Ngande Wahombaso Sambisha Ewotɔ Aso?

1. Lande na kele shɛnɔdi ekɔ ohomba lam’asambishaso ewotɔ aso?

¹ Ande ɔngɛnɔngɛnɔ wayoyala laso dia mbɔtɔ l’andja w’oyoyo kâmɛ l’ewotɔ aso wokaso ngandji, tosanganyi kâmɛ l’ɔtɛmwɛlɔ wa Jehowa lee! Lo sambisha ewotɔ aso, vɔ kokaka ndjeka woho wa tɛmɔla Jehowa ndo monga l’elongamelo ka ndjɔsɛna l’andja w’oyoyo. Koko dia mbasambisha lo yoho yakeketsha, paka sho monga la shɛnɔdi. Omendji ɔmɔtshi w’otshimbedi akalembetshiya ɔnɛ: “Wanɛ wemula nsaki kele l’ewotɔ awɔ ka mbeya akambo kondjaka etombelo woleki amɛna lo sawolaka la wɔ lo tshena pe dikambo dia awui wayashawɔ lɔkɔ.” Ngande wakokaso sala dui sɔ?

2. Ngande wele woho wayashaso le ewotɔ aso l’otema ɔtɔi ayotokimanyiya dia sho memula mposa kawɔ ka mbeya akambo efula?

² Emula Mposa Kawɔ ka Mbeya Akambo Efula: Tâkanyiyisha dimɛna la ntondo woho wakokayɛ nomialomia nsaki k’ewotɔ ayɛ. (Tuk. 15:28) Awui akɔna wayakiyanyawɔ? Ekakatanu akɔna wele lawɔ? Ondo wɛ mbeyaka mbaɛnya sawo dimɔtshi kana tɛkɛta divɛsa dia dimɛna efula dia lo sawo dimɔtshi diayokotola yambalo yawɔ lo yoho ya lânde. Naka ewotɔ ayɛ hawodjashi suke la yɛ, kete ondo wɛ koka sala dui sɔ lo mbâsambisha lo mikanda kana lo telefɔnɛ. Aha la wɛ sawola lawɔ awui wamboleka, onɛ ntɔngɔ y’akambo wa mɛtɛ ndo lɔmba Jehowa dia nde mbodia ntɔngɔ yakɔ.​—⁠1 Kor. 3:⁠6.

3. Ngande wakoka woho wayasha ewotɔ aso le so todiholɛ mboka dia sho mbâsambisha?

³ Yeso akadjangɛ pami kɛmɔtshi kakinde oma la tondja ɛdiɛngɛ efula ɔnɛ: “Utshu lakaye, le engenyi aye. Utâsanyia akambu a waki wukutshedi [Nzambi], la ketshi kakandakuki.” (Mako 5:19) Ohokanyiya woho wakahombe monga dikambo sɔ la shɛngiya le ewotɔ waki pami kɛsɔ! Kânga mbele ondo dikambo sɔ diatakokomɛka, mbeyaka monga ko ewotɔ ayɛ ndjashaka l’elimu ayɛ kana w’anayɛ. Tɛkɛta dia sawo dimɔ diakayasha lo Kalasa k’Olimu wa Teokrasi, kana dia losanganya lɔmɔ lakayɔtɔ, kana woho wakayatshu dia tenda Bɛtɛlɛ ndo dia dikambo dimɔtshi dia woke diakakokomɛ kokaka kosha diaaso dia wɛ sawola la wɔ dikambo dimɔtshi diendana la Jehowa ndo la ɔlɔngɔswamelo ande.

4. Tolonga takɔna tahombaso mbewɔ lam’asambishaso ewotɔ aso?

⁴ Onga la Shɛnɔdi: Lam’asambishaso ewotɔ aso, tewɔ dia mbasambisha awui efula mbala kakɔ ɔtɔi. Lam’ohɔnde etena kɛnɛ kakandatatɛ mbeka Bible, ɔnangɛsɔ ɔmɔtshi aketawɔ ate: “L’edja ka wenya efula, lakalembetshiyaka mama awui woho w’anyanya suke la kɛnɛ tshɛ kakamekaka oma lo Bible, dikambo sɔ diakakonyaka lo londjo mbala efula, djekoleko dimi la papa.” Oyadi owotɔ aso ambɛnya wahɔ lo losango l’oma lo Bible, shande ekadimwelo lo yoho yayowotshika la nsaki ka nde nyomeya akambo efula. (Tuk. 25:⁠7) Mbala tshɛ shakawɔ dilɛmiɛlɔ, onga la loshilambo ndo la solo dia lotutsha, oko watoyosalaka etena katɛkɛtayɛ l’anto wahayeye l’esambishelo.​—⁠Kol. 4:⁠6.

5. Kakɔna kahombaso sala naka ewotɔ aso hawetawe losango leso lo mbâsambisha?

⁵ Etena kɛmɔtshi ewotɔ waki Yeso wakafɔnya ɔnɛ nde ambodjɔ dadi. (Mako 3:21) Koko, l’ɔkɔngɔ diko, amɔtshi wakayokomaka ambetawudi. (Etsha 1:14) Naka wɛ kokondja etombelo w’ɔlɔlɔ lo welo wakayadje mbala ka ntondo dia sambisha ewotɔ ayɛ, kete tohekɔke. Akambo ndo dionga diawɔ kokaka ndjotshikitana. Tetemala la nyanga diaaso dikina dia mbâsambisha dui dimɔtshi diakoka memula mposa kawɔ ka mbeya awui efula. Wɛ mbeyaka ndjonga l’ɔngɛnɔngɛnɔ wa mbâkimanyiya dia vɔ tatɛ mbɔtɔ lo mboka katɔla otsha lo lɔsɛnɔ la pondjo. ​—⁠Mat. 7:​13, 14.