Tonge la kanyi yɔtɔnɛ l’Afundelo lo dikambo di’esakelo
“Ulangi Khumadiondjo [Nzambi k]aye l’utema aye tshe, la lumu laye tshe, la yimba yaye tshe, ndu la wulu aye tshe.”—MAKO 12:30.
1. Naa sangwelo dia ntondo diaki Nzambi lo dikambo di’anto?
SANGWELO dia ntondo diaki Jehowa Nzambi lo dikambo di’anto wakandatonge komonga dia vɔ ndjotata hemɔ kana ndjovɔ. Adama la Eva wakakitshama l’ekambɔ ka Ɛdɛna, kana ‘paradiso k’ɔngɛnɔngɛnɔ’ dia vɔ “nkikambaka la nkilamaka,” aha lo edja k’ɛnɔnyi 70 kana 80 eto, koko pondjo pondjo. (Etat. 2:8, 15; Osam. 90:10) Ototshikala atshukanyi wa ntondo asɔ la kɔlamelo le Jehowa ndo kitanyiya la ngandji lowandji lande, tshike totowotata hemɔ, totowotshunda esombe ndo totowovɔ.
2, 3. a) Ngande wakɔndɔla dibuku dia Undaki eongelo k’osombe? b) Ele lo kiɔkɔ ya nyɔi ka Adama, ndo ngande wayonyɛma etombelo w’oma lɔkɔ?
2 Undaki tshapita 12 tɛkɛtaka dimɛna dia “nshi ya kolo” yakomɛ onto laha kokele etena katshundande osombe. (Adia Undaki 12:1-7.) Ndjwe mbɛdikamaka la alɛmbɔlɛmbɔ wa “utamba wa amande.” Ekolo mbɛdikamaka la “epele w’apami” wambokotama ndo wotshingatshinga. Esekaseka walengɛ lo didishi dia nyanga osase koko wɛnaka paka wodjima oto ekɔ ɛnyɛlɔ ka dimɛna kɛnya woho wahayɛna onto dimɛna. Wongwelo wa wanyu amɔtshi mɛnyama oko ‘wamato wa atɔshi wa diangɔ wambotshika kamba olimu awɔ nɛ dia waya bu efula.’
3 Onto kotongama dia ekolo tshingatshinga, monga ko hayɛna dimɛna, ndo mongɔ wanyu. Ndo nto, nyɔi kakatahowɔ oma le Adama ekɔ “elimu wa Uhimbanyi” wele Ɔna Nzambi ayolanya elimu akɔ lo tshimbo ya Diolelo dia Mɛsiya. Ɔpɔstɔlɔ Joani akafunde ate: “Dia dikambu diako, mbakenama On’a [Nzambi], dia ndjulanya elimu wa uhimbanyi.”—1 Joa. 3:8.
Bu kɔlɔ ndjakiyanya dikambo dia yônge
4. Lande na kayakiyanya ekambi waki Jehowa dikambo dia yônge yawɔ lo yɛdikɔ yakoka, ndo kakɔna keyawɔ?
4 Lo etena kɛnɛ, ekambi waki Jehowa wekɔ lo tata hemɔ ndo wekɔ lo tshunda esombe, akambo wakomɛ anto tshɛ wele kema kokele. Bu kɔlɔ ndo ekɔ ohomba ndjakiyanya la wɛdimo dikambo dia yônge yaso ya demba. Shi sho nangaka kambɛ Jehowa la ‘wolo aso tshɛ’? (Mako 12:30) Koko kânga mbayangaso dia monga la demba dia dimɛna, sho pombaka mbeya dia lo mɛtɛ, ndoko k’ɔlɔ kakokaso sala diaha tshunda osombe kana mbewɔ oseka hemɔ tshɛ.
5. Wetshelo akɔna wakokaso kondja oma lo woho wakakikɛ ekambi waki Nzambi wa kɔlamelo hemɔ yaki lawɔ?
5 Ekambi waki Jehowa efula wa kɔlamelo wakalɔshana l’ekakatanu wendana la yônge. Epaforodito aki l’atei awɔ. (Fil. 2:25-27) Timɔtɛ k’ɔngɛnyi w’oshika waki ɔpɔstɔlɔ Paulo nde lawɔ aki mbala la mbala la pâ l’otema, diakɔ diele Paulo akawotɛ dia nde nɔka “tema ta wanu.” (1 Tim. 5:23) Paulo ndamɛ akahombe ndɔshana la “tende lu dimba,” ondo ɔsɔ aki hemɔ ka lo washo kana hemɔ kekina kaki komonga l’osakelo l’etena kɛsɔ. (2 Kor. 12:7; Ngal. 4:15; 6:11) Lo kɛnɛ kendana la “tende” diaki lande “lu dimba,” Paulo akasɛngasɛnga Jehowa l’etete. (Adia 2 Koreto 12:8-10.) Nzambi kominyɛ Paulo “tende” diaki lande “lu dimba” lo dihindo, koko nde akôkeketsha dia nde dikikɛ. Wolo waki Jehowa wakɛnama lo wɔdu waki Paulo. Onde sho koka kondja wetshelo oma l’ɛnyɛlɔ kɛsɔ?
Tewɔ dia ndeka ndjakiyanya dikambo dia esakelo
6, 7. Lande na kahombaso mbewɔ ndjakiyanya otamanya dikambo dia yônge yaso?
6 Oko wadieyanyu, Ɛmɛnyi wa Jehowa mbetawɔka esakelo. Mbala efula, Réveillez-vous ! mongaka l’asawo watɛkɛta dikambo di’esakelo. Kânga mbahatasukɛ yoho mɔtshi y’esakelo, sho ngɛnangɛnaka ekimanyielo k’aseka enganga. Kânga mbeyaso dia demba nɛi hasambe olando, sho mbeyaka dia hatohombe ndjakiyanya otamanya dikambo dia yônge yaso. Dionga diaso pombaka tshikitana la dia anto wele ‘bu la elongamelo,’ wanɛ wɔsa dia paka lɔsɛnɔ lele lawɔ ɛlɔ kɛnɛ loto mbahombawɔ nsɛna, ndo kɛsɔ mbâkonyaka dia mbetawɔ woho tshɛ w’esakelo dia kɔnɔ lo hemɔ yele lawɔ. (Ef. 2:2, 12) Tamboyashikikɛ diaha ndanya diɔtɔnganelo diasaso la Jehowa l’oyango wa kokɛ lɔsɛnɔ laso la nshi nyɛ, nɛ dia tekɔ la mbetawɔ dia naka sho tshikala la kɔlamelo le Nzambi, kete ‘tayokukutɛ lɔsɛnɔ l’oshika,’ mbuta ate lɔsɛnɔ la pondjo lo andja w’oyoyo wakandalake.—1 Tim. 6:12, 19; 2 Pet. 3:13.
7 Tekɔ nto la ɔkɔkɔ okina watotshutshuya diaha ndjakiyanya otamanya dikambo dia yônge yaso. Dikambo sɔ mbeyaka ndjotokonya dia toyashaka paka l’awui aso hita ato. Paulo akatewola lo kɛnɛ kendana la wâle ɔsɔ etena kakandalake ase Filipi dia “untu l’untu, tendaki akambu andi atu, keli untu l’untu endi ndu akambu w’antu akina.” (Fil. 2:4) Bu kɔlɔ dia ndjakiyanya la wɛdimo dikambo diaso shoamɛ, koko woho wayashaso l’otema ɔtɔi dikambo dia anangɛso la akadiyɛso ndo le anto wasambishaso “lukumu l’ololo lone la diulelu” toshimbaka diaha sho ndjakiyanya lo yoho yambotamba olelo dikambo dia yônge yaso.—Mat. 24:14.
8. Ndjakiyanya amboleka lo dikambo dia yônge yaso mbeyaka tokonya lo na?
8 Wâle wekɔ wa Okristo ndjetsha wahɔ wa Diolelo l’ɔkɔngɔ w’ekiyanu ande wendana la yônge yande. Ndjakiyanya amboleka dikambo dia yônge yaso mbeyaka nto ndjotokonya lo nyanga dia tshutshuya anto akina dia vɔ mbetawɔ tokanyi taso lo kɛnɛ kendana la weho ɛmɔtshi w’esakelo kana weho ɛmɔtshi wa diangɔ dia ndɛ. Lo dikambo sɔ, tɔsɛdingole dako diakate Paulo lo ɛtɛkɛta ande ɛnɛ ate: “[Nyɛdike] akambu w’ololo; la dia nyu ndjala la etema wa pudipudi, aha la akambu wa ntakanya antu, edja ndu lushi la Kristu.”—Fil. 1:10.
Kakɔna koleki ohomba?
9. Naa dui dimɔtshi dioleki ohomba diahatahombe minya yimba, ndo lande na?
9 Naka sho ndjashikikɛ dia mbeya akambo woleki ohomba, kete tayoleka ndjasha l’olimu wa ɛkɔnwɛlɔ ka lo nyuma. Dui sɔ salemaka lo tshimbo y’olimu w’esambishelo ndo wa mbetsha Ɔtɛkɛta wa Nzambi. Olimu ɔsɔ telaka ndo sho ndo wanɛ wetshaso ɛlɔlɔ. (Tuk. 17:22; 1 Tim. 4:15, 16) Tena dimɔtshi, Tshoto y’Etangelo la Réveillez-vous ! mongaka la asawo watɛkɛta dikambo dia anangɛso la akadiyɛso wele la hemɔ ya wolo. Mbala mɔtshi, asawo asɔ mɛnyaka woho wasalawɔ dia mbikikɛ pâ yele lawɔ lo nyanga waaso wa kimanyiya anto lo ndjela akoka awɔ dia vɔ mbeya Jehowa ndo alaka ande w’amɛna.a
10. Lande na kele ɔsɔnwɛlɔ aso w’esakelo ekɔ ohomba?
10 Etena katata Okristo, nde pombaka ‘mɛmba wotsho ande hita’ lo kɛnɛ kendana la ɔsɔnwɛlɔ wa yoho ya osakelo walangande sakemɛ. (Ngal. 6:5) Koko, tatohɛke dia ɔsɔnwɛlɔ aso w’esakelo wekɔ ohomba lo washo wa Jehowa. Oko wele woho wakitanyiyaso atɔndɔ wa lo Bible totshutshuyaka dia ‘tona dikila,’ dilɛmiɛlɔ di’efula di’Ɔtɛkɛta wa Nzambi pombaka totshutshuya dia tona esakelo kahɔtɔnɛ la atɔndɔ wa lo Bible kana kakoka ndanya diɔtɔnganelo diasaso la Jehowa. (Etsha 15:20) Ɛgzamɛ ndo esakelo ɛmɔtshi mbɔtɔnɛka efula la awui w’ɛdiɛngɛ. Jehowa kombetawɔ ase Isariyɛlɛ wakatɔmbɔkɔ ndo ‘wakasalaka awui wa maji’ kana awui w’ɛdiɛngɛ. Nde akate ate: “Tanyelaki elambu w’anyanya ntu; upumu w’etshumbelu weli wononyi le mi, talelu ta ngondo, nshi y’ekila, dietelu dia sanganya. Dimi halangi mena kolo kosohanyimi la nsanganya y’ekila.” (Is. 1:13) Etena keso la hemɔ, bu dimɛna sala dikambo diakoka shimba diaha Jehowa mboka alɔmbɛlɔ aso ndo ndanya diɔtɔnganelo diasaso la Nzambi.—Del. 3:44.
‘Ekanelo k’ɔlɔlɔ’ kekɔ ohomba
11, 12. Ngande wele ‘ekanelo k’ɔlɔlɔ’ ohomba etena kasɔnaso osakelo?
11 Etena katataso, hatokoke nongamɛ dia Jehowa tɔkɔnɔla lo dihindo, koko sho koka nɔmba lomba l’oma le Nzambi dia lɔ tokimanyiya l’ɔsɔnwɛlɔ w’esakelo ka dimɛna. Sho pombaka nyanga dia nɔmbwama la atɔndɔ wa lo Bible ndo la ekanelo k’ɔlɔlɔ lo kɛnɛ kendana la ɔsɔnwɛlɔ w’osakelo. Naka hemɔ kekɔ wolo, kete ondo ayonga dimɛna mɛnana la enganga efula oko wadiɛnya Tukedi 15:22, lɛnɛ adiaso ɔnɛ: “Lam’aha ului w’andaki, sangweyu diatufutanaka. Keli lam’eli andaki efula, dio diatushikikalaka.” Ɔpɔstɔlɔ Paulo akalake asekande ambetawudi dia “ndjala la nyumu ya ki, y’uluwanyi ndu y’ololo la kete nye.”—Tito 2:12.
12 Kɛnɛ kakakomɛ womoto ɔmɔtshi laki la hemɔ lo nshi ya Yeso mbakomɛ anto efula ɛlɔ kɛnɛ. Sho mbadiaka lo Mako 5:25, 26 ɔnɛ: “Umuntu omotshi aki la hemo ka dikila deku dikumi la pendi. Ndi akasuwi wulu lu anya a wetshi efula. Ndi akamani diango diandi tshe le wo. Keli kandji kunkitakita nduku yema; to kakaleki wulu.” Yeso akakɔnɔla womoto ɔsɔ ndo akosalɛ akambo la kɛtshi tshɛ. (Mako 5:27-34) Lo nyanga la wolo tshɛ dia paka kɔnɔ, Akristo amɔtshi wakahembama dia sɔna toho ta ɛgzamɛ kana ta esakelo tahɔtɔnɛ la atɔndɔ wa l’ɔtɛmwɛlɔ wa pudipudi.
13, 14. a) Ngande wakoka Satana kamba la ɔsɔnwɛlɔ aso w’esakelo dia ndanya olowanyi aso? b) Lande na kahombaso ndjalama oma lo dui tshɛ diɔtɔnɛ la awui w’ɛdiɛngɛ?
13 Satana kambaka la toho totshikitanyi dia minya ekambi waki Jehowa oma l’ɔtɛmwɛlɔ wa mɛtɛ. Oko wakambande l’awui wa mindo wa dieyanelo ndo l’eyango wa lomombo dia kɔsha anto amɔtshi, nde nyangaka dia ndanya olowanyi w’anto akina oma lo esakelo ɛmɔtshi wavɔ anto tshɔdia wele woho wâmɛ la osakelo w’ekanga kana wa l’awui w’ɛdiɛngɛ. Sho nɔmbaka Jehowa dia totshungola ‘oma le kanga kɔlɔ’ ndo oma lo “kolo tshe.” Omalɔkɔ, hatohombe ndjalambola le Satana lo mbetawɔ osakelo tshɛ wele la diɔtɔnganelo la awui w’ɛdiɛngɛ.—Mat. 6:13; Tito 2:14.
14 Jehowa akashimbe ase Isariyɛlɛ diaha vɔ sala diendja kana maji. (Euh. 18:10-12) Paulo akashile “doka” l’ɔnɔngɔ wa “etsha wa dimba.” (Ngal. 5:19, 20) Ndo nto, “akanga w’aloka” hawotɔsɛna l’andja w’oyoyo waki Jehowa. (Eny. 21:8) Mbokɛmaka hwe dia oseka ɛngɔ tshɛ kɔtɔnɛ la ɛdiɛngɛ kekɔ wɔnɔnyi lo washo wa Jehowa.
‘Ekanelo kanyu k’ɔlɔlɔ keyame le anto tshɛ’
15, 16. Lande na kahombaso monga la lomba etena kasɔnaso esakelo, ndo dako diakɔna dia lomba diakasha olui-walɔmbɔla wa lo ntambe ka ntondo?
15 Lo menda kɛnɛ k’omaso la mbuta, naka tekɔ lo mvɔ ɛgzamɛ kana toho tɔmɔtshi t’esakelo tshɔdia, kete ekɔ dimɛna tona. Koko, aha naka onto heye nembetshiya yoho yasalema osakelo ɔmɔtshi kete lâsɔ osakelo akɔ mbɔtɔnɛka l’awui w’ɛdiɛngɛ. Monga la kanyi yɔtɔnɛ la Afundelo lo dikambo di’esakelo nɔmbaka dia sho monga la lomba ndo la shɛnɔdi y’oma le Nzambi. Lo Tukedi tshapita 3, sho tanaka dako diata ɔnɛ: “Ekamaki [Jehowa] l’utema aye tshe, tekamaki yimba yaye hita. Uwetawoki lu akambu aye tshe, ku ndi ayukolongoswela mbuka yaye. . . . Ulami yimba la ewu. . . . Vo wayuyala lumu l’utema aye.”—Tuk. 3:5, 6, 21, 22.
16 Ɔnkɔnɛ, kânga mbasalaso la wolo dia monga la yônge ya dimɛna, sho pombaka monga la yewo y’efula diaha sho ndjoshisha diɔtɔnganelo diasaso la Nzambi etena katataso kana katshundaso osombe. Oyadi lo kɛnɛ kendana la esakelo kana lo awui akina, sho pombaka sala dia ‘ekanelo kaso k’ɔlɔlɔ mɛnama le anto tshɛ’ lo nsɛna lo yoho yɔtɔnɛ l’atɔndɔ wa lo Bible. (Fil. 4:5) Lo mukanda ɔmɔtshi w’ohomba, olui-walɔmbɔla wa lo ntambe ka ntondo wakalɔmbɛ Akristo dia tona ɔtɛmwɛlɔ wa dikishi, dikila ndo monanyi. Didjango diawɔ diaki la eshikikelo kɛnɛ: “Naka nyambuyakimela lu akambu aso, nyu nyayutsha ololo.” (Etsha 15:28, 29) Lo yoho yakɔna?
Toyasake la wɛdimo teya dia tayonga la yônge ya kokele lo nshi yayaye
17. Wahɔ akɔna wakondjaso lo demba lo woho wayelaso alako wele l’Afundelo?
17 Onto l’onto l’atei aso pombaka ndjambola ɔnɛ: ‘Onde dimi shihodiaka ɛlɔlɔ wambomokondja l’ɔtɛ wayelami dimɛna dimɛna atɔndɔ wa lo Bible wendana la dikila ndo la monanyi?’ Tokanyiya nto ɛlɔlɔ wambotokondja lo welo wadjaso dia ‘ndjaɛdia oma lo mindo tshɛ ya demba ndo ya yimba.’ (2 Kor. 7:1) Sho mbewɔka hemɔ efula etena kakambaso la atɔndɔ wa lo Bible wendana la pudipudi ka demba. Sho mongaka nto la demba dia wolo lam’ewɔso ndjadja mindo lo nyuma ndo lo demba lo tona nnɔ mfɔka kana dinɔnɔ dikina dia wolo. Tɔsɛdingole nto wahɔ wakondjaso lo monga la wɛdimo lo olelo ndo lo ɔnwɛlɔ. (Adia Tukedi 23:20; Tito 2:2, 3.) Kânga mbele diomuyelo ndo osutshasutshelo wa demba mbeyaka kimanyiya efula dia sho monga l’alemba w’amɛna, tambokondja ɛlɔlɔ efula lo demba ndo lo nyuma lo woho wayelaso alako wele l’Afundelo.
18. Dui diakɔna diahombaso ndeka ndjakiyanya, ndo ekotshamelo ka prɔfɛsiya kakɔna kendana la yônge kahombaso kongɛ?
18 Kɛnɛ koleki tshɛ ohomba ele, sho pombaka kokɛ lonyuma laso ndo keketsha diɔtɔnganelo dia dimɛna diele lam’asaso la Shɛso lele l’olongo, Ɔnɛ lele Kiɔkɔ ya “lumu leli kakiane, ndu dia lumu layayi,” lo andja ande w’oyoyo. (1 Tim. 4:8; Osam. 36:9) Lo andja w’oyoyo waki Nzambi, ɛkɔnwɛlɔ ka tshɛ lo tshɛ ka lo nyuma ndo ka lo demba kayonga nɛ dia anto wayodimanyiyama pɛkato yawɔ oma lo olambo wa tshungo waki Yeso. Ɔna ɔkɔkɔ wa Nzambi, mbuta ate, Yeso Kristo ayotɔlɔmbɔla lo “teko di’ashi a lumu” ndo Nzambi ayokitola asɔi tshɛ oma lo washo aso. (Eny. 7:14-17; 22:1, 2) Ndo nto l’etena kɛsɔ, prɔfɛsiya ka dimɛna efula kɛnɛ kayokotshama: “Nduku untu ludjashi la Jerusalema ayuta ati: dimi la kandji.”—Is. 33:24.
19. Etena kakokɛso yônge yaso lo yɛdikɔ yakoka, eshikikelo kakɔna kakoka monga laso?
19 Sho mbetawɔka l’ɔlɔlɔ tshɛ dia etshungwelo kaya suke ndo tekɔ lo kongɛ la asolo walomɔlomɔ etena kayonya Jehowa hemɔ la nyɔi. L’etena kakatakongɛ dikambo sɔ, tekɔ l’eshikikelo dia Shɛso ka ngandji ayotokimanyiya dia mbikikɛ pâ yaso nɛ dia ‘nde tokanɛka.’ (1 Pet. 5:7) Lâsɔ, nyɛsɔ tokokɛke yônge yaso, koko tosalake dikambo sɔ mbala tshɛ lo yoho yɔtɔnɛ la atɔndɔ wokɛma hwe wele l’Ɔtɛkɛta wa Nzambi wakasambiyama!
[Nɔte ka l’ɛse ka dikatshi]
a Nyu koka tana listɛ la asawo wa ngasɔ lo kiombo yele lo lɛkɛ 31 la Tshoto y’Etangelo ya Ngɔndɔ ka divwa 1, 2003.
Ovuswelo
• Onto akɔna ele lo kiɔkɔ ya hemɔ, ndo ayototshungola oma lo etombelo wa kɔlɔ wa pɛkato?
• Kânga mbele bu kɔlɔ ndjakiyanya dikambo dia yônge yaso, dui diakɔna diahombaso mbewɔ?
• Lande na kele ɔsɔnwɛlɔ aso w’esakelo ekɔ ohomba le Jehowa?
• Lo kɛnɛ kendana la yônge yaso, wahɔ akɔna wakokaso kondja lo kitanyiya atɔndɔ wa lo Bible?
[Osato wa lo lɛkɛ 23]
Anto kotongama dia ndjotata hemɔ ndo ndjotshunda esombe
[Osato wa lo lɛkɛ 25]
Kânga mbewɔ la hemɔ, ekambi waki Jehowa mongaka l’ɔngɛnɔngɛnɔ l’esambishelo