ASAWO WƆTƆNƐ L’ƆTƐ A DUI WA LO LOHOSO | WOHO WA NDEKA NKONDJA OMA LO WADIELO WA BIBLE
Kakɔna kakoka mbetɛ wadielo wa Bible dui di’ɔngɛnɔngɛnɔ?
Ngande wele wadielo wa Bible le yɛ? Onde dui diasha eshi? Ko kana dui di’ɔngɛnɔngɛnɔ? Dui sɔ nemanɛka la yoho yadiayɛ Bible. Ɛsɔ tɔsɛdingole kɛnɛ kakokayɛ nsala dia mfudia nsaki ndo ɔngɛnɔngɛnɔ ayɛ lo wadielo wa Bible.
Sɔna ekadimwelo ka dimɛna ndo ka lo ɔtɛkɛta wa nshi nyɛ. Naka wɛ mbadia awui wele wolo efula ndo wele la tɔtɛkɛta tambeta loowe tahayeye, kete ondo wɛ hɔngɛnangɛna kɛnɛ kadiayɛ. Ɔnkɔnɛ, yanga Bible kele la tɔtɛkɛta ta wɔdu nshihodia tayonanda otema ayɛ. L’etena kakɔ kaamɛ, tɔ pombaka monga Bible kakakadimɔma la yambalo ndo la kɔlamelo tshɛ.a
Kamba la tshulatshula dia nshi nyɛ. Ɛlɔ kɛnɛ, Bible hatanema tsho lo dibuku dia lokakatanya, mbuta ate dibuku diakatondjama, koko ndo lo fɔrma ka nimerikɛ. Bible mɔtshi koka mbadiema l’Ɛtɛrnɛtɛ kana ndjitelesharjɛ dia wadielo w’onto ndamɛ lo ɔrdinatɛrɛ, lo tablɛtɛ kana lo telefɔnɛ. Dikadimwelo dimɔtshi diekɔ ndo la prɔgramɛ yayokokimanyiya esadi eto dia wɛ menda avɛsa akina wa lo Bible watɛkɛta dui diakɔ diaamɛ kana mbɛdika dikadimwelo dia Bible diotshikitanyi. Naka wɛ nangaka mpokamɛ lo dihole dia mbadia, eya dia Bible tanemaka ndo lo eshinga. Anto efula nangaka mpokamɛ etena kewɔ lo mituka wɛmba anto tshɛ, etena kasolawɔ ahɔndɔ kana etena kasalawɔ elimu ekina wawasha akoka wa mpokamɛ. Lande na kahayahembe yoho yɔtɔnganɛ la yɛ?
Kamba la dihomɔ dia wekelo wa Bible. Dihomɔ dia wekelo wa Bible koka kokimanyiya dia wɛ ndeka nkondja wahɔ oma lo wadielo ayɛ. Ekɔ kartɛ yɛnya ngelo yatɛkɛtama lo Bible yayokokimanyiya dia wɛ mbeya dihole diakasalema kɛnɛ kadiayɛ ndo wɛ monga oko onto lɛna kɛnɛ kadiayɛ. Asawo wele oko wanɛ watanema lo periodikɛ kɛnɛ kana lo etenyi kata ɔnɛ: “Wetshelo w’oma lo Bible” katanema lo sitɛ k’Ɛtɛrnɛtɛ ka jw.org koka kokimanyiya dia wɛ mbeya kitshimudi ya tenyi efula dia lo Bible.
Tshikitanya yoho yayɛ ya mbadia. Naka wɛ mɛnaka dia ekɔ wolo mbadia Bible oma lo dikatshi dia ntondo polo di’ekomelo, lande na kahayafudia nsaki kayɛ lo mimɛ la etenyi kaleka kɔngɛnyangɛnya? Naka wɛ nangaka mbeya awui wendana l’anto waleka mbeyama lo Bible, wɛ koka mbadia awui wendana l’anto akɔ. Yoho mɔtshi ya wɔdu yakokayɛ mbadiaka Bible tanemaka lo kiombo yele l’ɔtɛ a dui ɔnɛ: “Sala eyangelo lo Bible dia mbeya anto watɛkɛtama lɔkɔ.” Kana, mbeyaka monga ko wɛ nangaka mbadia Bible lo ndjela ɔkɔndɔ kana lo ndjela woho wakayahɔnaka awui. Lande na kahayahembe yoho mɔtshi l’atei wa tɔsɔ?
a Anto efula wakɛnyi dia Bible—Ekadimwelo k’andja w’oyoyo kakakadimɔma la kɔlamelo, kekɔ mɛtɛ ndo wɔdu mbadia. Bible kakatondjama oma le Ɛmɛnyi wa Jehɔwa kɛsɔ tanemaka lo ɛtɛkɛta ndekana 130. Wɛ koka telesharjɛ kɔpi kɛmɔtshi oma lo sitɛ k’Ɛtɛrnɛtɛ ka jw.org kana telesharjɛ JW Library app. Kana, naka wɛ alanga, Ɛmɛnyi wa Jehowa koka kela kɔpi kɛmɔtshi ka Bible kakatondjama.