“Nyotshikale lo ngandji ka Nzambi”
1. L’oyango akɔna wakatondjama dibuku ‘Nyotshikale lo ngandji ka Nzambi?’
1 Tekɔ lo nongamɛ la asolo walomɔlomɔ dia mbeka dibuku di’oyoyo ‘Nyotshikale lo ngandji ka Nzambi’ lo Wekelo wa Bible wa l’etshumanelo tatɛ oma lo lomingu la Ngɔndɔ ka hende 23 lo Falase la Kisahidi kana lo etena kayodiotomba lo ɛtɛkɛta ekina watɛkɛtama lo ɛtshi kaso ka nkɛtɛ! Mukanda wakafundɛ Olui-walɔmbɔla anto tshɛ woka Jehowa ngandji komɛka la ɛtɛkɛta ɛnɛ: “Tekɔ lo nongamɛ l’otema ɔtɔi dia dibuku nɛ diayoleka nyokimanyiya dia nyu tetemala kamba l’akambo wa mɛtɛ lo lɔsɛnɔ lanyu la lushi la lushi ndo tshikala ‘lo ngandji ka Nzambi l’elongamelo ka ndjokondja lɔsɛnɔ la pondjo.’—Jude 21.”
2. Lo akambo akɔna wa lo lɔsɛnɔ wayotokimanyiya dibuku di’oyoyo nɛ?
2 Kɛnɛ kalongamɛso: Ngande wendana atɔndɔ wa lo Bible l’akambo anɛ: Lɔngɛnyi, tɔkɛnyɔ, dilɛmiɛlɔ dia lowandji, mbekelo y’onto ndamɛ, diwala, ɛtɛkɛta ndo la mbekelo? Nkum’etema yaso yayekiyama lo yoho yɔtɔnɛ l’ɛlɛmbɛ wosembwe wa lâdiko wele lo Ɔtɛkɛta waki Nzambi. (Osam. 19:7, 8) Naka sho ndeka shihodia yoho ya ekanelo ka yimba kaki Nzambi, kete tayonga la nsaki k’efula ka mbɔ̂ngɛnyangɛnya ndo dui sɔ diayotokimanyiya dia mbôkitanyiya lo akambo tshɛ wa lo lɔsɛnɔ.—Tuk. 27:11; 1 Joa. 5:3.
3. Lande na kahombaso salaka la wolo dia mbishaka kɔmatɛrɛ lo wekelo wa lomingu tshɛ?
3 Toyashikikɛ dia mbishaka kɔmatɛrɛ: Etena kalɔngɔsɔlaso wekelo, toyashikikɛ dia tombola Nzambi kâmɛ la ekambi ande wosanganyi. (Heb. 13:15) Etshumanelo k’otondo kayeka ndo kayɔkɛtshanya dibuku di’oyoyo nɛ kâmɛ. Lam’ele tayɔsɛdingolaka edingɔ engana eto lomingu tshɛ, tayonga l’akoka wa nɔngɔsɔlaka wekelo dimɛna dimɛna l’eshikikelo ɔnɛ tayoshaka kɔmatɛrɛ l’awui wamboteka. Kɔmatɛrɛ yaso yɔlɔngɔsɔmi dimɛna ndo ya lo tshena pe yayotshutshuya anto akina lo ngandji ndo lo elimu w’ɔlɔlɔ ndo yayokimanyiya dia ɔkɛtshanyelo monga dimɛna efula. (Heb. 10:24) Ndo nto, tayonga l’ɔngɛnɔngɛnɔ w’efula etena kayotosalaka wotelo wa lo sɛkɛ wa mbetawɔ kaso.
4. Bonde kahombaso kitanyiyaka wadjango waki Jehowa?
4 L’otsho w’ekomelo wa lɔsɛnɔ lande la lanɛ la nkɛtɛ oko onto, Yeso akate dia ekɔ ohomba kitanyiya wadjango waki Jehowa dia tshikala lo ngandji ka Nzambi. (Joa. 15:10) L’ekimanyielo ka dibuku ‘Ngandji ka Nzambi,’ tayoleka ndjashikikɛ dia kambaka l’atɔndɔ waki Nzambi lo lɔsɛnɔ laso la lushi la lushi ndo dia ‘tshikala lo ngandji ka Nzambi.’—Jude 21.