Toyasha le anto akina:—Lo ndjalɔngɔsɔlaka
1 Ndjalɔngɔsɔla dimɛna di’olimu aso tokimanyiyaka dia ndjasha le anto akina. Lo woho akɔna? Naka takayalɔngɔsɔdi dimɛna, kete yimba yaso tshɛ hayotodjama lo kɛnɛ kahombaso tɛkɛta, ndo kɛsɔ koka tokonya dia ndjasha efula le ompokami aso. Lâdikɔ dia lâsɔ, ndjalɔngɔsɔla dimɛna tokimanyiyaka dia minya wɔma ndo dia tɛkɛta la otema ɔtɔi. Ko ngande wakokaso nɔngɔsɔla mbɔtwɛlɔ ka dimɛna na?
2 Tokambe la mbɔtwɛlɔ kakoka: Sɔtɔla mbɔtwɛlɔ kɛmɔtshi k’oma lo Olimu aso wa Diolelo wa Ngɔndɔ ka ntondo 2006 kakoka lo ngelo kanyu, ndo sɛdingola woho wakokayɛ kita l’ɛtɛkɛta ayɛ hita. Ɔtɔnganyiyatɔ la awui wa lo ɛtshi kanyu ka nkɛtɛ. Ɛnyɛlɔ, naka wɛ pomanaka mbala la mbala l’anto wele lo ɛtɛmwɛlɔ ekina kana woye oma lo ahole wotshikitanyi, kete kanyiya woho wakoka mbɔtwɛlɔ kayɛ kotola yambalo yawɔ. Mbɔtɔnganyiya sawo diayɛ l’anto wasawola la yɛ ayɛnya woho wayashayɛ le wɔ l’otema ɔtɔi.—1 Kor. 9:22.
3 Etena katatɛyɛ kamba la mbɔtwɛlɔ kɛmɔtshi, tetemala la kikonya dimɛna. Lam’ele ɛtɛkɛta wa tatelo wekɔ ohomba efula, djaka yimba lo shɛngiya yele la mbɔtwɛlɔ kayɛ le anto. Onde sawo sɔ mendanaka la wɔ? Onde vɔ wekɔ lo kadimola ambola wambolayɛ? Naka kema, kete tshikitanyaka mbɔtwɛlɔ yayɛ polo l’etena kayoyotana kɛnɛ kele dimɛna.
4 Ekimanyielo dia mbohɔ: Anto efula tongaka l’okakatanu dia mbohɔ mbɔtwɛlɔ kawɔ etena kewɔ la ntondo k’ompokami. Naka dui sɔ kokomɛka, onde wɛ ambohembaka vusola mbɔtwɛlɔ kayɛ la dui dia wolo la ntondo k’onto okina? Dui sɔ koka kokimanyiya dia wɛ monga la tokanyi ta hwe lo yimba ndo mbewoya tokanyi takɔ lo yoho ya wɔdu ndo ya dimɛna. Kɛsɔ koka kokimanyiya nto dia wɛ kandola akambo wotshikitanyi wakoka tondja anto wasambishayɛ.
5 Dui dikina diakoka tokimanyiya diaha mbohɛ mbɔtwɛlɔ ele kifunda lo tshena pe lo dikatshi ndo mboka sso lɔkɔ la ntondo ka koma lale onto. Amɔtshi mɛnaka dia wohwelo ɔsɔ wa lo tshena pe mbakimanyiyaka diaha monga la wɔma ndo monga l’akoka wa tɛkɛta dimɛna l’anto. Lo toho tɔsɔ, ndjalɔngɔsɔla dimɛna koka tokimanyiya dia sho mɛnya anto ɔnɛ sho ndjashaka le wɔ ndo kɛsɔ ndowanyaka dimɛna mbɔtwɛlɔ yaso ya lokumu l’ɔlɔlɔ.