Ambola w’oma le ambadi aso . . .

Onde Akristo tshɛ wele la kɔlamelo mbayotshɔ l’olongo?

▪ Anto efula mbadiaka ɛtɛkɛta w’ekeketshelo waki Yeso ɛnɛ: “Ne dia [Nzambi] akalangi wa la kete utamanya, mbakandawasha On’andi etoi lakanduti, dia untu tshe lawetawo, tavokaki, keli ayali la lumu la pundju.” (Joani 3: 16) Onde Yeso akalange mbuta lâsɔ dia atɛmɔdi wa kɔlamelo tshɛ waki Jehowa Nzambi She, wayotshɔ l’olongo dia tɔsɛna pondjo dia monga l’ɔngɛnɔngɛnɔ wa mɛtɛ?

Tolembete nto ɛtɛkɛta waki Yeso ɛnɛ watshutshuya onto dia nkana yimba: “Nduku untu lakambela l’ulungu, paka lakahulo uma l’ulungu, On’a untu ndame.” (Joani 3: 13) Kɛsɔ mɛnyaka dia atɛmɔdi wa kɔlamelo wa lo nshi y’edjedja, ɛnyɛlɔ oko Nɔa, Abarahama, Mɔsɛ ndo Davidi kombudɛ l’olongo. (Etsha 2:34) Ko lende akawatshu vɔ tshɛ? Lo tshena pe, ekambi waki Nzambi wa kɔlamelo wakasɛnɛ lo nshi y’edjedja wekɔ lo waombo, mbuta ate lo djɔ ya nyɔi, haweye ndoko dikambo ndo wekɔ lo kongɛ eolwelo.—Undaki 9:5, 6; Etsha 24:15.

Yeso mbele onto la ntondo lakatɛkɛta dia anto amɔtshi wayotɔsɛna l’olongo l’ɔkɔngɔ wa nyɔi kawɔ. Nde akatɛ apɔstɔlɔ ande dia nde ayotshɔ l’olongo dia tâlɔngɔsɔlɛ dihole. (Joani 14:2, 3) Ɔsɔ aki dikambo di’oyoyo le ekambi waki Nzambi. Ɔpɔstɔlɔ Paulo akayolembetshiyaka l’ɔkɔngɔ wa nyɔi ka Yeso ndo wa eolwelo kande otsha l’olongo, dia Yeso ‘akadiholɛ ambeki ande mboka k’oyoyo’ k’otsha lo lɔsɛnɔ, mboka kele ndoko onto lakadjɛ lɔkɔ la ntondo ka nde ndja la nkɛtɛ.—Heberu 10:19, 20.

Onde kɛsɔ nembetshiyaka ɔnɛ ekambi waki Nzambi wa kɔlamelo tshɛ mbayotshɔ l’olongo? Ndoko, nɛ dia eolwelo k’otsha lo lɔsɛnɔ la l’olongo ekɔ oko ɔkɛndɛ ɔmɔtshi wele paka anto amɔtshi ato mbashawɔ. L’otsho w’ekomelo wakawetsha kâmɛ, Yeso akatɛ apɔstɔlɔ ande dia vɔ “[wa]yudjase lu kiti ya diulelu” lo Diolelo diande dia l’olongo. Ɔnkɔnɛ, vɔ wekɔ l’ɔkɛndɛ wa tolɛ kâmɛ la Yeso l’olongo.—Luka 22:28-30.

Lâdiko di’apɔstɔlɔ, anto akina nto wayolongola ɔkɛndɛ wa lânde ɔsɔ. L’ɛnɛlɔ kɛmɔtshi, ɔpɔstɔlɔ Joani akɛnyi Yeso nde l’olui w’anto wakolɔ wele l’olongo wolembetshiyami oko ‘Diolelo ndo ɛlɔmbɛdi wayolɛ lâdiko dia nkɛtɛ.’ (Enyelo 3:21; 5:10) Anto angana wakenga lofulo lɔsɔ? Oko wasalemadiɔ lo lowandji tshɛ, paka anto yema tshitshɛ tsho mbalɔmbɔla. Ngasɔ mbediɔ ndo lo Diolelo dia l’olongo. Yeso, Ɔna-Ɔkɔkɔ a Nzambi, ayolɛ kâmɛ l’anto 144 000 “wakasumbama uma l’atei w’antu.”—Enyelo 14:1, 4, 5.

Lo mɛtɛ, anto 144 000 wekɔ djui ya tshitshɛ lo mbɛdika l’ekambi wa kɔlamelo waki Nzambi wa lo nshi yakete ndo wa lo nshi nyɛ. Koko, dui sɔ mbokɛmaka nɛ dia anto 144 000 mbolɔka dia ntshɔ otsha l’olongo l’ɔtɛ w’ɔkɛndɛ ɔmɔtshi wa lânde. Naka wɛ ekɔ lo nanga mbika luudu, onde wɛ ayelɛ anto tshɛ weya mbika mvudu wa lo ngelo kanyu? Ndoko, nɛ dia wɛ ayelɛ paka lofulo l’anto lɛdimi l’olimu wele la yɛ. Woho akɔ wâmɛ mbele, aha ekambi waki Nzambi wa kɔlamelo tshɛ mbakasɔnama oma le nde dia nkondja diɛsɛ sɔ dia lânde dia tôlɛ kâmɛ la Yeso l’olongo.

Ɛlɔmbwɛlɔ kɛsɔ ka l’olongo kayokotsha sangwelo diaki Nzambi di’oma l’etatelo diendana la nkɛtɛ. Yeso nde la anto 144 000 wayolɛ kâmɛ la nde wayokadimola nkɛtɛ k’otondo paradiso, lɛnɛ ayɔsɛna ekambi waki Nzambi wa kɔlamelo waheyama mbadia l’ɔngɛnɔngɛnɔ wa pondjo. (Isaya 45:18; Enyelo 21:3, 4) L’atei w’anto asɔ mbele ndo wanɛ wele lo yimba yaki Nzambi, wayolwama.—Joani 5:28, 29.

Atɛmɔdi tshɛ wa kɔlamelo waki Jehowa wa lo nshi y’edjedja ndo wa lo nshi nyɛ, wayolongola woshasha wa diambo efula wa lɔsɛnɔ la pondjo. (Romo 6:23) Djui ya tshitshɛ y’anto wayonga la lɔsɛnɔ la lânde l’olongo ndo olui a woke w’anto wayokondja lɔsɛnɔ lo paradiso ka lo nkɛtɛ k’otondo.