Ekadimwelo lo wembola anyu

◼ Ngande wakoka wanɛ wakamba olimu w’olongwelo kimanyiya ambutshi di’aha anawɔ fukutanya lo nsanganya na?

Lam’ele ana wokongaka l’alemba wa wolo, vɔ hawotongaka la mbekelo ka mbidjasɛ edja lo dihole ɔtɔi. L’ɔkɔngɔ wa losanganya, ana mɛnaka dioko wambotomba oma lo lokanu, lâsɔ wolo awɔ wa demba mbatshutshuyaka dia ndawɔlawɔ kana mbitshanya asekawɔ akina l’etei ka Mbalasa ka Diolelo kana l’ahole akina watosalemaka nsanganya, lo parkingɛ, kana lo wedi wa shinga. Diɔ diakɔ diata yokedi mɔtshi ɔnɛ: ‘Ɔna lahalakema, atoshaka ambutshi ande sɔnyi.’​—⁠Tuk. 29:⁠15.

Lonyangu ko, anangɛso l’akadiyɛso amɔtshi waya esombe wakahomɔ wolo nɛ dia ana wakahomana la wɔ la shashimoya kana wakâsokola ko mbâkɔsha. Kɛsɔ ndjosoyaka onto tshanana ndo ndjokonyaka ambutshi kana etshumanelo l’adepasɛ w’anyanya. Dia mbakokɛ ndo kokɛ anto akina, ana hawokoke monga la lotshungɔ la ndawɔlawɔ kana kɛnya l’etei kana l’andja wa Mbalasa ka Diolelo.

Ambutshi wekɔ l’ɔkɛndɛ woye oma l’Afundelo wa mbetsha anawɔ woho wa vɔ mbɔsa ahole wakiso w’ɔtɛmwɛlɔ la nɛmɔ diahombama. (Und. 5:1a) Lo nsanganya yaso y’Akristo ya l’etshumanelo kana ya weke, wanɛ wakamba olimu w’olongwelo pombaka menda dia kana ‘akambo tshɛ wekɔ lo salema dimɛna’ ndo ‘ndoko ofutanu.’ (1 Kor. 14:40; Kol. 2:⁠5) Vɔ la dia sɛna wolo la ntondo ka losanganya, lo wonya wasalema losanganya, kana l’ɔkɔngɔ wa losanganya, oyadi l’etei kana l’andja wa dihole diasalemalɔ. Naka ɔna ekɔ lo ndawɔlawɔ kana ekɔ lo fukutanya, ɔnɛ l’akamba olimu w’olongwelo kokaka mbɔsa ɔnakɔ la lɔsɛngɔ tshɛ ko nde mbôlembetshiya lande na kele ndawɔlawɔ la fukutanya kema dimɛna. Kokaka nto mbutɛ ambutshi waki ɔnakɔ dikambo diakɔ la lotutsha ndo mbaɛnya ohomba wa nama ɔna. Ambutshi pombaka ndjela dako sɔ.

Mbokɛmaka dia tena efula kânga ana waya tomangase kana weke tɔkɛndakɛnda kokaka mbidja londjo kana fukutanya wenya wa nsanganya. Wanɛ wakamba olimu w’olongwelo pombaka koma oko minitɛ 20 la ntondo ka losanganya tatɛ ndo vɔ kokaka momba ahole wa mbidjasɛ wa l’ɔkɔngɔ dikambo di’ambutshi walanga mbidjasɛ l’anawɔ w’akɛnda. Anto akina pombaka kimanyiya wanɛ walongɔna lo mbetawɔ ntshika ahole wa l’ɔkɔngɔ hwe dikambo di’ambutshi asɔ.

Naka ɔna ɔmɔtshi ofukutanya, kete ombutshi la dia mbɔsa yɛdikɔ mɔtshi. Ko naka ombutshi hatshe ndoko dui, ko ofukutanu wekɔ lo tetemala, kete ɔnɛ lakamba olimu w’olongwelo la dia nɔmba ombutshi la lotutsha tshɛ dia kana nde kokaka tomba l’ɔna l’andja wa mbalasa. Naka tambeta eyoyo wele l’ana oya lo nsanganya, kete sho la dia mbidjasɛ kâmɛ la wɔ ndo mbakimanyiya etena kadja anawɔ londjo ndo kafukutanyawɔ lo weho ekina.

Sho ngɛnangɛnaka lam’ɛnaso ana wa weho w’ɛnɔnyi tshɛ lo Mbalasa ka Diolelo ndo lam’ɛnaso dionga diawɔ di’ɔlɔlɔ l’atei wa nkumbo ka Nzambi. (1 Tim. 3:15) Naka ana nɛmiyaka ɔlɔngɔswɛlɔ waki Jehowa wendana l’ɔtɛmwɛlɔ, kete vɔ wayowɔlɛmiyaka ndo wayandɔma oma le anto tshɛ wa l’etshumanelo.