Ambola w’oma le ambadi

Etena kakɔna kakoka onto mbɔsa yɛdikɔ ya batizama nto?

La ntondo k’awui amɔtshi, onto lambobatizamaka mbeyaka mɛna ohomba wa nsɛdingola dia kana batismu kande komonga dimɛna ndo kana nde pombaka batizama nto. Ɛnyɛlɔ, lo etena kakabatizama onto, mbeyaka monga ko nde akasɛnaka yoho ya lɔsɛnɔ ya kɔlɔ kana akasalaka dui dimɔtshi dia kɔlɔ diakakoke mbokonya dia nde mbitshanyema oma lo etshumanelo otondongaka nde amboshilaka nongola batismu. Onde nde akakoke ndjakimɔ le Nzambi etena kakandasalaka akambo wa kɔlɔ asɔ? Onto ɔsɔ otokoka ndjakimɔ le Jehowa lo yoho ya dimɛna paka l’ɔkɔngɔ wa nde ntshika lɔkɛwɔ lande lahɔtɔnɛ l’Afundelo. Ɔnkɔnɛ, onto lakabatizama etena kakandasalaka akambo amɔtshi wa kɔlɔ efula mbeyaka mɛna ohomba wa nde batizama nto.

Kayotota di’onto laki kosalaka pɛkato etena kakandabatizama, koko lakayosalaka dikambo dimɔtshi dia kɔlɔ l’ɔkɔngɔ wa batismu kande dialɔmba dia mbeta lo kɔmite ka kilombo? Tɔshi dia nde ota dia nde koshihodia kɛnɛ kakandasalaka lo etena ka batismu kande dimɛna ndo ota dia batismu kande komonga mɛtɛ ka dimɛna. Etena kasawolawɔ l’otshi wa kɔlɔ ɔsɔ, dikumanyi hawohombe mɛnya dia batismu kande komonga ka dimɛna ndo hawohombe mombola dia kana nde mbɔsaka dia ndjakimɔ ndo batismu kande kaki dimɛna kana bu. Kɛnɛ kahombawɔ mbeya ele nde akahokamɛ sawo di’oma l’Afundelo diendana la kitshimudi ya batismu. Nde akakadimola ɔnɛ eelo lo ambola wendana la ndjakimɔ ndo la batismu. Oma lâsɔ, nde akengola ahɔndɔ ndo akabatizama la tshondo l’ashi. Ɔnkɔnɛ, mbokɛmaka hwe dia nde akashihodia dimɛna ohomba wa kɛnɛ kakinde lo nsala. Lâsɔ dikumanyi diakahombe mbɔ̂sa oko onto lambobatizama.

Naka onto ambota dia batismu kande komonga ka dimɛna, kete dikumanyi mbeyaka nkotola yambalo yande lo Tshoto y’Etangelo ya Ngɔndɔ ka sato 1, 1960, lɛkɛ 159 ndo 160, ndo ya Ngɔndɔ ka hende 15, 1964, lɛkɛ 123 polo 126 lo Angɛlɛ, lɛnɛ ɔtɛkɛtami akambo wendana la batismu ka mbala ka hende dimɛna dimɛna. Yɛdikɔ ya batizama nto l’ɔtɛ w’akambo amɔtshi (ɛnyɛlɔ oko onto koshihodia akambo wa lo Bible dimɛna etena kakandabatizama) ekɔ yɛdikɔ y’onto ndamɛ.

Akambo akɔna wahomba Akristo nsɛdingola etena kalangawɔ mbidjasɛ luudu ɔtɔi la anto akina?

Onto tshɛ ekɔ la ohomba wa dihole dia mbidjasɛ. Koko ɛlɔ kɛnɛ, anto efula bu la mvudu yawɔ hita. Ekakatanu wendana la ekondjelo, yônge ndo akambo akina mbeyaka nkonya onto dia nde mbidjasɛ l’ase nkumbo, mbidja ndo ewotɔ ande dihole ɔtɔi. Lo ahole amɔtshi, ase nkumbo mɔtanaka lo luudu ɔtɔi.

Okongamelo waki Jehowa bu la ɔkɛndɛ wa mbisha tshumanelo tshɛ dia l’andja w’otondo listɛ l’otale l’ɛlɛmbɛ wahombawɔ ndjela lo kɛnɛ kendana la ahole wahombawɔ mbidjasɛ. Akristo keketshamaka dia nkana yimba la atɔndɔ wa l’Afundelo dia nshikikɛ dia kana tɛdikɔ tambowɔsa dia mbidjasɛ la anto akina mbetawɔmaka le Nzambi kana bu. Naa atɔndɔ amɔtshi l’atei awɔ?

Dui dia ntondo diahombawɔ mbidja yimba ele, shɛngiya yayonga la wodjaselo wa la anto akina le wɔ ndo lo lonyuma lawɔ. Weho akɔna w’anto wewɔ? Onde vɔ wekɔ atɛmɔdi wa Jehowa? Onde vɔ sɛnaka lo yoho yɔtɔnɛ la atɔndɔ wa lo Bible? Ɔpɔstɔlɔ Paulo akafunde ate: “Tanyukesamaki. Diendje dia kolo diatulanyaka ditshelu di’ololo.”—1 Kor. 15:33.

Afundelo mɛnyaka dia Jehowa halange monanyi la loseka. (Heb. 13:4) Ɔnkɔnɛ, Nzambi hetawɔ yɛdikɔ tshɛ yendana la wodjaselo wa pami la womoto wele kema atshukanyi oko wekɔ wadi la omi. Okristo hahombe mbidjasɛ lo dihole diadihawɔ washo lo akambo wa mindo.

Ndo nto, Bible keketshaka anto tshɛ walanga mbetawɔma le Nzambi dia ‘ndawɔ monanyi.’ (1 Kor. 6:18) Ɔnkɔnɛ, ayonga dui dia lomba le Okristo dia nde mbewɔ wodjaselo tshɛ wa la anto akina wakoka ndjokonya dia nde ndjonga la lɔkɛwɔ la mindo. Ɛnyɛlɔ, tɔshi dia Akristo efula w’apami la wa wamato wekɔ lo ndala lo luudu ɔtɔi. Shi yɛdikɔ shɔ kokaka ndjowadja l’ohemba wa nsekola ɛlɛmbɛ waki Nzambi? Kayotota naka anto ahende wele kema atshukanyi wambotanema vɔ ahende ato aha la lolango lawɔ l’ɔtɛ w’anto akina watongaka la wɔ bu lawɔ lo tshanda mɔtshi? Woho wâmɛ mbele, ayonga tshondo ya wâle lo nyuma le enyemba wele la ngandji ka lam’asa pami la womoto dia vɔ mbidjasɛ lo luudu ɔtɔi. Ayonga dui dia lomba dia sho mbewɔ akambo wa ngasɔ.

Lo kanyi yakɔ yâmɛ, hatonga dimɛna dia anto ahende wambodiaka diwala ntetemala mbidjasɛ lo luudu ɔtɔi. Naka vɔ mongaka kâmɛ mbala la mbala, kete dui sɔ kokaka ndjakonya esadi eto dia vɔ nsala awui wa mindo.—Tuk. 22:3.

Dui di’ekomelo di’ohomba diahombawɔ mbidja yimba ele woho wayɔsa anto yɛdikɔ yawɔ. Kânga mbakoka Okristo ɔmɔtshi mɛna dimɛna mbidjasɛ la anto amɔtshi, naka dui sɔ konyaka dia anto akina ntɛkɛta kɔlɔ lo dikambo diawɔ, kete nde pombaka mbidja yimba lɔkɔ. Tatetawɔke pondjo dia lɔkɛwɔ laso mbisha lokombo la Jehowa sɔnyi. Paulo akate ate: “Tanyuyalaki uku utamba a takanya; le asi Juda kana le asi Ngirika, kana le Ekelizia wa [Nzambi], uku ndu dimi latongenyangenyaka antu tshe lu akambu tshe. Dimi hayayangela waho keli latuyangelaka antu efula waho, dia vo nshimbamela.”—1 Kor. 10:32, 33.

Mbeyaka monga tshondo y’okakatanu le wanɛ walanga nsukɛ atɔndɔ waki Jehowa wosembwe dia vɔ ntana mvudu y’amɛna yahombawɔ mbidjasɛ. Koko Akristo pombaka ‘ntetemala mbeya kɛnɛ ketawɔma le Nkumadiɔndjɔ.’ Vɔ pombaka ndjashikikɛ dia ndoko dikambo dia kɔlɔ diasalema lo mvudu yawɔ. (Ef. 5:5, 10) Kɛsɔ nɔmbaka Akristo dia vɔ nyanga ɛlɔmbwɛlɔ kaki Nzambi lo dɔmbɛlɔ ndo nsala kɛnɛ tshɛ kakokawɔ nsala dia vɔ ndjakokɛ lo demba, lo lɔkɛwɔ ndo nkokɛ lokombo l’ɔlɔlɔ laki Jehowa.