Naa yoho y’osakelo yoleki dimɛna?

Dr. Michael Rose lele dɔkɔtɛlɛ dienda olimu ndo diendana l’awui wa tɛdi k’oshishi akate ate: “Ɔkɔnyi tshɛ wasalawɔ epaso aha la mbokaloya dikila ekɔ lo nongola yoho y’osakelo yoleki dimɛna.” Esakelo akɔna ndo toho t’ekambelo tahawakambe la dikila takɔna takoka mbɔtɔ lo ‘esakelo kaha la kaloya dikila’? Ekɔ ohomba wɛ mbeya dikambo sɔ dia wɛ mbɔsa tɛdikɔ tendana l’awui wa osakelo ndo epaso. Enda bandɛ vidɛo kele l’ɔtɛ a dui ɔnɛ: Pas de sang : la médecine relève le défi. Oma lâsɔ, hemba ewo kayɛ l’ekimanyielo ka ambola wayela anɛ.​— Diewoyelo: Lam’ele lo bandɛ vidɛo kɛnɛ vɔ mɛnya lo tshena pe weho ɛmɔtshi wasalema epaso, ambutshi pombaka monga la yewo etena kendawɔ vidɛo kɛnɛ la anawɔ wa totshitshɛ.

1) Naa ɔkɔkɔ woleki woke watona Ɛmɛnyi wa Jehowa kaloya dikila? 2) Lo kɛnɛ kendana l’osakelo, kakɔna kakombola Ɛmɛnyi wa Jehowa? 3) Lotshungɔ lakɔna lele la ɛkɔnyi? 4) Bonde kele sɔna weho ekina w’esakelo wahawakambe la dikila mɛnyaka dia tekɔ l’ekanelo k’ɔlɔlɔ? 5) Naka ɔkɔnyi amboshisha dikila efula, naa akambo ahende wahomba dɔkɔtɛlɛ sala aha la tshimbatshimba? 6) Naa atɔndɔ anɛi wendana la esakelo ekina wahawakambe la dikila? 7) Ngande wakoka adɔkɔtɛlɛ a) kitshakitsha oshishelo wa dikila, b) kokɛ globules rouges, c) kimanyiya dia dikila mbotôtɔ lo demba, ndo d) sala dia dikila dioshishwe kalola? 8) Kɔndɔla woho wasalema osakelo welɛwɔ a) ɔlɛlwɛlɔ wa dikila (hémodilution) ndo b) okotolelo wa dikila diakɛla lo mpota. 9) Awui akɔna wahombayɛ kombola dia mbeya lo kɛnɛ kendana la weho w’esakelo ekina wahawakambe la dikila? 10) Onde epaso wa wolo kokaka salema aha la kaloya onto dikila? 11) Ohamelo akɔna wa dimɛna watasalema laka aseka enganga?

Mbetawɔ esakelo ɛmɔtshi wɛnyishawɔ lo vidɛo kɛnɛ ekɔ yɛdikɔ yahomba onto ndamɛ mbɔsa lo ndjela nkum’otema kande kambetshama oma lo Bible. Onde wɛ amboshila sɔna toho ta esakelo tahawakambe la dikila tayoyetawɔ dikambo diayɛ ndo dia anayɛ? Ase nkumbo kayɛ wele kema Ɛmɛnyi wa Jehowa pombaka mbeya dimɛna tɛdikɔ tayɛ ndo ɛkɔkɔ wakotshutshuya dia sala dui sɔ.​—Enda “Ambola w’oma le ambadi” wele lo Tshoto y’Etangelo ya Ngɔndɔ ka samalo 15, 2004, lo Falase ndo Tshoto y’Etangelo ya Ngɔndɔ ka dikumi l’ɔtɔi 1, 2000.