‘Nyotshikale lo ngandji ka Nzambi’
‘Nyotshikale lo ngandji ka Nzambi etena kakonganyu kɛtshi kaki Nkumɛso Yeso Kristo l’elongamelo ka ndjokondja lɔsɛnɔ la pondjo.’—JUDE 21.
1, 2. Ngande wakatɛnya Jehowa ngandji katokande, ndo ngande weyaso dia paka sho kosadi awui amɔtshi ko sho tshikala lo ngandji kande?
JEHOWA NZAMBI akatɛnya ngandji kande lo toho totshikitanyi. Koko aha la tâmu, djembetelo yoleki woke ya ngandji ka Jehowa ele olambo wa tshungo. Ngandji kokande anto kekɔ efula yoho nyɛ yele nde akatome Ɔnande la ngandji la nkɛtɛ dia nde ndjotovwɛ. (Joa. 3:16) Jehowa akasale dui sɔ nɛ dia nde nangaka dia sho nsɛna pondjo pondjo ndo nde nangaka sho kondja wahɔ oma lo ngandji kande pondjo pondjo!
2 Ko onde sho kokaka mbuta dia lo weho akɔ tshɛ Jehowa ayotokimanyiya dia sho tshikala lo ngandji kande oyadi kakɔna tshɛ kayotɔsɔna dia sala? Kema, nɛ dia lo Jude divɛsa 21, sho mbadiaka ɔnɛ: ‘Nyotshikale lo ngandji ka Nzambi etena kakonganyu kɛtshi kaki Nkumɛso Yeso Kristo l’elongamelo ka ndjokondja lɔsɛnɔ la pondjo.’ Etelo k’ɔnɛ ‘nyotshikale lo ngandji ka Nzambi’ mɛnyaka dia ekɔ akambo amɔtshi walɔmbama dia sho sala. Ko ahombaso sala dia sho tshikala lo ngandji ka Nzambi?
Ngande wakokaso tshikala lo ngandji ka Nzambi?
3. Kakɔna kakate Yeso kaki ohomba le nde dia tshikala lo ngandji ka She?
3 Sho tanaka okadimwelo wa dimbola sɔ lo ɛtɛkɛta wakatɛkɛta Yeso l’otsho w’ekomelo wa lɔsɛnɔ lande la la nkɛtɛ. Nde akate ate: “Naka nyu nyambukitanyia elembe ami, nyu nyayuyala lu ngandji kami, uku akamakitanyia elembe a Papa, wemi lu ngandji kandi.” (Joa. 15:10) Mbokɛmaka hwe dia Yeso akeyaka dia kitanyiya wadjango waki Jehowa aki ohomba dia nde mbetawɔma le She. Ko naka aki ngasɔ le Ɔna Nzambi la kokele, shi kete ayonga ngasɔ ndo le so?
4, 5. a) Naa yoho ya ntondo yakokaso mɛnya dia sho nangaka Jehowa? b) Lande na kahatakoke tona dia kitanyiya wadjango waki Jehowa?
4 Yoho ya ntondo yakokaso mɛnya dia sho nangaka Jehowa ele lo mbokitanyiya. Ɔpɔstɔlɔ Joani akate dikambo sɔ lo mbuta ɔnɛ: ‘Kɛnɛ kalembetshiya mboka Nzambi ngandji ele kitanyiya ɛlɛmbɛ ande, ko ɛlɛmbɛ ande kema wotsho.’ (1 Joa. 5:3) Lo mɛtɛ, aha anto tshɛ wa l’andja ɔnɛ mbetawɔ dia monga l’okitanyiya. Koko, tolembete etelo kɛnɛ: ‘Ko ɛlɛmbɛ ande kema wotsho.’ Jehowa hatɔlɔmbɛ dia sho sala kɛnɛ keso bu la akoka.
5 Tɔshi ɛnyɛlɔ kɛnɛ: Onde wɛ kokaka nɔmba ɔngɛnyi ayɛ w’oshika dia nde mɛmba ɛngɔ kɛmɔtshi keyayɛ ɔnɛ kekɔ wotsho efula dia nde mɛmba? Kema! Jehowa toleka ɔlɔlɔ la fwa ndo nde mbaleka mbeya elelo aso. Bible toshikikɛka dia Jehowa ‘mbohɔka dia tekɔ ditshu.’ (Osam. 103:14) Nde hatɔlɔmbaki pondjo dia sho mɛmba wotsho wahatakoke mɛmba. Ɔnkɔnɛ, sho ndoko l’ɔkɔkɔ wa tona kitanyiya wadjango waki Jehowa. Koko, sho mbeyaka dia okitanyiya toshaka diaaso dia diambo dia sho mɛnya dia mɛtɛ sho nangaka Shɛso lele l’olongo ndo sho nangaka tshikala lo ngandji kande.
Woshasha wa lânde w’oma le Jehowa
6, 7. a) Nkum’otema kɛdikɛdi na? b) Sha ɛnyɛlɔ kɛnya woho wakoka nkum’otema tokimanyiya dia sho tshikala lo ngandji ka Nzambi.
6 L’andja wa kɔlɔ ɔnɛ wasɛnaso, sho mongaka l’ohomba wa mbɔsa tɛdikɔ efula tendana la okitanyiya aso le Nzambi. Ngande wakokaso ndjashikikɛ dia tɛdikɔ tɔsɔ mbɔtɔnɛka la lolango laki Nzambi? Jehowa akatosha woshasha ɔmɔtshi wakoka tokimanyiya efula dia sho monga la okitanyiya. Woshasha akɔ ko nkum’otema. Nkum’otema kɛdikɛdi na? Nkum’otema kɛdikɛdi dikoka dia lânde diele l’onto dia sɛdingola etsha ande, waonga ande ndo ɛsɔnwɛlɔ ande. Tɔ kekɔ oko shushi yele l’etei k’otema aso yatokimanyiya dia sho sɛdingola ɛsɔnwɛlɔ wa lo lɔsɛnɔ laso kana dia kana yimba lo etsha waki la so ntondo ndo dia mbeya kana wekɔ amɛna kana kɔlɔ.—Adia Romo 2:14, 15.
7 Ngande wakokaso kamba la nkum’otema lo yoho ya dimɛna? Tɔshi ɛnyɛlɔ kɛnɛ. Ɔmɛngɔdi ɔmɔtshi ekɔ lo tatenyanya oswe wa woke efula wahɛnama mboka. Ndoko ehomɔ kakoka mbɛnya lɛnɛ atandatshu. Koko, nde ekɔ lo tatshu la dihonga tshɛ otsha lɛnɛ atandatshu. L’ekimanyielo ka na? Nde ekɔ la busɔlɛ kana yɛnya nɔrdɛ. Yɛnya nɔrdɛ ekɔ yangɔ yele oko tango yofundami ndjɛkɛ nyɛi ya nkɛtɛ, mbuta ate ɛstɛ, owɛstɛ, nɔrdɛ ndo sidɛ ndo yekɔ la dikɔnga diɛnya paka otsha lo nɔrdɛ. Naka ɔmɛngɔdi bu la yɛnya nɔrdɛ, kete nde mbeyaka shishɔ. Woho akɔ wâmɛ mbele, naka onto bu la nkum’otema, kete nde mbeyaka minganɛ etena kayangande dia sala ɛsɔnwɛlɔ wendana la lɔkɛwɔ ndo ɛsɔnwɛlɔ w’ɛlɔlɔ lo lɔsɛnɔ.
8, 9. a) Elelo akɔna wele la nkum’otema kaso wahombaso mbohɔka? b) Kakɔna kahombaso sala dia nkum’otema kaso monga mɛtɛ ohomba le so?
8 Koko, l’ɛnyɛlɔ ka yɛnya nɔrdɛ, nkum’otema kekɔ la elelo. Naka ɔmɛngɔdi sukanya yɛnya nɔrdɛ la lowolo lelɛwɔ ema, kete dikɔnga hadiotɛlɛ otsha lo nɔrdɛ. Woho akɔ wâmɛ mbele, kakɔna kayotomba naka sho mbetawɔ dia nsaki yaso mbahemɛ tɛdikɔ taso? Nsaki yaso ya lokaki kokaka konya nkum’otema kaso dia totshutshuya dia sho mbɔsa tɛdikɔ ta kɔlɔ. Bible tɔhɛmɔlaka ɔnɛ: “Utema ndeka diango tshe lukesu, vo weko kolo efula.” (Jer. 17:9; Tuk. 4:23) Ndo nto, naka ɔmɛngɔdi bu la kartɛ ka dimɛna, kete yɛnya nɔrdɛ hatowokimanyiya kânga yema. Woho akɔ wâmɛ mbele, naka hatoyaɛkɛ lo ɛlɔmbwɛlɔ ka shikaa ndo kahatshikitana kele l’Ɔtɛkɛta wa Nzambi, Bible, kete nkum’otema kaso hatotokimanyiya kânga yema. (Osam. 119:105) Lonyangu ko, anto efula wa l’andja ɔnɛ mbetawɔka dia nsaki ya l’etema awɔ mbahemɛ tɛdikɔ tawɔ ndo vɔ hawodje yimba l’atɔndɔ wele l’Ɔtɛkɛta wa Nzambi. (Adia Efeso 4:17-19.) Diakɔ diele, kânga mbele anto efula wekɔ la nkum’otema, vɔ salaka akambo wa kɔlɔ.—1 Tim. 4:2.
9 Sho pombaka ndjashikikɛ diaha sala ngasɔ! Ɔnkɔnɛ, nyɛsɔ totetemale mbetawɔ dia Ɔtɛkɛta wa Nzambi mbetsha ndo mbekiya nkum’otema kaso dia tɔ monga mɛtɛ ohomba le so. Sho pombaka mpokamɛ kɛnɛ katotɛ nkum’otema kaso kambekiyama oma lo Bible lo dihole dia sho mbetawɔ dia nsaki ya lokaki kiahemɛ. L’etena kakɔ kâmɛ, sho pombaka sala la wolo dia nɛmiya nkum’etema y’anangɛso l’akadiyɛso wa lo nyuma wokaso ngandji. Sho salaka la wolo dia mbewɔ dia mbatakanya, lo mbohɔka dia nkum’etema y’anangɛso l’akadiyɛso mbeyaka ndeka mbashimba dia sala awui amɔtshi wasalaso.—1 Kor. 8:12; 2 Kor. 4:2; 1 Pet. 3:16.
10. Akambo akɔna asato wa lo lɔsɛnɔ wayangaso sɛdingola?
10 Kakianɛ, nyɛsɔ tɔsɛdingole akambo asato wakokaso mɛnya ngandji kokaso Jehowa lo lɔsɛnɔ laso lo mbokitanyiya. Lo dikambo la dikambo, nkum’otema kekɔ ohomba, koko tɔ pombaka nɔmbwama ntondotondo la atɔndɔ wa lo Bible wendana la lɔkɛwɔ. Akambo asato wakokaso kitanyiya Jehowa la ngandji tshɛ vɔanɛ: 1) Lo nanga wanɛ walangema oma le Jehowa, 2) lo nɛmiyaka lowandji ndo 3) lo salaka la wolo dia tshikalaka pudipudi lo washo waki Nzambi.
Tolange wanɛ walangema oma le Jehowa
11. Bonde kahombaso nanga wanɛ walangema oma le Jehowa?
11 Dikambo dia ntondo ele, sho pombaka nanga wanɛ walangema oma le Jehowa. Lo kɛnɛ kendana la angɛnyi, anto wekɔ oko nanda. Mbuta ate sho sɛngiyamaka oma le anto wosukanyi la so. Otungi aso mbeyaka dimɛna wâle kana ohomba wakoka monga la angɛnyi le anto wele kema kokele. Ɔnkɔnɛ, nde toshaka dako dia lomba nɛ ɔnɛ: “One latengolaka kame la akanga a yimba, atuyalaka kanga yimba. Keli one latekesanelaka la akanga a dinginya, atuhumoka lukulu l’engeno.” (Tuk. 13:20; 1 Kor. 15:33) Ndoko onto la l’atei aso lakombola ‘mpomɔ lokolo l’ɛngɛnɔ.’ Onto tshɛ la l’atei aso kombolaka dia monga ‘kanga lomba.’ Ndoko onto lakoka mbetɛ Jehowa kanga lomba oleki woho wende ndo ndoko onto lakoka mbɔsɛngiya dia nde monga la lɔkɛwɔ la kɔlɔ. Koko, nde toshaka ɛnyɛlɔ ka dimɛna lo kɛnɛ kendana la lɔngɛnyi. Tokanyiya yema: Anto akɔna wele kema kokele wasɔna Jehowa dia vɔ monga angɛnyi ande?
12. Woho akɔna w’angɛnyi wasɔna Jehowa?
12 Jehowa akɔsaka owandji wa nkumbo Abarahama oko ‘ɔngɛnyi ande.’ (Is. 41:8) Pami kɛsɔ aki kanga kɔlamelo ya mamba, onto ɔlɔlɔ ndo nde aki la okitanyiya. (Jak. 2:21-23) Ɔsɔ mbele woho w’angɛnyi wasɔna Jehowa. Nde sɔnaka woho w’anto akɔ wâmɛ ɛlɔ kɛnɛ. Naka Jehowa sɔnaka angɛnyi wa ngasɔ, shi kete ekɔ ohomba dia sho lawɔ sɔna angɛnyi w’amɛna dia mɛngɔla l’akanga wa tomba woho wa sho lawɔ koma akanga wa tomba?
13. Lo kɛnɛ kendana la ɔsɔnwɛlɔ w’angɛnyi, kakɔna kayotokimanyiya dia sho sala ɛsɔnwɛlɔ w’ɛlɔlɔ?
13 Kakɔna kakoka tokimanyiya dia sho sala ɛsɔnwɛlɔ w’ɛlɔlɔ lo dikambo sɔ? Mbeka bɛnyɛlɔ dia lo Bible kokaka tokimanyiya. Nyɛsɔ tende lɔngɛnyi laki lam’asa Ruta nde la Naɔmi wa okilo ande, lɔnɛ laki lam’asa Davidi nde la Jɔnatana kana lɔnɛ laki lam’asa Timɔtɛ nde la Paulo. (Ruta 1:16, 17; 1 Sam. 23:16-18; Fil. 2:19-22) Anto asɔ waki la lɔngɛnyi la wolo nɛ dia lɔ lakaye oma lo ngandji k’oshika kakawokaka Jehowa. Onde wɛ kokaka tana angɛnyi walanga Jehowa oko wɛ? Eya dia l’etshumanelo ka Akristo mbakokayɛ tana angɛnyi wa woho ɔsɔ. Angɛnyi asɔ hawotokohomuya lokolo l’ɛngɛnɔ lo nyuma. Koko, vɔ wayokokimanyiya dia wɛ kitanyiya Jehowa, pama lo nyuma ndo monɛ lo nyuma. (Adia Ngalatiya 6:7, 8.) Vɔ wayokokimanyiya dia wɛ tshikala lo ngandji ka Nzambi.
Tɔlɛmiya lowandji
14. Tena efula, akambo akɔna wakoka monga tshondo y’okakatanu le so dia nɛmiya lowandji?
14 Yoho ya hende yakokaso mɛnya Jehowa ngandji kawokaso mendanaka la lowandji. Sho pombaka nɛmiya lowandji. Lande na kele tongaka tshondo y’okakatanu dia sho sala dui sɔ lo tena dimɔtshi? Dui dimɔtshi ele, anto wele la yema ya lowandji kema kokele. Lâdiko dia lâsɔ, shoamɛ kema kokele. Sho ndɔshanaka la nsaki yaso ya lôtɔ ya tɔmbɔkɔ.
15, 16. a) Lande na kele ekɔ ohomba dia sho nɛmiya wanɛ wele Jehowa akawasha ɔkɛndɛ wa kokɛka ekambi ande? b) Wetshelo akɔna w’ohomba wakondjaso oma lo woho wakɔshi Jehowa woho wakatɔmbɔkwɛ ase Isariyɛlɛ Mɔsɛ?
15 Koko, sho mbeyaka ndjambola ɔnɛ: ‘Naka ekɔ tshondo y’okakatanu le so dia nɛmiya lowandji, ko lande na kahombaso sala dui sɔ?’ Okadimwelo wa dimbola sɔ mendanaka la dikambo diendana la lowandji. Onto akɔna ayotɔsɔna dia nde monga omboledi la ɔnɔmbɔdi aso? Naka sho sɔna dia Jehowa monga Omboledi aso, kete sho pombaka nɛmiya lowandji lande. Onde sho kokaka mɛtɛ mbêlɛ ɔnɛ Ɔnɔmbɔdi aso naka hatosale dui sɔ? Ndo nto, Jehowa ôkokambaka la lowandji lande lo tshimbo y’anto wele kema kokele wakandasha ɔkɛndɛ wa kokɛka ekambi ande. Naka sho tɔmbɔkwɛ anto asɔ, ngande wayotɔsa Jehowa na?—Adia 1 Tesalonika 5:12, 13.
16 Ɛnyɛlɔ, etena kakangunɛngunɛ ase Isariyɛlɛ Mɔsɛ, Jehowa akɔshi dia nde mbakawangunɛngunɛ. (Wal. 14:26, 27) Nzambi hatshikitana. Naka tayɔtɔmbɔkwɛ wanɛ wakandasha yema ya lowandji, kete nde mbatɔmbɔkwɛso!
17. Dionga diakɔna di’ɔlɔlɔ diahombaso sala la wolo dia monga la diɔ otsha le wanɛ wele la yema ya lowandji l’etshumanelo?
17 Ɔpɔstɔlɔ Paulo akɛnya dionga di’ɔlɔlɔ diahomba monga la so otsha le wanɛ wele la yema ya lowandji l’etshumanelo k’Akristo. Nde akafunde ate: “Nyukitanyia aui w’elombodi anyu, nyuyali l’okongo awo, ne dia vo watosenaka dia etema anyu, uku antu wayedika la [Nzambi] diango. Vo watutshaka dikambu so la ongenongeno, aha la lunyangu, ne dia dikambu diako hadiunyusha nduku waho.” (Heb. 13:17) Lo mɛtɛ, dui sɔ nɔmbaka dia sho mbidja welo dia monga la yimba y’okitanyiya ndo mbetawɔ mbâlɛmbɛ. Koko, tohɔ dia tekɔ lo sala la wolo dia tshikala lo ngandji ka Nzambi. Shi ekɔ ohomba sho mbidja welo dia kotsha oyango ɔsɔ?
Totshikalake pudipudi lo washo wa Jehowa
18. Lande na kalanga Jehowa dia sho mongaka pudipudi?
18 Yoho ya sato yɛnyaso ngandji kokaso Jehowa ele, woho wayaketembolaso dia tshikalaka pudipudi lo washo ande. Tena efula ambutshi salaka la wolo dia anawɔ monga pudipudi. Lande na? Ɔkɔkɔ wa ntondo ele, monga pudipudi ekɔ ohomba dia ɔna monga la yônge ya dimɛna. Ndo nto, ɔna lele pudipudi kimanyiyaka di’anto tɛkɛta dimɛna lo dikambo dia nkumbo kande, mɛnyaka dia ambutshi ande mbolangaka ndo mbodjaka yimba. Woho akɔ wâmɛ mbele, Jehowa nangaka dia sho monga pudipudi. Nde mbeyaka dia pudipudi kekɔ ohomba dia sho monga la yônge ya dimɛna. Nde mbeyaka nto dia naka sho monga pudipudi, kete dui sɔ diayokimanyiya dia anto tɛkɛta dimɛna lo dikambo diande, nde Shɛso kele l’olongo. Dui sɔ diekɔ ohomba efula nɛ dia anto kokaka kotwama oya le Nzambi kakambɛso lo menda ɛnamelo kaso kotshikitanyi la anto wele l’andja ɔnɛ wa mindo.
19. Ngande weyaso ɔnɛ pudipudi ka lo demba kekɔ ohomba?
19 Lo akambo akɔna wahombaso tshikalaka pudipudi? Lo akambo tshɛ wa lo lɔsɛnɔ laso. Jehowa akɛnya ase Isariyɛlɛ w’edjedja hwe dia pudipudi ka lo demba kekɔ ohomba. (Lew. 15:31) Ɛlɛmbɛ wa Mɔsɛ waki la wadjango amɔtshi wakendanaka la akambo wele oko wonyelo wa mindo, osolelo w’alɔnga, w’anya, w’ekolo ndo w’ahɔndɔ. (Etum. 30:17-21; Lew. 11:32; Wal. 19:17-20; Euh. 23:13, 14) Ase Isariyɛlɛ wakohɔka dia Jehowa Nzambi kawɔ ekɔ ekila, mbuta ate “pudipudi.” Ekambi waki Nzambi k’ekila pombaka vɔ lawɔ monga ekila.—Adia Akambu w’Asi Lewi 11:44, 45.
20. Lo akambo akɔna wahombaso tshikalaka pudipudi?
20 Ɔnkɔnɛ, sho pombaka monga pudipudi, oyadi l’andja kana l’etei. Sho ndjaketembolaka dia nama yimba yaso pudipudi. Sho kitanyiyaka atɔndɔ waki Jehowa wendana la pudipudi ka lo lɔkɛwɔ la kɔlamelo tshɛ, kânga mbambolola anto wotodingi l’awui wa mindo wa dieyanelo. Kɛnɛ koleki ohomba ele, sho salaka la wolo dia nama ɔtɛmwɛlɔ aso pudipudi lo mbewɔ dia ndjasanya la ɔtɛmwɛlɔ wa kashi. Sho hatohɛ ɔhɛmwɛlɔ wakasambiyama wele lo Isaya 52:11 wata ɔnɛ: “Nyuneli, nyuneli, nyumo uma lane. Nyu wane watembaka puki y’ekila ya [Jehowa], nyuyaedia; tanyunandaki engo ka mindu.” Ɛlɔ kɛnɛ, sho tshikalaka pudipudi lo nyuma lo mbewɔ diaha minanda kânga ɛngɔ ɔtɔi kɛna Shɛso ɔnɛ kekɔ mindo lo kɛnɛ kendana la ɔtɛmwɛlɔ. Omalɔkɔ mbele, sho mbewɔka fɛtɛ ya l’ɛtɛmwɛlɔ wa kashi ndo nshi ya fɛtɛ yasalema lo andja wa nshi nyɛ. Lo mɛtɛ, ekɔ tshondo y’okakatanu dia tshikalaka pudipudi. Koko, ekambi waki Jehowa salaka la wolo dia sala dui sɔ nɛ dia diɔ mbakimanyiyaka dia vɔ tshikala lo ngandji ka Nzambi.
21 Jehowa nangaka dia sho tshikalaka lo ngandji kande pondjo pondjo. Koko, sho tshɛ onto l’onto pombaka ndjashikikɛ dia tekɔ lo sala kɛnɛ kakokaso sala dia tshikalaka lo ngandji ka Nzambi. Sho kokaka sala dui sɔ lo ndjelaka ɛnyɛlɔ kaki Yeso ndo lo mɛnyaka ngandji kokaso Jehowa lo kitanyiyaka ɛlɛmbɛ Ande. Naka sho sala dui sɔ, kete tayokoka monga l’eshikikelo dia ndoko dui “[di]ayeya ntanganya uma lu ngandji ka [Nzambi] keli le Kristu Jesu Khumesu.”—Romo 8:38, 39.
Onde wɛ âkohɔ?
• Ngande wakoka nkum’otema tokimanyiya dia sho tshikala lo ngandji ka Nzambi?
• Lande na kahombaso nanga wanɛ walangema oma le Jehowa?
• Lande na kele ekɔ ohomba dia sho kitanyiya lowandji?
• Ohomba akɔna wele la pudipudi le ekambi waki Nzambi?
21. Ngande wakokaso ndjashikikɛ dia tayotshikalaka lo ngandji ka Nzambi?
[Kiombo/Osato wa lo lɛkɛ 20]
DIBUKU DIAKEKETSHA ANTO DIA MONGA LA LƆKƐWƆ L’ƆLƆLƆ
Lo Losanganya la distrikɛ la lo 2008/2009, dibuku diele la ndjɛkɛ 224 diele l’ɔtɛ a dui ɔnɛ: ‘Nyotshikale lo ngandji ka Nzambi’ diakatondjama. Naa oyango wele la dibuku di’oyoyo sɔ? Diɔ diekɔ l’oyango wa kimanyiya Akristo dia vɔ mbeya ndo nanga atɔndɔ waki Jehowa waleka mendana la lɔkɛwɔ l’Okristo. Wekelo wa lotshimola wa dibuku ‘Nyotshikale lo ngandji ka Nzambi’ ayofudia eshikikelo kele la so k’ɔnɛ nsɛna lo yoho yɔtɔnɛ l’atɔndɔ waki Jehowa mbele yoho ya lɔsɛnɔ yoleki tshɛ dimɛna nshi nyɛ ndo yatɔla lo lɔsɛnɔ la pondjo lo nshi yayaye.
Lâdiko dia lâsɔ, dibuku sɔ diekɔ l’oyango wa tokimanyiya dia sho mɛna dia kitanyiya Jehowa bu wotsho, koko ɔsɔ ekɔ yoho yɛnyaso Jehowa ngandji kawokaso. Lo mɛtɛ, dibuku sɔ diayototshutshuya dia sho ndjambola ɔnɛ: ‘Lande na kakitanyiyami Jehowa?’
Etena kɔsa anto amɔtshi yɛdikɔ ya kɔlɔ ya mimɔ oma lo ngandji ka Jehowa, mbala efula vɔ salaka dui sɔ l’ɔtɛ wa lɔkɛwɔ la kɔlɔ lele la wɔ, koko aha l’ɔtɛ w’ɔnɛ haweye wetshelo dimɛna. Ɔnkɔnɛ, ekɔ ohomba sho keketsha ngandji ndo lowando lele la so lo ɛlɛmbɛ la atɔndɔ waki Jehowa watɔlɔmbɔla lo lɔsɛnɔ la lushi la lushi! Tekɔ l’eshikikelo dia dibuku di’oyoyo sɔ diayokimanyiya ɛkɔkɔ waki Jehowa wa l’andja w’otondo dia vɔ mbeta lo wedi w’akambo wa mɛtɛ, mɛnya dia Satana ekɔ kanga kashi ndo kɛnɛ koleki ele, tshikala lo ngandji ka Nzambi!—Jude 21.
[Osato wa lo lɛkɛ 18]
“Naka nyu nyambukitanyia elembe ami, nyu nyayuyala lu ngandji kami, uku akamakitanyia elembe a Papa, wemi lu ngandji kandi”