Onde sho sukɛka Ɔtɛkɛta wa Nzambi?
1 Lo andja ɔnɛ wele mbala efula anto mɔnyɔlaka Bible, Akristo wa mɛtɛ sukɛka Ɔtɛkɛta wa Nzambi la wolo tshɛ. Oko wetawɔso dia ‘Afundelo tshɛ wakasambiyama oma le Nzambi,’ sho suyaka Yeso Kristo lakate lo dɔmbɛlɔ diande dimɔtshi le Jehowa ɔnɛ: ‘Ɔtɛkɛta ayɛ wekɔ mɛtɛ.’ (2 Tim. 3:16; Joa. 17:17) Ngande wakokaso sukɛ Ɔtɛkɛta wa Nzambi?
2 Teke Afundelo: Aha la tâmu, Yeso akeke Ɔtɛkɛta wa Nzambi la etete tshɛ. Dui sɔ diakokimanyiya dia nde mbetshaka anto lo kamba la Afundelo lo edja tshɛ kakandakambe olimu ande w’esambishelo. (Luka 4:16-21; 24:44-46) Ngande wakokaso kimɛ avɛsa efula lo yimba? Sho kokaka kimɛ avɛsa efula lo yimba lo mbadiaka Bible lushi la lushi ndo oma lâsɔ kanaka yimba la avɛsa wɛnaso dia wayoleka tokeketsha ndo wekɔ ohomba l’esambishelo. Etena kalɔngɔsɔlaso nsanganya, sho pombaka nyangaka ndo mbadiaka avɛsa woshilami mbala kakɔ ɔtɔi oma lo Bible ndo ondo nɔngɔsɔla kɔmatɛrɛ yendana la avɛsa akɔ. Etena kɔtɔso lo nsanganya, sho pombaka ndjelaka wadielo w’avɛsa lo Bible yaso etena kadia ɔtɛkɛtshi avɛsa. Mbeya avɛsa wa lo Bible ayotokimanyiya dia sho ‘nembetshiya ɔtɛkɛta w’akambo wa mɛtɛ dimɛna.’—2 Tim. 2:15.
3 Totshike Bible katɛkɛtɛ: Etena keso l’esambishelo, sho pombaka tshika dia Bible tɔamɛ tɛkɛta. Ɛnyɛlɔ, naka kokaka, kete sho pombaka pemba mbadia divɛsa ɔtɔi ndo kɛtshanya kâmɛ la ompokami aso. Naka nde amboka dimbola, kana ambodja wekamu ɔmɔtshi, kete ayoleka dimɛna sho kamba la Bible dia mbokadimola. Naka ompokami aso ekɔ la olimu, kete sho mbeyaka kotola yambalo yande oya lo kanyi mɔtshi y’oma lo Bible lo mbuta ɔnɛ: “La ntondo ka dimi kotshika, dimi nangaka kadiɛ divɛsa ɔtɔi nɛ.” Naka kokaka, kete adia divɛsa diakɔ mbala kakɔ ɔtɔi oma lo Bible ndo kimanyiya ompokami dia nde mɛna divɛsa diakɔ diadayɛ.
4 Etena kakawɛnya ompokami ɔmɔtshi divɛsa dimɔtshi diatona wetshelo wa Losato l’osanto, nde akate la diambo tshɛ ate: “Oma ko mbotwelo kami polo ɛlɔ kɛnɛ dimi tshɔka lo ɔtɛmwɛlɔ, koko dimi kombeyaka mɛtɛ dia Bible mbutaka ngasɔ!” Mbala kakɔ ɔtɔi nde aketawɔ wekelo wa Bible. Yeso akate dia ɛkɔkɔ ande wayohokamɛ dui diande. (Joa. 10:16, 27) Yoho yoleki dimɛna y’anto wele la etema w’ɛlɔlɔ mbetawɔ akambo wa mɛtɛ ele mbaɛna mbala kakɔ ɔtɔi oma lo Afundelo. Nyɛsɔ tosukɛke Ɔtɛkɛta wa Nzambi w’akambo wa mɛtɛ!