Nyetsha ananyu

Samuɛlɛ akatetemala sala kɛnɛ kele ɔlɔlɔ

ONDE wɛ ambɛnaka anto akina wasala awui wa kɔlɔ?​—a Samuɛlɛ akɛnyi. Nde akasɛnaka lo dihole diele wɛ halongamɛ dia mɛna akambo wa kɔlɔ wasalema. Dihole diakɔ ko tabɛrnakɛlɛ kaki Nzambi kana dihole di’ɔtɛmwɛlɔ diaki l’osomba wa Shilo. Nyɛsɔ tende woho wele ambeta ɛnɔnyi ndekana 3 000, tabɛrnakɛlɛ kakayokomaka dihole diakadjasɛka Samuɛlɛ.

La ntondo ka Samuɛlɛ mbotɔ, Hana ka nyango akakombolaka efula dia mbota ɔna. Mbala kɛmɔtshi kakandatshu lo tabɛrnakɛlɛ, Hana akalɔmbɛ Nzambi dikambo sɔ. Nde akalɔmbaka l’etete tshɛ woho wele ɛlɔmɔ ande eto mbakasukasukaka. Dui sɔ diakakonya ɔlɔmbɛdi wa lâdiko Eli dia nde fɔnya dia Hana akadjɔ wanu. Koko lam’akandeye dia Hana kombidjɔ wanu koko aki la lonyangu l’efula, Eli akɔtshɔkɔla ndo akawotɛ ate: “[Nzambi k]a Isariyele uki dombelo diaye.”​—1 Samuele 1:17.

L’ɔkɔngɔ diko, Samuɛlɛ akayotɔka, ndo Hana aki l’ɔngɛnɔngɛnɔ w’efula lo woho ɔnɛ wele nde akatɛ Elekana w’omɛnde ɔnɛ: ‘Kam’ayokila Samuɛlɛ awɛlɛ, dimi layotshɔ la nde lo tabɛrnakɛlɛ dia nde tokambɛka Nzambi olimu lɛkɔ.’ Ndo kɛsɔ mbakandasale! L’etena kɛsɔ ondo Samuɛlɛ aki la ɛnɔnyi ɛnɛi kana etanu.

Eli akatshunde osombe, ndo anande w’apami Hɔfɛni la Finehasi kɔtɛmɔlaka Jehowa lo yoho ya dimɛna. Vɔ wakeyanaka la wamato wakayaka ndjembola tabɛrnakɛlɛ! Oko le yɛ, kakɔna kakahombe shɛwɔ sala?​— Eelo, nde akahombe mbasha dilanya ndo mbashimba diaha vɔ sala awui wa kɔlɔ wa ngasɔ.

Ɔlɔngɔlɔngɔ Samuɛlɛ akole lɛkɔ ndo ondo nde akeyaka dionga dia kɔlɔ diaki la ana waki Eli. Onde Samuɛlɛ akayele ɛnyɛlɔ kawɔ?​— Kema, nde akatetemala sala kɛnɛ kele ɔlɔlɔ, oko wakawetsha ambutshi ande. Diakɔ diele Jehowa akoke Eli nkɛlɛ k’efula. Nde akatome ɔprɔfɛta ɔmɔtshi dia nde totɛ Eli woho wakandahombe mbisha nkumbo kaki Eli dilanya, djekoleko anande wakasalaka kɔlɔ.​—1 Samuele 2:22-36.

Samuɛlɛ akatetemala kamba kâmɛ la Eli lo tabɛrnakɛlɛ. Oma lâsɔ, l’otsho ɔmɔtshi lam’aki Samuɛlɛ lo djɔ, dui dimɔtshi diakawelɛ. Ɔnkɔnɛ, Samuɛlɛ akalawɔ otsha le Eli, koko Eli akawotɛ dia nde kombelɛ. Wakawelɛ nto. L’ɔkɔngɔ wa vɔ mbelɛ mbala ka sato, Eli akatɛ Samuɛlɛ ate: “Kuti wati: [Jehowa], otekete, ne dia ukambi aye oso uka.” Etena kakate Samuɛlɛ ngasɔ, Jehowa akatɛkɛta la nde. Onde wɛ mbeyaka kɛnɛ kakatɛ Jehowa Samuɛlɛ?​—

Nzambi akanyomotɛ Samuɛlɛ kɛnɛ kakandasangoyaka dia mbisha nkumbo kaki Eli dilanya. La wedi a pindju, Samuɛlɛ akoke wɔma dia mbutɛ Eli kɛnɛ kakawotɛ Jehowa. Koko Eli akasɛngasɛnga Samuɛlɛ ate: “Lambukosengasenga nti: tumbisheki.” Ɔnkɔnɛ, Samuɛlɛ akayotɛka Eli kɛnɛ tshɛ kakawotɛ Jehowa kakandahombe sala, oko wakatɛ ɔprɔfɛta ande ɔmɔtshi Eli dui sɔ ntondo. Eli akokadimola ate: “[Jehowa] atshi uku weli ololo lu ashu andi.” L’ekomelo Hɔfɛni nde la Finehasi wakadiakema ndo Eli akavu nde lawɔ.​—1 Samuele 3:1-18.

L’etena kɛsɔ, “Samuele akuli, [Jehowa] aki la ndi.” Lâso ko ondo Samuɛlɛ ele l’ɛnɔnyi dikumi l’ɛmɔtshi, mbuta ate etena k’ohomba efula ka lo lɔsɛnɔ l’ɔlɔngɔlɔngɔ kana osekaseka. Oko le yɛ, onde aki dui dia wɔdu dia Samuɛlɛ tetemala sala kɛnɛ kaki ɔlɔlɔ etena kele anto akina kosalaka dui sɔ?​— Kânga mbakidiɔ komonga wɔdu, Samuɛlɛ akakambɛka Jehowa olimu la kɔlamelo tshɛ lɔsɛnɔ lande l’otondo.​—1 Samuele 3:19-21.

Kayotota dikambo diayɛ? Onde wɛ ayokoya Samuɛlɛ etena kayoyôla? Onde wɛ ayotetemala sala kɛnɛ kele ɔlɔlɔ? Onde wɛ ayotetemala kitanyiya wetshelo wa lo Bible ndo kɛnɛ kaketsha ambutshi ayɛ? Naka wɛ sala ngasɔ, kete wɛ ayɔngɛnyangɛnya Jehowa ndo ambutshi ayɛ.

[Nɔte ka l’ɛse ka dikatshi]

Ambola:

○ Kakɔna kakayokonyaka dia Samuɛlɛ kamba lo tabɛrnakɛlɛ kaki Jehowa?

○ Ekakatanu akɔna wakahomana la Samuɛlɛ lɛkɔ?

○ Ɛnyɛlɔ kakɔna kasha Samuɛlɛ ɛlɔngɔlɔngɔ l’esekaseka?