Onde okadimwelo wa dimbola sɔ wekɔ ohomba?

“Lam’akimi l’ɛnɔnyi dikumi, lakatatɛ ntomba l’ana w’apami. L’etatelo, takakimanɛka tsho l’anya ndo mbishana bizɛ. Koko kombeta edja, takatatɛ minandana lo tenyi dia demba dia sɔnyi ndo takayoyashaka lo toho ta dieyanelo totshikitanyi. Lam’akimi l’ɛnɔnyi 15, lakatatɛ nkamba olimu ndo lakatatɛ nsawola l’apami wa l’olimu wakakombolaka dia sho mbeyana. Lakalangaka monga la dihonga ndo nsala kɛnɛ tshɛ kakasalaka asekami wa l’olimu. Lakakombola dia asekami mbetawɔmi ndo dui sɔ diakayokonyaka dia dimi ndjasha efula l’awui wa dieyanelo.”—SARAH,a AUSTRALIE.

ONDE wɛ ayâmba dia mbeya ɔnɛ Sarah akôdiama lo nkumbo kakayashaka l’awui w’ɔtɛmwɛlɔ? Ambutshi ande wakasale la wolo dia mbôdia lo yoho yɔtɔnɛ l’atɔndɔ wa lo Bible wendana la lɔkɛwɔ. Koko, Sarah akasale akambo lo yoho yotshikitanyi.

Anto efula mbetawɔka ɔsɔnwɛlɔ wakasale Sarah. Vɔ fɔnyaka dia kɛnɛ kata Bible lo kɛnɛ kendana l’awui wa dieyanelo kambeta loowe. Akina mbɔsaka dia ndoko kɔlɔ ndjasha l’awui w’ɔtɛmwɛlɔ ndo l’awui wa dieyanelo lo nsɛnɔ yawɔ.

Onde ekɔ ohomba dia wɛ mbeya ndo nsɛna lo yoho yɔtɔnɛ la kɛnɛ ketsha Bible lo kɛnɛ kendana l’awui wa dieyanelo? Bible mbutaka dia tɔ ‘kakasambiyama oma le Nzambi ndo kekɔ ɔlɔlɔ mbetsha anto.’ (2 Timote 3:16) Naka wɛ mbetawɔka ɔnɛ Nzambi mbakatonge anto ndo ɔnɛ Bible ekɔ Ɔtɛkɛta ande wakasambiyama, kete ekɔ dimɛna sho mbeya kɛnɛ katatɔ lo dikambo sɔ.

Lonyangu ko, anto efula wekɔ la tokanyi toshikitanyi lo kɛnɛ ketsha Bible lo dikambo di’awui wa dieyanelo. Ewandji w’ɛtɛmwɛlɔ wasɛma ɔnɛ vɔ nɛmiyaka Bible keketshaka tokanyi talɔshana lam’asatɔ lo kɛnɛ kendana l’awui wa dieyanelo. Lo mɛtɛ, dikambo sɔ diambokakitola ɛtɛmwɛlɔ efula wetawɔma le anto efula.

Lo dihole dia sho ndjaɛkɛ lo kɛnɛ kata anto akina, bonde kahayatshungwɛ etena dia nsɛdingola dikambo nɛ? Asawo wayela sɛdingolaka ambola dikumi wayaoka anto lo kɛnɛ kata Bible lo dikambo di’awui wa dieyanelo. Wɛ ayɛna ekadimwelo wokɛma hwe wɛnya kɛnɛ ketsha Bible lo dikambo sɔ. Sawo di’ekomelo diayɛnya lande na kele ɔsɔnwɛlɔ aso wekɔ ohomba efula.

[Nɔte ka l’ɛse ka dikatshi]