Dionga dimɔtshi diaki Nzambi Dioleki diyama oshinga wolo

Haykanush, opandjudi ɔmɔtshi wahatabatizama wadjasɛ la Arménie, akatɔngɔna pasɛpɔrɔ kɛmɔtshi sukana la luudu lande. L’eteyi ka pasɛpɔrɔ kakɔ, aki kartɛ mɔtshi ya lo bankɛ ndo nkanda y’ɔlɔlɔ ya dikuta. Kadiyɛso kakɔ akatɛ omɛnde, laki nde la wɔ opandjudi wahatabatizama ɛngɔ kakandatɔngɔna.

Wadi l’omi asɔ waki l’ekakatanu wa wolo wendana la falanga ndo waki la dibasa. Koko, vɔ wakɔshi yɛdikɔ ya tokaloya falanga yakɔ lo adrɛsɛ ɔmɔtshi waki lo pasɛpɔrɔ kakɔ. Pami kakashisha pasɛpɔrɔ kakɔ akambiyama efula nde la nkumbo kande. Haykanush nde l’omɛnde wakalembetshiya nkumbo kakɔ dia vɔ wekɔ la losembwe l’ɔtɛ w’awui wakawekaka oma lo Bible. Oma laasɔ, vɔ wakakambe la diaaso sɔ dia ntɛkɛta akambo wendana l’Ɛmɛnyi wa Jehowa ndo wakasha nkumbo kakɔ ekanda ɛmɔtshi walembetshiya Bible.

Nkumbo kɛsɔ kakalange mbisha Haykanush falanga mɔtshi oko difuto, koko nde kombetawɔ ndjilongola. Lushi lakayele, wadi aki ɔnɛ lakashisha pasɛpɔrɔ akaye ndjenda Haykanush nde l’omɛnde lakawɔ dia ndjowaɛnya lowando l’efula laki la nde, nde akatɛtɛ dia Haykanush mbetawɔ pɛtɛ kɛmɔtshi ka diyama.

L’ɛnyɛlɔ ka nkumbo kɛsɔ, anto efula koka mambiyama oma lo losembwe lakɛnya Haykanush nde l’omɛnde. Ko, onde Jehowa akambiyama? Ngande wakandɛnyi losembwe lawɔ? Onde losembwe lawɔ lakasungana la welo wakawadje?

WAONGA WOLEKI DIANGƆ DIA L’EMUNYI NƐMƆ

Ekadimwelo lo ambola asɔ bu wolo. Lande na? Nɛ dia ekambi waki Nzambi mbeyaka ɔnɛ mbokoya waonga waki Jehowa ekɔ dui dia nɛmɔ efula oleki diyama, paonyi ndo diangɔ dikina dia l’emunyi. Lo mɛtɛ, kɛnɛ kɔsa Jehowa la nɛmɔ ntshikitana etale la kɛnɛ kɔsa anto efula la nɛmɔ. (Isaya 55:8, 9) Ndo ekambi ande mɛnaka dia welo wadjawɔ dia mbokoya waonga wa Jehowa wekɔ la nɛmɔ efula.

Sho koka mɛna dui sɔ oma lo kɛnɛ kata Bible lo dikambo dia shɛnɔdi ndo lomba. Tukedi 3:13-15 mbutaka ɔnɛ: ‘Ɔngɛnɔngɛnɔ le onto latana lomba ndo onto lakondja shɛnɔdi; likondja ndeka nkondja mfɛsa dimɛna, ndo monga la lɔ ekɔ la wahɔ efula ndeka monga la paonyi. Lɔ ndeka kɔrai nɛmɔ; ndooko ɛngɔ kakombolayɛ kakoka mbɛdikama la lɔ.’ Mbokɛmaka hwe dia, Jehowa mbɔsaka waonga wa ngasɔ la nɛmɔ di’efula oleki diangɔ tshɛ dia l’emunyi.

Ko, kakɔna kayotota lo dikambo dia losembwe?

Jehowa ndamɛ ekɔ la losembwe. Nde ‘hakoke mbuta kashi.’ (Tito 1:2) Nde akasambiya ɔpɔstɔlɔ Pɔɔlɔ dia fundɛ Akristo wa la Hɛbɛru wa lo ntambe ka ntondo ɔnɛ: “Nyotetemale tɔlɔmbɛ, nɛ dia tekɔ l’eshikikelo dia tekɔ la nkum’otema ka pudipudi oko wakombolaso monga la losembwe lo akambo tshɛ.”—Hɛbɛru 13:18.

Yeso akatshike ɛnyɛlɔ k’ɔlɔlɔ kendana la losembwe. Ɛnyɛlɔ, etena kakate ɔlɔmbɛdi a laadiko Kayifasi ate: “Lambokotshibia lo lokombo la Nzambi kasɛna dia wɛ totɛ kana wɛ mbele Kristo, Ɔna Nzambi!,” Yeso aki la losembwe ndo akayaenya ndamɛ oko Mɛsiya. Nde akate mɛtɛ kaanga mbakandeyaka di’ase Tominadi ta laadiko t’ase Juda wakakokaka mbuta di’ɔnɛ nde ambɔtɛnga Nzambi ndo dui sɔ diakakoke mbokonya lo nyɔi.—Mateo 26:63-67.

Kayotota lo dikambo diaso? Naka tekɔ la ntondo ka dui dimɔtshi diɛnaso dia sho koka nkondja wahɔ wa lomombo la l’emunyi lo sho ntshika mbutɛ onto ɔmɔtshi akambo tshɛ hwe kana sho ntshikitanya tsho awui amɔtshi, onde tayonga la losembwe?

OKAKATANU DIA MONGA LA LOSEMBWE

Mbeyaka ndjala dui dia wolo dia monga la losembwe lo nshi y’ekomelo nyɛ yele anto efula ‘wekɔ lo ndjalanga, wekɔ lo nanga falanga.’ (2 Timɔte 3:2) Etena kayala ekakatanu wendana la ekondjelo kana etena konga elimu wolo ntana, anto efula hawoyɛna kɔlɔ mbiva, monga dungi pende ndo nsala awui akina wele bu la losembwe. Woho w’ekanelo ka yimba ka ngasɔ kambokokanɛ, diakɔ diele anto efula wɛna dia yoho tshɔi yakokawɔ nkondja lomombo la l’emunyi ele monga aha la losembwe. Kaanga Akristo amɔtshi wakɔshi tɛdikɔ ta kɔlɔ ndo “dia nkondja diangɔ lo nkamba la lokeso” vɔ wakashisha diɛsɛ diawɔ dia monga l’etshumanelo.—1 Timɔte 3:8; Tito 1:7.

Koko, Akristo efula mbokoyaka Yeso. Vɔ wamboshihodia dia monga la waonga wele oko waki Nzambi ekɔ dui di’ohomba oleki oseka ɔngɔnyi kana wahɔ tshɛ. Diakɔ diele, ɛlɔngɔlɔngɔ w’Akristo hawove la kalasa dia nkondja pwɛ y’efula. (Tukedi 20:23) Aha mbala tshɛ mbakoka losembwe mbela difuto oko wakakondja Haykanush. Koko, monga la losembwe lo kɛnɛ kata Nzambi ekɔ dimɛna ndo dui sɔ tokimanyiyaka dia monga la ɛngɔ kɛmɔtshi ka nɛmɔ efula, mbuta ate monga la nkum’otema ka pudipudi.

Ɛnyɛlɔ kaki Gagik mɛnyaka dui sɔ. Nde mbutaka ate: “La ntondo ka dimi nkoma Okristo, lakakambaka lo kɔpanyi ka woke lɛnɛ ele kanga kɔpanyi kakɔ akewɔka mfuta mikanda lo salaka alapɔlɔ wa kashi lo dikambo dia wahɔ wa kɔpanyi. Oko wakimi ɔnɔmbɔdi, wakalongamɛka dia dimi ‘layetawoya’ onto lakatafutshanyaka mikanda lo nkamba la mbekelo ya kashi lo wahɔ wa kɔpanyi. Etombelo waki la dui sɔ ele, lakeyamaka oko onto laki komonga la losembwe. Etena kakamayeka akambo wa mɛtɛ, lakatone ntetemala salaka ngasɔ kaanga mbele olimu ɔsɔ waki la wahɔ w’efula. Lo dihole dia dimi ntetemala nkamba lo kɔpanyi kɛsɔ, lakadihola kɔpanyi kami dimɛ. Ndo ntatɛ oma ko lushi la ntondo, lakatofundja kɔpanyi kami laka lɛɛta ndo lakafute mikanda tshɛ.”—2 Kɔrɛtɔ 8:21.

Gagik mbutaka ate: “Falanga yakamakondjaka yaki yema tshitshɛ ndo aki tshondo y’okakatanu dia dimi nkotsha ehomba wa nkumbo kami. Koko, lekɔ l’ɔngɛnɔngɛnɔ w’efula nshi nyɛ. Lekɔ la nkum’otema ka pudipudi la ntondo ka Jehowa. Lekɔ ɛnyɛlɔ k’ɔlɔlɔ le anami ahende w’apami ndo lekɔ lo nkotsha kɛnɛ kalɔmbama dia nkondja waɛsɛ lo etshumanelo. Nshi nyɛ, lekɔ lo mbeyama oko pami kele la losembwe le wanɛ wafutshanya mikanda ndo oma le wanɛ wanda la mi okanda.”

JEHOWA TOKIMANYIYAKA

Jehowa nangaka wanɛ wootombola lo mbokoyaka waonga ande wa diambo mbidja ndo losembwe. (Tito 2:10) Ndo etena kasalaso dui sɔ, nde tolakaka dia tokimanyiya. Nde akasambiya nkumekanga Davidɛ dia mbuta ɔnɛ: ‘Dimi laki dikɛnda ndo wonya ɔnɛ laya osombe, koko dimi talɛnaka onto ɔlɔlɔ akalema, kana anande walɔmbana mbo ya ndɛ.’—Osambu 37:25.

Ɛnyɛlɔ ka Ruta shikikɛka dui sɔ. Nde akatshikala la kɔlamelo tshɛ le Naɔmi laki okilo ande lo dihole dia nde mbotshika l’ɔtɛ wakinde osombe. Ruta akonɔ otsha l’Isariyɛlɛ, lɛnɛ akandakoke tɔtɛmɔla Nzambi ka mɛtɛ. (Ruta 1:16, 17) Nde akikɔ la losembwe ndo akakambaka la wolo efula dia nkɔdiakɔdia lo ndjela kɛnɛ kakatama lo Ɛlɛmbɛ lo dikambo di’ase wola. Ndo lo ndjela kɛnɛ kakayɛnaka Davidɛ ndo nde lawɔ l’ɔkɔngɔ, Jehowa kokalɛ pondjo Ruta nde la Naɔmi. (Ruta 2:2-18) Nde akasale awui efula oleki nkimanyiya tsho Ruta la diangɔ dia l’emunyi. Nde akɔsɔnɛ dia monga ɔmɔtshi la lo ɔlɔndji wa nkumbo ka Davidɛ ndo Mɛsiya wakalakema!—Ruta 4:13-17; Mateo 1:5, 16.

Mbeyaka monga dui dia wolo efula le ekambi wa Jehowa ɛmɔtshi dia nkondja falanga yahombama dia nkotsha ehomba awɔ. Koko lo dihole dia nsala la wolo dia tana yoho ya wɔdu koko yele bu la losembwe dia nkotsha ehomba awɔ, vɔ kambaka la wolo ndo l’etete dia nkotsha ehomba awɔ. Lo nsala ngasɔ vɔ mɛnyaka dia waonga waki Nzambi wa diambo ɛnyɛlɔ oko losembwe wekɔ la nɛmɔ efula le wɔ ndeka diangɔ tshɛ dia l’emunyi.—Tukedi 12:24; Ɛfɛsɔ 4:28.

L’ɛnyɛlɔ kaki Ruta, Akristo wa l’andja w’otondo wekɔ lo mɛnya mbetawɔ lo wolo wele la Jehowa wa mbakimanyiya. Vɔ ndjaɛkɛka tshɛ lo tshɛ le Ɔnɛ lakalake ate: “Dimi hakotshikaki ndo hakokalɛki pondjo.” (Hɛbɛru 13:5) Mbala ko mbala, Jehowa okɛnyaka dia nde koka ndo ayokimanyiya wanɛ wele la losembwe lo tena tshɛ. Nde okokotshaka daka diande dia nkotsha ehomba w’ekambi ande.—Mateo 6:33.

Lo mɛtɛ, anto koka mbɔsa diyama ndo diangɔ dikina dia l’emunyi la nɛmɔ. Koko sho koka monga l’eshikikelo dia Shɛso lele l’olongo mbɔsaka losembwe laso ndo waonga akina la nɛmɔ di’efula ndeka mbɔkɔ y’oshinga wolo.