“Ɔsɔ aki woshasha woleki dimɛna wemi talalongolaka”

Ngasɔ mbakayaoke yana ya yimato mɔtshi y’ɛnɔnyi 13 etena kakandalongola yana ya mfɔ dia nde kɛnyaka la yɔ oko woshasha. Womoto ɔmɔ landa okanda lele la falanga akate di’ɔrdinatɛrɛ wakawosha she lam’akinde lo kalasa ya sekɔndɛrɛ aki woshasha wakatshikitanya lɔsɛnɔ lande. Ndo pami kɛmɔ keke katshuka akɛnyi dia kartɛ ka l’anya kakasale wadɛnde lam’akawakotsha ɔnɔnyi wa ntondo wa diwala aki woshasha woleki dimɛna wende atalongolaka.

Ɔnɔnyi tshɛ, anto efula mbetshaka wenya ndo welo dia nyanga woshasha “woleki dimɛna” dia mbisha ɔngɛnyi kana owotɔ ɔmɔ lo diaaso dimɔ dia laande. Ndo anto efula wayolanga dia mpokamɛ okadimwelo wele oko wɛnɛ wɔtɛkɛtshiso lo mbɔtwɛlɔ. Ko kayotota lo dikambo diayɛ? Onde wɛ ayonga suke dia mbisha kana nongola weshasha wangɛnangɛna anto?

Dui sɔ koka nkotola yambalo efula aha tsho l’ɔtɛ wa shɛngiya yakoka monga la woshasha ɔmɔ le ɔnɛ lawolongola koko ndo lo yoho yakoka ɔnɛ lakimɔ ndjaoka. Laadiko dia laasɔ, Bible mbutaka ɔnɛ: “Ɔngɛnɔngɛnɔ waya lo mbisha ndeka wa nongola.” (Etsha 20:35) Eelo, ɔngɛnɔngɛnɔ waya lo mbisha mbeyaka monga efula naka woshasha wekɔ la nɛmɔ di’efula le ɔnɛ lawolongola.

Ko laasɔ, ngande wakokayɛ mbetɛ woshasha ayɛ kiɔkɔ y’ɔngɛnɔngɛnɔ wa mɛtɛ le yɛ ndo le ɔnɛ lawolongola? Ko naka wɛ bu l’akoka wa mbisha woshasha “woleki dimɛna,” kakɔna kakokayɛ nsala dia woshasha ayɛ monga mɛtɛ la nɛmɔ?