Wokelo wa Mbalasa ya Diolelo lo Wedja Efula Lo Wedja Ɛmɔtshi wa l’Erɔpɛ
1 Lo ɛnɔnyi akumi wêke kambeta ɛnɛ olimu w’Ɛmɛnyi wa Jehowa wakasekɛma lo wedja efula wa l’Erɔpɛ, mbidja ndo wedja wa l’Erɔpɛ wa lo Ɛstɛ. Mbala efula, anangɛso wakahɛnyahɛnyama wolo efula oma l’oshimbelo w’olimu ɔsɔ. Aki wolo dia sala nsanganya lo sɛkɛ, ndo dia kondja Mbalasa ya Diolelo ya sala nsanganya yakɔ aki dikambo dia wolo wa mamba. Koko, l’ɛnɔnyi wetshi ɛnɛ, “[Jehowa] akatutshela akambu a waki; diako mbangenangenasu.”—Osam. 126:3.
2 L’etatelo k’ɔnɔnyi 1983, wanɛ wakahɛnyahɛnyaka Ɛmɛnyi wa Jehowa wakatatɛ kitshakitsha dihɛnyɔdi. Lo 1989, lɛɛta la lo wodja wa Pologne la Hongrie aketawɔ olimu w’Ɛmɛnyi wa Jehowa. Lo 1991, lɛɛta la lo wodja wa Russie aketawɔ olimu w’Ɛmɛnyi wa Jehowa. Tatɛ oma l’etena kɛsɔ, olimu wambohama woho w’anyanya la Russie ndo lo wedja waki ntondo l’olui wa Ex-Union soviétique. L’asa Ngɔndɔ ka Sato 1996 la Ngɔndɔ ka Dikumi 1998, Olui-Walɔmbɔla aketawɔ dia sɔndja biro ya filialɛ yalɔmbɔla wedja 11 wa l’Erɔpɛ falanga ya mbikisha Mbalasa ya Diolelo 359.
3 Etena kendanyu alɛdi wele lo dikatshi di’okotsha nɛ, nyokane yimba l’akambo wa diambo wasala Jehowa lo wahɔ w’ekambi ande. (Osam. 136:4) Nyayɔngɛnangɛna dia mɛna okambelo wa dimɛna wakambema la weshasha wakimɔ anangɛso wa l’andja w’otondo, lo kotsha ɛtɛkɛta wakate Yeso wele lo Joani 13:35 wata ɔnɛ: “Uma lu dikambu ne, antu tshe wayeya vati: ambeki ami mbenyu, naka nyu nyayukana ngandji.”
4 L’atei wa wedja wa l’Erɔpɛ wambokondja wahɔ oma l’ekongelo ka wokelo wa Mbalasa ya Diolelo lo wedja wele bu l’ekondjelo k’efula mbatanema ndo wodja wa Roumanie, lɛnɛ ambokishama Mbalasa ya Diolelo 36 tatɛ Ngɔndɔ k’Esambele 2000. Lo kamba l’ekongelo kâmɛ ka wokelo wa Mbalasa ya Diolelo suke la tshɛ, wakakisha Mbalasa ya Diolelo 61 lo wodja wa Ukraine l’ɔnɔnyi 2001, ndo 76 l’ɔnɔnyi 2002. Oma l’ekimanyielo ka Falanga ya Mbalasa ya Diolelo, nkama ya Mbalasa ya Diolelo yambokama la Bulgarie, Croatie, Macédoine, Moldavie, Monténégro Russie, ndo Serbie.
5 Mbikisha Mbalasa ya Diolelo lo wedja ɛmɔtshi bu dikambo dia wɔdu, ndo la ntondo ka tatɛ wokelo ayɔ pombaka mbidja welo efula. Mbala efula ɔlɔngɔswɛlɔ wa diangɔ dia wokelo wa Mbalasa mbɔsaka wenya efula. Oma lâsɔ nto, wokelo wa Mbalasa ya Diolelo lo lɛkɛ la l’Erɔpɛ lɔsɔ nɔmbaka falanga efula oleki l’ahole efula wa l’Afrikɛ kana l’Amérique du Sud. Koko, l’ɔtɛ w’ohamelo wa lofulo l’atɛmɔdi wa Jehowa, ohomba wa nkama ya Mbalasa ya Diolelo wekekɔ lo wedja wa l’Erɔpɛ wele kema l’ekimanyielo k’efula ɛsɔ!
6 Tekɔ mɛtɛ l’ɔngɛnɔngɛnɔ efula dia mɛna woho watahame wokelo wa mbalasa ya Diolelo ɔsɔ! Akambo efula wakete wakɛnya di’aki esambishelo ka mamba le anto wele suke l’ahole wakakama Mbalasa ya Diolelo shɔ. L’ahole amɔtshi, ewandji wa ngelo waki la diambo dia mamba lo menda woho wakayelaka ambiki wa Mbalasa ya Diolelo shɔ ɛlɛmbɛ wendana la wokelo wa mvudu.
7 Isaya akatɛkɛta dimɛna lo kɛnɛ kendana l’ohamelo w’ɔtɛmwɛlɔ wa mɛtɛ. Nzambi akate lo tshimbo y’omvutshi ɔsɔ ate: “Dimi, [Jehowa], layusamanya dikambu ne l’etena kadio.” (Is. 60:22) Lo mɛtɛ, ɛnɔnyi dikumi wetshi ɛnɛ akɛnama di’aki etena kakahamia Jehowa olimu l’Erɔpɛ wa l’Ɛstɛ. Tekɔ lo nɔmba Jehowa dia nde nyomoleka tshɔkɔla welo wadjaso dia kɛndjakɛndja esadi esadi olimu wa wokelo wa Mbalasa ya Diolelo lo wedja efula lo tokimanyiya dia sho nyomoleka sukɛ ekongelo ka Falanga ya Mbalasa ya Diolelo! Kɛsɔ ayokimanyiya dia Mbalasa ya Diolelo efula mbikama lo wedja wele bu l’ekondjelo k’efula. Dikambo sɔ diayokimanyiya di’ohamelo w’ɔtɛmwɛlɔ wa mɛtɛ salema lo wedja efula wa l’Erɔpɛ ndo esambishelo ka mamba kayoshama polo ‘lo tokoma ta nkɛtɛ.’—Etsha 13:47.
[Esato wa lo lɛkɛ 3]
Mbalasa ya Diolelo yokakatanyi Moscou, Russie
[Esato wa lo lɛkɛ 4]
Mbalasa ya Diolelo y’Eyoyo l’Erɔpɛ wa lo Ɛstɛ
Strumica, Macédoine
Daruvar, Croatie
Bitola, Macédoine
Sokal, lo distrikɛ dia Lviv lo Ukraine
Sofia, Bulgarie
Krasnooktyabrskiy, Maykop Area, Russie
Bački Petrovac, Serbie ndo Monténégro
Plovdiv, Bulgarie
Tlumach, Ivano-Frankivsk District, Ukraine
Rava-Ruska, Lviv District, Ukraine
Stara Pazova, Serbie ndo Monténégro
Zenica, Bosnie- Herzégovine
Sokal, Distrikɛ dia Lviv lo Ukraine
Zhydachiv Distrikɛ dia Lviv lo Ukraine.