sangwelo dia Jehowa dia kamba la Diolelo dia Mɛsiya dia tshungola anto wele la kɔlamelo ndo dia kidia lokombo Lande l’ekila. Ngande wakayaoke Paulo lo kɛnɛ kendana la lomba la Nzambi kokanga sangwelo sɔ na? Ɔpɔstɔlɔ akakomiya mukanda ande l’ɛtɛkɛta ɛnɛ: “Lokumu layaale lee [Nzambi], ɔtɔi akɔ wa nkanga lomba, oma lee Yeeso Kristo, ponjo ponjo! Ayaale ɔsɔku.”—Romo 11:25; 16:25-27, Dyookaneelo dy’Oyooyo.
16 Paulo akashihodia dia Jehowa ‘ndamɛ oto mbele kanga lomba,’ mbuta ate nde kaheme tshɛ lo lomba l’andja w’otondo. Onto akɔna l’atei w’anto wele kema kokele lakoka mɛtɛ kanyiya yoho yoleki tshɛ dimɛna ya kandola oseka dikambo tshɛ mbidja ndo okakatanu woleki tshɛ wendana la tɔfwɛfwɛ takadje Satana t’ɔnɛ Nzambi kema la lotshungɔ la nɔmbɔla? Ɔnkɔnɛ, tekɔ l’ohomba wa kimanyiya anto dia vɔ monga la woho wa dilɛmiɛlɔ di’efula diele laso otsha le Nzambi lele ‘la lomba l’otema.’ (Jobo 9:4) Lo yɛdikɔ yayotoleka shihodia lomba la Jehowa, mbayotoleka mbetawɔ ɔnɛ yoho yande ya kandola akambo mbele yoho yoleki tshɛ dimɛna.—Tukedi 3:5, 6.
Toshihodia ɔkɛndɛ wele la dionga dia Jehowa dioleki woke
17. Ngande wakoka oshihodielo wa dimɛna wa ngandji ka Jehowa kimanyiya wanɛ wayakiyanya lo woho watshika Nzambi asui?
17 ‘Nzambi ekɔ ngandji.’ (1 Joani 4:8) Oma l’ɛtɛkɛta wa diambo ɛsɔ, Bible mɛnyaka dionga diaki Nzambi dioleki waonga ande akina tshɛ dimɛna ndo dionga dialeka keketsha wanɛ wayakiyanya lo woho wambofulanɛ akambo wa kɔlɔ. Jehowa akɛnya ngandji kande lo yoho tshɛ yakandasɔnɛ dia shidiya wolo wa mamba w’elanyelo wele la pɛkato lâdiko dia etongelo kande. Ngandji akatshutshuya Jehowa dia mbisha ana wa Adama la Eva wele atshi wa pɛkato elongamelo. (Etatelu 3:15) Nzambi akawasha ehomɔ ka vɔ ndjasukanya la Nde, ehomɔ kakɔ ko dɔmbɛlɔ ndo akakimanyiya dia vɔ monga la diɔtɔnganelo dietawɔma la Nde. Ngandji akatshutshuya Nzambi dia mbisha anto tshungo dikambo dia edimanyielo ka pɛkato tshɛ ndo mbisha nto anto lɔsɛnɔ la kokele ndo la pondjo. (Joani 3:16) Ndo ngandji akôtshutshuya dia monga la solo dia lotutsha otsha le anto, mbasha waaso efula wa tona Satana ndo sɔna Jehowa oko Owandji awɔ.—2 Petero 3:9.
18. Ewo kakɔna keso la diɛsɛ dia monga latɔ ndo kakɔna kayotɔsɛdingola lo sawo diayela?
18 Etena kakashaka pastɛrɛ kɛmɔtshi sawo la ntondo k’anto wakatshumana dia mbohɔ mpokoso k’oma le waa terɔristɛ kakakomɛ anto, nde akate ate: “Hateye ɔkɔkɔ watshika Nzambi dia awui wa kɔlɔ la asui tetemala.” Ekɔ mɛtɛ lonyangu efula mboka ɛtɛkɛta wa ngasɔ! Shi tekɔ mɛtɛ la diɛsɛ dia monga l’ewo ka mɛtɛ lo dikambo sɔ? (Euhwelu k’Elembe 29:29) Ndo oko wele Jehowa la lomba, losembwe ndo la ngandji, sho mbeyaka dia kem’edja, nde ayanga komiya asui tshɛ. Nde akalake dia sala dikambo sɔ. (Enyelo 21:3, 4) Ko kayotota dikambo dia wanɛ tshɛ wavɔ? Onde woho wakakandola Jehowa okakatanu wakatombe l’Ɛdɛna mbatshikaka aha l’elongamelo? Kema. Ngandji kakôtshutshuya dia mbasha ndo vɔ lawɔ elongamelo lo tshimbo ya eolwelo. Kɛsɔ mbayotɛna lo sawo diayela.
Ngande wayoyokadimola?
• Akokaso mbutɛ onto lambola lande na katshika Nzambi asui?
• Ngande wɛnama eongelo k’ekila ka Jehowa ndo losembwe lande lo woho wakandakandola ɔtɔmbɔkwɛlɔ wakatombe l’Ɛdɛna?
• Bonde kahombaso kimanyiya anto dia vɔ shihodia dimɛna ngandji ka Jehowa?
[Osato wa lo lɛkɛ 15]
Toyange dia kimanyiya wanɛ watshimba wɔɔngɔ lo dikambo dia asui wa l’andja ɔnɛ
[Esato wa lo lɛkɛ 17]
Davidi ndo Habakuka, anto waki la kɔlamelo wakoke Nzambi ambola wa l’otema ɔtɔi