3 Ekimanyielo dia ndɔshana l’ekakatanu

Ekɔ ekakatanu ɛmɔ wele nshi nyɛ hatokoke mbewɔ kana mbakandola. Ɛnyɛlɔ, naka wɛ akavusha onto ɔmɔ lokayɛ ngandji kana naka wɛ ekɔ la hemɔ kahakɔnɔ, wɛ mbeyaka monga ko bu la kɛnɛ kahombayɛ nsala, koko wɛ koka ntana toho tɔmɔ ta ndɔshana la kandji kele la yɛ. Onde Bible koka kokimanyiya la ntondo k’ekakatanu wa wolo wa ngasɔ?

HEMƆ KAHAKƆNƆ

Rose mbutaka ate: “Lekɔ la hemɔ ka lootɔ katetemala mbishami kandji efula. Yoho yami ya lɔsɛnɔ yaki l’ofukutanu.” Dui dimɔtshi diakandalekaka ndjakiyanya efula ele, tena dimɔtshi nde komonga l’akoka wa mbidja yimba lo wekelo ande wa Bible ndo awui wa lo nyuma. Koko nde akakimanyiyama efula oma lo ɛtɛkɛta waki Yeso watanema lo Mateo 19:26, ɛtɛkɛta wata ɔnɛ: “Le Nzambi, akambo tshɛ kokaka salema.” Rose akakondja wetshelo dia ekɔ toho efula ta nsala wekelo. Lam’ele kandji kaki lande aketɛka wadielo dui dia wolo efula lo tena dimɔ, nde akayotatɛ mpokamɛ wadielo wa Bible wakadjama l’eshinga ndo ekanda wakilembetshiya.a Nde mbutaka ate: “Otondongaka aha toho ta wekelo tɔsɔ, tshike haleye woho wotomosala dia nama diɔtɔnganelo diasami la Nzambi.”

Etena konga Rose la lonyangu l’ɔtɛ wende bu l’akoka wa nsala kɛnɛ kakokande nsala nde tanaka esambelo l’ɛtɛkɛta watanema lo 2 Kɔrɛtɔ 8:12, ɛtɛkɛta wata ɔnɛ: “Naka lolango lekɔ ntondo, dui sɔ mbetawɔmaka djekoleko lo ndjela kɛnɛ kele la onto, aha lo ndjela kɛnɛ kele onto bu la tɔ.” Ɛtɛkɛta ɛsɔ mboholaka Rose dia Nzambi ngɛnangɛnaka kɛnɛ kasalande, nɛ dia nde ekɔ lo nsala kɛnɛ tshɛ kende l’akoka wa nsala.

ƆKƐYI

Delphine, lakatatɛkɛtshi diande lo sawo dietshi, mbutaka ate: “L’ɔkɔngɔ w’ɔnami la womoto l’ɛnɔnyi 18 mvɔ, laki la kandji k’efula kakakonya diaha dimi mbetawɔ dia layotetemala nsɛna. Awui komonga woho akɔ waamɛ.” Koko nde akatane esambelo k’efula lo ɛtɛkɛta watanema lo Osambo 94:19, lɛnɛ atɛ omembi w’esambo Nzambi ate: “Etena kakamamɛnama la ekiyanu, wɛ akansambe ndo akambɔladia.” Nde mbutaka ate: “Lakalɔmbɛ Jehowa dia nde kimanyiyami dia dimi monga l’akambo wa nsala wakoka kimanyiyami dia mbɔladia kandji kami.”

Nde akayasha l’olimu wa ndjakimɔ la lolango w’ohomba efula. L’etena kɛmɔ, nde akayoyaɛdika la kidiyɔ katokambaka la ana w’akɛnda dia nsanga asango, mbuta ate kaanga naka kidiyɔ kɛsɔ kambolana, tɔ mongaka ohomba dia nsanga asango. Woho akɔ waamɛ mbele, kaanga mbakandayongaka la paa, nde akakondja wetshelo dia nde ekekɔ l’akoka wa nkimanyiya anto akina. Nde mbohɔka ate: “Lakɛnyi esadi eto dia etena kakamakambaka l’atɔndɔ wa lo Bible ndo toho ta nkana yimba oma l’Afundelo dia nkimanyiya ambeki ami wa Bible, ɔsɔ aki yoho mɔtshi yakɔladia Jehowa kandji kami ndo sambami.” Nde akasale listɛ l’anto wa lo Bible wakahomana la tena dia wolo di’ɔkɛyi. Nde akɛnyi ɔnɛ: “Vɔ tshɛ waki anto wakalɔmbaka.” Nde akakondja nto wetshelo ɔnɛ dia “ndɔshana l’ekakatanu paka mbadiaka Bible.”

Wekelo wa Bible aketsha Delphine dui dikina di’ohomba, mbuta ate mbidja yimba lo nshi yayaye koko aha lo nshi yakete. Elongamelo kele lo Etsha 24:15 kakoosambe, tɔ mbutaka ɔnɛ: “Eolwelo k’anto w’ɛlɔlɔ ndo k’anto wa kɔlɔ kayoyala.” Ngande wakinde l’eshikikelo dia Jehowa ayolola ɔnande la womoto? Nde akakadimola ɔnɛ: “Lekɔ lo mɛna ɔnami la womoto lo nshi yayaye. Lo ndjela ekongelo kaki Shɛso lele l’olongo, datɛ diakɔ diaya suke. Lekɔ lo ndjaɛna dimi l’ɔnami la ngandji lo jardɛ yaso oko wakiso dimi la nde lushi lakandotɔ.”

a Awui wakadjama l’eshinga wa ngasɔ tanemaka efula lo sitɛ ka Ɛtɛrnɛtɛ ka jw.org.

Bible koka kokimanyiya dia wɛ nkondja esambelo kaanga lo tena dia wolo efula

NGANDE WAKOKA NZAMBI TOKIMANYIYA?

Okadimwelo washa Bible mbokɛmaka hwe. Tɔ mbutaka ɔnɛ: “Jehowa ekɔ suke la wanɛ tshɛ wawelɛ, wanɛ tshɛ wawelɛ lo mɛtɛ. Nde kotshaka nsaki ka wanɛ wawoka wɔma; nde mbokaka delo diawɔ dialɔmbawɔ ekimanyielo ndo nde mbatshaka.” (Osambo 145:18, 19) Shi dui sɔ minandaka otema? Ko, ngande wayokadimola Nzambi lo alɔmbɛlɔ w’anto wɔlɔmba l’otema ɔtɔi dia nyanga ɛlɔmbwɛlɔ kande?

LO TOSHA WOLO:

Mbala efula ekakatanu kokaka tosha ɔkɔmwɛlɔ ndo tɔlɛndja lo demba, lo yimba ndo lo nyuma. (Tokedi 24:10) Koko Jehowa “mbishaka wolo le ɔnɛ lambɔlɛmba ndo nkudu k’efula le wanɛ wele bu la lokalo.” (Isaya 40:29) Ɔpɔstɔlɔ Pɔɔlɔ lakakikɛ ehemba wa wolo efula, akate ate: “Lo akambo tshɛ, dimi lekɔ la wolo oma le ɔnɛ lambisha lokalo.” (Filipɛ 4:13) Pɔɔlɔ akakondja wolo oma le nyuma k’ekila ka Nzambi. Wɛ la wɔ nto koka nɔmba Nzambi dia nde kosha nyuma k’ekila.—Luka 11:13.

LO TOSHA LOMBA:

Ko kakɔna kahombayɛ nsala naka wɛ ekɔ l’ohomba wa nshihodia ndo nkamba l’alako w’oma lo Bible? Ombeki Jakɔba akafunde ate: “Naka onto ɔmɔtshi l’atei anyu ekɔ l’ohomba wa lomba, nde atetemale nɔmba Nzambi, ko nde ayowoshalɔ, nɛ dia la lokaho tshɛ nde mbishaka anto tshɛ aha la mbahangwɛ.” (Jakɔba 1:5) Wɛ koka nsala akambo wɔtɔnɛ l’alɔmbɛlɔ ayɛ lo mbadiaka Bible ndo lo kambaka la wetshelo w’oma lɔkɔ. (Jakɔba 1:23-25) Etena kayoyosala dui sɔ, wɛ ayɛna woho wele alako watɔ wekɔ alako wa lomba.

LO TOSHA WƆLADI:

Kaanga etena keyɛ l’ekiyanu w’efula, Jehowa koka kokimanyiya dia wɛ ndjaoka dimɛna. Ɔtɛkɛta ande mbutaka ɔnɛ: “Lo oseka dikambo tshɛ, tanyoyakiyanyake, koko nyote Nzambi ehomba anyu lo dɔmbɛlɔ la ɛsɛngɔsɛngɔ kaamɛ ndo la eokelo ka losaka, ko wɔladi wa Nzambi woleki tokanyi tshɛ wayolama etema anyu la timba tanyu lo tshimbo ya Kristo Yeso.” (Filipɛ 4:6, 7) Lande na kahayalɔmbɛ Jehowa dia nde kosha wɔladi?

Ko ayoyosala naka ekakatanu wele la yɛ hawokandɔma esadi esadi? Totake mbala kakɔ ɔtɔi dia Nzambi ambokokalɛ. Kaanga naka ekakatanu ayɛ wekɔ lo ntetemala, Nzambi koka kosha dihonga ndo wolo wa mbikikɛ. (1 Kɔrɛtɔ 10:13) Bible tolakaka nto dia etena kayokoka kele ekakatanu aso wayokandɔma lo pondjo!