EKADIMWELO LO AMBOLA W’OMA LO BIBLE
Lande na katanema prɔfɛsiya lo Bible?
Lande na katɛkɛta Bible dia awui weta nshi yaso nyɛ?—Luka 21:10, 11.
Awui efula wendana la prɔfɛsiya tanemaka lo Bible k’otondo. Ndooko onto lakoka mbuta l’eshikikelo awui wendana la nshi yayaye. Diakɔ diele, ekotshamelo ka prɔfɛsiya ya lo Bible tetawoyaka dia Bible kekɔ Ɔtɛkɛta wa Nzambi.—Adia Jashua 23:14; 2 Petero 1:20, 21.
Prɔfɛsiya ya lo Bible yamboshilaka la kotshama toshaka ɔkɔkɔ w’oshika wa monga la mbetawɔ le Nzambi. (Hɛbɛru 11:1) Ndo nto, yɔ toshaka eshikikelo dia alaka waki Nzambi wendana la nshi yayaye y’amɛna wayokotshama. Ɔnkɔnɛ, prɔfɛsiya ya lo Bible toshaka elongamelo ka shikaa.—Adia Osambu 37:29; Rɔmɔ 15:4.
Ngande watokimanyiya prɔfɛsiya ya lo Bible?
Prɔfɛsiya mɔtshi pɛmɔlaka ekambi waki Nzambi dia vɔ mbɔsa yɛdikɔ mɔtshi. Ɛnyɛlɔ, etena kakɛnyi Akristo wa lo ntambe ka ntondo ekotshamelo ka prɔfɛsiya mɔtshi, vɔ wakamɔ oma la Jɛrusalɛma. L’ɔkɔngɔ diko, etena kakalanyema osomba lam’ele anto efula wakatone Yeso, Akristo waki etale lo dihole di’ekokelo.—Adia Luka 21:20-22.
Ɛlɔ kɛnɛ, ekotshamelo ka prɔfɛsiya mɛnyaka dia keem’edja Diolelo diaki Nzambi diayanga nkomiya waolelo ndo mandji y’ana w’anto. (Danyele 2:44; Luka 21:31) Diakɔ diele, ekɔ ohomba efula di’onto tshɛ nsala akambo dia mbetawɔma le Nkumekanga Yeso Kristo, ɔnɛ lakasɔnama oma le Nzambi.—Adia Luka 21:34-36.