Tokoya Yeso lo tɛmɔla Nzambi lo yoho yetawɔnde

La ngandji tshɛ, Nzambi mbelɛka anto ‘w’oma lo wedja tshɛ, waoho tshɛ, weho w’anto tshɛ ndo ɛtɛkɛta tshɛ’ dia vɔ mbɔtɛmɔla. (Eny. 7:9, 10; 15:3, 4) Wanɛ wetawɔ leeta lɔsɔ kokaka “menda dimena dia [Jehowa].” (Osam. 27:4; 90:17) Lo ɛnyɛlɔ k’omembi w’esambo, vɔ mbediaka awui awɔ dia tombola Nzambi, lo mbuta ɔnɛ: “Nyeso totemole, tokolami, tukhuse adui la ntundu ka [Jehowa] Utungi asu.”​—Osam. 95:6.

Ɔtɛmwɛlɔ wele la nɛmɔ di’efula le Jehowa

Oko wende Ɔna ɛtɔi laki Nzambi lakandote, Yeso aki la waaso efula wa mbeka tokanyi, atɔndɔ ndo wadjango waki She. Diakɔ diakakoke Yeso mɛnya anto l’eshikikelo tshɛ yoho ya dimɛna yakawahombe tɛmɔla Jehowa. Nde akate ate: “Dimi leli mbuka, mete la lumu. Nduku untu laya le Papa, tshikima uma le mi.”​—Joa. 1:14; 14:6.

Yeso akatotshikɛ ɛnyɛlɔ ka kokele ka ndjakitshakitsha l’ɛse ka She. Nde akate ate: “Dimi dime halatshi dikambu, keli latutaka akambu wakambetsha Papa.” Oma lâsɔ, nde akakotsha ate: “Dimi latutshaka akambu watôngenyangenyaka nshi tshe.” (Joa. 8:28, 29) Lo toho takɔna takangɛnyangɛnya Yeso She?

Dui dimɔtshi ele, Yeso akamamemaka She l’otema ɔtɔi ndo ɔsɔ mbele kitshimudi ya tɛmɔla Nzambi. Yeso akɛnya woho wakandamamemaka She lo mbokitanyiya ndo lo sala lolango lande oyadi kânga sala dikambo sɔ akɔlɔmbaka dia nde nambola lɔsɛnɔ lande. (Fil. 2:7, 8) Yoho kina y’ohomba efula y’ɔtɛmwɛlɔ waki Yeso akikɔ woho wakandayashaka mbala la mbala lo olimu wa mbetɛ anto ambeki polo lo yɛdikɔ yele ambetawudi kana anto waki komonga ambetawudi wakawelɛka ɔnɛ Ombetsha. (Mat. 22:23, 24; Joa. 3:2) Ndo nto, Yeso aketshaka wenya ande ndo akakambe la wolo ande dia kimanyiya anto akina. Yimba yande ya ndjahombia yakawɔsɛka tena efula, koko nde aki l’ɔngɛnɔngɛnɔ dia kambɛ anto akina. (Mat. 14:13, 14; 20:28) Kânga mbakinde l’elimu efula, Yeso akɔsaka nshi tshɛ etena ka nɔmba She lele l’olongo. (Luka 6:12) Ɔtɛmwɛlɔ waki Yeso waki mɛtɛ la nɛmɔ le Nzambi!

Tosale la wolo dia ngɛnyangɛnya Nzambi

Jehowa akalembetɛ lɔkɛwɔ l’ɔlɔlɔ laki l’Ɔnande ndo nde akɛnya woho wakandawetawɔ. (Mat. 17:5) Koko, Satana Diabolo nde lawɔ akɛnyi kɔlamelo yaki Yeso. Ɔnkɔnɛ, Satana akaleke sɔmana la Yeso. Lande na? Nɛ dia polo l’etena kɛsɔ ndoko onto lakakitanyiya Nzambi lo yoho ya kokele ndo mbɔtɛmɔla lo yoho yetawɔnde. Ndo Diabolo akalangaka dia shimba Yeso diaha nde tɛmɔla Jehowa lo yoho yasungana.​—Eny. 4:11.

Dia kesa Yeso, Satana akohembe lo nyanga dia mbosha ɛngɔ kɛmɔtshi. Nde akɛmbɛ Yeso “l’ote w’ukungu, akawenya waulelu tshe wa l’andja ndu lutumbu lawo.” Oma lâsɔ, nde akawotɛ ate: “Dimi layukushawo, vo tshe, naka we ayunkhusamela dia ntemolami.” Kakɔna kakasale Yeso? Nde akawotɛ ate: “Satana, mo! ne dia akafundama ati: Kotemolaki Khumadiondjo, [Nzambi k]aye, Kûkambelaki ndame ulimu.” (Mat. 4:8-10) Eelo, Yeso akeyaka dia naka nde kusamɛ Satana, kete nde otɔtɛmɔla dikishi oyadi wahɔ akɔna wakandakoke kondja oma lɔkɔ. Nde kombetawɔ dia nde tɛmɔla oseka onto tshɛ onyake Jehowa.

Lo wedi aso, ondo Satana hotosha waolelo wa l’andja tshɛ la lotombo lawɔ dia sho mbɔtɛmɔla. Koko, nde ekɔ lo tetemala sala la wolo diaha Akristo wa mɛtɛ tɛmɔla Nzambi lo yoho yalangande. Diabolo kombolaka dia sho mbɔtɛmɔla kana tɛmɔla ɛngɔ kekina.​—2 Kor. 4:4.

Kristo Yeso akatshikala la kɔlamelo edja ndo lo nyɔi. Lo nama olowanyi ande otsha le Nzambi, Yeso akatombola Jehowa l’akambo tshɛ woho wahatasalaka ndoko onto. Oko weso Akristo wa mɛtɛ ɛlɔ kɛnɛ, sho salaka la wolo dia mbokoya ɛnyɛlɔ ka kɔlamelo kaki Yeso lo mbetshaka ɔtɛmwɛlɔ w’Otungi aso lo dihole dia ntondo. Lo mɛtɛ, ɛngɔ koleki nɛmɔ kele laso ele diɔtɔnganelo di’oshinga wolo diasaso la Nzambi.

Ɛtshɔkɔ waya lo tɛmɔla Nzambi lo yoho yetawɔnde

Monga lo “otemwelo weli pudipudi, waha la vadi” lo washo wa Nzambi mbelaka ɛtshɔkɔ efula. (Jak. 1:27) Ɛnyɛlɔ, tekɔ lo nsɛna lo etena kele anto efula wekɔ lo ‘ndjalanga, anangi wa falanga, etako’ ndo ‘vɔ kema la ngandji k’akambo w’ɔlɔlɔ.’ (2 Tim. 3:1-5) Koko l’okongamelo waki Nzambi, tekɔ la diɛsɛ dia monga la diɔtɔnganelo l’anto w’ɛlɔlɔ ndo wele pudipudi wasala la wolo dia kitanyiya ɛlɛmbɛ wendana la yoho yahombaso mbɔtɛmɔla. Shi dikambo sɔ keketshaka mɛtɛ?

Ndo nto, lo tshikala aha la vadi l’andja ɔnɛ, sho mongaka la nkum’otema ka pudipudi. Sho nangaka monga la nkum’otema ka pudipudi lo kitanyiyaka atɔndɔ waki Nzambi wosembwe ndo lo kitanyiyaka ɛlɛmbɛ wa Kayisa wahalɔshana la ɛlɛmbɛ waki Nzambi.​—Mako 12:17; Etsha 5:27-29.

Tɛmɔla Nzambi la anima aso tshɛ mbelaka nto ɛtshɔkɔ ekina. Etena kayashaso tshɛ dia sala lolango laki Nzambi lo dihole dia lolango laso shoamɛ, nsɛnɔ yaso mongaka la oyango ndo l’ɔngɛnɔngɛnɔ. Lo dihole dia sho mbuta ɔnɛ: “Tolekaki, tonokaki, ne dia shu tayuvo lui,” tekɔ l’elongamelo ka shikaa ka kondja lɔsɛnɔ la pondjo lo paradiso ka la nkɛtɛ.​—1 Kor. 15:32.

Dibuku dia Enyelo tɛkɛtaka dikambo dia wanɛ watshikala pudipudi lo washo waki Jehowa ‘wayoya oma lo fɔnu ka woke.’ Ɔkɔndɔ mbutaka ɔnɛ: “One ludjashi lu kiti ka diulelu ayuwakumba la eyalelu kandi.” (Eny. 7:13-15) Ɔnɛ lodjashi lo kiti ka diolelo ɔsɔ ekɔ paka Jehowa Nzambi, onto loleki tshɛ l’andja w’otondo. Ohokanyiya ɔngɛnɔngɛnɔ wayonga la so etena kayondotolongola lo luudu lande la dipɛma ndo kayondotokokɛ diaha ndoko dui dia kɔlɔ tokomɛ! Ndo lo yɛdikɔ mɔtshi, sho koka kondja ekokelo kande oma ko kakianɛ.

Ndo nto, wanɛ tshɛ watɛmɔla Nzambi lo yoho yetawɔnde mbɔsamaka oko anto walɔmbwama otsha lo “teko di’ashi a lumu.” Tɛkɔ di’ashi a lɔsɛnɔ sɔ diekɔ didjidji dia tɛdikɔ tshɛ takɔshi Jehowa dia sho kondja lɔsɛnɔ la pondjo. Lo tshimbo ya tshungo kaki Yeso, “[Nzambi] ayâkitula asoi tshe uma lu ashu awo.” (Eny. 7:17) Anto wayokondja ekimanyielo dia vɔ koma kokele ndo wayonga l’ɔngɛnɔngɛnɔ waheyama mbuta dia vɔ kondja lɔsɛnɔ la pondjo la nkɛtɛ. Kânga kakianɛ, atɛmɔdi waki Nzambi wekɔ lo mbida ekoko l’ɔngɛnɔngɛnɔ tshɛ dia mɛnya lowando lawɔ l’oma k’ɛse otema le Jehowa ndo wekɔ lo mbɔtɛmɔla kâmɛ la wanɛ wele l’olongo wemba ɔnɛ: “Khumadiondjo [Nzambi], Kanga-Wulu-Tshe, ndi etsha aye waki ndu mamba li! We Khum’ekanga ka wedja tshe, mbuka yaye yeko ololo la mete! Khumadiondjo akona ahukuka woma, ndu ahutumbula lukumbu laye na? Ne dia weme utu keli ekila. Wedja tshe wayuya, wayukotemola, ne dia etsha aye w’ololo wambenama.”​—Eny. 15:3, 4.

[Osato wa lo lɛkɛ 27]

Kakɔna katosha Satana dia sho mbɔtɛmɔla?