ƆKƆNDƆ WA LƆSƐNƆ
Lakashola ɛngɔ ka nɛmɔ koleki lokumu
L’otsho ɔmɔtshi lo 1984, lɔsɛnɔ lami lakatshikitana oma lo monga osekaseka w’ɛnɔnyi dikumi l’ɛmɔtshi ko lakakome onto la lokumu efula. Lakalongola dɛmbɔ dia koso oko Miss ka la Hong Kong. Foto kami kaki laadiko w’ekanda ndo lo tojurnalɛ. Lakembaka esambo, lakanɔka nkombe, lakashaka asawo, lakelamɛka lo waa emisiɔ wa televiziɔ, lakalɔtaka ahɔndɔ wa lokumu ndo lakatombaka kaamɛ l’ɛnɛnɛ wa weke, ɛnyɛlɔ oko nguvɛrnɛrɛ ka la Hong Kong.
Ɔnɔnyi wakayelana, lakatatɛ nkɛnya lo waa filmɛ ndo mbala efula laki la ɔkɛndɛ woleki woke. Tojurnalistɛ wakalangaka mbeya ɔkɔndɔ ami, amindji wa foto wakalangaka mundami foto ndo anto wakalangaka dia dimi monga l’atei w’anto wa ntondo, dia monga lo waa selemɔnyi y’osapwelo, ndo dia dimi monga lo waa fɛtɛ. Lakongaka nshi tshɛ onto lakotola yambalo y’anto.
Lo filmɛ ka wɔma
Koko yema yema, lakayoshola dia awui asɔ tshɛ komonga amɛna oko akamafɔnyaka. Lakakambe efula lo waa filmɛ ya wɔma ndo dui sɔ diaki waale. Akɛnyi wa la Hong Kong kokambaka la akɛnyi ahende ahende wanɛ wakakokaka ndjɔhɛna akɛnyi akina oko akasalemaka la Hollywood, diakɔ diele dimɛ lakɛnya diewo diami hita lo nsala awui wa diambo dia nkotola yambalo y’anto, ɛnyɛlɔ lo mbahema la mututu laadiko wa mutuka. Filmɛ efula yakamanyanyemaka lɔkɔ yakikɔ l’awui wa mindo ndo wa ngala. Filmɛ mɔtshi yaki l’awui w’ɛdiɛngɛ.
Lo 1995, lakatshukama l’onto lakatondjaka waa filmɛ. Kaanga mbele akɛnamaka dia laki la oseka ɛngɔ tshɛ kakakokaka mbishami ɔngɛnɔngɛnɔ, mbuta ate lokumu, ɔngɔnyi ndo omi la ngandji, dimi komonga l’ɔngɛnɔngɛnɔ ndo laki ɔkɛtshi oto. Lakɔshi yɛdikɔ ya ntshika nkɛnya lo waa filmɛ.
LAKOHƆ MBETAWƆ KAKI LA MI OMA KO DIKƐNDA
Lakatatɛ mbohɔ la ngandji tshɛ mbetawɔ kaki la mi etena kakimi dikɛnda. Lo nshi shɔ, Lushi la samalo tshɛ dimi la enondo ami la womoto takatshɔka tembola nkumbo kɛmɔtshi k’Ɛmɛnyi wa Jehowa. Papa Joe McGrath, akekaka Bible la so kaamɛ la anande asato wa wamato. Nkumbo kawɔ kakikɔ l’osalosalo ndo la ngandji ndo “nyɔmi pami Joe” akasalɛka wadɛnde ndo anande akambo la dilɛmiɛlɔ. Lakangɛnangɛnaka ntshɔ la wɔ lo nsanganya y’Akristo. Tena dimɔtshi, takatshɔka lo nsanganya ya weke. Ɔsɔ aki ntena di’ɔngɛnɔngɛnɔ. Lakayaokaka lo ekokelo etena kakimi kaamɛ l’Ɛmɛnyi wa Jehowa.
Koko, lakahomanaka l’awui wa kɔlɔ efula la ngelo kaso. Yoho yaki papa ya nsɛna yakashaka mama lɔkɔnyɔ efula ndo mama akayɔkɔmɔ woho w’anyanya. Etena kakimi suke la nkotsha ɛnɔnyi dikumi, mama akatshike nsangana kaamɛ la Ɛmɛnyi wa Jehowa. Koko dimi lakatetemala ndjasha l’etema ehende ndo lakabatizama la ɛnɔnyi 17. Koko, yema tshitshɛ l’ɔkɔngɔ lakayoyasha lo lɔkɛwɔ la mindo lahahombe Akristo monga la lɔ ndo dimi kondjonga ose etshumanelo nto.
LAKƆSHI YƐDIKƆ YA NKALOLA
Yema tshitshɛ l’ɔkɔngɔ wa diwala diami, dikumanyi pende di’oma lo etshumanelo k’Ɛmɛnyi wa Jehowa dia lo ngelo kakiso wakaye ndjomenda. Wakambitɛ woho wakamakoke kalolɛ Jehowa Nzambi ndo wakakongɛ dia Cindy laki misiɔnɛrɛ ndjaka ndjokimanyiyaka. Oma lo etena kɛsɔ, lakashisha mbetawɔ kami efula, diakɔ diakamawotɛ dia nde mɛnyami dia Bible ekɔ mɛtɛ Ɔtɛkɛta wa Nzambi. Nde akamɛnya bɛnyɛlɔ dia prɔfɛsiya ya lo Bible yakakotshama. Yema yema, takayokoma angɛnyi w’eshika ndo nde akanɔmbɛ dia mbeka la mi wetshelo w’etatelo wa lo Bible. Dimi laketawɔ. Etena kɛsɔ mbakameye mbala ka ntondo dia Jehowa ekɔ Nzambi ka ngandji lalanga dia dimi monga l’ɔngɛnɔngɛnɔ.
Etena kakamatatɛ ntshɔ lo nsanganya y’Akristo nto, lakangɛnangɛna monga la lɔngɛnyi kaamɛ l’Ɛmɛnyi wa Jehowa oleki monga la lɔngɛnyi l’anto wakasalaka la mi waa filmɛ. Koko, awui amɔtshi wa lo nshi yami ya dikɛnda wakatshutshuyaka dia dimi mboka dia takamakoke ndjaɛkɛ le onto ndo dimɛ kondjaɔsaka la nɛmɔ. Ose etshumanelo ɔmɔtshi akankimanyiya etena kakandamɛnya oma lo Bible woho wa ndɔshana la ekakatanu wa lo yimba ɛsɔ ndo lakeke woho wa monga la angɛnyi w’eshika.
ƐNGƆ KA NƐMƆ KOLEKI LOKUMU
Lo 1997, dimi la omɛmi takonɔ la Hollywood, Californie, lo États-Unis. Lɛkɔ, lakatoyashaka efula dia nkimanyiya anto dia vɔ nkondja wahɔ oma lo lomba lele l’Ɔtɛkɛta wa Nzambi. Mbetsha Bible akambisha ɔngɛnɔngɛnɔ w’efula oleki lokumu laki la mi lo nkɛnya ndo lo nsala waa filmɛ. Ɛnyɛlɔ lo 2002, lakahomana la Cheri ɔnɛ lakeyanaka la mi ntondo la Hong Kong. Awui efula wa lo nsɛnɔ yaso wakafɔnaka. Nde aki Miss ka la Hong Kong ɔnɔnyi ɔtɔi la ntondo ka dimi monga. Etena kakamakondja titrɛ kɛsɔ, nde mbaaki onto lakambahɛ dɛmbɔ dia nkoso dia Miss. Ndo nto, nde akayotatɛ nkɛnya lo waa filmɛ ndo oma laasɔ, nde akayotatɛ ndjitondja akamba kaamɛ la ɛnɔmbɔdi wa lokumu. Nde lawɔ akayonɔka la Hollywood.
Otema ami wakanandema efula etena kakamoke ɔnɛ Cheri amboshisha omambedi ande lakandama la hemɔ ka lo doyi ka la shashimoya. Nde kotana ndooko esambelo oma lo ɔtɛmwɛlɔ wa Buda. L’ɛnyɛlɔ kami, nde aki onto la lokumu diakɔ diele anto akina wakɔɔkɔmiyaka, koko nde aki la lɔkɔnyɔ ndo kokoka ndjaɛkɛ le onto. Lakatatɛ nkahana la nde kɛnɛ kakameke oma lo Bible, koko awui wa lo ɔtɛmwɛlɔ wa Buda lɛnɛ akinde wakookaloyaka ɛkɔngɔkɔngɔ diaha nde monga la lowando lo dui sɔ.
Cheri y’ɔngɛnyi ami lo filmɛ
Lushi lɔmɔtshi lo 2003, Cheri akambelɛ oma la Vancouver, la Canada lɛnɛ akandatshu tosala filmɛ. L’ɔngɛnɔngɛnɔ tshɛ, nde akambitɛ dia nde akatembolaka shamba mɔtshi ndo la shashimoya nde akatatɛ nɔmba la dui dia wolo ate: “Ombitɛ, ele Nzambi ka mɛtɛ? Naa lokombo layɛ?” L’etena kɛsɔ, nde akatetaka suke la Mbalasa ka Diolelo ndo akɛnyi lokombo Jehowa. Nde akashihodia dia ɔsɔ aki okadimwelo w’oma le Nzambi ndo nde akalange mɛnana la Ɛmɛnyi wa Jehowa aha la ntshimbatshimba. Lakasale ekongelo ndo l’ɔkɔngɔ wa nshi ngana, nde akatshu lo losanganya lo etshumanelo ka l’ɔtɛkɛta wa chinois la Vancouver.
Cheri akayombitɛka ate: “Anto asɔ wakayasha l’otema ɔtɔi le mi. Lakakoke mbatɛ woho wakamayaokaka.” Lakangɛnangɛna efula dia mboka dui sɔ nɛ dia etena kakayashaka Cheri lo awui wa waa filmɛ, nde komonga l’angɛnyi. Cheri akatetemala ntshɔ lo nsanganya. Koko lo 2005, nde akasinya kɔtra dia ntondja filmɛ hiende y’etale la Chine, kɛsɔ mbakayosala dia nde nkalola la Hong Kong. L’ɔngɛnɔngɛnɔ tshɛ lo 2006, Cheri akakimɔ lɔsɛnɔ lande le Jehowa ndo akabatizama lo Losanganya l’Ɛmɛnyi wa Jehowa la Hong Kong. Kaanga mbele nde akalangaka kambɛ Jehowa efula, olimu ande w’awui wa filmɛ aketɛka akambo wolo efula le nde, ndo nde komonga la ɔngɛnɔngɛnɔ.
ƆNGƐNƆNGƐNƆ WA NKIMANYIYA ANTO AKINA
Lo 2009, lɔsɛnɔ laki Cheri l’otondo lakatshikitana. Nde akɔshi yɛdikɔ ya ntshika olimu wa salaka filmɛ l’oyango wa kambɛ Jehowa lo tena tshɛ. Nde akayonga l’angɛnyi w’eyoyo efula l’etshumanelo k’Akristo. Nde akayokoma osambisha wa lo tena tshɛ wa lokumu l’ɔlɔlɔ la Diolelo ndo nde mɛtɛ akɛnyi dia nkimanyiya anto akina mbele yoho ya lɔsɛnɔ yoleki dimɛna.—Mateo 24:14.
Oma laasɔ, Cheri akɔshi yɛdikɔ ya mbeka ɔtɛkɛta wa népalais dia nsukɛ olui wakayahamaka w’Ɛmɛnyi wa Jehowa wa l’ɔtɛkɛta wa népalais la Hong Kong. Dimi pombaka nyotɛ dia waa Népalais efula wa la Hong Kong mbɔsamaka oko anto w’anyanya ndo vɔ petshamaka nɛ dia vɔ tɛkɛtaka Angɛlɛ kana chinois yema tshitshɛ ndo nɛ dia wekɔ la mbekelo yotshikitanyi. Cheri akambitɛ dia nde ngɛnangɛnaka efula nkimanyiya anto asɔ dia vɔ mbeya Bible. Ɛnyɛlɔ, lushi lɔmɔtshi etena kakandatasambishaka lo luudu la luudu, nde akahomana la womoto ɔmɔtshi l’ose Népal lakeyaka awui yema tshitshɛ lo dikambo dia Yeso, koko kombeyaka ndooko ɛngɔ lo dikambo dia Jehowa Nzambi ka mɛtɛ. Cheri akakambe la Bible dia mbɛɛnya dia Yeso akalɔmbɛ She lele l’olongo. Etena kakashihodia womoto dia nde akakoke nɔmba Nzambi ka mɛtɛ ɔnɛ lele lokombo lande Jehowa, nde akadihola otema ande dia mbetawɔ lokumu l’ɔlɔlɔ. Kombeta edja, omɛnde ndo ɔnande la womoto vɔ lawɔ wakatatɛ mbeka Bible.—Osambu 83:18; Luka 22:41, 42.
Cheri ɛlɔ kɛnɛ
Etena kakamɛnyi woho wakangɛnangɛnaka Cheri nsambisha lo tena tshɛ, lakayambola nte: ‘Kakɔna kashimba dia dimi nsala kɛnɛ kasalande?’ Oma lo etena kɛsɔ, dimi lawɔ lakadjasɛ la Hong Kong nto. Lakɔshi yɛdikɔ ya nyomokongɛ lɔsɛnɔ lami dia dimi nyomoleka ndjasha efula lo mbetsha anto akambo wa mɛtɛ wa lo Bible. Lakɛnyi dia mpokamɛ anto ndo mbaakimanyiya dia vɔ mbeya Ɔtɛkɛta wa Nzambi mbishakami ɔngɛnɔngɛnɔ wa mɛtɛ.
Lakɛnyi dia nkimanyiya anto dia vɔ mbeya Ɔtɛkɛta wa Nzambi mbishakami ɔngɛnɔngɛnɔ wa mɛtɛ
Ɛnyɛlɔ, lakeke Bible la womoto ɔmɔtshi l’ose Vietnam laki nshi tshɛ la lɔkɔnyɔ ndo mbala efula nde aki l’asɔyi lo washo. Ɛlɔ kɛnɛ, nde ekɔ la enamelo k’ɔngɛnɔngɛnɔ lo lɔsɛnɔ ndo ekɔ lo ngɛnangɛna lɔngɛnyi la l’anto wa l’etshumanelo.
Dimi la Cheri, takatane ɛngɔ ka nɛmɔ koleki lokumu la fwa. Kaanga mbele olimu wa waa filmɛ wakatoshaka ɔngɛnɔngɛnɔ ndo lokumu, mbetsha anto akambo wendana la Jehowa Nzambi ndeka mbisha ɔngɛnɔngɛnɔ nɛ dia kɛsɔ mboshaka lotombo. Takɛnyi mɛtɛ ka ɛtɛkɛta waki Yeso wata ɔnɛ: “Ɔngɛnɔngɛnɔ waya lo mbisha ndeka wa nongola.”—Etsha 20:35.