Tokimanyiya akina dia ‘kitanyiya la otema ɔtɔi’
1. Kakɔna kalɔmba Jehowa atɛmɔdi ande?
1 Dia tɛmɔla Jehowa lo yoho yetawɔnde, okitanyiya ekɔ dui dia ohomba efula. (Euh. 12:28; 1 Pet. 1:14-16) Kema edja, Nzambi ayolanya “wane waheyi [Nzambi], la wahakitanyia lukumu l’ololo.” (2 Tes. 1:8) Ngande wakokaso kimanyiya akina dia ‘kitanyiya la otema ɔtɔi’ wetshelo wa lo Ɔtɛkɛta wa Nzambi?—Romo 6:17.
2. Lande na ekɔ ohomba kimanyiya akina dia monga la mbetawɔ ka nge?
2 Lo mbakimanyiya dia keketsha mbetawɔ ndo ngandji kawɔ: Lo Afundelo, okitanyiya kakatanyema efula la mbetawɔ. Ɔpɔstɔlɔ Paulo akatɛkɛta dikambo dia ‘didjango dia Nzambi ka pondjo, dia kimanyiya anto dia monga la okitanyiya wa mbetawɔ.’ (Romo 16:26) Heberu tshapita 11 shilaka bɛnyɛlɔ efula dia mbetawɔ diele efula l’atei adiɔ diakendanaka la sala akambo lo yoho yɔtɔnɛ la lolango laki Nzambi lakashɔma. (Heb. 11:7, 8, 17) Lo wedi okina, ohindodi kakatanyema la ohombelo wa mbetawɔ. (Joa. 3:36; Heb. 3:18, 19) Sho pombaka monga la akoka wahombama dia kamba la Ɔtɛkɛta wa Nzambi dia kimanyiya akina dia monga la woho wa mbetawɔ kakimanyiya onto dia monga la okitanyiya.—2 Tim. 2:15; Jak. 2:14, 17.
3. a) Ngande wokakatanyemi okitanyiya la ngandji? b) Ngande wakokaso kimanyiya ambeki wa Bible dia monga la ngandji otsha le Jehowa?
3 Okitanyiya kakatanyema nto la ngandji kele la onto otsha le Nzambi. (Euh. 5:10; 11:1, 22; 30:16) 1 Joani 5:3 mbutaka ɔnɛ: “Ngandji ka [Nzambi] kene, dia shu nama elembe andi: ku elembe andi hawuleki wutshu.” Ngande wakokaso kimanyiya ambeki wa Bible dia mboka Jehowa ngandji? Lo wonya wa wekelo, yanga waaso wa keketsha lowando lande lo waonga waki Jehowa. Ɛnya wɛmamɛ lowando l’efula lele layɛ otsha le Nzambi. Kimanyiya ombeki dia kanyiya woho wakokande monga la diɔtɔnganelo dia onto ndâmɛ la Jehowa. Ntondotondo, ngandji kokaso Jehowa kayokeketsha anto akina ndo kayotokeketsha shoamɛ dia kitanyiya la otema ɔtɔi.—Mat. 22:37.
4. a) Lande na kele ɛnyɛlɔ kaso kekɔ ohomba? b) Ahombaso sala dia monga la ‘otema w’okitanyiya’?
4 Oma lo ɛnyɛlɔ kaso: Yoho ya dimɛna efula yakokaso keketsha akina dia kitanyiya lokumu l’ɔlɔlɔ ele oma lo ɛnyɛlɔ kaso. Diɔ diakɔ diele, sho pombaka tetemala mbidja welo dia monga la ‘otema w’okitanyiya.’ (1 Khum. 3:9; Tuk. 4:23) Kakɔna kalɔmba dui sɔ? Diɔ nɔmbaka dia ndodjaka otema aso la mbo ya ndɛ ya lo nyuma oma l’ekimanyielo ka wekelo wa Bible wa mbala la mbala ndo wɔtwɛlɔ wa nsanganya. (Osam. 1:1, 2; Heb. 10:24, 25) Yanga dia mbekesanɛ la anto wele etema awɔ wekɔ kâmɛ la ɔtɛmwɛlɔ wa pudipudi. (Tuk. 13:20) Sambishaka mbala la mbala la nsaki ka mɛtɛ ka kimanyiya anto wa lo ɛtshi kayɛ ka nkɛtɛ. Tɔlɔmbɛ Jehowa dia nde tokimanyiya dia sho monga la otema w’ɔlɔlɔ. (Osam. 86:11) Ewɔ awui wakoka ndanya otema ayɛ, ɛnyɛlɔ, tɔkɛnyɔ ta mindo kana ta ngala. Wesa awui waleka kosukanya la Nzambi ndo wakeketsha diɔtɔnganelo diasayɛ la nde.—Jak. 4:7, 8.
5. Ngande watshɔkwama anto wele la okitanyiya?
5 Jehowa akashikikɛ ekambi ande wa lo nshi y’edjedja dia wayokondja ɛtshɔkɔ, naka vɔ mpokamɛ dui diande. (Euh. 28:1, 2) Popo ndo ɛlɔ kɛnɛ, Jehowa tshɔkɔlaka efula ‘wanɛ wôkitanyiya oko wende owandji.’ (Etsha 5:32) Ɔnkɔnɛ, oma lo wetshelo ndo ɛnyɛlɔ kaso, nyɛsɔ tokimanyiya anto akina dia kitanyiya la otema ɔtɔi.