Etshama oma l’ɔtɛkɛta wa Nzambi

Ngande wakoka nkumbo kayɛ monga l’ɔngɛnɔngɛnɔ?

Sawo nɛ diekɔ la ambola wele ondo wɛ amboyaokaka ndo mɛnyaka lɛnɛ akokayɛ ntana ekadimwelo lo Bible kayɛ. Ɛmɛnyi wa Jehowa wayonga suke dia nkɛtshanya la yɛ ekadimwelo ɛsɔ.

1. Lande na kele diwala diekɔ ohomba dia monga la lɔsɛnɔ la nkumbo l’ɔngɛnɔngɛnɔ?

Jehowa Nzambi k’ɔngɛnɔngɛnɔ mbele kiɔkɔ ya diwala. Diɔ diekɔ ohomba efula dia nkumbo monga l’ɔngɛnɔngɛnɔ nɛ dia lâdiko dia diɔ nkimanyiya di’anto mbɔtɔ lɔngɛnyi, diɔ diekɔ dihole dia dimɛna diahomba ana mbodiama. Ngande wɔsa Nzambi diwala? Nde kombolaka dia diɔ ntshikala pondjo ndo pami la womoto ntshukana lo ndjela ɛlɛmbɛ wa lɛɛta. (Luka 2:1-5) Nzambi nangaka dia wadi l’omi monga la kɔlamelo lam’asawɔ. (Heberu 13:4) Jehowa mbetawɔka di’Akristo ndjaka diwala ko ndjotshukana nto paka naka olonganyi ɔmɔtshi ambosala loseka.—Adia Mateu 19:3-6, 9.

2. Ngande wahomba wadi l’omi salanɛ akambo lam’asawɔ?

Jehowa akatonge apami la wamato dia vɔ nkamba kâmɛ dia nkotsha ɛkɛndɛ awɔ wa lo diwala. (Etatelu 2:18) Oko wende ɔtɛ wa nkumbo, pami pombaka nkotsha ehomba wa l’emunyi wa nkumbo kande ndo mbaetsha akambo wendana la Nzambi. Nde pombaka monga la ngandji ka ndjahombia otsha le wadɛnde. Wadi l’omi pombaka mbokana ngandji ndo nɛmiyana lam’asawɔ. Lam’ele wadi l’omi kema kokele, mbeka dia nyimanyiyana ekɔ dui di’ohomba diakimanyiya atshukanyi dia vɔ monga l’ɔngɛnɔngɛnɔ lo diwala diawɔ.—Adia Efeso 4:31, 32; 5:22-25, 33; 1 Petero 3:7.

3. Onde wɛ pombaka nsɛka olonganyi ayɛ naka wɛ bu l’ɔngɛnɔngɛnɔ lo diwala?

Naka wɛ l’olonganyi ayɛ nyekɔ l’ekakatanu, kete nyosalanɛke akambo la ngandji. (1 Koreto 13:4, 5) Ɔtɛkɛta wa Nzambi hadjangɛ atshukanyi dia vɔ nkakitɔna dia nkandola ekakatanu wa lo diwala. Koko, la ntondo k’akambo amɔtshi wamboleka wolo, Okristo kokaka mbɔsa yɛdikɔ ya nkakitɔna l’olonganyi ande kana bu.—Adia 1 Koreto 7:10-13.

4. Ana le, kakɔna kanyokombolɛ Nzambi?

Jehowa kombolaka dia nyu monga l’ɔngɛnɔngɛnɔ. Nde nyoshaka alako w’amɛna wɛnya woho wakokanyu monga l’ɔngɛnɔngɛnɔ lo nshi yanyu y’akɛnda. Nde kombolaka dia nyu nkondja wahɔ oma lo lomba ndo diewo diele l’ambutshi anyu. (Kolosai 3:20) Jehowa ngɛnangɛnaka etena kakitanyiyanyu ambutshi anyu dia mbôtombola.—Adia Undaki 11:9–12:1; Mateu 19:13-15; 21:15, 16.

5. Ambutshi le, akokanyu nsala dia ananyu monga l’ɔngɛnɔngɛnɔ?

Nyu pombaka nsala la wolo tshɛ dia kondjɛ ananyu mbo ya ndɛ, luudu ndo ahɔndɔ. (1 Timote 5:8) Koko, di’ananyu monga l’ɔngɛnɔngɛnɔ, nyu pombaka nto mbaetsha dia vɔ mboka Nzambi ngandji ndo mbetshama oma le nde. (Efeso 6:4) Ɛnyɛlɔ kashanyu lo woho wokanyu Nzambi ngandji kokaka monga la shɛngiya ya wolo le ananyu. Naka alako anyu mbɔsama oma l’Ɔtɛkɛta wa Nzambi, kete vɔ kokaka ndowanya timba t’ananyu lo yoho ya dimɛna.—Adia Euhwelu k’Elembe 6:4-7; Tukedi 22:6.

Ana kondjaka wahɔ etena kâkeketshanyu ndo kawândolanyu. Ndo nto, vɔ wekɔ l’ohomba wa engwelo ndo ohokwelo. Ohokwelo wa ngasɔ mbakokɛka oma lo ditshelo diakoka mbashishɛ ɔngɛnɔngɛnɔ. (Tukedi 22:15) Ɔnkɔnɛ ohokwelo hahombe pondjo mbishama la ngala kana l’esehe.—Adia Kolosai 3:21.

Ɛmɛnyi wa Jehowa wambotondja abuku wele l’oyango wa lânde wa nkimanyiya ambutshi l’ana. Awui w’oma l’abuku asɔ ntomba oma lo Bible.—Adia Osambu 19:7, 11.

Dia mbeya awui akina, enda tshapita 14 ya dibuku nɛ, Bible etshatɔ mɛtɛ? diakatondjama oma le Ɛmɛnyi wa Jehowa.