Etena keyɛ la hemɔ ka wolo

“Lam’akameye dia lekɔ la kansɛrɛ ka lo doyi ndo ka lo emong’ɔsɔhi, laki l’eshikikelo dia langa mvɔ. Etena kakamakalola la ngelo, l’ɔkɔngɔ wa dɔkɔtɛlɛ mbutɛmi dindjɛyi sɔ, lakate nte: ‘Aha kɛnɛ mbakamalongamɛka, ko ka dimi pombaka nyanga woho wa mbikikɛ hemɔ kɛnɛ.’”—Linda, lele l’ɛnɔnyi 71.

“Lekɔ la hemɔ ka kandji efula ka l’eshisha wa lo lonya la lɔmɔsɔ la elongi kami. Lo etena kɛmɔtshi, lakonge l’ɔkɔmwɛlɔ l’ɔtɛ wa paa k’efula kambisha hemɔ kɛsɔ. Lakayaokaka mbala efula oko opoko ndo lakakome polo ndo lo nyanga dia ndjadiaka.”—Elise, lele l’ɛnɔnyi 49.

Pami kɛmɔtshi kele la hemɔ odjashi lo kɔsa k’etshimbi ndo wakinde wa ngandji mbodinga

NAKA wɛ kana lakiyɛ ɔmɔtshi la ngandji ambondamaka la hemɔ kakoka nkonya polo lo nyɔi, kete wɛ mbeyaka ɔkɛyi w’efula wakoka monga la dui sɔ. Laadiko dia hemɔ tɔamɛ, wɛ pombaka ndɔshana la waonga amɔtshi wele la wanɛ wakosakɛ kana w’ase nkumbo. Wɔma ndo okiyanu mongaka efula l’ɔtɛ wa randevu washanayɛ l’enganga, okakatanu wele layɛ wa nsomba ekanga ndo wa mfuta falanga y’osakelo, kana etombelo wa kɔlɔ wele la ekanga lo demba. Okiyanu wa lo yimba mbidja ndo tshondo ya hemɔ, koka kɔtɛwɔla efula.

Ko lende akokaso ntana ekimanyielo? Anto efula wakɛnyi dia vɔ kondjaka ekeketshelo koleki lo nɔmbaka Nzambi ndo lo mbadiaka avɛsa wakeketsha wa lo Bible. Ngandji, osukɔ w’ase nkumbo ndo w’angɛnyi koka nto tokimanyiya.

WOHO WAKATONDOYA ANTO AMƆTSHI

Robert lele l’ɛnɔnyi 58 akasha dako nɛ ate: “Onga la mbetawɔ le Nzambi, ko nde ayokokimanyiya dia wɛ mbikikɛ hemɔ kayɛ. Lɔmba Jehowa. Tɛnde woho wayaokayɛ. Lɔmbande nyuma kande k’ekila. Lɔmbande dia nde kokimanyiya dia wɛ mɛna akambo la sso di’ɔlɔlɔ ndo nkeketsha nkumbo kayɛ ndo dia wɛ mbikikɛ hemɔ kayɛ aha la mbayaya.

“Mongaka dimɛna efula etena kakosukɛ nkumbo kayɛ la ngandji tshɛ ndo kewɔ suke la yɛ.” Lushi tshɛ vɔ mbelɛkami lo telefɔnɛ mbala ɔtɔi kana hiende ko mimbolakami ɔnɛ: ‘Ngande wakayemwe?’ Lakalongola ekeketshelo oma le angɛnyi wa l’ahole wotshikitanyi. Vɔ kimanyiyakami dia ndjaoka dimɛna, ndo dui sɔ kimanyiyakami diaha mpekɔ.”

Naka wɛ ambotshɔ tenda ɔngɛnyi ayɛ wele la hemɔ, lembetɛ kɛnɛ kata Linda: “Ɔkɔnyi nangaka nsɛna oko anto akina tshɛ ndo mbeyaka monga ko nde halange ntɛkɛta dia hemɔ kande wonya tshɛ. Laasɔ, nyosawole awui wokonyosawolaka.”

Diɛsɛ la wolo w’oma le Nzambi, esambelo kasha Afundelo ndo osukɔ wa la ngandji tshɛ w’oma le nkumbo l’angɛnyi, sho koka monga l’eshikikelo dia ekɔ ohomba ntetemala nsɛna, kaanga l’etena kalɔshanaso la hemɔ ka wolo.

Avɛsa wa lo Bible wakoka kokimanyiya

Yaɛkɛ le Nzambi.

“Dimi lakambola Jehowa kanyi, ko nde akankadimola. Nde akantshungola oma lo wɔma ami tshɛ. Mbolambola nyɛ akelɛ, ko Jehowa akoke.”—Osambo 34:4, 6.

Linda, lakatatɛkɛtshi l’etatelo mbutaka ate: “Ndooko lushi lakamalɔmbɛ nte: ‘Ɔnkɔnɔlɛ.’ Koko lakalɔmbaka mbala tshɛ nte: ‘Ombisha wolo, ndo okimanyiya dia mbikikɛ hemɔ kami.’”

Kondja wolo oma l’Ɔtɛkɛta wa Nzambi.

“Ndooko onto lodjashi lɛkɔ layota ate: ‘Dimi lekɔ la hemɔ.’”—Isaya 33:24.

Kana yimba lo alaka waki Nzambi wendana la nshi yayaye. Dui sɔ diayokosha elongamelo, ndo elongamelo kɛsɔ kayokosha wolo wa mbikikɛ.

Lɔmba ase nkumbo ndo angɛnyi dia vɔ kosukɛ.

“Ɔngɛnyi wa mɛtɛ mbokanaka ngandji tena tshɛ, ndo ekɔ ɔnanyɔ lakokayɛ mendɛ le nde lo tena dia paa.”—Tokedi 17:17.

“Toyakakitolake l’anto akina. Etawɔ di’angɛnyi ayɛ kokimanyiya. Ekɔ tena dimɔtshi diakokayɛ ndjaoka opoko ndo mfɔnya dia kaanga Nzambi hakohokamɛ, koko toyakakitolake l’anto akina.” Ɔsɔ mbele dako diakasha Elise, lakatatɛkɛtshi l’etatelo.