EKADIMWELO LO AMBOLA W’OMA LO BIBLE
L’oyango akɔna wayokalola Kristo?
La ntondo ka Yeso Kristo mbudɛ l’olongo lo 33 T.D., nde akalake ambeki ande dia nde ayokalola. Nde akayaɛdika la pami kɛmɔtshi ka lokumu kaki suke la minda lɔkɛndɔ otsha lo wodja ɔmɔtshi l’etena k’otale ndo lakakalola ele la wolo wa mbolɛ oko nkumekanga. Yeso ayokalola l’oyango wa mbela anto ɛlɔmbwɛlɔ ka dimɛna.—Adia Luka 19:11, 12.
Yeso ayela anto ɛlɔmbwɛlɔ ka dimɛna
Kristo ayokaola la demba diakɔna? Nde akolwama la demba dia lo nyuma diahɛnama. (1 Petero 3:18) Oma laasɔ, nde akadɛ lolongo ndo akatodjasɛ lo lonya l’omi la Nzambi. (Osambu 110:1) L’ɔkɔngɔ wa nshi efula Yeso akatɛnama la ntondo ka Jehowa Nzambi, lele “Tangu Andja” ko nde akawosha lowandji laadiko di’anto tshɛ. Diakɔ diele, Yeso ayokalola aha oko onto, koko oko Nkumekanga kahɛnama.—Adia Danyele 7:13, 14.
Kakɔna kayoyosala Yeso etena kayondoya?
Etena kayoya Yeso nde la andjelo ande lo yoho yahɛnama, nde ayolombosha anto. Nde ayolanya anto wa kɔlɔ ndo ayosha wanɛ wawetawɔ oko Nkumekanga lɔsɛnɔ la pondjo.—Adia Mateo 25:31-33, 46.
Etena kayɔlɔmbɔla Yeso oko Nkumekanga, nkɛtɛ kayokadimɔ paradiso. Nde ayolola wanɛ wakavu dia vɔ ndjɔngɛnangɛna la lɔsɛnɔ lo Paradiso ka la nkɛtɛ.—Adia Luka 23:42, 43.