Tokimanyiya akina dia vɔ mbɔtɔka lo nsanganya

¹ “Angɛnyi tshɛ wotodingi . . . wele la nsaki ka mbɔtɔ lo nsanganya yaso wambelamɛ dia ndja la waasaso tshɛ.” Tatɛ kam’akatombe diewoyelo nɛ lo Tshoto y’Etangelo (Phare de la Tour de Sion) ya Ngɔndɔ ka Dikumi l’Ɔtɔi, 1880 (l’Angɛlɛ), Ɛmɛnyi wa Jehowa wekɔ lo mbelɛ anto la waasaso tshɛ dia ndjosangana la wɔ kâmɛ dia mpokamɛ wetshelo w’oma lo Bible. (Eny. 22:17) Ɔsɔ ekɔ dikambo di’ohomba efula l’atei w’ɔtɛmwɛlɔ wa mɛtɛ.

² Ekɔ ohomba efula mbɔtɔ lo nsanganya: Sho kondjaka ɛtshɔkɔ lam’asanganaso l’etshumanelo. Wɔtwɛlɔ wa nsanganya ndekaka ntekesanyiya la Jehowa, Nzambi kaso ka mamba. L’atei w’etshumanelo, sho sanganaka dia ‘mbetshama oma le Jehowa.’ (Is. 54:13) Ɔlɔngɔswamelo ande wekɔ l’ekongelo katatetemala ka wetshelo w’oma lo Bible watokotola efula oya le nde ndo watokimanyiya dimɛna dia kamba l’‘alako tshɛ waki Nzambi.’ (Etsha 20:27; Luka 12:42) Nsanganya mbetshaka onto woho wa monga la diewo dia mbetsha Ɔtɛkɛta waki Nzambi. Waohwelo w’oma l’atei w’Afundelo tokimanyiyaka dia sho monga la diokanelo di’oshika lam’asaso shamɛ, lam’asaso l’anto akina ndo lam’asaso la Jehowa ndamɛ. Osanganelo wa l’anto woka Nzambi ngandji keketshaka mbetawɔ kaso.​—⁠Romo 1:​11, 12.

³ Eeta onto mbala kakɔ ɔtɔi: Oma ko wekelo wa ntondo, elɛɛ ombeki tshɛ wa Bible oya lo nsanganya. Lomialomia nsaki kande lo mbêwoya dikambo dimɔtshi diakakokeketsha lo losanganya lakete ndo lo mbɛnya dui dimɔtshi diayɔtɛkɛtama lo losanganya layaye. Kɔndɔlɛnde kɛnɛ keta lo Mbalasa ka Diolelo, ndo yashikikɛ dia nde ayokoka koma lawɔ aha l’okakatanu.

⁴ Naka polo nd’ɛlɔ nde atɔtɔka lo losanganya, kete tetemala la mbêtaka. Ɔsaka minitɛ ngana lomingu tshɛ dia mbɛnya woho ɔnɛ wakɛndakɛnda ɔlɔngɔswamelo aso. Kamba la biukubuku Wambosangana dia Sala Lolango la Nzambi ndo bandɛ video Les Témoins de Jéhovah ​—⁠ Un nom, une organisation dia mbêkesanyiya la so ndo la nsanganya yaso. Kotshɔke ndo l’apandjudi akina di’ombeki wa Bible mbekesanɛ la wɔ. Lo dɔmbɛlɔ, sha Jehowa losaka dikambo di’ɔlɔngɔswamelo ande ndo tɛkɛtaka dia kɛnɛ kahombama di’ombeki mbɔtɔ lɔkɔ.

⁵ Tengengake dia kimanyiya eyoyo ɛnɛ wayasha dia vɔ sanganaka la so. Lam’atafule lowando lawɔ otsha le Jehowa, mbayowotshutshuyama dia kamba la kɛnɛ kekawɔ ndo ndjala atɔi amɔtshi wa l’atei w’ɔlɔngɔswamelo waki Nzambi wele kâmɛ.​—⁠1 Kor. 14:⁠25.