Woho wendanayɛ la losango laki Yeso Kristo

“Dimi lakayi dia antu ndjala la lumu, la dia vo ndjala la lo efula.”—JOANI 10:10.

ƆKƆKƆ woleki woke wakaye Yeso Kristo la nkɛtɛ ele dia ndjosha koko aha dia ndjolongola. Lo tshimbo y’olimu ande, nde akasha anto woshasha w’oshinga wolo, mbuta ate losango lakɛnyaka akambo wa mɛtɛ wendana la Nzambi ndo la lolango lande. Wanɛ wetawɔ losango lɔsɔ kokaka monga la lɔsɛnɔ la dimɛna oma ko kakianɛ oko wadiɛnya miliyɔ y’Akristo wa mɛtɛ.a Koko woshasha woleki tshɛ mbaki l’edia ka losango lakasambishaka Yeso, mbuta ate lɔsɛnɔ lande la kokele lakandakimɔ lo wahɔ aso. Panda kaso ka pondjo nemanɛka la woho wetawɔso kana watonaso woshasha woleki tshɛ ɔsɔ wele dui dioleki ohomba diendana la losango lande.

Kɛnɛ kakatosha Nzambi nde la Kristo Yeso akeyaka dia atunyi ande wayowodiaka nyɔi ka kandji. (Mateu 20:17-19) Koko l’ɛtɛkɛta ande waleka mbeyama wele lo Joani 3:16, nde akate ate: “[Nzambi] akalangi wa la kete utamanya, mbakandawasha On’andi etoi lakanduti, dia untu tshe lawetawo, tavokaki, keli ayali la lumu la pundju.” Lâdiko dia lâsɔ, Yeso akate dia nde akaye “dia mbakimwela lumu landi uku etshungwelu ka antu efula.” (Mateu 20:28, sho mbɛnganyisha alɛta ango.) Lande na kakate Yeso dia nde akaye dia mbisha lɔsɛnɔ lande lo dihole dia lɔ mbɔsama?

Lam’ele Nzambi akokaka anto ngandji k’otamanya, nde akasale kɛnɛ kahombama dia mbatshungola oma lo pɛkato k’ohowɔ la etombelo atɔ, mbuta ate oma lo eongelo kele kema kokele ndo oma lo nyɔi. Nzambi akasale dikambo sɔ lo ntoma Ɔnande ɛtɔi lakandote la nkɛtɛ dia nde ndjovɔ nyɔi k’olambo. Yeso akakitanyiya la lolango lande tshɛ ko akayokimɔ lɔsɛnɔ lande la kokele lo wahɔ aso. Olambo ɔsɔ welɛwɔ ɔnɛ tshungo mbele woshasha woleki woke wakasha Nzambi anto.b Woshasha ɔsɔ kokaka ntɔla otsha lo lɔsɛnɔ la pondjo.

Kɛnɛ kahombayɛ nsala Onde wɛ mbɔsaka tshungo oko woshasha ayɛ? Wɛmɛ mbahomba nkadimola dimbola sɔ. Ohɔsa dia onto ɔmɔtshi ambokɔlɛkɛ woshasha wɔmbami. Wɛ hatokondja woshasha ɔsɔ naka wɛ hakotshisha kɛnɛ kalɔmbama ndo hawolongodi. Woho akɔ wâmɛ mbele, Jehowa ekɔ lo kosha woshasha wa tshungo, koko woshasha ɔsɔ wayonga wayɛ paka naka wɛ nkotsha kɛnɛ kalɔmbama ndo mbolongola. Lo woho akɔna?

Yeso akate dia wanɛ ‘wele la mbetawɔ’ le nde mbayokondja lɔsɛnɔ la pondjo. Mbetawɔ nemanɛka la yoho ya lɔsɛnɔ yele la so. (Jakoba 2:26) Monga la mbetawɔ le Yeso nembetshiyaka nsɛna lo yoho yɔtɔnɛ l’akambo wakandetsha ndo wakandasale. Dia wɛ nsala ngasɔ, wɛ pombaka mbeya Yeso nde la She dimɛna. Yeso akate ate: “Lumu la pundju lone, eli dia nkêya, weme [Nzambi k]a mete, la Jesu Kristu lakayatumi.”—Joani 17:3.

Ambeta ɛnɔnyi oko 2 000 wele Yeso Kristo akasambisha losango lakatshikitanya nsɛnɔ ya miliyɔ y’anto wa l’andja w’otondo. Onde wɛ nangaka mbeya akambo akina lo kɛnɛ kendana la losango lɔsɔ ndo woho wakokayɛ wɛ la wakiyɛ wa ngandji nkondja wahɔ oma lɔkɔ aha paka kakianɛ, koko ndo pondjo pondjo? Ɛmɛnyi wa Jehowa wayɔngɛnangɛna dia kokimanyiya.

Asawo wayela wayokokimanyiya dia wɛ nyomeya Yeso Kristo, pami kakasambisha losango lakoka ntshikitanya lɔsɛnɔ la yɛ pondjo pondjo lo yoho ya dimɛna.

[Nɔtɛ ya l’ɛse ka dikatshi]