Tɔkɛndɛkɛndɛ lo mboka yaki Jehowa
“One tshe latukaka [Jehowa] woma, latokendakendaka lu mbuka yandi, eli la [ɔngɛnɔngɛnɔ].”—OSAM. 128:1.
1, 2. Lande na kakokaso monga l’eshikikelo dia onto kokaka monga l’ɔngɛnɔngɛnɔ?
ONTO tshɛ kombolaka monga l’ɔngɛnɔngɛnɔ. Koko aha la tâmu, nyanga dia monga la ɔngɛnɔngɛnɔ halembetshiya monga l’ɔngɛnɔngɛnɔ.
2 Koko, onto kokaka mɛtɛ monga l’ɔngɛnɔngɛnɔ. Osambu 128:1 mbutaka ɔnɛ: “One tshe latukaka [Jehowa] woma, latokendakendaka lu mbuka yandi, eli la [ɔngɛnɔngɛnɔ].” Sho kokaka monga l’ɔngɛnɔngɛnɔ naka sho tɛmɔla Nzambi ndo kɛndakɛnda lo mboka yande lo sala lolango lande. Shɛngiya yakɔna yakoka monga la dui sɔ lo lɔkɛwɔ laso ndo lo waonga wakɛnɛmɔlaso?
Tonge anto wakokawɔ mbɛkɛ etema le wɔ
3. Diɔtɔnganelo diakɔna diele lam’asa tshelo y’anto mbɛkɛ etema le so la ndjakimɔ kaso le Nzambi?
3 Sho kokaka mbɛkɛ etema le anto woka Jehowa wɔma oko wakokaso mbɛkɛ etema aso le nde. Jehowa akakotsha alaka tshɛ wakandalake Isariyɛlɛ w’edjedja. (1 Khum. 8:56) Ndjakimɔ kaso le Nzambi ekɔ dɔkɔlɔkɔ dioleki ohomba diakokaso tshika ndo alɔmbɛlɔ wa mbala la mbala wayotokimanyiya dia kotsha dɔkɔlɔkɔ diaso. Sho kokaka nɔmba oko omembi w’esambo Davidi ɔnɛ: “We [Nzambi], katukaka alokoloko ami. . . . [Layembaka] esambu wa ntumbulaka lukumbu laye pundju, dia dimi nkutsha alokoloko ami la lushi la lushi.” (Osam. 61:5, 8; Und. 5:4-6) Dia monga angɛnyi wa Nzambi, sho pombaka monga anto wakokawɔ mbɛkɛ etema le wɔ.—Osam. 15:1, 4.
4. Ngande wakɔshi Jɛfɛta la ɔnande la womoto dɔkɔlɔkɔ diakandatshikɛ Jehowa?
4 Lo nshi y’Embadi wa lo Isariyɛlɛ, Jɛfɛta akatshike dɔkɔlɔkɔ le Jehowa dia naka nde mbokimanyiya dia nɛndja ase Amɔna, kete nde ayowosha oko “ulambu wa lutshumba” onto la ntondo layotomba oma lo luudu lande dia ndjolongola lam’ayondokalola oma lo ta. Tshɔi y’ɔnande la womoto mbakatombe dia ndjolongola. Oma lo mbetawɔ kaki lawɔ le Jehowa, Jɛfɛta nde la ɔnande la womoto lakikɔ atatshukama wakakotsha dɔkɔlɔkɔ diawɔ. Kânga mbakɔsamaka diwala la diwutshi la nɛmɔ efula lo Isariyɛlɛ, ɔnaki Jɛfɛta la womoto aketawɔ tshikala onyemba ndo akakondja diɛsɛ dia kamba olimu w’ekila lo luudu l’ɔtɛmwɛlɔ laki Jehowa.—Emb. 11:28-40.
5. Yoho yakɔna yakɛnya Hana dia nde aki onto lakawakokaka mbɛkɛ otema le nde?
5 Hana womoto lakokaka Nzambi wɔma akɛnya dia nde aki onto lakawakokaka mbɛkɛ otema le nde. Nde akadjasɛka la Ɛlɛkana w’omɛnde l’ose Lɛwi ndo la waladɛnde Penina lo lɛkɛ l’akona w’Efarayimɛ. Penina akote ana efula, ndo nde akɔ̂laka Hana laki ekomba djekoleko etena kakatshɔka nkumbo kawɔ lo tabɛrnakɛlɛ. Lo diaaso dimɔtshi, Hana akatshike dɔkɔlɔkɔ dia naka nde mbota ɔna, kete nde ayowosha Jehowa. Kem’edja, nde akatshu diemi ndo akote ɔna pami lakandɔlɛ lokombo Samuɛlɛ. L’ɔkɔngɔ wa ɔna kila awɛlɛ, Hana akawosha Nzambi la Shilo, mbuta ate nde akasha Jehowa Samuɛlɛ “nshi tshe ya lumu landi.” (1 Sam. 1:11) Nde akakotsha dɔkɔlɔkɔ diande, kânga mbakinde kombeyaka dia nde ayoyota ana akina.—1 Sam. 2:20, 21.
6. Ngande wakɛnya Tishikɛ dia nde aki onto lakokawɔ mbɛkɛ otema le nde?
6 Tishikɛ, Okristo ɔmɔtshi wa lo ntambe ka ntondo aki pami kakawakokaka mbɛkɛ otema le nde ndo “ukambi a kolamelu.” (Kol. 4:7) Tishikɛ akande lɔkɛndɔ nde la ɔpɔstɔlɔ Paulo oma la Ngirika polo la Makɛdɔniya, lo Asie mineure ndo ondo polo la Jerusalɛma. (Etsha 20:2-4) Ondo nde mbaki “unyasu” lakakimanyiya Tito dia menda awui wa weshasha dikambo di’ambetawudi wa la Judiya waki lo dihombo. (2 Kor. 8:18, 19; 12:18) Etena kaki Paulo lo lokanu mbala ka ntondo la Rɔma, nde akalɔmbɛ Tishikɛ onyimpala wakandɛkɛka otema le nde dia tɔlɛ asekande ambetawudi wa la Ɛfɛsɔ ndo la Kɔlɔsɛ mikanda. (Ef. 6:21, 22; Kol. 4:8, 9) Mbala ka hende kaki Paulo lo lokanu, nde akatome Tishikɛ la Ɛfɛsɔ. (2 Tim. 4:12) Naka tekɔ anto wakokawɔ mbɛkɛ etema le wɔ, kete tayokondja ɛtshɔkɔ efula l’olimu wa Jehowa.
7, 8. Lande na kakokaso mbuta dia Davidi nde la Jɔnatana waki angɛnyi wa mɛtɛ?
7 Nzambi nongamɛka dia sho monga angɛnyi wakoka anto mbɛkɛ etema le wɔ. (Tuk. 17:17) Jɔnatana y’ɔnaki nkumekanga Saulo akakome ɔngɛnyi waki Davidi. Etena kakoke Jɔnatana dia Davidi ambodiaka Ngɔliyatɛ, “utema wa Jonatana akakelekama l’utema wa Davidi. Jonatana akukaka Davidi ngandji uku akandayaukaka.” (1 Sam. 18:1, 3) Jɔnatana akewola Davidi etena kakalange Saulo mbodiaka. L’ɔkɔngɔ wa Davidi ndawɔ, Jɔnatana akatɛnanaka la nde ko vɔ ahende wakatokeketshaka lɔngɛnyi lawɔ. Saulo aki suke la ndjaka Jɔnatana, nɛ dia nde akatɛkɛta la Davidi, koko angɛnyi ahende asɔ wakahomana nto ndo wakaleke mbokana. (1 Sam. 20:24-41) Mbala k’ekomelo kakawɛnana, Jɔnatana akakeketsha Davidi “l’ekamelu kandi le [Nzambi].”—1 Sam. 23:16-18.
8 Jɔnatana akavu lo ta diakawalɔ la ase Filistiya. (1 Sam. 31:6) Lo lembo lɔmɔtshi l’ɔkɛyi, Davidi akembe ate: “Dimi la lokonyo lu dikambu diaye, we onalingu Jonatana we akalekaka ngenyangenyami otekoya. Ngandji kaye le mi aki dikambu dia mamba, to kakaleki ngandji k’amantu.” (2 Sam. 1:26) Ngandji kɛsɔ kaki ngandji konga lam’asa angɛnyi ndo tɔ komonga ngandji ka lam’asa pami la womoto. Davidi nde la Jɔnatana waki angɛnyi wa mɛtɛ.
Tongake la ‘yimba y’okitshakitsha’ tena tshɛ
9. Ngande wɛnya Embadi tshapita 9 ohomba wa monga la okitshakitsha?
9 Dia monga angɛnyi wa Nzambi, sho pombaka monga ‘la yimba y’okitshakitsha.’ (1 Pet. 3:8; Osam. 138:6) Embadi tshapita 9 mɛnyaka ohomba wa monga la okitshakitsha. Jɔtama y’ɔnaki Ngidiyɔna akate ate: “Etamba wakatshu dia ntosonola khum’ekanga, dia mbaulela.” Tshapita shɔ shilaka otamba wa owele, wa fingo ndo wa vinyɔ. Etamba ɛsɔ waki didjidji di’anto w’ɛlɔlɔ waki konyanga dia mbolɛ asekawɔ ase Isariyɛlɛ. Koko otamba w’atɛndɛ waki ohomba paka dia mpɛtsha dja waki didjidji dia lowandji laki Abimelɛkɛ kanga lotamanya ndo ondjakanyi lakalomɔlomɔka dia mbolɛ anto akina. Kânga ‘mbakandolɛ Isariyɛlɛ l’edja k’ɛnɔnyi esato,’ nde akavu nyɔi k’osondjo. (Emb. 9:8-15, 22, 50-54) Ekɔ mɛtɛ ohomba efula monga la ‘yimba y’okitshakitsha’!
10. Wetshelo akɔna wambotokondja lo woho waki Hɛrɔdɛ “kuntumbula [Nzambi]”?
10 Lo ntambe ka ntondo T.D., owanu wakatombe lam’asa Hɛrɔdɛ Angiripa nkumekanga ka l’otamanya ka la Judiya la ase Tura ndo la ase Sidɔna wakayangaka wɔladi lam’asawɔ la nde. Lo diaaso dimɔtshi, etena kakashaka Hɛrɔdɛ sawo dimɔtshi dia lo sɛkɛ, anto wakade ekoko ɔnɛ: “Diui dia etemolatemola kemotshi, aha dia untu!” Hɛrɔdɛ kotona lotombo lakawoshaka anto lɔsɔ, ndo ondjelo waki Jehowa akɔkɔmɔla ko nde akavu nyɔi ka kɔlɔ efula “ne dia ndi kuntumbula [Nzambi].” (Etsha 12:20-23) Ko kayotota naka lo yɛdikɔ mɔtshi tekɔ la diewo di’ɔtɛkɛtshi kana dia mbetsha akambo wa mɛtɛ? Nyɛsɔ, totombolake Nzambi l’ɔtɛ wa kɛnɛ katoshande diaaso dia sho sala.—1 Kor. 4:6, 7; Jak. 4:6.
Tonge la dihonga ndo la wolo
11, 12. Ngande wɛnya kɛnɛ kakakomɛ Ɛnɔka dia Jehowa mbishaka ekambi ande dihonga ndo wolo?
11 Naka sho kɛndakɛnda lo mboka yaki Jehowa la okitshakitsha tshɛ, kete nde ayotosha dihonga ndo wolo. (Euh. 31:6-8, 23) Ɛnɔka, onto l’esambele lo ɔlɔndji w’oma le Adama, akakɛndakɛnda la dihonga tshɛ la Nzambi lo monga la lɔkɛwɔ l’ɔlɔlɔ l’atei w’anto wa kɔlɔ wa lo lɔlɔnga lande. (Etat. 5:21-24) Jehowa akakeketsha Ɛnɔka dia nde mbewoya anto asɔ losango la wolo efula l’ɔtɛ w’ɛtɛkɛta ndo w’etsha awɔ wa kɔlɔ. (Adia Jude 14, 15.) Onde wɛ ekɔ la dihonga diahombama dia mbewoya dombwelo diaki Nzambi?
12 Jehowa akadiake anto wa kɔlɔ lo Mvula k’elola ka lo nshi ya Nɔa. Prɔfɛsiya kaki Ɛnɔka tokeketshaka, nɛ dia anto wa kɔlɔ wa lo nshi yaso nyɛ wayanga ndjakema kem’edja oma le nunu la nunu di’ekilami waki Nzambi. (Eny. 16:14-16; 19:11-16) Dia kadimola alɔmbɛlɔ aso, Jehowa toshaka dihonga dia mbewoya losango lande, oyadi lɔ mendanaka la dombwelo diande kana la ɛtshɔkɔ wayokondja anto lo ɛlɔmbwɛlɔ ka Diolelo diande.
13. Lande na kakokaso monga l’eshikikelo dia Nzambi kokaka tosha wolo ndo dihonga dieso l’ohomba dia mbikikɛ ekakatanu wa wolo wele laso?
13 Tekɔ l’ohomba wa dihonga ndo wolo washa Nzambi dia mbikikɛ ndo tondoya ekakatanu. Etena kakatshuke Esau wamato ahende w’ase Hiti, “vo wakanyangia [ambutshi ande] Isaka la Rebeka.” Rɛbɛka akalele ate: “Dimi la wutshu efula l’utema ami dikambu dia ana amantu w’asi Hiti. Naka [ɔnaso] Jakoba ayutshuka wadi uma l’atei wa ana amantu w’ashi Hiti weli lu wudja one, na waho wa dimi ntshikala la lumu ntu?” (Etat. 26:34, 35; 27:46) Isaka akɔshi yɛdikɔ ndo akatome Jakɔbɔ dia toyanga womoto l’atei w’atɛmɔdi waki Jehowa. Kânga mbaki Isaka la Rɛbɛka kokoka tshikitanya kɛnɛ kakasale Esau, Nzambi akawasha lomba, dihonga ndo wolo wa tshikala la kɔlamelo le Nde. Naka sho nɔmba dia kondja ekimanyielo, kete Jehowa ayotosalɛ woho akɔ wâmɛ.—Osam. 118:5.
14. Ngande wakɛnya yana ya yimato y’ose Isariyɛlɛ dihonga?
14 Ntambe efula l’ɔkɔngɔ, yana mɔtshi ya yimato y’ose Isariyɛlɛ yakandama oko fumbe oma le wevi ɛmɔtshi akakome ose olimu lo luudu laki Namana owandji w’alembe w’ase Suriya wakadiɛnɛka la hemɔ ka sudi. L’ɔkɔngɔ wa nde mboka ahindo wakasale Nzambi lo tshimbo ya ɔprɔfɛta Elisha, la dihonga tshɛ yana ya yimato shɔ yakatɛ wadi aki Namana ate: ‘Naka nkumɛmi ayotshɔ l’Isariyɛlɛ, kete ɔprɔfɛta waki Jehowa ayowɔkɔnɔya oma lo sudi kande.’ Namana akatshu l’Isariyɛlɛ ndo nde akatɔkɔnɔka lo dihindo. (2 Khum. 5:1-3) Yana ya yimato shɔ yekɔ ɛnyɛlɔ ka dimɛna efula le ɛlɔngɔlɔngɔ l’esekaseka wayaɛkɛ le Jehowa dia kondja dihonga dia sambisha embetsha awɔ, asekawɔ wa la kalasa ndo anto akina.
15. Yɛdikɔ yakɔna yakɔshi Obadiya, ose olimu waki Ahaba la dihonga tshɛ?
15 Wolo watosha Nzambi tokimanyiyaka dia sho mbikikɛ ɛhɛnyɔhɛnyɔ. Tɔsɛdingole ɛnyɛlɔ kaki Obadiya ose olimu waki nkumekanga Ahaba, lakasɛnaka lo nshi ya ɔprɔfɛta Elidja. Etena kakadjanga nkumekanga ka womoto Jezabɛlɛ dia vɔ ndjaka aprɔfɛta waki Nzambi, Obadiya akashɛ aprɔfɛta 100 l’atei awɔ, “akumi atanu, atanu lu weuku.” (1 Khum. 18:13; 19:18) Onde sho lawɔ tayokimanyiya asekaso Akristo wahɛnyahɛnyama oko wakakimanyiya Obadiya aprɔfɛta waki Jehowa la dihonga tshɛ?
16, 17. Kakɔna kakasale Aristarako nde la Ngayo la ntondo ka ɛhɛnyɔhɛnyɔ?
16 Naka tekɔ lo pɛnyahɛnyama, kete sho kokaka monga l’eshikikelo ɔnɛ Jehowa ayonga kâmɛ la so. (Romo 8:35-39) Lo dihole dia tɔkɛnyɔ dia l’Ɛfɛsɔ, Aristarako nde la Ngayo, wanɛ wakakambaka kâmɛ la Paulo wakonge la ntondo ka nunu di’andɔshi. Dɛmɛtɛriyo laki otshudi wa fɛsa akatɔmbɔsha anto. Nde la asekande akina w’etshudi wa fɛsa wakasalaka todudu ta fɛsa ta jambizambi ya womoto Aratɛmi wakɛnyi dia okanda awɔ waki lo wâle l’ɔtɛ w’esambishelo kaki Paulo kakatshutshuya anto efula wa l’osomba dia vɔ tshika ɔtɛmwɛlɔ wa dikishi. Olui w’anto ɔsɔ wakakotola Aristarako la Ngayo l’etei ka luudu la tɔkɛnyɔ ndo wakahangɔhangɔ ɔnɛ: “Aratemi w’asi Efeso keli wuki!” Ondo Aristarako nde la Ngayo wakalongamɛka dia wayodiakema, koko ofundji wa l’osomba akalɛmbɔhaya olui ɔsɔ w’anto.—Etsha 19:23-41.
17 Otondoyalaka wɛ mbakahomana la okakatanu wa ngasɔ, onde wɛ otoyanga dia mbewɔ okakatanu ɔsɔ? Ndoko kɛnya dia Aristarako nde la Ngayo wakashisha dihonga diawɔ. Oko wakandaye oma la Tɛsalɔnika, Aristarako akeyaka dia sambisha lokumu l’ɔlɔlɔ akakoke mbaela ɛhɛnyɔhɛnyɔ. Yema tshitshɛ la ntondo, londjo la mamba lakatombe etena kakasambisha Paulo lɛkɔ. (Etsha 17:5; 20:4) Lam’ele Aristarako nde la Ngayo wakakɛndakɛndaka lo mboka yaki Jehowa, vɔ wakakondja wolo ndo dihonga diasha Nzambi dia mbikikɛ ɛhɛnyɔhɛnyɔ.
Todjake yimba lo wahɔ w’anto akina
18. Ngande ‘wakadjaka’ Piriska la Akula yimba lo wahɔ w’anto akina?
18 Oyadi tekɔ lo pɛnyahɛnyama kakianɛ kana bu, sho pombaka ndjakiyanya dikambo di’asekaso Akristo. Piriska nde la Akula ‘wakadjaka yimba’ lo wahɔ w’anto akina. (Adia Filipi 2:4.) Wadi l’omi wakashaka ɛnyɛlɔ k’ɔlɔlɔ asɔ wakahangiya Paulo lakawɔ etena kakinde l’Ɛfɛsɔ, lɛnɛ akatɔmbɔsha Dɛmɛtɛriyo otshudi wa fɛsa olui w’anto wakatatɛkɛtshi dikambo diawɔ ntondo. Ondo dui sɔ mbakatshutshuya Akula nde la Piriska dia vɔ ‘mbidja nsɛnɔ yawɔ lo wâle’ dikambo diaki Paulo. (Romo 16:3, 4; 2 Kor. 1:8) Ɛlɔ kɛnɛ, ndjakiyanya dikambo di’anangɛso wahɛnyahɛnyama tokonyaka anto wele la “yewu uku elui.” (Mat. 10:16-18) Sho kambaka olimu aso la yewo tshɛ ndo tonaka dia funga anangɛso lo mbisha anto wâhɛnyahɛnya nkombo yawɔ kana mbatɛ awui wendana lawɔ.
19. Awui akɔna w’ɛlɔlɔ wakasalɛka Dɔrɔka anto akina?
19 Ekɔ toho efula takokaso mbidja yimba lo wahɔ w’anto akina. Akristo amɔtshi wekɔ l’ehomba ɛmɔtshi ndo sho mbeyaka monga l’akoka wa mbakotshɛ ehomba ɛsɔ. (Ef. 4:28; Jak. 2:14-17) Lo etshumanelo ka lo ntambe ka ntondo ka la Jɔpa, aki womoto ɔmɔtshi laki la lokaho lakawelɛka Dɔrɔka. (Adia Etsha 9:36-42.) Dɔrɔka “akatshaka akambu w’ololo efula ndu akambu wa ketshi,” ndo nde akatɛlɛka wadi waki edo waki lo dihombo ahɔndɔ. Nyɔi kande lo 36 T.D. kakanyangiya wadi waki edo efula. Nzambi akakambe la ɔpɔstɔlɔ Petero dia mbolola Dɔrɔka ndo ondo nde aketsha nshi yande ya lɔsɛnɔ yakatshikala dia sambisha lokumu l’ɔlɔlɔ ndo salɛ anto akina akambo w’ɔlɔlɔ. Ande ɔngɛnɔngɛnɔ wele laso dia monga la wamato w’Akristo wele la yimba ya ndjahombia nshi nyɛ lee!
20, 21. a) Diɔtɔnganelo diakɔna diele lam’asa keketsha anto akina la ndjakiyanya dikambo dia wahɔ w’anto akina? b) Kakɔna kakokaso sala dia keketsha anto akina?
20 Sho ndjakiyanyaka dikambo dia wahɔ w’anto akina lo mbakeketsha. (Romo 1:11, 12) Silasi, lakakambaka kâmɛ la Paulo aki kiɔkɔ y’ekeketshelo le anto. L’ɔkɔngɔ wa yɛdikɔ ya mbeya kana Akristo wakahombe mbahema ohekele kana bu mbɔsama oya lo 49 T.D., olui walɔmbɔla waki la Jerusalɛma wakatome enyimpala dia tɔlɛ Akristo waki l’ahole tshɛ mikanda waki la yɛdikɔ shɔ. Silasi, Judasɛ, Baranaba, ndo Paulo wakɛmbɛ mikanda akɔ otsha l’Antiyɔka. Lɛkɔ, Silasi nde la Judasɛ “wakalaki anyawo aui efula, wakâkikitsha.”—Etsha 15:32.
21 L’ɔkɔngɔ diko, Paulo nde la Silasi wakadjama lo lokanu la Filipi koko wakatshungwama oma lo didimu dia nkɛtɛ diakasalema. Vɔ waki mɛtɛ la ɔngɛnɔngɛnɔ dia sambisha olami wa lokanu la nkumbo kande ndo mɛna woho wakawakome ambetawudi! La ntondo ka vɔ mimɔ oma l’osomba ɔsɔ, Silasi nde la Paulo wakakeketsha anangɛwɔ. (Etsha 16:12, 40) Lo ɛnyɛlɔ ka Paulo nde la Silasi, tosale la wolo dia keketshaka anto akina oma lo kɔmatɛrɛ yaso, asawo aso ndo oma l’ohetoheto aso l’olimu w’esambishelo. Lo weho akɔ tshɛ, naka ‘tekɔ la dui dia keketsha,’ kete ‘todite.’—Etsha 13:15.
Totetemale kɛndakɛnda lo mboka yaki Jehowa
22, 23. Ngande wakokaso mɛtɛ kondja wahɔ oma lo ɛkɔndɔ wa lo Bible?
22 Tekɔ mɛtɛ la lowando lo kɛnɛ kendana la ɛkɔndɔ wa mɛtɛ wa nsɛnɔ y’anto wɔtɛkɛtshiwɔ lo Ɔtɛkɛta wa Jehowa “[Nzambi k]’ekeketshelu tshe”! (2 Kor. 1:3) Naka sho kombolaka kondja wahɔ oma lo ɛkɔndɔ ɛsɔ, kete sho pombaka kamba la wetshelo wa lo Bible lo nsɛnɔ yaso ndo mbetawɔ dia nyuma k’ekila kaki Nzambi tɔlɔmbɔla.—Ngal. 5:22-25.
23 Naka sho kana yimba lo ɛkɔndɔ wa lo Bible, kete dui sɔ diayotokimanyiya dia kɛnɛmɔla waonga wangɛnyangɛnya Nzambi. Dui sɔ diayokeketsha diɔtɔnganelo diasaso la Jehowa, latosha “[lomba], ewu la ongenongeno.” (Und. 2:26) Naka sho sala ngasɔ, kete tayokoka ngɛnyangɛnya otema waki Nzambi. (Tuk. 27:11) Nyɛsɔ toyashikikɛ dia salaka ngasɔ lo tetemala kɛndakɛnda lo mboka yaki Jehowa.
Ngande wayoyokadimola?
• Ngande wakokayɛ mɛnya di’anto kokaka mbɛkɛ etema le yɛ?
• Lande na kahombaso monga ‘la yimba y’okitshakitsha’?
• Ngande wakoka ɛkɔndɔ wa lo Bible tokimanyiya dia sho monga la dihonga?
• Lo toho takɔna takokaso mbidja yimba lo wahɔ w’anto akina?
[Osato wa lo lɛkɛ 8]
Jɛfɛta nde la ɔnande la womoto wakakotsha dɔkɔlɔkɔ diande, kânga mbaki dui sɔ wolo
[Osato wa lo lɛkɛ 10]
Akɛnda, kakɔna kambonyeka oma lo ɛnyɛlɔ ka yana ya yimato y’ose Isariyɛlɛ?
[Osato wa lo lɛkɛ 11]
Ngande wakakotsha Dɔrɔka ehomba w’asekande Akristo?