Anto tshɛ kokaka mbisha lonya l’olimu wa mbetɛ anto ambeki w’eyoyo
1 Dia kondja ombeki w’oyoyo aha paka la welo w’onto ɔtɔi oto. Jehowa koka kamba la anto tshɛ wele “ekambi kame” la nde dia kimanyiya ambeki wa Bible dia vɔ pama lo nyuma. (1 Kor. 3:6-9) Sho kimanyiyaka eyoyo l’onto ndo l’onto aha oma lo kɔmatɛrɛ yaso y’oma k’ɛse otema tsho koko ndo oma lo lɔkɛwɔ laso l’ɔlɔlɔ lele tshondo ya djembetelo yɛnya dia nyuma ka Nzambi kekɔ lo kamba olimu lo nsɛnɔ yaso. (Joa. 13:35; Ngal. 5:22, 23; Ef. 4:22, 23) Akokaso sala nto dia kimanyiya eyoyo?
2 Oko etshumanelo: Onto tshɛ la l’atei aso kokaka ndjasha le wanɛ weke ka tatɛ mbɔtɔ lo nsanganya lo mbashaka mɔyɔ la wangasanu tshɛ ndo lo sawolaka la wɔ yema la ntondo ndo l’ɔkɔngɔ wa losanganya. L’ɔkɔngɔ wa nde kana yimba lo kɛnɛ kakandɛnyi mbala ka ntondo kakandatshu l’etshumanelo, pami kɛmɔtshi akate ate: “L’atei w’anto wakimi kombeyaka kânga yema asɔ, lakahomana la anto waki la ngandji ka shikaa woho wahamatɛnaka ndoko lushi l’atei wa Ɔtɛmwɛlɔ wakamodiama. Akɛnama hwe dia lamboshola akambo wa mɛtɛ.” Ngɔndɔ esambele l’ɔkɔngɔ wa nde mbɔtɔ lo losanganya mbala ka ntondo, nde akabatizama.
3 Towândolake etena katandahame lo nyuma. Onde ombeki ɔmɔtshi wa Bible ekɔ lo mbikikɛ ɔlɔshamelo? Onde nde ekɔ lo mbɔtɔ lo nsanganya mbala la mbala? Onde nde akakondja dihonga dia mbisha kɔmatɛrɛ? Onde nde ambofundja lokombo lo Kalasa k’olimu wa teokrasi kana ambotatɛ sambisha? Towândole lo ehamelo wambondosala. Kɛsɔ ayowokeketsha.—Tuk. 25:11.
4 Oko onto leka la nde Bible: Apandjudi amɔtshi wakakimanyiya ambeki awɔ wa Bible dia vɔ mbekesanɛ la anto wa lo etshumanelo lo nɔmbaka apandjudi wele la lɔkɛwɔ l’ɔlɔlɔ dia mbatshindɛ dia teka la wɔ. Totshimbatshimbake dia mbelɛ ombeki oya lo nsanganya ya lo etshumanelo. Etena katatɛnde mbɔtɔ lo nsanganya, eyanyande la anto akina. Onde nde ekɔ lo ndɔsha dia tshika mbekelo kɛmɔtshi ka kɔlɔ, ɛnyɛlɔ oko nnɔ mfɔka? Onde onto ɔmɔtshi la lakawɔ mboshimbaka dia mbeka? Nde koka kondja wahɔ lo sawola la opandjudi ɔmɔtshi wakahomana la okakatanu wa woho akɔ ko akotondoya.—1 Pet. 5:9.
5 Eyoyo wekɔ l’ohomba wa osukɔ wa lo nyuma oma le etshumanelo. Anto tshɛ koka mbakimanyiya dia vɔ pama lo ndjashaka l’otema ɔtɔi le wɔ l’onto ndo l’onto.