“Nzambi nangaka onto lakimɔ l’ɔngɛnɔngɛnɔ”

Oko le yɛ, woho akɔna wa woshasha wakokayɛ ndeka ngɛnangɛna? Aha la taamu, efula ka l’atei aso wayɔngɛnangɛna nongola woshasha oma le onto lawashawɔ la ngandji koko aha lotshutshuya. Diakɔ diele, eyango watshutshuya onto dia nkimɔ woshasha wekɔ ohomba efula. Ngasɔ mbahombadiɔ monga ndo le so djekoleko etena kashaso Nzambi weshasha. Ɛsɔ tɔsɛdingole ɛtɛkɛta waki ɔpɔstɔlɔ Pɔɔlɔ wele lo 2 Kɔrɛtɔ 9:7.

Lande na kakafunde Pɔɔlɔ ɛtɛkɛta ɛsɔ? Nde akalange nkeketsha Akristo wa la Kɔrɛtɔ dia vɔ nsukɛ asekawɔ ambetawudi waki lo dihombo la Judeya. Onde nde akadjangɛ ase Kɔrɛtɔ dia vɔ nkimɔ weshasha? Ndooko, koko nde akawafundɛ ate: “Onto l’onto akimɔ oko wakandashikikɛ l’otema ande, aha la lonyangu kana lotshutshuya, nɛ dia Nzambi nangaka onto lakimɔ l’ɔngɛnɔngɛnɔ.” Ɛsɔ tɔsɛdingole ɔhɛmwɛlɔ ɔsɔ dimɛna dimɛna.

“Oko wakandashikikɛ l’otema ande.” Ɔpɔstɔlɔ Pɔɔlɔ akate dia Okristo wa mɛtɛ kimɔka woshasha nɛ dia nde akatashikike “l’otema ande” dia nsala dui sɔ. Lo tena dimɔtshi, Okristo ndjakiyanyaka efula di’ehomba w’asekande ambetawudi. Nomb’ewo kɛmɔtshi mbutaka ɔnɛ tshɛkɛta ya lo Grɛkɛ yokadimɔmi ɔnɛ “wakandashikikɛ” nembetshiyaka “tayalɔngɔsɔdi la ntondo.” Mbokɛmaka dia etena keya Okristo dia asekande ambetawudi wekɔ lo dihombo, nde ndjambolaka dia mbeya woho wakokande mbakimanyiya.​—1 Joani 3:17.

“Aha la lonyangu kana lotshutshuya.” Pɔɔlɔ akɛnya weho ehende wa weshasha wahomba Akristo wa mɛtɛ mbewɔ, mbuta ate woshasha wa la lonyangu ndo wa lotshutshuya. Etelo ka lo Grɛkɛ kokadimɔmi ɔnɛ “aha la lonyangu” nembetshiyaka tshɛkɛta lo tshɛkɛta ɔnɛ “aha la okiyanu.” Dibuku dimɔtshi mbutaka dia “onto lakimɔ woshasha la lonyangu kana lotshutshuya kimɔka l’etema ehende ndo mongaka la lonyangu lo woho wamondokimɔ.” Onto latshutshuyawɔ dia nkimɔ woshasha salaka dui sɔ nɛ dia wambowotshutshuya. Akɔna latei aso mɛtɛ akoka nongola woshasha oma le onto lawoshawɔ la lonyangu kana lotshutshuyishawɔ?

“Nzambi nangaka onto lakimɔ l’ɔngɛnɔngɛnɔ.” Pɔɔlɔ mbutaka ɔnɛ etena kɔsa Okristo yɛdikɔ ya nkimɔ woshasha, nde pombaka nsala dui sɔ l’ɔngɛnɔngɛnɔ tshɛ. Ɔngɛnɔngɛnɔ ɔsɔ ndjaka etena kakimɔso woshasha la eyango w’amɛna. (Etsha 20:35) Naka onto nkimɔ woshasha l’ɔngɛnɔngɛnɔ kete dui sɔ diayɛnama ndo le anto akina. Mbokɛmaka dia “ɔngɛnɔngɛnɔ” ɔsɔ koka mɛnama lo woshɛshɛ ndo lo yoho yɛnama le onto lokimwe woshasha. Onto latosha woshasha l’ɔngɛnɔngɛnɔ munandaka otema aso ndo dui sɔ salanganyaka otema wa Jehowa. Ekadimwelo kekina ka Bible (Contemporary English Version) mbutaka ɔnɛ: “Nzambi nangaka anto walanga nkimɔ weshasha.”

Ɛtɛkɛta wakasambiyama ɛsɔ wekɔ tshondo ya tɔndɔ le Akristo lo kɛnɛ kendana la woho wa nkimɔ weshasha. Oyadi tekɔ lo nkimɔ wenya aso, wolo aso kana diangɔ diaso, nyɛsɔ tosalake dui sɔ la lolango laso nɛ dia sho kondjaka ɔngɛnɔngɛnɔ w’efula lo nkimanyiya anto akina djekoleko wanɛ wele lo dihombo. Etena kakimɔso l’ɔngɛnɔngɛnɔ sho mongaka l’ɔlɔ ndo mbetawɔmaka le Nzambi nɛ dia nde “nangaka onto lakimɔ l’ɔngɛnɔngɛnɔ.”