Olimu wahombaso mbetshaka lo dihole dia ntondo
1. Ngande wakɛnya Yeso dia esambishelo mbaki olimu wakandetshaka lo dihole dia ntondo?
1 Esambishelo mbaki olimu waketshaka Yeso lo dihole dia ntondo. Nde akayashaka tshɛ lɔkɔ ndo akakindjakindjaka wodja wa Palɛstina w’otondo dia nsambisha anto efula lo ndjela akoka ande. Nde aketɛ lɔsɛnɔ lande ɔsɛlɛngɛ dia ndeka ndjasha l’olimu w’esambishelo. (Mat. 8:20) Etena kakahembe elui w’anto mboshimba dia nde ntshikala kâmɛ la wɔ woho wa nde nkɔnɔla anto awɔ waki la hemɔ, Yeso akawatɛ ate: “Dieli la mi dia nsambisha lukumu l’ololo la diulelu dia [Nzambi] ndu lu esumba ekina, ne dia dimi lakatumama dia dikambu diako.”—Luka 4:43.
2. Lande na kaki olimu w’esambishelo ohomba efula le Yeso?
2 Lande na kaki olimu w’esambishelo ohomba efula le Yeso? Kɛnɛ kakalekaka mbokiyanya aki okidiamelo wa lokombo laki Jehowa. (Mat. 6:9) Nde akokaka She ka l’olongo ngandji ndo akayangaka dia nsala lolango lande ndo nkitanyiya oseka didjango diande tshɛ. (Joa. 14:31) Ndo nto, nde akakotshaka ehomba w’anto l’otema ɔtɔi ndo akalangaka dia mbakimanyiya.—Mat. 9:36, 37.
3. Ngande wakokaso mɛnya dia esambishelo mbele olimu wahombaso mbetshaka lo dihole dia ntondo?
3 Tokoya Yeso: Mbetsha olimu w’esambishelo lo dihole dia ntondo l’ɛnyɛlɔ ka Yeso mbeyaka monga tshondo y’okakatanu l’ɔtɛ weso la wenya yema tshitshɛ ndo wambolola andja ɔnɛ l’akambo efula wekola yimba. (Mat. 24:37-39; Luka 21:34) Ɔnkɔnɛ, sho pombaka nshikikɛ akambo woleki ohomba lo nsala ekongelo ka dimɛna dia ndjalɔngɔsɔla woho wa sambishaka mbala la mbala. (Fil. 1:10) Sho pombaka nsala la wolo dia nsɛna lɔsɛnɔ l’ɔsɛlɛngɛ ndo mbewɔ dia ndjasha l’andja ɔnɛ tshɛ lo tshɛ.—1 Kor. 7:31.
4. Lande na kele ekɔ ohomba dia sho mbetsha olimu w’esambishelo lo dihole dia ntondo oma ko kakianɛ?
4 Etena kɛnande dia nde bu la wenya efula, kanga lomba atetshaka akambo woleki ohomba lo dihole dia ntondo. Ɛnyɛlɔ, naka wambowotɛ ɔnɛ ta dimɔtshi diayanga ndɔma, kete nde ayokamba l’etena ndo la wolo ande dia nsala kɛnɛ kahombama woho wa nkokɛ ase nkumbo kande ndo mpɛmɔla asukanyi ande. Nde ayetsha akambo wele bu ohomba lo dihole dia hende. Etena kambototshikalɛ la ntondo ka ta dia Aramangɛdɔna ndɔma kaya mondo. (Zef. 1:14-16; 1 Kor. 7:29) Dia sho ndjashimbɛ ndo shimbɛ wanɛ watohokamɛ, sho pombaka ndjalama ndo nama wetshelo aso, oyadi l’etei kana l’andja w’etshumanelo. (1 Tim. 4:16) Eelo, dia sho shimbamɛ, sho pombaka mbetsha olimu w’esambishelo lo dihole dia ntondo.