Akambo wa kɔlɔ wambofulanɛ

Smita,a womoto laki l’ɛnɔnyi 35 lakadjasɛka l’osomba wa Dacca, Bangladesh akeyamaka oko onto lokana ngandji ndo lakokɛ anto. Anto wakaweyaka oko womoto lakakambaka olimu efula, laki l’ɔngɛnɔngɛnɔ ndo lakakombolaka nkimanyiya anto akina dia mbeya kɛnɛ kakandeke lo dikambo dia Nzambi. Ande woho wakanyange ase nkumbo ndo angɛnyi ande, etena kakandama Smita la hemɔ ka shashimoya ndo kakandavu lo lomingu ɔtɔi lee!

James nde la wadɛnde wambotshukana l’edja k’ɛnɔnyi 30 l’ɛmɔtshi, waki la lokumu lele oko laki Smita. Lo eleko kamɔnga akatshi, vɔ wakatshu tenda angɛnyi awɔ lo lɛkɛ la owɛstɛ ka l’États-Unis. Koko, vɔ kokalola lakawɔ la New York. Etena kakiwɔ lo lɔkɛndɔ, vɔ wakasale aksida wa wolo la mutuka ndo wakatshike wakiwɔ wa ngandji ndo asekawɔ wa l’olimu l’ɔkɛyi w’efula.

Mbokɛmaka mɛtɛ di’asui ndo awui wa kɔlɔ wambofulanɛ ɛlɔ kɛnɛ. Ata wekɔ lo ndjaka anto k’anto ndo asɔlayi. Awui w’esehe ndo wa ngala komɛka anto waha l’onongo. Aksida wakonya polo lo nyɔi ndo hemɔ ya wolo mindaka woho w’onto tshɛ oyadi ɛnɔnyi kana dihole diele la nde lo tshunda. Mpokoso y’oma lo diangɔ diakatongama komɛka weho w’anto tshɛ. Awui wa kananɛ kɔlɔ ndo wa wɛngiya wambokokanɛ. Ondo wɛ ambodiɛnɛka l’asui.

Bu kɔlɔ ndjaoka ambola wele oko anɛ:

• Lande na kele akambo wa kɔlɔ komɛka anto w’ɛlɔlɔ?

• Onde Nzambi mbahombaso mɛndja onongo w’akambo wa kɔlɔ?

• Onde mpokoso yatokomɛ tombaka otombatomba, ko kana onto ɔmɔtshi mbele lo kiɔkɔ yayɔ?

• Onde Karma, mbuta ate etombelo w’oma l’akambo wakasale onto lo nshi y’edjedja, mbele lo kiɔkɔ y’asui w’onto?

• Naka Nzambi Kanga-Wolo-Tshɛ ekɔ, lande na kahandakokɛ anto w’ɛlɔlɔ oma l’akambo wa kɔlɔ?

• Onde lushi lɔmɔtshi anto wokonga ko hawoyodiɛnɛ l’akambo wa kɔlɔ ndo l’asui?

Dia nkondja okadimwelo lo ambola asɔ, sho pombaka takondjisha ekadimwelo wa ambola ahende anɛ: Lande na kele akambo wa kɔlɔ komɛka anto tshɛ, ndo kakɔna kayosala Nzambi?