Woho wokongɛmi Olui-walɔmbɔla

OLUI-WALƆMBƆLA w’Ɛmɛnyi wa Jehowa kengama la apami wele ekambi waki Nzambi w’akitami. Vɔ wekɔ enyimpala wa olui w’ɔhɔmbɔ wa kɔlamelo ndo wa kɛsɔ, ɔnɛ lele la ɔkɛndɛ wa mbisha diangɔ dia ndɛ dia lo nyuma ndo nɔmbɔla olimu w’esambishelo ka Diolelo wasalema lo andja w’otondo ndo ndjashikikɛ dia vɔ wekɔ dui dioleki ohomba le Ɛmɛnyi wa Jehowa.​—Mat. 24:14, 45-47.

Olui-walɔmbɔla sanganaka lomingu tshɛ, mbala efula Lushi la sato. Nsanganya shɔ mbâkimanyiyaka dia vɔ kamba kâmɛ. (Osam. 133:1) Wanɛ wakenga Olui-walɔmbɔla wekɔ lo kamba nto lo waa kɔmite yotshikitanyi. Dia kokɛ wahɔ wa Diolelo, oseka kɔmite tshɛ kekɔ la awui amɔtshi walɔmbɔlatɔ oko wɛnyishamidiɔ lanɛ l’ɛse.

◼ KƆMITE KALƆMBƆLA: Kɔmite kɛnɛ kengama la ɛnɔmbɔdi wa lo kɔmite nkina tshɛ ya lo Olui-walɔmbɔla ndo kekɔ la sekeletɛlɛ kele nde lawɔ ekɔ ose Olui-walɔmbɔla. Tɔ ndjashikikɛka dia kɔmite nkina tshɛ yekɔ lo kɛndakɛnda dimɛna. Tɔ mendanaka nto la akambo wa wanyandja wa weke, ɛhɛnyɔhɛnyɔ, mpokoso ndo akambo akina wa wanyandja wakomɛ Ɛmɛnyi wa Jehowa wa l’andja w’otondo.

◼ KƆMITE KENDA ASE BƐTƐLƐ: Anangɛso wa lo kɔmite kɛnɛ mbele la ɔkɛndɛ wendana la kotsha ehomba wa lo nyuma ndo wa lo demba w’ase nkumbo ya Bɛtɛlɛ ya l’andja w’otondo. Kɔmite kɛnɛ mbasɔna ndo mbelɛ anto w’eyoyo lo nkumbo ya Bɛtɛlɛ ndo mbakandola akambo wendana la olimu awɔ wa lo Bɛtɛlɛ.

◼ KƆMITE KA OTONDJELO W’EKANDA: Kɔmite kɛnɛ mendaka olimu wa funda, tondja ndo kahanya ekanda walembetshiya Bible l’andja w’otondo. Tɔ mendaka waa ɛprimɛri ndo diangɔ diakamba la Ɛmɛnyi wa Jehowa. Kɔmite kɛnɛ mbênda dia falanga yakimɔma dikambo dia olimu wa Diolelo wasalema lo andja w’otondo yekɔ lo kambema lo yoho yoleki dimɛna.

◼ KƆMITE K’OLIMU: Wanɛ wakamba lo kɔmite kɛnɛ mbênda olimu w’esambishelo ndo akambo wendana la tshumanelo, ambatshi mboka, dikumanyi ndo emendji weteta. Tɔ mendaka ɔlɔngɔswɛlɔ wa Olimu aso wa Diolelo ndo tɔ mbêta ambeki wa lo Kalasa ka Ngiliyadɛ ndo lo Kalasa k’olowanyelo w’ekambi ndo tɔ mbâtoma lɛnɛ ahombawɔ tokamba.

◼ KƆMITE KA WETSHELO: Kɔmite kɛnɛ mendaka wetshelo washama lo nsanganya ya weke ndo ya lo etshumanelo. Tɔ nɔngɔsɔlaka dikongelo dia wetshelo wa lo nyuma dikambo di’ase nkumbo ka Bɛtɛlɛ ndo tɔ mendaka awui wendana la kalasa yotshikitanyi, ɛnyɛlɔ Kalasa ka Ngiliyadɛ, Kalasa k’ambatshi mboka ndo ɔlɔngɔswɛlɔ wa waa bandɛ kasɛtɛ ndo waa bandɛ vidɛo.

◼ KƆMITE K’OFUNDELO: Kɔmite kɛnɛ kekɔ la ɔkɛndɛ wa menda ofundelo wa mbo ya ndɛ ya lo nyuma lo ekanda ndo kahanya ekanda akɔ le asekaso ambetawudi ndo anto akina. Kɔmite kɛnɛ kadimolaka ambola wa lo Bible ndo nɔngɔsɔlaka adramɛ ndo dikongelo di’asawo. Tɔ mendaka nto olimu w’okadimwelo wasalema l’andja w’otondo.

Ɔpɔstɔlɔ Paulo akɛdika etshumanelo k’akitami la demba di’onto ndo akadje dikako vɔlɛ lo ohomba w’onto tshɛ la lɔkɔ, kâmɛ ndo woho wele onto l’onto ekɔ l’ohomba w’osekande, wa mbokana ngandji ndo wa kamba kâmɛ olimu wakawasha Nzambi. (Romo 12:4, 5; 1 Kor. 12:12-31) Yeso Kristo lele Ɔtɛ ekɔ lo mbisha tenyi dikina dia demba kɛnɛ tshɛ kele ohomba dia diɔ kamba kâmɛ ndo ekɔ lo dilesha lo nyuma. (Ef. 4:15, 16; Kol. 2:19) Lo ɛlɔmbwɛlɔ ka nyuma k’ekila kaki Jehowa, Olui-walɔmbɔla kongɛma dia nɔmbɔla olimu lo yoho shɔ.