Yasukanya la Nzambi

Jehowa toshaka lotshungɔ la nsɔna

Euhwelu k’Elembe 30:11-20

“MBALA efula lakokaka wɔma wa wokoka w’ɔnɛ hatotshikala la kɔlamelo le Jehowa.” Kɛsɔ mbakate Okristo ɔmɔtshi wa womoto wakakanyiyaka dia akambo wa kɔlɔ wakokomɛ lo nshi yande ya dikɛnda wayowokonya diaha nde ntshikala la kɔlamelo. Onde ngasɔ mbayaokaso ndo sho? Onde ekɔ mɛtɛ dia hatototondoya l’ɔtɛ w’akambo wakatokomɛ? Kema. Lam’ele Jehowa akatosha lotshungɔ la nsɔna, sho shoamɛ mbakoka nsala ɛsɔnwɛlɔ wendana la woho wayotokamba la lɔsɛnɔ laso. Jehowa kombolaka dia sho nsala ɔsɔnwɛlɔ wa dimɛna ndo Bible Ɔtɛkɛta ande tɛnyaka woho wakokaso nsala dui sɔ. Tende ɛtɛkɛta waki Mɔsɛ wele lo Euhwelu k’Elembe tshapita 30.

Onde ekɔ dui dia wolo dia sho mbeya kɛnɛ katɔlɔmba Nzambi ndo kisala?a Mɔsɛ akate ate: “Olembe one wamumunyudjela elo hawunyuleki wulu, ndu vo kema etali uma le nyu.” (Divɛsa 11) Jehowa hatɔlɔmbɛ kɛnɛ kahatakoke nsala. Ɛlɛmbɛ ande kema wolo ndo sho kokaka mbakitanyiya ndo mbeya kɛnɛ kalembetshiyawɔ. Aha paka sho ‘mbode l’olongo’ kana ‘mbotehwe la wedi wa ndjale’ ko sho mbeka kɛnɛ katɔlɔmba Nzambi. (Divɛsa 12, 13) Bible tokiyaka hwe woho wahombaso nsɛna.—Mika 6:8.

Koko, Jehowa hatotshutshuya dia mbokitanyiya. Mɔsɛ akate ate: “Dimi lambukitsha lumu la ololo, nyoi la kolo la ntundu kanyu elo.” (Divɛsa 15) Tekɔ la lotshungɔ la nsɔna lam’asa lɔsɛnɔ la nyɔi ndo ɔlɔlɔ la kɔlɔ. Sho kokaka nsɔna dia ntɛmɔla Nzambi ndo mbokitanyiya tele l’elongamelo ka nde tɔtshɔkɔla kana sho kokaka nsɔna dia ntona mbokitanyiya ko sho ndjɛna pâ l’etombelo wa kɔlɔ w’oma l’ɔsɔnwɛlɔ aso. Shoamɛ mbahomba nsala ɔsɔnwɛlɔ walangaso.—Divɛsa 16-18; Ngalatiya 6:7, 8.

Onde ɔsɔnwɛlɔ wasalaso wekɔ l’ohomba lo washo waki Jehowa? Eelo! Mɔsɛ akate lo wolo wa nyuma kaki Nzambi ate: ‘Nyɔsɔnɛ lɔsɛnɔ.’ (Divɛsa 19) Lâsɔ, ngande wakokaso nsɔna lɔsɛnɔ? Mɔsɛ akalembetshiya ate: “Lu mbuka [Jehowa, Nzambi k]anyu, ngandji, lu nkitanyia diui diandi ndu lu mbumamema.” (Divɛsa 20) Naka sho mboka Jehowa ngandji, kete tayokombola dia mbohokamɛ l’okitanyiya tshɛ ndo mbomamema la kɔlamelo tshɛ, oyadi kɛnɛ tshɛ kakoka tokomɛ. Lo nsɛna lo yoho shɔ, sho sɔnaka lɔsɛnɔ, mbuta ate yoho ya lɔsɛnɔ yoleki dimɛna oma ko kakianɛ l’elongamelo ka ndjɔsɛna lɔsɛnɔ la pondjo l’andja w’oyoyo waki Nzambi wayaye.—2 Petero 3:11-13; 1 Joani 5:3.

Ɛtɛkɛta waki Mɔsɛ ɛsɔ ketshaka mɛtɛ k’ohomba efula. Oyadi kɛnɛ tshɛ kakakokomɛ lo lɔsɛnɔ layɛ l’andja wa kɔlɔ ɔnɛ, ndoko dui diɛnya ɔnɛ wɛ hatotondoya. Jehowa ekɔ lo kosha nɛmɔ lo kosha lotshungɔ la nsɔna. Eelo, wɛ kokaka nsɔna dia mboka Jehowa ngandji, mbohokamɛ ndo ntshikala la kɔlamelo le nde. Naka wɛ nsala ɔsɔnwɛlɔ wa ngasɔ, kete Jehowa ayɔtshɔkɔla welo wayoyodja.

Dikambo dia mɛtɛ di’ɔnɛ sho tekɔ la lotshungɔ la mboka Jehowa ngandji ndo mbokambɛ diakakeketsha womoto lakatatɛkɛtshi dikambo diande l’etatelo ka sawo nɛ. Nde akate ate: “Dimi mbokaka Jehowa ngandji. Lo tena dimɔtshi, dimi mbohɛka dia kɛnɛ koleki ohomba ele ngandji kokami Jehowa. Ɔnkɔnɛ, dimi kokaka ntshikala la kɔlamelo.” L’ekimanyielo ka Jehowa, wɛ lawɔ kokaka nsala dui sɔ.

[Nɔtɛ ka l’ɛse ka dikatshi]