Kɛnɛ kaketsha Yeso lo dikambo dia Diolelo diaki Nzambi

“Jesu akatakindulaka l’esumba ndu lu ngelu, atasambisha lukumu l’ololo la diulelu dia [Nzambi].”—LUKA 8:1.

SHO tokombolaka ntɛkɛta akambo wendana la so kana akambo wangɛnangɛnaso. Yeso akate ate: “Unyo atoteketaka uma lu efula k’akambu weli l’utema.” (Mateu 12:34) Naka sho nsɛdingola akambo wakate Yeso etena kakandakambaka olimu ande, kete sho kokaka mɛna dia Diolelo diaki Nzambi mbaki dikambo diakaleke ohomba le nde.

Diolelo diaki Nzambi kɛdikɛdi na? Diolelo diekɔ lowandji lalɔmbwama oma le nkumekanga kɛmɔtshi. Ɔnkɔnɛ, Diolelo diaki Nzambi diekɔ lowandji lakashikikɛma oma le Nzambi. Yeso akatɛkɛta awui efula wendana la Diolelo diaki Nzambi ndo nde akadietɛ ɔtɛ a dui wa losango lande. Diolelo diakɔ tɛkɛtamaka mbala ndekana 110 lo Evanjiliɔ wakɔ ɛnɛi. Koko Yeso kosambishaka oma l’ɛtɛkɛta eto. Nde aketsha akambo efula wendana la Diolelo diaki Nzambi ndo la kɛnɛ kayodioyosala ndo oma l’etsha ande.

Ele nkumekanga kadiɔ? Nkumekanga ka Diolelo diaki Nzambi kɔsɔnama oma le anto, koko nde akasɔnama oma le Nzambi ndamɛ. Lo wetshelo ande, Yeso akɛnya dia nde mbakasɔnama oma le Nzambi dia ndjala Nkumekanga.

Yeso akeyaka dia prɔfɛsiya ya lo Bible yakatatshi dia Mɛsiya wakalakema akahombe ndjôlɛ lo Diolelo dia pondjo. (2 Samuele 7:12-14; Danyele 7:13, 14; Mateu 26:63, 64) Tôhɔ dia Yeso akate hwe dia nde mbaki Mɛsiya wakalakema. Ɔnkɔnɛ, Yeso aketawɔ dia nde mbele Nkumekanga kakasɔnama oma le Nzambi. (Joani 4:25, 26) Mbokɛmaka hwe lande na kakakambe Yeso mbala efula la tshɛkɛta “diulelu diami.”—Joani 18:36.

Lâdiko dia lâsɔ, Yeso aketsha ɔnɛ anto akina wayohomba mbolɛ kâmɛ la nde lo Diolelo. (Luka 22:28-30) Nde akelɛ anto asɔ wayotolɛ kâmɛ la nde ɔnɛ “limba la tshitshe” nɛ dia vɔ wekɔ anto yema tshitshɛ. Nde akate lo dikambo diawɔ ate: “Shenyu nangaka nyusha diulelu.” (Luka 12:32) Dibuku di’ekomelo dia lo Bible mɛnyaka dia wanɛ wayonga la diɛsɛ dia tôlɛ kâmɛ la Kristo wayonga anto 144 000.—Enyelo 5:9, 10; 14:1.

Lende ele Diolelo? Yeso akatɛ Pɔnsɔ Pilato ɔnɛ laki omboledi w’ose Rɔma ate: “Diulelu diami diaha dia la kete nye.” (Joani 18:36) Diolelo diaki Nzambi dialɔmbɔla Kristo hadiotolɛ lo tshimbo ya enyimpala w’anto. Yeso akate mbala ko mbala ɔnɛ Diolelo diaki Nzambi diekɔ “diulelu dia l’ulungu.”a (Mateu 4:17; 5:3, 10, 19, 20) Mbokɛmaka hwe dia Diolelo diaki Nzambi diekɔ lowandji la l’olongo.

Yeso akalongamɛka l’eshikikelo tshɛ dia nkalola l’olongo l’ekomelo ka nshi yakandahombe mbetsha la nkɛtɛ. Nde akate dia nde ‘ayotɔlɔngɔsɔla dihole,’ mbuta ate ayodihwɛ wanɛ wakahombe tôlɛ kâmɛ la nde mboka dia vɔ mboyela.—Joani 14:2, 3.

Kakɔna kayoyokotsha Diolelo? Yeso aketsha ampokami ande dia vɔ nɔmbaka Nzambi ɔnɛ: “Diulelu diaye diayi. Lulangu laye latshami la kete uku atshamalo l’ulungu.” (Mateu 6:9, 10) Lolango laki Nzambi lekɔ lo salema l’olongo. Diolelo diekɔ ehomɔ kayokamba la Nzambi dia nkotsha sangwelo diande lo dikambo dia nkɛtɛ. Dia nkotsha dikambo sɔ, Diolelo diayosala etshikitanu wa weke lo nkɛtɛ kɛnɛ.

Kakɔna kayoyosala Diolelo la nkɛtɛ? Yeso aketsha dia Diolelo diaki Nzambi diayoyonya akambo wa kɔlɔ lo minya atshi wa kɔlɔ. (Mateu 25:31-34, 46) Dia nsala dui sɔ, Nzambi ayonya awui wa kɔta mishiko ndo awui wa kɔlɔ tshɛ. Yeso aketsha dia nkɛtɛ kayololanɛ la akanga wa “memakana,” anto w’ɔlɔlɔ, anto wokana kɛtshi, wele la “etema wa pudipudi” ndo wadja wɔladi.—Mateu 5:5-9.

Onde akanga wa kɔlamelo asɔ wayɔsɛna lo nkɛtɛ kambolanyema? Ndooko! Yeso akalake dia etshikitanu wa diambo wayosalema la nkɛtɛ lo ɛlɔmbwɛlɔ ka Diolelo diaki Nzambi. Pami kakahanema suke la Yeso akawotɛ ate: “Jesu, kumbuho lam’ayuyukuma lu diulelu diaye.” Yeso akôkadimola ate: ‘Mɛtɛ kakotɛmi ɛlɔ nte: Wɛ ayonga la mi lo Paradiso.’ (Luka 23:42, 43) Eelo, Diolelo diaki Nzambi diayokadimola nkɛtɛ k’otondo paradiso kɔfɔnyi la kɛnɛ kaki lo ekambɔ ka Ɛdɛna.

Kakɔna nto kayoyosalɛ Diolelo anto? Lâdiko dia ndaka anto kɛnɛ kayowasalɛ Diolelo diaki Nzambi, Yeso akawaɛnya ndo kɛnɛ kayodioyosala. Yeso akakɔnɔla anto efula lo dihindo. Ɛkɔnwɛlɔ ɛsɔ waki didjidji dia kɛnɛ kayondoyosalɛ weho w’anto tshɛ lo Diolelo diande. Evanjiliɔ wakasambiyama mbutaka ɔnɛ: “Jesu akakindula la Ngalili tshe, aketshaka antu lu temwelo diawo, akasambishaka lukumu l’ololo la diulelu. Ndi akakonoyaka wehu tshe w’elandu la wehu tshe wa hemo waki la antu.”—Mateu 4:23.

Yeso akakɔnɔla weho wa hemɔ efula. Nde “akasenya ashu wa untu lakuto tshungu.” (Joani 9:1-7, 32, 33) Yeso akananda pami kakatataka hemɔ ka sudi ka kɔlɔ la ngandji tshɛ ko akɔkɔnɔla. (Mako 1:40-42) Etena kakawawela “kanga luhuki la dikukuma,” Yeso akɛnya dia nde kokaka nkɔnɔla “akanga a puki, ndu nteketshaka ndu akanga a nyumi.”—Mako 7:31-37.

Kânga nyɔi kokoka nshika ekolo la ntondo ka Nkumekanga kakasɔnama oma le Nzambi. Yeso akôlola anto lo waaso asato watɛkɛtama lo Bible. Nde akôlola ɔna ɛtɔi laki wadi aki odo, osekaseka waki la ɛnɔnyi 12 ndo ɔngɛnyi ande Lazaro.—Luka 7:11-15; 8:41-55; Joani 11:38-44.

Etena kakandatɛkɛtaka lo dikambo dia woho wayonga nshi yayaye ya ambolami wa Diolelo diaki Nzambi, Yeso akate lo tshimbo ya ɔpɔstɔlɔ Joani ate: “Enda, edjaselu ka [Nzambi] keko l’atei w’antu! Ndi ayudjase la wo, ku vo wayuyala antu andi. [Nzambi] ndame ayuyala la wo, ndu ayuyala [Nzambi k]awo. Ndi ayukitula asoi tshe lu ashu awo; nyoi hayuyala ntu, delu hadiuyuyala ntu, kuyanga ndjawi, kuyanga kandji. Akambu wa ntundu wambushila.” (Enyelo 1:1; 21:3, 4) Ohokanyiya yema dikambo di’andja wahatoyala la alelo, ndjawi, kandji ndo kânga nyɔi! L’etena kɛsɔ mbayokotshama tshɛ lo tshɛ dɔmbɛlɔ di’ɔnɛ lolango laki Nzambi latshame la nkɛtɛ oko watshamalɔ l’olongo.

Etena kakɔna kayoya Diolelo diaki Nzambi? Yeso akate dia nde ayotatɛ mbolɛ l’etena kakandelɛ ɔnɛ “wôngelo” ande. Yeso akasha prɔfɛsiya kele la awui efula dia mɛnya etena kakahombe wôngelo ande lo lowandji la Diolelo ntatɛ. L’etena kɛsɔ mbakahombe monga efukutanu wa l’andja w’otondo, ata, ndjala, adidimu wa nkɛtɛ, hemɔ ndo ohamelo wa ɛɔnywɛlɔ k’ɛlɛmbɛ. (Mateu 24:3, 7-12; Luka 21:10, 11) Tolembetelo tɔsɔ ndo tolembetelo tokina takatatshi Yeso tekɔ lo mɛnama djekoleko oma ko 1914, ɔnɔnyi wakalɔma Ta dia ntondo di’andja w’otondo. Kɛsɔ mɛnyaka dia Yeso ekɔ lo mbolɛ oko Nkumekanga. Kem’edja nto, Diolelo diaki Nzambi diayanga ndja ndo diɔ diayanga nsala dia lolango la Nzambi salema la nkɛtɛ.b

Oyelo wa Diolelo diaki Nzambi wayonga la kitshimudi yakɔna le yɛ? Kɛsɔ nemanɛka la woho wayoyetawɔ kana wayoyotona losango laki Yeso.

[Nɔtɛ ya l’ɛse ka dikatshi]