Onde wɛ aakohɔ?
Onde wɛ akangɛnangɛna wadielo wa numɛlɔ ya Tshoto y’Etangelo yeke katomba? Naka ngasɔ, kete enda dia kana wɛ kokaka nkadimola ambola wayela anɛ:
Dia nkimanyiya anawɔ lo nyuma, lande na kahomba ambutshi wakonɔ mbidja yimba lo dikambo di’ɔtɛkɛta?
Ondo ana wayeya ɔtɛkɛta wa lo dihole diodjashinyu la kalasa ndo l’ahole wetetawɔ. Koka monga ohomba di’ɔna mbeya ɛtɛkɛta efula. Ambutshi pombaka nsɛdingola dia kana ana wayoshihodia akambo wa mɛtɛ dimɛna ndo mpama lo nyuma, oyadi lo monga l’etshumanelo ka l’ɔtɛkɛta wa lo dihole diewɔ kana ka l’ɔtɛkɛta w’ambutshi wakonɔ. Ambutshi w’Akristo mbetshaka wahɔ wa lo nyuma w’anawɔ la ntondo ka nango yawɔ.—w17.05, lk. 9-11.
Etena kakambola Yeso Petero ɔnɛ: “Onde wɛ mbokakami ngandji oleki diangɔ nɛ?” “diangɔ nɛ” diakendanaka la na? (Jni. 21:15)
Mɛnamaka dia Yeso akataka dikambo dia nse yaki lalewɔ kana olimu wa munda nse. L’ɔkɔngɔ wa nyɔi ka Yeso, Petero akakalola l’olimu wakandakambaka, mbuta ate olimu wa munda nse. Akristo pombaka menda dihole diele la olimu wa l’emunyi l’otema awɔ.—w17.05, lk. 22-23.
Yoho yakɔna yakakambe la Elias Hutter dia nkimanyiya wanɛ wakalangaka mbeka Hɛbɛru?
Nde akalange di’ambeki mbeya ntshikitanya oma lɛnɛ akatatɛ tɔtɛkɛta ta lo Hɛbɛru lo Bible ndo woho wakɔtɔnɛka tɔtɛkɛta ta etatelo kana t’ekomelo. Dia nsala dui sɔ, nde akatondja alɛta lo yoho y’oshika, koko tɔtɛkɛta ta etatelo kana t’ekomelo lo yoho yɔlɔngami. Yoho yakɔ yamɛ mbele lo nɔtɛ ya lo Bible—Ekadimwelo k’andja w’oyoyo—Kele la rɛferansɛ.—wp17.4, lk. 11-12.
Awui akɔna wahomba monga la shɛngiya le Okristo walanga monga l’okoma dia ndjakokɛka oma le anto akina?
Awui amɔtshi vɔ anɛ: Nzambi mbɔsaka dia lɔsɛnɔ lekɔ ekila. Yeso kokeketsha ambeki ande dia monga la tokuwa ta ta dia ndjakokɛka. (Luka 22:36, 38) Sho pombaka ntshula tokuwa taso ta ta nkongo. Lɔsɛnɔ ndeka lomombo la l’emunyi nɛmɔ. Sho nɛmiyaka nkum’otema k’anto akina ndo sho mbishaka ɛnyɛlɔ. (2 Kɔr. 4:2)—w17.07, lk. 31-32.
Lande na kele ɔkɔndɔ wa Mateo wendana la Yeso etena kakinde dikɛnda ntshikitana la wa Luka?
Mateo ndekaka ntɛkɛta akambo wendana la Yɔsɛfu, ɛnyɛlɔ kɛnɛ kakandasale etena kakandeye dia Mariya aya la diemi, losango l’oma le Nzambi la ndawɔ otsha l’Edjibito ndo ndjokalola. Luka ndekaka ntɛkɛta dikambo dia Mariya; ɛnyɛlɔ woho wakandatshu dia tenda Elizabɛtɛ ndo kɛnɛ kakandasale etena kakatshikala Yeso lo tɛmpɛlɔ eke dikɛnda.—w17.08, lk. 32.
Naa awui amɔtshi wɛnya dia Bible tshikalaka pondjo?
Kitshimudi ya tɔtɛkɛta ndo ditelo diakakambe la wɔ lo Bible akayotshikitana. Etshikitanu w’awui wa pɔlitikɛ akonge la shɛngiya lo ɔtɛkɛta wakatɛkɛtaka anto efula. Aki ɔlɔshamelo diaha Bible kadimɔma l’ɛtɛkɛta wakatɛkɛtaka anto efula.—w17.09, lk. 19-21.
Onde onto l’onto ekɔ la ondjelo ɔmɔtshi wawolama?
Ndooko. Yeso akate di’andjelo wa ambeki ande mendaka nshi tshɛ elungi ka Nzambi. (Mat. 18:10) Nde akataka dia andjelo ndjashaka le ambeki ande, koko aha ɔnɛ andjelo wekɔ lo nkokɛ onto l’onto l’atei awɔ lo yoho ya dihindo.—wp17.5, lk. 5.
Ngandji kakɔna koleki tshɛ?
Naka tɔ pikama lo atɔndɔ w’amɛna, kete a·gaʹpe mbele ngandji koleki tshɛ. Tɔ koka mendana la nanga ndo monga la nsaki k’efula otsha le onto ɔmɔtshi. Koko tɔ kɛnɛmɔlaka atɔndɔ wa laadiko, ɛnyɛlɔ salɛ anto akina akambo aha la lokaki.—w17.10, lk. 7.