ASAWO WƆTƆNƐ L’ƆTƐ A DUI WA LO LOHOSO | LANDE NA MONGA LA LOSEMBWE?

Woho wele lokeso la shɛngiya le yɛ

“Nshi tshɛ okongaka awui amɔtshi wele wolo wakoka kandɔma paka la yema ya lokeso.”—Samantha, Afrique du Sud.

Onde wɛ mbetawɔka dui sɔ? L’ɛnyɛlɔ ka Samantha, sho tshɛ tambohomanaka l’awui amɔtshi wa wolo lo ntena dimɔtshi. Kɛnɛ kasalaso etena kahembamaso dia monga la lokeso koka mɛnya atɔndɔ akɔna wɔsaso la nɛmɔ. Ɛnyɛlɔ, naka dinyadinya kɔlɔ kosadiso mboleki ohomba le so, kete sho koka ndjɔsa dia lokeso ekɔ ohomba. Koko, etena kashola anto akina kɛnɛ kele mɛtɛ, lokeso mongaka mbala efula la etombelo wa kɔlɔ. Tɔsɛdingole awui wayela anɛ.

LOKESO NDANYAKA WƐKAMU

Diɔtɔnganelo pikamaka lo wɛkamu. Etena kɛkanɛ anto ahende etema, vɔ ndjaokaka dimɛna ndo l’ekokelo. Wɛkamu hahame esadi esadi. Anto mongaka la wɛkamu lam’asawɔ etena ketshawɔ wenya kaamɛ, katanɛwɔ mɛtɛ lo asawo awɔ ndo kasalawɔ akambo aha la lokaki. Koko wɛkamu koka nshishɔ oma lo dui ɔtɔi dia lokeso. Ndo etena kalana wɛkamu, koka monga dui dia wolo efula di’onto ndjonga la wɛkamu akɔ nto.

Onde wɛ ambokesamaka oma le onto ɔmɔtshi lakayafɔnyaka dia nde aki ɔngɛnyi ayɛ w’oshika? Naka eelo, ngande wakayaoke? Ondo wɛ akayaoke kɔlɔ ndo oko onto lambowofunga. Dui sɔ diekɔ mɛtɛ. Aha taamu, lokeso koka ndanya diɔtɔnganelo di’oshinga wolo diele lam’asa anto.

LOKESO MBOTAKA LOKESO

Wekelo ɔmɔtshi wakasale Robert Innes ombetsha wa économie lo kalasa y’adidi ya la Californie, akɛnya dia “lokeso ekɔ dui diasambemɛ.” Ɔnkɔnɛ, lokeso koka monga oko mikrɔbɛ, mbuta ate etena tshɛ katayaleke monga la diɔtɔnganelo l’onto lele la lokeso mbatayaleke monga lo waale wa monga la lokeso wɛ lawɔ.

Ngande wakokayɛ mbewɔ diaha ntala lo djonga ya lokeso? Bible koka kokimanyiya. Lam’alangɛ, ɛsɔ tɔsɛdingole atɔndɔ amɔtshi wa lo Bible wayɔkɛtshanyema lo sawo diayela.

Weho ɛmɔtshi wa lokeso

Kashi

KASHI KƐDIKƐDI NA? Kashi kɛdikɛdi mbutɛ onto lele la lotshungɔ la mbeya mɛtɛ kɛnɛ kele kashi. Mbuta kashi koka nembetshiya nto ntɛkɛta kɔlɔ kana mengesola awui l’oyango wa minganyiya onto, mbishɛ awui wele ohomba dia nkesa onto ndo mbidja oshimu esɔ l’oyango wa mbisha ɛnamelo ka kɔlɔ.

KƐNƐ KATA BIBLE: ‘Jehowa petshaka kanga okadi, koko nde ekɔ ɔngɛnyi wa ma ma w’anto wosembwe.’ (Tukedi 3:32) “Etena kɛnɛ kamonyotshika mbuta kashi, nyotanɛke mɛtɛ onto la wonyande.”—Ɛfɛsɔ 4:25.

Emamatanya

EMAMATANYA KƐDIKƐDI NA? Dui sɔ nembetshiyaka mbuta dui dia kashi ndo dia kɔlɔ dialanya lokumu l’onto ɔmɔtshi.

KƐNƐ KATA BIBLE: ‘Onto ladja ofukutanu tondjaka ewanu, ndo omamanyishi kakitolaka angɛnyi wa ma ma.’ (Tukedi 16:28) ‘Lɛnɛ ele bu nkunyi, dja nimalaka, ndo lɛnɛ ele bu omamanyishi, owanu shilaka’—Tukedi 26:20.

Okadi

OKADI KƐDIKƐDI NA? Okadi ekɔ tshelo ya ntshutshuya onto ɔmɔtshi dia nkondja falanga kana diangɔ lo yoho ya lokeso.

KƐNƐ KATA BIBLE: ‘Tokesake dia mbiva ose olimu wele lo dihombo ndo wele ose wola.’ (Euhwelu k’Elembe 24:14, 15) ‘Ɔnɛ lakesa mbolambola tɛngaka Nkumɛnde, koko onto tshɛ loka ose wola kɛtshi mbotombolaka.’—Tukedi 14:31.

Wovi

WOVI KƐDIKƐDI NA? Mbiva kɛdikɛdi mbɔsa ɛngɔ kakana aha la dikimɔ.

KƐNƐ KATA BIBLE: “Ɔnɛ latovaka atovake nto, koko nde akambe olimu w’efula, akambe olimu w’ɔlɔlɔ la anya ande dia nde monga la yangɔ ya nkahana l’onto lele lo dihombo.” (Ɛfɛsɔ 4:28) “Tanyokesamake. . . . Wevi, akanga w’ɔkɔmiya, ambidjɔki wa wanu, atɛnganyi kana apɔtwanyi, vɔ tshɛ hawotokita Diolelo dia Nzambi.”—1 Kɔrɛtɔ 6:9, 10.